top of page
Search
  • Writer's pictureMaulolo Fata Ueligitone Malifa

Talafou i Vaifanua o Sydney NSW (28 February 2021)

Sign of the fines

E fa’asefuluina tupe a le Malo ua sasa’a mai i le fa’aaogaina o Meapu’eata(speed camera)fa’aonaponei,e pu’e ai ta’avale ua maualuga le saoāsaoā,nai lo le televave fa’ale tulafono,i maga’ala ese’ese o Niu Sa Uelese.Pe fa’aiva ona pu’eina aveta’avale,e masini Pu’eata saoāsaoā a Leoleo ia Ianuari 2021,fa’atusa i le masina lava lenei i le tausaga ua mavae,2020,ina ua ave’ese laupapa o Lapata’iga fa’ailoilo(warning signs)mo Aveta’avale.Malomaloā le vevesi ma le feitaga’i,i totonu lava o le Faiga Malo Tu’ufa’atasi(Coalition)i le fa’ai’uga e fa’ata’atia ese,le fa’atutu o fa’ailoilo mo Meapu’eata Saoāsaoā i tafātafā ala(speed camera ahead signs)ia Tesema i le tausaga ua tuana’i atu,lea na matuā si’itia maualuga ai Tupe Maua a le Malo.I Tusitusiga a James O’Doherty o le Daily Telegraph,na lagaina lenei Mataupu e le Faipule a le Liberal,i le Maota Maualuga(Upper House)Lou Amato,ona o fa’aseā ma faitioga mai le mamalu lautele,i le Su’etupe o le Malo i le tu’ueseina o Laupapa Fa’ailoilo mo Mea Pu’eata Saoāsaoā,i autafa o Auala,E pei o Mona Vale Road,ST IVES 301 fa’asalaga,Hume Highway,CASULA 374,Penshurst Street,CHATSWOOD 390,Anzac Parade,MAROUBRA 42,Wakehurst Parkway,Northern Beaches 73,Barrenjoey Road,MONA VALE 74,King Street,MASCOT 72,ma Blacktown Road,BLACKTOWN 51 fa’asalaga.Fa’aalia e le So’oupu a le Minisitā o Fela’ua’iga,Andrew Constance,ni fautuaga e o’o atu i le 43 ni soifua fa’asaoina,pe ana le tu’ueseina Laupapa Fa’ailoilo mo Lapata’iga mo Aveta’avale,o lo’o i ou luma atu le Ta’avale o Meapu’eata Saoāsaoā,a Leoleo.I le taimi nei,153,638 afe Aveta’avale ua mauaina e le Meapu’eata,le fa’aaogaina o Telefoni Feavea’i(Mobile phone detection cameras)talu mai le amatalia ia Mati 2020,i le Aofa’iga e $63.75 Miliona Tala.Silasila ane pe le o i ai sau ticket o le Aveta’avale Saoāsaoā.



Bank in a deceit of it’s clients

Ripotia e le Daily Telegraph i le vaiaso ua mavae atu,Aso 17 Fepuari 2021,le fa’aauau pea o faiga fa’aalatua,ma le taufa’asese a le Faletupe Commonwealth Bank,ua silia i le Fa’a sefululua afe ona matuā mafatia ana pa’aga ma a latou Teugatupe,i ana tupe tului taufa’asese,aemaise lava i Talosaga Tupe Fa’aopo’opo(Overdrafts)i le tele o tausaga,pei ona fa’amaonia e le Fa’amasinoga Maualuga Federal Government.Mauaina fo’i le solia fa’alausoso’o e le Faletupe,Commonwealth o Aiaiga fa’ale Tulafono,e tausisia ona tiute fa’ale Auaunaga tau Tupe,i lalo o lana Laisene Fa’ale Tulafono.I le vaitau o le va o Tesema 2014,ma le masina o Mati 2018,na fa’ailoa ai e le Commonwealth Bank,Aiaiga o ana tupe tului(interest rates)mo Nonogatupe ese’ese.Na tu’uina fo’i fa’amatalaga o Teugatupe a tagata ta’ito’atasi(Bank Statements),fa’atasi ma tupe tului(interest rate)e 16% pasene.Ae liliu ane le Faletupe Commonwealth,samala le mamalu lautele,1510 i le 34% pasene le tupe tului(interest rate)i le tausaga,o le Aofa’iga maualuga o le tului(interest)e $2.2 miliona tala. Fa’amanino mai i Pepa o le Fa’amasinoga Maualuga,o le telē o lea sēsē,e mafua i le gasologa o galuega Fa’a komipiuta(systems issues)Ua afaina ai le pea le Ta’uleleia o le Faletupe Commonwealth Bank,talu mai le tausaga 2013.Fa’aalia fo’i na fai suiga ina ua tula’i mai lenei fa’afitauli,aemaise le fa’asa’o o le amiotonu o ana tupe tului(interest rates)se’ia aulia le 2015.Fa’amatalaina ini Saili’iliga lata mai,e le’i mae’a ona matuā manino le malamalama tonu o le to’atele,na a’afia a latou Teuga Tupe i taimi muamua.Silasila ane po’o sologalelei ma ō gatasitasi,lau tupe tului ma le tala’aga o lau Teuga Tupe.


GP had no vax training

O fa’afitauli ua alia’e mai i le fa’atinoga o Tui Puipui(Vaccine)o le Fa’ama’i COVID-19.Fa’amatalaina e le ali’i Minisitā Soifua Maloloina,Maota o Sui a le Faiga Malo Maualuga(Federal Government)i totonu o le Palemene i le vaiaso ua mavae atu.O le Foma’i na fa’atinoina Tui Vaila’au Malolosi(high dose vaccine)mo Gasegase e to’alua,i se tasi o Nofoaga Tausi mo Tagata Matutua i Kuiniselani,e le’i mae’a ana A’oa’oga talafeagai mo le fa’atautaia lelei,o fa’atinoga o le Tui Puipui mo le Fa’ama’I COVID-19.Fa’aalia i le Ripoti a le Daily Telegraph,Aso Tofi 25 Fepuari 2021,le fete’ena’i o le Saunoaga muamua a le ali’i Minisitā,ina ua logoina ia ini Fautuaga fou,e foliga e i le ituaiga A’oa’oga na fa’atonuina mo le Foma’i.Ta’ua i luma o le Palemene,le fa’amaloloina o le Foma’i(GP)lea na faia Tui Vaila’au Malolosi ta’i fa’afā,o se tamā matua 88 tausaga,ma le tina e 94 tausaga,i le Nofoaga Tausi mo Tagata Matutua,Holy Spirit Nursing Home,Brisbane Kuiniselani.Saunoa le Minisitā,Greg Hunt,o lo’o fa’agasolo nei Su’esu’ega Mae’ae’a o lenei Fa’afitauli,auā e to’atele i latou ua molimauina le fete’ena’i o lenei Tui Vaila’au,ma le fa’alogona o le tino.Silasila lelei ane pe i ai ni a’afiaga,e ono fa’aosofia ai se isi gasegase ia te oe,ae le’i fa’atinoina le Tui Vaila’au,mo le Fa’ama’i COVID-19.Ua na o se fautuaga,ia talanoa mae’ae’a i lau Foma’I po’o le GP.


How raisins helped a 105-year-old kick COVID

Ina ua fesiligia le Tina Matua mai Niu Ioka,105 tausaga o Lucia DeClerck,po’o le a le mafua’aga ma le Leo Lilo,o lona Soifuaga Umi,ua aulia ai le sili atu i le 100 tausaga.Na le’i fa’atuai le tali vave mai a le Olomatua.Tatalo!Tatalo!Tatalo!Fuafua lelei le Olaga(One step at a time)ma taofi le ta’umafa i mea-ai gāoa(No junk food)Fa’amatalaina lelei e Lucia le fa’asaoina o ia mai le Fa’ama’i COVID-19,e le gata i lana Tatalo,a’o se tasi o ana matai’ai i taeao uma,o lona Olaga atoa,o vine mamago eena e 9 ua mae’a ona fa’afefiloi ma le Sini,ona ta’atia lea mo Aso e 9.Fa’amatalaina e lana fanau ma ā latou fanau,o lana faiga fa’aauau ma le fa’asologa lea o lona ala mai,i taeao ta’itasi,fa’atasi ai ma le fufuluina o ona oloa(nifo)i le ga’o kuka mea-ai,po’o le baking soda.Tala fa’amama’i le tama a lana tama (granddaughter)le Tama’ita’i o Shawn Laws O’Neil,53 tausaga e alala i Los Angeles,Kalefonia,sa tu’ufesilisili ma pei e ulagia le Olomatua,i lana faiga fa’asolo lea i taeao ta’itasi,aemaise ana vine mamago eena e 9,ua sasa’a i ai ma le Sini,a’o lea ua aulia le 105 tausaga.O Lucia e pei lava o le tatou Folauga,o ona Matua o Tagatanu’u o Guatemala ma Sepania(Spain)malaga mai ma fa’amautū i Amerika,i le Setete o Hawaii,ma fanau ai Lucia i le tausaga 1916.Fa’asaoina lenei Tina Matua mai le FLU Sepania(Spanish FLU)Lua Taua o le Lalolagi,ma le ma’ema’eā o le COVID-19.O lo’o nonofo ma lana fanau tama matutua e to’alua,i New Jersey i Niu Ioka.Fai mai se tasi o fanau na tupuga mai lenei Tina 105 tausaga,o lo’o ma’ai ma tutu’a lava lona mafaufau i Talanoaga i le taimi nei.Tautuanā le Tausiga fa’aauau a nai o tatouTamā ma Tinā Matutua,aemaise le tausiga i Ta’umafa Paleni i Aso faiso’o,mo lo latou Soifua Maloloina Lelei.


Noelani selected as Head Girl-Suva’s Holy Trinity Anglican School

A fa’amanuiaina alo ma fanau a Samoa i A’oa’oga,Iunivesite,Ta’aloga ma Galuega Totogi lelei,aemaise lava le soifua a’e ma fa’aauau le olaga i Atunu’u pei o Ausetalia,Niu Sila ma Amerika,o se mitamitaga faia’e i loto ma agaga o nai Matua,aetainane tatou uma o Samoa,ae ā le Tapuaiga malu a o tatou Aiga o lo’o fa’amuli mai,i le Atunu’u Pele,auā e le faigofie ona fa’atonutonufolau le Soifuaga,Alala ma Nonofo i fafo mai o Samoa.Ripotia mai Fiti,e Maina Vai o le Samoa Global News,i le vaiaso ua tuana’i atu,le filifiliaina o se Afafine Talavou Samoa,e avea ma”Ulu Ta’ita’i Tama’ita’i”po’o le”Head Girl”i “Suva’s Holy Trinity Anglican School”mo se taimi muamua i le Tala’aga Fa’asolopito o A’oa’oga Maualuluga i Fiti.O lenei afafine e tupuga mai le Alalafaga o Fasito’otai i Aānā,Afifio le Pa’ia o le Aiga Taulagi,Toleafoa ma Va’afusu’aga,Afio Afamasaga le Matua o Usoali’i,na Matematea Malo,Afio Tu’igamala o le Ma’upū o le Tuia’ana,o lē ua fa’alanu ma’ave’ave i le va o Aiga ma le Falefitu,Le Matua Ali’i ma le Aiga Sa Lauano.Tainane le Mamalu maualuga o le Falefitu ma le Fale Fasito’o.Fa’amatalaina e le Pule A’oga.E ui,ua nā o le 2 tausaga talu ona taunu’u lenei Afafine Samoa i Le Aoga,ae ua a’utasi lona Filifiliga,ona o ona Uiga Lelei Fa’aalia,Amio Lelei ma Tausa’afia,Atamai i A’oa’oga,aemaise le fa’atāuaina o ona Agava’a ma Tomai Fa’a Ta’ita’i.Na tu’ua e Noelani Serenade Brown-Vaise ma lona Aiga i Samoa,ina ua tofia lona Tinā mo se galuega i le Ofisa,Faletupe o Ati’ina’e o Asia mo le Pasefika,(Suva Fiti-Asian Development Bank Subregional)Saunoa le Tinā o Faumuinā Ferila Brown-Hodgson,le Agaga o le Fa’afetai lemū a’e i Le Atua,auā e le’i umi ona i ai le Afafine i le A’oga,aemaise o fafo mai o si o tatou Atunu’u Pele Samoa.Fa’amatalaina e Faumuinā le matagofie o lea fo’i suiga fou i Suva,e matuā misia lava Samoa,aemaise le olaga i Nu’u ma Alaalafaga,o lona ese’esega tele lea.E misia lava Aiga i Samoa.Fa’aali e Noelani,13 tausaga lona matua,e fa’amuamua lava Le Atua i fuafuaga uma,Fa’afetaia ma Viia Le Atua i le filifiliaina o ia e avea ma”Ulu Ta’ita’i Teine”Head Girl mo”Suva Holy Trinity Anglican School”Ta’utino Noelani Serenade Brown-Vaise,tu’uina atu lona Fa’atuatuaga i Le Atua,e fesoasoani mai iā te ia i lenei Tausaga.Maualuga fo’i lona Mitamitaga o ia o le Samoa Au Uliuli.


3 views0 comments

Recent Posts

See All
bottom of page