top of page
Search
  • Writer's pictureMaulolo Fata U. Malifa

Tala i vaifanua o Sydney NSW 04 Aperila 2021 Samoa History i lona Malo

Updated: Sep 1, 2021

Domestic violence risk linked to income

Na ripotia e le Sydney Morning Herald i lana Lomiga Aso Gafua 30 Mati,e le Tusitala Sinia o le Tamaoaiga,o Shane Wright,le feso’ota’iga vāvālalata o le Sauāga i totonu o Aiga,ma le totogi po’o

le tupe maua a le Tina mai lana galuega.Fa’amatalaina,o le si’itia maualuga o le tupe maua a le Tinā,fa’atusa i le totogi o lona to’alua po’o le Tamā,e tusa lea ma le 35% pasene le fa’aopo’opoga o le sauāina o Tinā ma Tama’ita’i(Domestic Violence)i totonu o Aiga.Ua fa’ailoa mai i Su’esu’ega i totonu lava o Ausetalia,i le faigatā i Ali’i ma Tamā,ona taliaina le avea o le Tinā o se tasi e fa’amoemoe i ai lo lā aiga,ona e sili atu lona totogi ia te ia.Ua fa’avae nei lagona mai Sailiga o le 10 tausaga talu ai,e le Matagaluega Fuainumera ma Fa’amaumauga(Australian Bureau of Statistics)ae foliga mai o lo’o tūtūmau lava e o’o mai i le taimi nei.O le taimi lava e saunoa atua ai

le Tinā,ua si’itia maualuga lona totogi nai lo le Tamā o le Aiga,si’isi’i loa le leotele ma fa’amatalaga ogaoga,e ono a’afia ai lagona loloto o le Tinā,ma i’u ai lava i le sauāina o le Tinā,ma sosolo ane i le fanau.Fa’amautūina mai e le Iunivesite Aoao Ausetalia(Australia National University)i Su’esu’ega a Robert Breunig,o le matua o le tagata,o le aofa’iga o lana tupe maua,fa’apea le atunu’u na soifua ai,aemaise atunu’u tau atia’e e pei o Samoa,e faigofie ona tutupu manatu e tautalagia ai le PULE a le tagata,ona o a tatou Tu ma Aga-i-fanua ma le Aganu’u,e tauala i PULEGA FA’A MATAI.Fa’ailoa fo’i le utiuti o se suiga i le sauāina o Tinā ma Tama’ita’i,fa’apea fanau i totonu o Aiga,e ui ua si’isi’i a’e pea le tupe maua mai totogi o Tinā

ma Tama’ita’i,e galuea’ina ai totonu o Aiga,nai lo augātupulaga sa tūmāoti lava ma fa’amoemoe tele le tausiga o se Aiga i Tamā ma Ali’i.O le Aso Gafua ua mavae atu,na fa’alauiloa ai e le Ali’i

Palemia,Scott Morrison suiga ese’ese i lana Kapeneta,ina ua fa’aulufale ni Faipule tama’ita’i,fa’apea le tofiaina o se Tama’ita’i e avea ma Minisitā mo le Saogalemū o Tina ma Tama’ita’i(Women’s Safety)


Uncertain futures for workers as jobkeeper winds up

E latalata i le miliona tagata faigaluega o lo’o maua le fesoasoani a le Malō,tauala i le tupe totogi fa’aopo’opo(Jobkeeper)o le ā leai ni galuega ina ua fa’amuta lea seleni maua,a’o feagai ma le vaitau o le Fa’ama’i COVID-19.Ua fa’amoemoe le si’itia maualuga o tagata lē

faigaluega(Unemployment)Fa’aalia manino e le Teutupe a le Faiga Malo Maualuga(Federal Govt)Josh Frydenberg i le vaiaso ua mavae,e le masalomia le tele o Pisinisi o le ā faigata ona fa’aauau,i le fa’amuta ai o le Jobkeeper i le vaiaso ua tuana’i,ae le mafai ona savali ese le Faiga Malo Maualuga,ma ona tiute taua’ve o le saunia pea o fesoasoani masani mo Pisinisi,auā le olaola pea o le Tamaoaiga o le atunu’u,aemaise le a’afia tele i le Fa’ama’i.Mai lava i le amataga o lea fa’amoemoe,ua na o se fesoasoani fa’avaitaimi,mo fa’alavelave fa’afuase’i e pei o le COVID-

19.Ta’utino Josh,ua o’o mai le taim i e taofi ai le tu’uina atu o le Jobkeeper,ae fa’amalosia ma u’una’ina tagata e toe fo’i e saili galuega e pei ona masani ai le soifuaga.Ua maitauina,o le ā afaina ai fuafuaga alumamao mo le si’itia maualuga,o le Tamaoaiga olaola o le Ausetalia,pe ā fa’aauau pea lea tupe totogi po’o le JOBKEEPER.Ta’ua e le Failautusi a le Ofisa o Tupe,Steven Kennedy i le fonotaga a le Senate i le vaiaso talu ai,e o’o atu i le 150,000 afe tagata leai ni galuega,ina ua fa’amuta aloa’ia ma taofi le tu’uina atu o lenei tupe a’aopo’opo(JOBKEEPER)talu le amataga o le Fa’ama’i,COVID-19.Fa’aalia e le Ta’ita’i o le Labor-Itū Agai,Anthony Albanese,e 2 miliona tagata Ausetalia ua leai ni galuega i le taimi nei,o lo’o tagi mai ala e fa’ama’ite nisi galuega fou.


PM has finally taken steps to show that he is listening

Fa’amatalaina e le Tusitala Fa’apitoa i Faiga Fa’a Upufai o Malō,po’o le Fa’a Polokiki,David Crowe o le Sydney Morning Herald,i lana Lomiga 30 Mati 2021,ua fa’agasolo suiga fou a le Ali’i

Palemia,Scott Morrison,o sitepu muamua e iloa ai ua fa’alogo i ni fautuaga,aemaise le tele na’uā o le leotetele o le atunu’u,i fa’afitauli o lo’o feagai pea ma Tinā ma Tama’ita’i.Fa’aalia o se suiga fou mo se taimi umi,e tau lavea’ia ai lana Faiga Malō,i le filifiliaina o ni Faipule Tama’ita’i,ia su’ifefiloi ai le fa’atinoga o galuega,aemaise le tu’ualalo ma le faufautua lelei i vaega talafeagai.

O le fefulisa’i fa’ala’au mamafa lā o le fa’atautaiga a le Ali’i Palemia,ua fofola ai,i le maitau a le mamalu lautele Ausetalia,e moni lona naunauta’iga ma lana fa’atinoga,ia saili mae’ae’a se

vaifōfō e togafitia ai le tele o fa’afitauli o lo’o lamatia ai Tinā, Tama’ita’i ma alo Teine.O se amataga lelei,ua i ai ni suiga i le fa’atautaiga o galuega i totonu o le Malō,ae mulimuli ane pasiaina e fai ma Manulautī mo le Lumana’i.O ni fesua’iga iloga ua faia e Scott Morrison,o le si’itia maualuga o Tama’ita’i i Tofiga Minisitā,e aunoa ma se Ali’i.Ua fa’aalia o se faiga e atagia ai le tu’uina atu i Tama’ita’i o le Malosi’aga,e tautatala ai auā ni Soālaupulega,mo ni fa’ai’uga

talafeagai lelei mo le manuia lautele o tagata,ae le o le faia o le fa’ai’uga fa’a Polokiki i taimi uma.Se tasi o vaega iloga i lenei manatu fou o le Ali’i Palemia,ia lava mafaufauga Fa’ale Itūpā o

Tinā,e fafau a’i Aiaiga tonu(POLICIES)e a’afia ai Tinā,Tama’ita’i ma Fanau Teine.Tama’ita’i Minisita i le taimi nei:Karen Andrews-Home Affairs,Anne Ruston-Social Affairs,Jane Hume-Financial Service, Melissa Price-Defense Industry,Marise Payne-Foreign Affairs/Women,ma le Tama’ita’i o Michaelia Cash,ua filifilia nei e avea ma Loia Sili. E 6 suiga fou a le Faiga Malō Maualuga-Federal Government,i le vaiaso ua tuana’i atu,o Tama’ita’i Minisita uma,e pei ona saunoa i ai le Ali’i Palemia o Scott Morrison.


Opal card to expand to Uber

Sosolo atu le malosi’aga o lau Pepa Malaga i Nofoa-afi ma Pasi,po’o le OPAL CARD e totogi ai lou fealua’i i le UBER.E silia i le afe ma afe le mamalu lautele faimalaga i Sini nei,ua fa’aaoga le Pepa Totogi a le Opal,o se faiga fa’ata’ita’i fou a le Setete o Niu Sa Uelese,mo felamalaga’iga,ma atofaina ai ma ni fa’amanuiaga e fa’aiti’itia ai tupe totogi mo faiga malaga,i Uber Taxis ma Uila.Fa’aalia o se taimi muamua i le lalolagi ua fa’aulufale ai lenei faiga fou fa’a pisinisi.E

10,000 i latou e u’umia Pepa Totogi Opal,mo feōa’iga i le Taulaga Fa’atau i Sini,ua atofaina i ai le $3 tala fa’apaū,mo femalaga’iga fa’ale mamalu lautele(public transport)mo se taimi fa’ata’ita’i mo le itulā,ma mata’itū ai pe lelei lea faiga fou mo le Mamalu Lautele femalaga’i.Ua fuafua le Faiga Malō a le Setete Niu Sa Uelese,e fa’alauiloa aloa’ia lenei aiaiga fou i le vaiaso nei,ma le fa’amoemoe e amata lelei i le ogatotonu o le tausaga,masina o Iuni se’ia aulia Tesema 2021.Mo oe le tagata faimalaga,o le ā mafai ona fa’aaogā lau Pepa Totogi Opal Card, e totogi ai le Uber, Lime Bike, Ingogo Taxi,po’o Manly Fast Ferry.Saunoa le Minisita o Fela’ua’iga,Andrew Constance,o lenei taumafaiga fou,ia fa’aiti’itia ai le fa’atumulia o luga o alatele vavave i ta’avale feoa’i.O se tasi o fa’afitauli tuputupu pea,ua to’atele na’uā tagata,ā ua vāapiapi magāala ua le mafai e pasi ona o’o i ai,ua taumafai e fa’aiti’itia le o’o atu o lau ta’avale i le Taulaga,ae fa’aaoga Pasi,Nofoa-afi,ta’avale la’u pasese,uila afi ma uila vili vae.Fa’aalia o se va’aimamao fou a le Pulega o Feala’ua’iga a le Setete,mo le Lumana’i Fa’ata’atia Faimalaga Fa’aonaponei, Future Transport Technology Roadmap.O le lumana’,i lea o lou femalaga’i fa’ale mamalu lautele,i le Taulaga Fa’atau i Sini,aetainane le Setete o Niu Sa Uelese.Fa’amatalaina fo’i le naunauta’iga o le Pulega,i le fa’aulufale o Pasi e ola i le Eletise,mo se taimi lata mai.

O le ā tele aoga o lau Pepa Totogi OPAL CARD.


Offices urged to ditch FaceTime for face-to-face

Ua u’unāina malosi le mamalu galulue fa’aofisa,e toe fo’i atu e nofoia lau kesi ma lou nofoa i lou Ofisa masani.Fa’afitauli tele lenei na mafua ai ona tu’ua Ofisa ma Fale Faigaluega,ae galulue mai i Aiga ma Maota,ina ua tapunia vaega uma o le soifuaga,i le vaitau o le māsausau o le maliliu o tagata i le Fa’ama”i-COVID-19.Silia nei ma le tausaga,taumamao pea i latou galulue fa’a ofisa,mai nofoaga masani sa alausu atu i ai,i le tele o tausaga.Fa’aalia ma le mautinoa

e i latou, e masani i Uiga ma Aga Feso’ota’i Fa’ale Tagata Soifua,e lē taitai ona tutusa le talanoa i le ZOOM po’o le FaceTime,ma le talanoa Fa’afesāga’i po’o le FACE-TO-FACE.E matuā vala lona ese’esega,auā e fa’amalieina lava le tagata soifua,i le vaai atu,ma lou silasila mai e sologalelei ai,o’oo’o le fa’asoa ma i’u ai i se taunu’uga lelei talafeagai,o mataupu ese’ese e autova’a atu ai le

mamalu lautele.Ua faia nei fuafuaga maioio a Matagaluega ese’ese a le Setete,mo aiaiga”Toe fo’i i Galuega”e toe fa’aulufale ana Tagata Faigaluega,mo le galulue i Ofisa pei ona masani ai.Ua

talosagaina malosi le toe o’o atu i Ofisa e galulue ai,ae le o le alofaga ona o le COVID-19.Fa’aalia le alagātatau le toe fa’afo’i lau galue,ia fa’atupula’ia le Tamaoaiga olaola o Ausetalia, fa’apea le

toe tapu’e ma si’itia le ati’ina’e Pisinisi,mo le fananau mai o nisi galuega fou,mo i latou ua vāea ma fa’amalōlō mai galuega,talu le Fa’ama’i.Lapata’iga malosi a le Teutupe Setete,Dominic Perrottet mo tagata faigaluega uma,ua o’o mai le taimi ua tatau ai ona toe fo’i i le Taulaga i Sini mo galuega.Mo i latou e alala i nu’u fa’aitumalō,fa’amolemole ua talafeagai le taliu ane i fale ma ofisa faigaluega.Tatalo fo’i le Ofisa Fa’atonu Sinia o le Taulaga Fa’a Pisinisi Sini,Katherine O’Regan,ua matuā mana’omia le si’itia maualuga o Fefa’ataua’iga fa’a pisinisi i le taimi nei.


Volkman racing to a new level

Si’itia maualuga le tulaga ua ausia e le taleni Lakapi Liki,a se tasi fo’i alo talavou Samoa,Tasesa Matai’a Ronald Volkman,i le faitau i Tusitusiga a Jocelyn Airth o le Daily Telegraph,vaiaso ua mavae.Ua nā o le fa’alua ona ta’alo i le”Jersey Flegg”ae foliga ma,o le ā fa’avave ona la’a atu i le NSW Cup,i se taimi lata mai.O le fa’aopo’opoina pea o tama manunu’a a le Sydney Roosters,ua

manino atili mai o le Numera 7 a le BEARS,le atali’i Samoa o Tasesa Ronald Volkman,e talafeagai tonu ona agava’a ma taleni,na te fa’atumuina lea a le Roosters.Fa’amatalaina e lona faiaoga,Chooks Flegg,a sologalelei ana koleni ma tapenaga i le taimi nei,e le toe fa’atali Trent Robinson,ae fa’aulufale atu i le Au Maualuga a le Roosters Premiers.O lenei alo o le atunu’u sa kapetenia le Au Lalo o le 18-Under 18 a Samoa ile Tausaga 2018.Maitau atu i mafaufauga

ma Tusitusiga a le Au Fa’asalalau i Nusipepa,Leitiō ma Televise e le tatau ona fa’atūai le ta’alo loa o Tasesa Ronald Volkman,i le ofi atu loa i le Roosters Premier 2021.Tasesa Matai’a Ronald Volkman,sa ta’alo mo le First 15 a lana Kolisi o Waverley College,soso’o ai ma lona filifilia i le Au Lalo 18 a le Iuni Lakapi Iuni NSW,tausaga ua mavae 2020.E foliga mai o lo’o taufaoina e le Lakapi Iuni ma le Liki lenei alo talenia o le atunu’u,ae fa’atoā masuigāmalie ane le mugāfālō a le Wallabies a Ausetalia ma Sydney Roosters,po’o ai e telē na Feagaiga Ta’alo mo Joseph Suaali’i.Se taimi lata mai e maimoa ai le Lalolagi,i nei Fetū Pupula Samoa i le fa’aalia o Meaalofa ta’alo mai Le Atua,ua fa’amanuiaina ai o tatou Aiga,Nu’u ma Alaalafaga,Samoa aetainane le Ekalesia.


Ruthless Rennie ringing in the changes

Fa’aalia filifiliga ma’ema’eā a le Faiaoga Ulu a le Wallabies,le Ali’i Rarotonga Maori Niu Sila,Dave Rennie,le amataga o lona 2 tausaga i le Foeuli o le Au Lakapi a Ausetalia.Ua ia fofola lapata’iga i tama ta’aalo uma,e le taulia le umi o avea oe ma Wallabies,e te tumau ma mautinoa ai lou filifilia mo Ta’aloga Fa’avāomalō(Test Matches)mo lenei tausaga 2021,e alagātatau ona si’isi’i pea i luga lau fa’atinoga,i taimi uma e ofu ai le Jersey samasama,ma tamo’e i luga o le malae.Fa’ate’ia le to’atele e malamalama i le Lakapi Iuni a Ausetalia,ina ua tu’ueseina Hookers(Numera 2)e to’atolu na ia fa’aaogāina i le tausaga ua mavae 2020,lavea ma le alo Samoa o Jordan Uelese,i le 40 tama ta’aalo ua filifilia mo ana koleniga,e tapena ai mo Ta’aloga Fa’avāomalō iā Iulai.Fa’aalia e Rennie e tatau ona faia fa’ai’uga toa ma lē fefe,mo le va’ai mamao i le Ipu a le Lalolagi 2023 i Farani.Telē le suiga o lana filifiliga mai le tausaga 2020.Se tasi o filifiliga lototele a Rennie,o le fofola atu i le pou malosi fa’amoemoeina a le Wallabies,le alo Samoa,Scott Sio,e ao ona si’isi’i lana fa’atinoga,e toe ofi atu ai i le laina i luma a Ausetalia.Mo le silafia,o Scott ua fa’aupuina e le Faiaoga a Agentina,o se tasi o Pou(Prop)pito i silisili ona lelei lana ta’alo i le Lalolagi.Talosia le toe fa’afouina o le ta’alo a Scott e pei ona masani mai ai,e fesoasoani iā Ala’alatoa ma Fa’amausili,i le taulaina o le sikalamu a le Wallabies,i ta’aloga fa’avāomalō o lenei tausaga.O alo nei o le atunu’u o lo’o i a’afia i tama ta’aalo e 40 ua filifilia e Dave Rennie i le taimi nei:Allan Ala’alatoa,Pone Fa’amausili,Len Ikitau, Noah Lolesio,Hunter Pa’isami,Jordan Petaia,Pete Samu,Irae Simone ma Matt To’omua.


FAIGA PALOTA SAMOA 2021

Ua api nei le galu,ua fa’atini fo’i foe mo le a’e.O lagona totogo a’e, pe a fa’asolosolo mafaufauga i si o’u Atunu’u Pele Samoa,i lona foafoaina mai le amataga.Le Atunu’u na valoia e tali i Lagi sona

Malō.O le si’i taua o le tasi Itumalō i le isi Itumalō,sailiga o Pulega Fa’atupu ma Ao,ae na lilifa ma ifoifo i le palapala,ina ua Fa’alepa Le Sā o Ioane Viliamu,i le Gataifale o Samoa,ma sunu’i ai Alafale o Le Atua,Matāniu Feagaimaleata,Faleū ma Utuagiagi,fa’apea Malaeola ma Gāfoaga,lea na Ao Malamalama ai Samoa ma ona Tagata.A’o tatou fa’anōnōmanū ma fa’amanatu,le Toetu Manumalō A’ia’i o lo tatou Fa’aola o Iesu Keriso,Le Alo o Le Atua,o le Fa’avae o Samoa ma ona Tagatanu’u,ua fai lea ma fa’ata’imuaga o le Faiga Filifiliga Sa’oloto a Samoa,e ala i lana PALOTA,i le mae’a ai o lenā 5 tausaga ua mou malie atu,e manatua ai pea nai o tatou Aiga, Laufanua, Le Atunu’u ma ana Ekalesia Kerisiano i vaitau fa’apenei.


Ina ua sisi a’e lana Fu’a,Tagavai o le Sa’olotoga”FA’AVAE I LE ATUA SAMOA”Aso muamua o Ianuari 1962,i le mae’a ai o Pulega Fa’a Kolone a Siāmani ma Niu Sila,ma avea ai le Malo Tuto’atasi o Samoa i Sisifo,ma Atunu’u e pulea sa’oloto e ona tagatanu’u,se’ia aulia lenei taeao

fou. A’o tatou tulimata’i le Faiga Filifiliga,a si o tatou Atunu’u Pele Samoa i le Aso Faraile nei,9 Aperila 2021,ia fa’aulufale pea e Le Atua le filemū i o tatou loto ma Agaga.


Talu mai Ianuari 1962,e to’afā na pale mai e avea ma Ao o le Malō, 1st Malietoa Tanumafili 2, 2nd Tupua Tamasese Meaole 3, 3rd Tuiatua Tupuola Efi, 4th Tuimaleali’ifano Va’aleto’a Sualauvi 2.


To’aono na avea ma Sui Ao o le Malō, 1st Mata’afa Fa’asuamaleaui Pu’elā, 2nd Tupua Tamasese Meaole 4, 3rd Tuimaleali’ifano Suālauvi 1, 4th Tuimaleali’ifano Va’aleto’a Suālauvi 2,

5th Matai’a Visesio, 6th Pule Lameko Gae’e & 7th Tapusatele Le Mamea Ropati Mualia.


To'alima na avea ma Palemia: 1st Mata’afa Faumuinā Fiame Mulinuū, 2nd Tupua Tamasese Meaole 4, 3rd Tupuola Taisi Efi, 4th Vaai Kolone, 5th Tofilau Eti Alesana,

6th Tuilaepa Sa’ilele Malielēgaoi & 7th Fiame Naomi Mataafa Faumuina Milunuu ll (2021).


To’asefulutolu na pale mai e avea ma Fofoga Fetalai o le Maota.

O Fofoga fetalai e to’alua muamua, 1st Amoa Tausilia & 2nd Luafatasaga Kalapu.


Ua 40 nei tausaga talu ona tula’i mai le Vaega Fa’aupufai,Puipuia Aiā Tatau a Tagata HRPP i le ta’ita’ina o le Malō Samoa i le taimi nei.

O Vaega Fa’aupufai nei na agaia le HRPP,i totonu o le 40 tausaga.

Samoa National Development Party-

SNDP,Tautua Samoa Party.E manatuina fo’i le tula’i mai a le Fa’alapotopotoga a Tagata Faigaluega a le Malō,PSA,na fa’ato’ilaloina ai le Faiga Malō a Tupuola Taisi Efi,i le mae’a ai o le

Solotete’e Tele i le 1981,lea na pale mai ai le HRPP e o’o mai i lenei vaitau.


O le ā fa’afofoga le tatou atunu’u i Ausetalia nei,i le fa’asalalauina tu’usa’o o le Faiga Palota a Samoa,e le Fofoga Mo’omia a Samoa,mai le 6 i le taeao Aso Faraile nei.

O le tula’i mai o le Vaega Fa’aupufai a le FAST po’o le Fa’atuatua i le Atua Samoa ua Tasi,ua tele ai le suiga o le silasila a le mamalu o Samoa,i le tāua o Faiga Fa’a Temokarasi,po’o le fa’atāuaina o Aiātatau a Tagata,i le fa’atinoga o le Palota.

Tatou talosia le alofaiva o si o tatou Atunu’u Pele i lana Faiga Filifiliga mo le isi 5 Tausaga.

2 views0 comments

Recent Posts

See All
bottom of page