top of page
Search
  • Writer's pictureMaulolo Fata Ueligitone Malifa

Faamanatuina 70 Tausaga Aiono Tasi (Talafou Sini 06 Mati 2022)

70 TAUSAGA O AIONO LELA’AUNAFAUSIA UTUTAIMALIE SIMAIKA TASI

O le atoaga o le 70 tausaga o le soifuaga o se tamā po’o se tinā, o le fo’i lea o le Vi’iga o Le Atua, ma se fiafiaga tele i se Aiga, aemaise le fanau, Uo ma Aumeamamae. O le afiafi o le Aso Faraile ua mavae atu, na fa’ailogaina ai le atoaga o le 70 tausaga o le Soifua,se tasi o Tamali’i o le atunu’u, ua loa ona ala’ala i Sini Ausetalia nei, Afioga iā Aiono La’aunafausia Simaika Tasi. Na soifua mai Aiono i Fasito’o-Uta i A’ana i le tausaga 1952, mae’a ana a’oa’oga soso’o ai ma le galue i le Falema’i tele i Samoa, Vaega Fale Su’etoto (Laboratory) ae sa fa’amautū i Le Maota Gasegase i Tuasivi, motu i Salafai. Saunoa le Afioga Aiono, o le avea o ia ma se Tagata galue i le su’eina o toto o le mamalu o Samoa po’o le (Lab Technician) e lē se galuega faigofie, se tasi o matāfaioi o le galuega, o le sāilia lea o ni siama e a’afia ai le toto, mai le feau lata ma le feau mamao (human waste) se’i va ane lau fa’afofoga tapua’i Samoa. Na ī ai le fa’anaunauga e malaga atu i Fiti mo le fa’atasiga fa’alea’oa’oga, i le su’eina o le toto o le tagata, ae peita’i ua tu’ua Samoa mo le malaga mai i Niu Sila. O le tausaga e 1969 na taunu’u ai i Aotearoa, ae na toe fo’i i Samoa i le tausaga e

1974, ma fa’aipoipo atu ai i lona faletua o Fuatino Ailao Tasi, ma malaga mai ma fa’amautū i Niu Sila, mo le 30 tausaga. Na tu’ua Niu Sila mo Ausetalia nei i le tausaga e 1994, ma galue ai i le kamupani o L.G. Williams i Melepone Vitoria mo le 3 tausaga. Malaga mai ma alala ma lona Aiga i Sini nei, i le tausaga e 1997 se’ia aulia le atoaga o lona 70 tausaga, i le Aso Faraile ua mavae atu. E to’alima o lā alo, ma fanau a le fanau e to’alima fo’i. Pe tusa ma le 70 le Auvala’aulia sa molimauina le Fiafia o le Aso Soifua o le afioga iā Aiono Lela’aunafausia Ututaimalie Simaika Tasi, e to’atele lava i nai ona tauaiga ma Paolo,aemaise fanau. Na amata lava i le Sauniga Lotu,

soso’o ai ma le Lauga Fa’afeiloa’i mo le Auvala’aulia, na saunoa i ai le Susuga a Papali’i Parenso Tasi, o le alo matua o le afioga iā Aiono ma Fuatino, o ia fo’i sa fai ma Fofoga o le Aso-Master of Ceremony (MC)

Saunoa fo’i le “Auga-o-Aute le afioga i le La’aunafausia, momoli lana Fa’afetai aloā’ia i le Paia ma le Mamalu o le Auvala’aulia. Matagofie Felanulanua’i le Ta’umafataga ese’ese na saunia lava e alo o Aiono ma le faletua iā Fuatino. Tali fuaitau fo’i le sui o le Auvala’aulia, e molimoli le Agaga Fa’afetai i Fa’aaloaloga ma le fofoga ta’umafa o lea afiafī. Maitauina le fa’atasi mai o le afioga iā Taimalelagi Tasi mai Kuiniselani, o se Uso o le afioga iā Aiono. Matagofie atili ai le Fa’amoemoe, i le auai atu a le Susuga i le ali’i Foma’i, Afioga Seagaitumua Paniani Patū, ma le faletua o Minerva Patū. O Tuaā o Aiono La’aunafausia Simaika Tasi, o Tasi Faletanoa’i, mai Vailoa Lepea Faleata, ma Atele Aiono Levave Fa’asisila o Fasito’o-Uta.

Maualuga le fa’amoemoe o Aiono i lea afiafi, auā sa afifio atu Aiga Na Lua:

O le afifio o Suafa o Aiono ma Leaupepe, e fa’alagilagi e le Pa’ia o le Aiga Sa Tuala.

Afio mai Toleafoa ma le Ta’auso. Afio mai le Ma’upū.

Afio mai le Matua o Tau’auve’a.

Ala’alata’i mai Ape na e moe manatunatu.

Afifio mai le Falefitu ma le Falefasito’o.

Afio mai le Aiga Sa Tuala ma le latou Tama o Muāgututi’a.

Afio mai le Aiga Taulagi ma le Matua o Sa Tuala.

Ala’alata’i mai le Nofoaituaiga iā Satuisavailu’u, aitainane To’oto’o o Ma’auga ma lau

Fetalaiga Leulumoega, o le Tumua.

Susu lau Susuga Malietoa na fa’alologo i ai Samoa, ma lou Nofoa vaevaeloloa. Susu mai Aiga Sa Malietoa ma le Ala’alafaga o Usoali’i.

Susū To’aā na Sa’o na Lua, ī lo outou Ala’alafaga.

Ala’alata’i mai Mago ma Luasi’ufanua,

ma Upu iā Sapapali’i i Mataniu Feagai-ma-le-Ata.

Afio Tuliaupupu o le Fofoga o le Alataua, ma lou Matua o Atuaia.

Afio Savai’inaea ma lou Matua o Sula. Afio mai Usoali’i.

Maliu mai Fuatimau ma Saletauā, ma oe le Lagimalu.


AUSSIES OFFER TO TAKE UP THE FIGHT

A’o vevesi le Lalolagi i le tau sāilia o se fofō e tāofia ai le ma’ema’eā,ma le pule sauā (Dictatorship Rule) a Peresetene Vladamir Putin o le Malo Komenisi o Rusia, ae ua to’atele le numera o Tagataānu’u o Ausetalia, ua ofoina atu lō latou soifua, e tau ai mo le Malo o Ukraine

mo le puipuia o lona Tuto’atasi. I le mae’a ai o le Saunoaga lototele ma le fa’amomoiloto a le Ali’i Peresetene o Volodymyr Zelensky i le vaiaso ua mavae, ma lona tatalo mai i le Lalolagi, mo so’o se tagata e tau mo lona atunu’u, ua lē masino le to’atele o tagata Ausetalia, ua feso’ota’i atu i le Ofisa o le Amepasa o Ukraine, mo le malaga atu i Europa, e tali i le vala’au mai mo se fesoasoani. Fa’aalia e Jaroslav Duma, Amepasa i Sini, le talanoaga ma Tusitala o Josh Hanrahan ma

Clare Armstrong, Daily Telegrapgh Aso Lua vaiaso ua mavae, e sili atu i le 20 tagata i le aso, ua vala’au atu mo le fa’amauina o igoa e fia tau mo Ukraine, e tete’e atu ma fa’atama’ia fitafita fa’atupu fa’alavelave a Rusia, aemaise le fa’afaiā’ina o le Peresetene pule sauā, ma le pepelo amio fiapule i le Lalolagi (Dictatorship Regime) ua tumua’itutusa ma le Peresetene o Saina, Xi Jingping. Saunoa le Konesula ma fa’ailoa Ta’utinoga a le numera tele o Ausetalia, ma tagata mai isi atunu’u ua avea ma sitiseni Ausetalia, se avanoa e tau ai mo le puipuia o le Malo Tuto’atasi o Ukraine, aemaise le naunau atu mo le fa’ato’ilaloina o lenei tamaloa fasioti tagata, ua o’o lava ī ona ia tagataānu’u, ua afe ma afe ua ia fa’aōnānā i le fa’aaogaina o kasa ma pauta o’ona, aemaise lava tagata Rusia e lē lagolagoina lana Faiga malo. Se tasi o vaega na fa’aalia e Konesula Duma, e ī ai

fo’i i latou ua ofoina atu le auaunaga, mo le tausiga o tagata ua a’afia ma manunu’a i lenei ofofā’iga fiapule sauā fasioti tagata lē taupūlea a Putin. Ua lē o manino mai fo’i pe talia i lalo o le tulafono sitiseni o tagata Ausetalia, pe fa’atagaina ona tagataānu’u le tali atu mo le malaga ese ma le atunu’u, e tauina se Taua mo se isi atunu’u pei o Ukraine. Saunoa le ali’i Palemia o Scott Morrison, lona lapatāia o Tagata Ausetalia, ia taofia le malaga atu i lea vevesiga i Europa.


DISEASES LURKING IN THE WATERS

Ua tu’uina aloā’ia mai se Lapata’iga malosi a Foma’i Ese’ese i Ausetalia mo le mamalu lautele, i le molimauina o ni fa’alogona ese’ese i le tino, aemaise lava lou laualo po’o le manava tigā,e āfua

mai i le fesouā’ina o lou puta (intestine) ona o se ‘siama po’o ni otaota’ lē aogā, ua fa’afuase’i ona osofā’ia ai le sologa masani, o le fa’amalūina o au taumafataga i taimi uma, ma aso faiso’o. Lapata’ia fo’i lou mata’itūina lelei o ni a’afiaga i lou pa’u e lē masani ai, (rare skin infection) Fa’amatalaina e Foma’i, aemaise i latou faia saili’iliga ma su’esu’ega fa’apitoa o siama nini’i feavea’i, o ia itūaiga Fa’ama’i e fananau mai i le ‘ūia po’o le savali fa’alausoso’o i totonu o le vai,

po’o tāfega o lologa’ (floodwater) aemaise lenei vaitau, i pāpā ai o alāvai ese’ese ona o le tetele o timuga. Fa’aalia e le Sui Ta’ita’ifono o le “Australian College for Emergency Medicine Queensland” Shantha Raghwan, i le talanoaga ma Jessica Marszalek o le Daily Telegraph Aso 1 o Mati 2022, ua le mafai e le Ofisa Soifua Maloloina, aemaise lava Falema’i Ese’ese i le atunu’u atoa, le tau fa’asoasoaina o moega mo gasegase ese’ese, i Kuiniselani ma Niu Sa Uelese, e mafua mai i lologa, silisili ona to’atele ma’i e a'afia ai le manava tigā, ma a’afīaga o le pa’u. Nisi o fa’ailoga ua mautinoa o le pua’i fa’alausoso’o, manava tatā ma le fa’alogoina le fufusi o lou laualo (vomiting,

diarrhea and cramps) Fa’aalia le numera tele o Foma’i, Tama’ita’i tausi ma’i, ma ē lagolago le nonofo fa’aauau i Falema’i, mo le tau togafitia o gasegase ona o lologa. Ua lapatā’ia manino e le Soifua Maloloina, le fa’atupulā’ia o le mamalu lautele o Ausetalia, o le ā ī ai a’afiaga o le totoga o le tino, aemaise le pa’u (va ane lau fa’afofoga) ‘stomach and skin infections’ aemaise le filogia o le vai, pe ā a’afia le fa’amamāina ona o le malosi o lologa ma tāfega. Fautuaga a Talafou silasila ane i vai ta’umafa ī ō tatou Aiga, aemaise lava nai fanau iti, ma nai Matua matutua.


TAFE OUTSOURCING FAIL

Ua laumanu’ia ma fa’alelea’i solo faotioga ma fa’aseā, ua le gata i Tagata Faigaluega, fa’apea le au atamamai i le fa’atulagaina lelei o Mataupu tau A’oa’oga, mo le a’oa’oina o tagata ma fanau aoga, o lo’o a’o’oga i Polokalame tau a’oa’oga a le “TAFE po’o le Technical and Further Education” O le TAFE e pei ona lauiloa ai i Niu Sa Uelese fa’apea Ausetalia, o se Fa’alapotopotoga A’oa’oga mo le fa’aauauina o le a’otauina taumafai o le tama ma le teine, ua lē ausia maka po’o togi e ulufale ma taliaina i Iunivesite, i le mae’a ai o le Kolisi po’o le A’oga Maualuga, aemaise le Su’ega tā’ua o le “HSC” Se tasi o Autū ma se Manulautī fa’ale a’oa’oga a le “TAFE” o se fa’apitoaugafa o lana Auaunaga i le tapu’eina o agava’a ma taleni a fanau, ua lē pau i talanoaga fa’ale a’oa’oga ma le Faiaoga, a’o le a’otauina mae’ae’a lelei o le tagata a’oga i le Fa’atinoga (Practical) Vaiaso ua mavae na ripotia ai e Christopher Harris, Tusitala Fa’apitoa i A’oa’oga po’o le “Education Writer” a le Daily Telegraph, se fa’aletonu i le toe ‘tusia ma fa’amautū fa’aupuga o ma aiaiga o Mataupu ta’itasi’ ina ua atofaina i se “Kamupani Feutagā’iga-Overseas Consultancy” i fafo atu o Ausetalia, e fa’atinoa nei galuega sa masani ona tauaveina ma fa’atinoa e Faiaoga A le TAFE, ua loa lo latou silafia, e lē gata i Aiaiga ma le fa’avasegaina o Metotia e a’otauina ai nei Mataupu, ua mautū fo’i le iloa lelei o itūaiga tagata a’o’oga o lo’o tusi talosaga atu, mo le amataina o ni Polokalame Fa’ale A’oa’oga. Fa’amatalaina i le Ripoti, le latalata i le $20 miliona talā Ausetalia ua ma’umau, ae lē o taliaina e le “Tino e Pulea ma Ioeina le Maualuga Fa’atulaga o Agava’a Mana’omia o Tagata A’o’oga i Mataupu a’oa’oina” a le TAFE, po’o le

“Australian Skills Quality Authority” Talanoa manino se tasi tagata faigaluega, o lenei galuega sa tu’uina atu i ni Kamupani Ausetalia, o “Ernst & Young mo le totogi e $9.9 miliona talā, ae $6.6 miliona talā Ausetalia i le Kamupani o Deloitte, mo le isi vaega o le galuega, maua ane mulimuli ua tu’uina, i se Auaunaga i fafo atu o Ausetalia, o le “Info Pro Learning” Tele lenei gasugasu e lē o ī ai so tatou silafia lelei.


INSURERS BRACE FOR BIG SURGE IN CLAIMS

A’o tau maitau uiga femoumoua’i malolosi o matagi oso fa’ata’uta’u, ae tainane le si’isi’i pea i luga o le suātimu ua mafua ai lologa, ae o lo’o vevesi ma lē nofonofoa’i Kamupani ma Pisinisi Inisiua (Insurance) auā le feagai ma le Mamalu lautele, ua fa’atō’ai atu Talosaga ese’ese mo meatotino ua fa’atama’ia ma malepelepe i a’afiaga ona o Lologa, ma matagi malolosi, aemaise lava le Setete o Kuiniselani, ma le tele o vaega o Niu Sa Uelese. Tusia e David Ross o le Daily Telegraph, aso 2 Mati le si’itia maualuga o le tau e fa’atupe ai vaega ese’ese ua matuā fa’aleagaina pei o fale, auala, ta’avale, pisinisi ma meatotino. Ua lē o faitauina le a’afīaga o tagata lautele, ua maua i le gasegase o le mafaufau (Mental Health) aemaise nai tagata ua soso’o tausaga e 5-7 talu ai o malepe le fale i lologa ma matagi. Fa’aalia e le Pulega o Inisiua Ausetalia “Insurancde Council of Australia” ua 31,000 afe Talosaga ua fa’amauina talu mai le Aso Lua ua mavae, ae lē o faitau ina le 15,000 na ulufale atu i le Aso Gafua. Fa’ailoa maie le “ICA” ua vave teisi ona maua tonu se aofā’iga mautū, o le Tauaofa’i o lologa ma matagi malolosi ua a’afia ai le Setete i lenei tausaga, auā o lo’o

gasolo mai pea Talosaga i aso uma, aemaise le aga’i atu o matagi ma lologa i Pitonu’u taumamao atu o Niu Sa Uelese, aemaise le afaina tele o le Au Faifa’ato’aga i lafumanu, togāla’au ‘aina, meatotō ese’ese e o’o lava i alāvai i totonu o Fa’atoga. Fa’aalia manino e le Pule Fa’atonu o le Ali’i Ofisa Sili fo’i o le “Insurance Australia Group” Nick Hawkins, ua tu’u māioio nei vaega ta’itasi a Kamupani Inisiua, latou te gafa ma Asiasiga ō so’o se meatotino ua fa’aleagaina i lologa ma matagi, fa’aalia e le Ofisa Autū o le Va’aiga o le tau (NRMA) o le 73% pasene o Talosaga mo le Inisiua o meatotino fa’atama’ia i nofoaga ese’ese, e mafua mai i le maualuga o le suātimu paū na fa’amauina, talu mai le amataga o timuga. Tā’ua e le Faletupe o Suncorp i le, o le 70% pasene o le 5000 o ana Talosaga ua taulimaina, o le Setete o Kuiniselani, ua fautuaina e Kamupani Inisiua

ana “Aufaisea po’o Shareholders” e ono sili atu tupe fa’aalu-2022.


NSW TO DUMP $75M OF RUSSIAN ASSETS

Amuia i tatou e moni lava o lo’o feagai ma lologa ma matagi malolosi, i lenei vaega o le lalolagi, ae Fa’afetaia pea le Alofa ma le Agalelei fa’aauau o Le Atua, o lo’o tatou feiloa’i ma nonofo fa’atasi i

Aiga i lalo o le tulutulu e tasi, fa’apea le fēsāga’i, talanoa ma fanau i Aso ta’itasi. O osofā’iga fa’aauau fa’afitafita fa’amalosi a le ali’i Peresetene o Vladimir Putin ma vaegā’au tau a Rusia o Ukraine, ua sūia atoa ai nei le mata’itūina o le Saogalemū o le lalolagi (World Security) auā ua fa’alālā ma fa’afefe e lenei Ta’ita’i fasioti tagata o lenei seneturi, Vladimir Putin, lona a’apa ane e fa’aaoga meatau fa’aNiukilia (Nuclear Arsenals) o le ā tafaiesea uma ai tagata Ukraine, fa’apea Europa. Ua silia i le miliona tagata Ukraine ua tu’ua Aiga ma matua matutua, ae saili le saogalemū i atunu’u tuāoi. O le taimi mulimuli na fa’aaogaina ai sea ituaiga meatau, tausaga 1945 iā Aukuso, ina ua fa’apaū e Amerika lana pomu atomika i luga o Nakasaki ma Hiroshima, le atunu’u o Iapani ona o lona ma’ema’eā fa’afitafita na sosolo mai i le Vasa Pasefika, a’afia ai ma Ausetalia, ae fa’ai’u i lana osofa’iga maoa’e o “Pearl Harbour” i le Setete o Hawaii, e o’o mai i le taeao nei, o lo’o mama’i pea tagata ī ia nu’u o Iapani, ona o le manavaina o le kasa o’ona, tutusa pau ma le meatau niukilia lea e fa’alālā e le Peresetene fasioti tagata o Vladimir Putin. Fa’aalia

manino lā e le Pulega Faiga Malo a le Setete Niu Sa Uelese, le taofia ma fa’alēaogaina uma o ni ‘tupe teu’ po’o ‘investment assets’ a le Malo Komenisi o Rusia, o lo’o teuina i so’o se Faletupe i Niu Sa Uelese Fa’amatalaina e le Teutupe a le Setete o Matt Kean, le taofia o ni ‘tupe teu’ a le Au Milionea a Rusia, aemaise pa’aga ma uo mau’oa a Putin, o lo’o teu fa’ananā i Ausetalia, i le fa’aaogaina o igoa sesē po’o ni Aiga ma uo Rusia, e nonofo i Ausetalia. Fa’aalia malosi e Pulega o

le Setete Niu Sa Uelese, e 339 Sui Faipule o le Palemene Komenisi a Rusia e lagolagoina Putin, ua a’afia uma i lea Tulafono fou, talu ona osofa’ia fa’amalosi e Putin ma Rusia le Malo Tuto’atasi Tūmāoti o Ukraine.


TA’ALOGA-SPORTS

Fa’ate’ia le lalolagi e fiafia i le ta’aloga Kirikiti Fa’a Peretania, i le maliu fa’afuase’i o le ali’i maoa’e le talenia i le ta’aloga (Legend of Cricket) o Shane Warne. Ua tumu luga o le Initaneti, Upega Tafa’ilagi ese’ese, Leitio, Televise ma Nusipepa, i le āave mai o tala i le maliu o lenei alo talenia Ausetalia, ma tele ona agava’a i le ta’aloga Kirikiti. O Shane Warne o le Fa’ate’a Ta’avilivili Fa’amoemoeina (Leg Spinner Bowler) “Shane Warne, the greatest Leg-Spinner in the history of Cricket, and an Australia icon who transcendend the Sport”

Na maliu fa’afuase’i Shane i lona potu i le faletalimalo sa nofo ai, i Ko Samui, Thailand, masalomia lona maliu i se ma’i fatu oso fa’afuase’i, a’o i ai i Thailand mo ni fonotaga fa’aPisinisi. Soifua mai aso 13 Setema 1969, i le Pitonu’u o Ferntree Gully, Vitoria ae vala’au i ai Le Atua, aso 4

Mati 2022. Na o le 52 ona tausaga, o le matua fo’i lea o Fesola’i Va’aiga Tu’igamala, na maliu ai i le vaiaso ua tuana’i atu. Mo le Pa’ia o le tatou atunu’u e fiafia i le ta’aloga Kirikiti, o Shane Warne na ia sūia atoa le faiga o le fa’ate’a ta’avilivili, po’o le “Leg Spin Bowling”

Vaiaso ua mavae, na maliu ai se isi fo’i ta’utā’ua a Ausetalia i le Kirikiti, le ali’i Mulumu Maoa’e (Australian Top Wicket Keeper) Rod Marsh i le gasegase o le Kanesa. O le ta’aloga muamua a Shane mo Ausetalia, o le tausaga e 1992. E silia i le 1000 ana pē o tama ta’aalo i lana fa’ate’a ta’avilivili po’o le “spin bowling” i ta’aloga faitaulia fa’avaōmalō ta’i 5 aso, ta’aloga mo le aso e tasi (One dayer-50 overs) O Dean Jones, tama tā tamua maoa’e(opening batsman) Rod Marsh,

Mulumu Fa’amoemoeina (Australian Best Wicket Keeper) ma Shane Warne, Fa’ate’a ta’avilivili (Legend Leg Spin Bowler) O nei ali’i ta’aalo Kirikiti ta’utā’ua a Ausetalia, na o le ta’i 50 ma ona tupu tausaga, ae na maliliu uma i le Gasegase Ma’i Fatu fa’afuase’i. Ali’i Lakapi iuni Fiti o Joeli Vindiri, 48 ona tausaga a’o Inga the Winger, e 52 ona tausaga na maliu ai.

21 views0 comments

Recent Posts

See All
bottom of page