top of page
Search
  • Writer's pictureMaulolo Fata U. Malifa

Tala Fou i vaifanua o Sini NSW Ausetalia (20 Tesema 2020)

Updated: Jan 11, 2021

Se fiafiaga tele le tatala o malaga va’alele ma Niu Sila

O femalaga’iga va’alele i le vasa Tasemane (Tasmania) i le va o Ausetalia ma Niu Sila, ua vavala mai ona matalatala, talu mai ona tapunia, valu masina talu ai a’afiaga mai le COVID-19.

Ua mae’a fa’atulagaina fuafuaga ina ua i ai le maliega auautasi, a le Kapeneta o le Faigamalo a Niu Sila, e tatala ai malaga masani i masina muamua o le Tausaga Fou 2021.O lea aiaiga ua fa’ali tino ai le tafiesea o le tulafono e te nofo esea mo le 14 aso. O le sa’olotoga o le mamalu faimalaga e pei ona masani ai mo le taimi nei o lo’o tumau pea tuafono mo COVID-19, se’i vagana ua fa’ataunu’u se sainigalima i le va o Ta’ita’i o Malo e lua,le Tama’ita’i Palemia,o Jacinda Arden,ma le Ali’i Palemia o Scott Morrison i se taimi lata mai.Fa’aalia e Arden,o le naunauta’iga o lana Faigamalo,ia fa’amaoti se aso talafeagai i le Tausaga Fou-2021,ona galulue fuafua lea i ai,sa i ai le popolega pe mafai e le Faigamalo a Ausetalia,ona fa’atonutonu nofoaga ma nu’u o lo’o pipisi ai le Fa’ama’i,i Setete ta’itasi.Ta’ua fo’i le fiafiaga tele o le 600,000 afe tagata Niu Sila o lo’o alala ma nonofo i Ausetalia,ua le mafai ona malaga e vaai aiga,aemaise galuega,ona o le taugata o totogi fa’atulaga o Fale Talimalo,i lalo o aiaiga o le COVID-19.

Mo le taimi nei,so’o se tasi e fia malaga i Niu Sila,e ao ona e taulimaina se Pepa Fa’amaonia (voucher) e ulufale atu ai,mo se avanoa nofo i Fale Talimalo,mo le 14 aso. Fa’aalia le agaga Fa’afetai o le Faiga Malo Maualuga Ausetalia(Federal Govt)lenei fa’ai’uga a Niu Sila,aemaise se fa’amoemoega maualuga,e toe si’itia ai le Tamaoaiga o Ausetalia,e tauala mai i Tagata Tafafao pol’o le Tourusm.Ta’utino le Minisita o Tagata Tafafao Maimoa(tourism)a Ausetalia,Simon Birmingham,o se tala fa’afiafialoto,ona o le pagatia ma le pa’ū maualalo o seleni maua,mai le Tagata Tafafao Maimoa,talu le tapunia o tuaoi i faiga a le Fa’ama’i-COVID -19.

Tapena loa lau malaga mo le Lotu Fa’amanatu (reunion) ma le Fa’aipo’ipoga a lou Aiga i le Tausaga Fou, 2021.


Pandemic hit the coffers

Ua lipotia le matua si’itia maualuga o aitalafu,ae fa’aopo’opoina le fa’aiti’itia o Tupe Maua,fa’aalia i fuainumera fa’amaumau,o Tala Fa’ale Tupe a le Faiga Malo Maualuga(Federal Budget)i totonu o le isi sefulu Tausaga i le lumana’i.Pe tusa ma le piliona ma piliona tala le fa’aauau fa’atupulaia o Aitalafu,e afua mai i le vaitaimi umi,o le feagai ai ma le COVID -19.Ta’ua e le Lipoti Tumaoti Fa’atuatuaina,Ofisa Fa’a Palemene i Lana Tala o Tupe,e ono tifatō ma palasi maualalo(recession)le Tamaoaiga o Ausetalia,pe tusa ma le $258 piliona tala,e fa’aiti’itia ai, i le aga’i atu i le tausaga 2030,o le a matua fa’ava’atuia ai Tupe Maua,a le atunu’u.Fa’aalia le tapenapena mamao o le Faiga Malo a Scott Morrison,ia fa’apaū maualalo lafoga(tax cuts)fa’amoemoe e fa’aulufale i le 2024-2025,lona uiga, ua na o le 20% pasene o i latou e totogi maualuga,e maua ia fa’amanuiaga,a’o le isi 80% pasene,e ono si’itia lafoga totogi.Fa’aalia e le Teutupe o Josh Frydenberg,le paū maualalo i le $213.7 piliona tala,i le Tala o le Tupe ia Oketopa,ae na si’itia maualuga Tupe Maua ma Aitalafu.Fa’amatalaina e le Ofisa Tala Fa’atatau o le Tupe,o Matagaluega e lua e maoa’e le si’itia ma fa’aopo’opo pea tupe fa’aaluina ai,o le Tino Inisiua mo Tagata e i ai Mana’oga Fa’apitoa(National DisabilityInsurance Scheme)ma le Matagaluega Puipuiga o le Saogalemu(DEFENCE)Fa’aalia fo’i,pau le fofo o lenei fa’afitauli,o le matua si’itia o lafoga(tax increase)e fa’atumu ai le opū lea i totonu o le isi 10 i le 20 tausaga.Fa’amaonia mai,mo le taimi nei,o tupe tului(interest rates)i Faletupe,aemaise nonoga tupe,o lo’o taliaina e Faiga Malo Maualuga,ona o le si’itia maualuga pea o Aitalafu,e aulia atu le isi 10 i le 20 tausaga.


Tupe tului mo Mokesi

Ua mana’omia le fa’amaoni o Faletupe uma i Ausetalia,ina ia fa’ailoa lelei i tagata e u’umia Fale Fa’atau motu,po’o i latou e i ai Nonoga tupe Fa’a Mokesi,e uiga i tupe tului(interest rate)po’o le tau maualalo lea,ua pito silisili ona talafeagai,ua mafai ona latou atofaina, mo oe ma lau Nonogatupe Fa’a Mokesi,i tausaga ta’itasi.Afai ae taunu’u ia suiga,o lo’o finauina e le Komisi o Oloa Fa’atau,ma Auaunaga mo le Mamalu Lautele(Australian Competition and Consumer Commission)e afe ma afe tala o le a fa’asaoina,i le tau totogiina o lou Maota Nofomau,i tausaga ta’itasi.Fa’amatalaina e le Tusitala Fa’atonu o Faiga Fa’apolokiki i Faiga Malo,a le Sydney Morning Herald,o le Aso 5th Tesema,o ni saili’iliga ma su’esu’ega,i Nonogatupe mo Fale Fa’atau,na mautinoa ai,o oe lea ua loa ona totogi lou Fale Nofomau,o lo’o tutumau pea lau tupe tului(interest rate)mai tausaga e tele ua tuana’i,ae ua tu’uina atu tau fou o tupe tului,i Nonoga tupe fou.I se fa’amatalaga lata mai,o lou fa’amaoni e te tutumau i lau Faletupe,ua tausagā o totogi ai lau Mokesi,ma teu ai au tupe,ae le o fa’amaoni lau Faletupe,e toe fa’afo’i mai lou ma’au lea e sasa’a atu,i vaiaso po’o masina ta’itasi.Ua fa’amaonia mai fo’i i le Su’esu’ega lava lea,e silia i le 50% pasene o Nonogatupe i Faletupe,ua tausagā e le o migoi,pe sui tupe tului(interest)ae ua atili ai ona lapo’a le ese’esega,ma Nonogatupe fou,ua tu’uina i ai tau fou(new interest rate)a’o tumau pea le Nonogatupe matua,ua le o toe amana’iaina.Silasila ane i lau Teuga tupe,po’o lau Mokesi,ua loa ona tatala,a’o lo’o tutumau pea lau tupe tului(interest rate)e aunoa ma se talanoa mai o lau Faletupe,po’o lau Mortgage Manager.Aua ne’i galo lau Aia tatau e te fesili ma saili le tau lelei ma talafeagai mo oe,aemaise le feagai ai ma lau Fale Tupe.


Educating Australia about Indigenous potential

A tutusa avanoa e mauaina e fanau i A’oa’oga,Galuega,Pisinisi ma Ta’aloga,e mautinoa o le a fananau mai ai ni fa’amanuiaga,talafeagai mo se lumana’i o so’o se atunu’u.O le fa’aulufaleina atu o fanau a Tagata-nu’u Ausetalia(Indigenous)i ni A’oga ma Iunivesite lelei,e nonofomau ma a’ooga ai,ua na o le pau lea o se auala,e Palemia ai se Tagata-a-nu’u Ausetalia mo se taimi muamua.O le silasila toto’a lea ma le vaaimamao,a le ali’i Minisita o Mataupu Tau Tagata-a-nu’u Ausetalia o Ken Wyatt.E pei ona fa’ailoa i se Talanoaga Tu’ufa’atasi(Documentary)a le Sky News,ua fa’aigoaina o le,SUIGA O LE ATUNU’U,po’o le”Changing Our Nation”ua fa’amatala manino ai,o le maua uma o fa’amanuiaga tutusa e fanau a se atunu’u,e tauala i A’oa’oga,o le aualalaupapa lea i le tumutumu,o so’o se taunu’uga ma fa’amoemoega,e le afaina po’o fea le atunu’u,na tupuga mai ai ou matua ma tuaā.Ua silia nei i le sefulu tausaga,o fa’aauau pea le fesoasoani faale a’oa’oga a le”Tino o A’oa’oga mo Tagata-a-nu’u Ausetalia”(Australian Indigenous Education Foundation)e saili avanoa tau a’oa’oga ma Sikolasipi,ma fa’aulufale fanau talavou mai Nu’u,Alaalafaga,ma Itumalo e nonofo ai Tagata-a-Nu’u Moni o Ausetalia(IndigenousCommunities)ina ia taunu’u a latou moemitiga,ini lumana’i Manuia,e tumua’itutusa ai ma fanau mai Aiga,o lo’o sologalelei ma lava le fa’asoa,ma mautinoa lona Tamaoaiga alualuiluma.Na amataina lenei Polokalame i le Tausaga 2008,ina ua atofaoina le avanoa e tasi i Niu Sa Uelese,mo le taimi nei,ua latalata i le 400 tama ma teine,ua ulufale atu i A’oa’oga maualuluga i Setete,ma Itumalo ta’itasi.Fa’amatalaina e Wyatt i lenei Polokalame a le Sky TV,le agaga Fa’afetai i le suiga tele ua vavala mai,e tauala i nei avanoa Fa’a Sikolasipi,pau lea o se avanoa e maua ai se Palemia muamua Ausetalia,o se Tagata-a-nu’u Moni o Ausetalia.Ta’ua e le tama’ita’i talavou 12 tausaga,o Aspen Moore,o lo’o aoga fa’a Sikolasipi i le”Sydney’s Pymble Ladies College”ua avea lenei avanoa,ua tatala ai lana vaaimamao,mo lona lumana’i.


Fa’aipo’ipoga a Allan Alaalatoa ma Filoimalo A'aone Malifa

O le Aso Faraile na se’i mavae atu,na fa’ataunu’uina ai le tu’ufatasia o le Aiga Fou,e ala i le Sauniga o le Fa’aipo’ipoga,a se tasi o tamafanau Samoa,ua lauiloa ai si o tatou atunu’u,i le Lakapi Iuni.O le Aso Fiafia,ua loa ona taupoina,aemaise le pipisi o le COVID-19,ae le’i fa’ava’atuia ai foliga fiafia,ma le tausa’afia,o le pou malosi a le Wallabies,o Alan Emani Alaalatoa ma lana pa’aga,o Filoimalo A’aone Malifa.Na fa’atumulia le Malumalu Tapua’i o le Ekalesia Fa’apotopotoga Kerisiano Samoa-EFKS Sini,i Uo ma Aumea Mamae,Aiga o le Ulugali’i Fou,aemaise le Aufaigaluega Folafola o le Talalelei.Na maitauina fo’i le auai o Pulega o a la’ua galuega.Sauniga o le Fa’apai’aga o le Fa’ato’afaiavaāma ma le Fa’ato’anofotane,na Ta’ita’iina e le Susuga i le Fa’afeagaiga,o Iakopo Leleimalefaga,Failautusi o le Pulega Sini Saute.Mae’a le Sauniga,soso’o ai ma le Taumafataga i le Maota Mafuta o le Aulotu,ae fa’ai’u i Fa’aaloaloga masani,na tapenaina lava e le Ulugali’i Fou,o la matua ma Aiga na Lua,aua le Ofisa Fai Fa’aipo’ipoga ma le Aufaigaluega Folafola o le Talalelei,aetainane Samoa Potopoto.To’oto’o o le Aulotu,feagai lea ma le Fofoga o le Alataua ma Sa Asomua,Tofa Tu’uu Fa’atoafe,Susuga i le A’oa’o Fesoasoani.Tali fuaitau le Susuga A’oa’o Fesoasoani ia Lemalu,e fai ma sui o le Auvala’aulia,ma le Aufaigaluega a Le Atua,e molimoli le agaga o le Fa’afetai,i le matagofie o fa’atinoga uma aua le Aso Fiafia o le afioga ia Muagututi’i po’o Toleafoa ma le Afioga ia Tu’uamaleulua’iali’i.Na fa’ai’u ma Taualuga i se Fiafia na faia i le Faleaiga”Le Montage Restaurant,i Lilyfield,e amanaia ai le to’atele o Uo ma Pa’aga a le Ulugali’i Fou,aemaise tagata iloga i Ausetalia i ta’aloga,aufaipisinisi,ma masaniga i galuega.Tula’i le afioga ia Gisa,e fai ma Fofoga o Sa Alaalatoa,i le Fa’atamali’i,aua le So’otaga ma Gafa o Aiga Samoa,tali fuaitau le Afioga i le Alaalatama,Ututa’aloga Fata Fa’a Vaoga,e molimoli le Fa’a Tamali’i,a le Susuga ile Toeaina,Faletua ma le Papa o Gato’aitele.O matua o le Ulugali’i Fou.Afioga Gisa Vili ma le faletua ia Emma Alaalatoa,ma le Susuga i le Toeaina Fa’atonu,Malifa Taeipo ma le faletua ia Sitaua Malifa.O Itu Taulagi o le Ulugali’i Fou,Fasito’o Uta,Sapo’e,Matatufu,Luatuanu’u ma le Alalafaga i Afega.Fa’amanuia Le Atua i le Amataga fou o le fanau,ia Alan Emani ma Filoimalo A’aone Alaalatoa.


TALA I TA'ALOGA

Stephen Crichton’s parents

I se feiloa’iga a Ta’aloga a le Talafou ma matua o Stephen ma Christian Crichton,i le vaiaso ua tuana’i atu,le Susuga i le Fa’afeagaiga,o le Assembly Of God-AOG i Rooty Hill,Susuga ia Va’a ma le faletua ia Gogosina Crichton,na maua ai le avanoa,e fa’asoa ai i le tele o Tusitusiga i Nusipepa,Leitio ma Televise,e uiga i le lumana’i lata mai ta’alo o Stephen. Fa’amatalaina e i la’ua le Alofa ma le Agalelei fa’aauau o Le Atua,ua mafua ai ona sologalelei ma tau lau o fa’amoemoega,o nai fanau,aua o le auga lava lea ma mafua’aga,na tuua ai Matua,Aiga,Nu’u ma Alalafaga,le Atunu’u aemaise Ekalesia,ina ia maua se lumana’i manuia mo fanau ma Aiga.Saunoa le faletua o Gogosina,o le fa’amuamua o A’oa’oga,ae le’i fa’atamala i le fa’atauaina o taleni,ma agava’a ese’ese na la maitauina,isi a la fanau a’o tuputupu a’e,i le taunu’u ane i Niu Sila,aemaise ina ua tulauele’ele i Ausetalia nei.Molimauina e le Susuga i le Faifeau ma lona faletua,le mamafa o le fa’amuamua,o le tapu’eina o le fanau i totonu o le Lotu,ia latou manatua pea le Alofa ma le tausiga a Le Atua,i o latou olaga tuputupua’e,aemaise ua motu ma le taula,ina ua lilo atu nai Tuaā,sa faia le tu’ualalo,i fanau ma a latou fanau,a’o fesaga’i ai i totonu o Aiga ma Alalafaga.Saunoa Va’a,o le Fa’avae Mautu,o Aiga Samoa,o le Lotu ma Le Atua,mafua’aga lea na u’unaina ai,nai o la alo tama matutua e to’alua,e le gata i A’oa’oga,a’o le fa’aulufale nisi taleni,e manatu i la’ua,e aoga e tautua ai le Lotu ma le galuega tala’i a Le Atua.O Fa’amanuiaga e ala mai i Ta’aloga,ua tulaga lelei ai Christian ma Stephen,e le’i faigofie aua e tele lu’itau,na feagai sa ono fa’ava’atu’ia ai le taunu’uga,ua i ai nei,pe ana le seanoa ma le fa’atonutonu folau,a le Mana Tu’umumusu ma le Ta’ita’iga a Le Atua.O le vala’auina o le Susuga a Va’a ma Gogosina,la te limata’ita’ina,ma Fa’aulu’ulu i ai Au Talavou a le Assembly Of God,i totonu o Niu Sa Uelese,o se tasi lea o moemitiga,ina ia fesoasoani tele i le tapu’eina o fanau lalovaoa,ma Tupulaga talavou Samoa,o lo’o soifua a’e i Niu Sa Uelese,aetainane Ausetalia.Se tasi o matafaioi faifaipea a le Susuga Va’a ma lana Autalavou,AOG Rooty Hill,o le fafagaina lea o nai tagata ua leai ni Aiga,ma ni fale e nonofo ai,ae ua avea lalo o Auala Laupapa,i le Taulaga i Sini,ma o latou Lafitaga.O afiafi o Aso Faraile o vaiaso ta’itasi,e fa’atino ai lea galuega fesoasoani,ta’ua fo’i,ua i ai nai alo Samoa,ua a’afia ai i lenei o tagata leai ni Aiga,o lo’o taumafai le Susuga ia Va’a,e fa’asufi lenei alo Samoa,e toe fo’i i le Aiga ma le Lotu.

11 views0 comments

Recent Posts

See All

Comments


bottom of page