top of page
Search
  • Writer's pictureMaulolo Fata Ueligitone Malifa

Tala i vaifanua o Sini NSW Ausetalia 10 Oketopa 2021

MALO SAMOA MA LE “PANDORA PAPERS”

Ua toe laumanu’ia a’e fo’i le “Suafa Pele” o si tā atunu’u ‘Samoa’ i Ripoti o Tupe teu fa’ananā, ma fa’aaogaina i ai le igoa o Samoa, e aunoa ma le silafia e tagata lautele, aetainane le mamalu o le

atunu’u. O le po o le Aso Gafua ua mavae atu, 4 Oketopa 2021, na fa’aalia ai e le Fale Televise ‘ABC Ausetalia’ i lana Polokalame masani, ua fa’aaogaina “4 Corners po’o Tulimanu e 4” i Ausetalia nei ma le Lalolagi atoa mo le 40 minute, se Sailiga ma Su’esu’ega o Fa’amatalaga fa’alilolilo fa’ananā tau Teugatupe, e alofaga i ai le totogiina o Lafoga a le to’atele o tagata Milionea o le Lalolagi, o Ta’ita’i o Malo pei o Palemia ma Peresetene, o Milionea i Taleni

Fa’afiafia ma Ata Tifaga, aemaise le Au Mauoloa i atunu’u Asia, pei o Saina,Singapore, Rusia ma atunu’u Aferika, o lo’o teu fa’alilolilo tupe mai le silafia o Tagataānu’u. po’o le“Tax Evasion”

O lenei Su’esu’ega faigatā ē ono lamatia ai le soifua, sa galulue ai ni Tusitala Ese’ese Iloga o le Lalolagi mo se taimi umi, ua fa’aigoaina o le “Pandora Papers” A tōmanatu le Mamalu o Samoa, le alia’e mai i le tausaga 2018/2019 o le Suafa o Samoa ī se isi fo’i fa’afitauli fa’apea e tā’ua o

“Panama Papers” O le fa’aaogaina o le igoa o Samoa i nei Aiaiga ma Faiga Fa’a Pisinisi Teugatupe Fa’aālatua Fa’ananā, sī o tā atunu’u to’aiti’iti ma to’agaogao, ua nā o se mātogi i le Fa’afanua o le Lalolagi,ua avea ai Samoa ma se atunu’u e māofa ai MaloTetele o le lalolagi, i le faigofie ona matala ana Tulafono ma Aiaiga Fa’a Pisinisi, e ofi atu ai Tagata Fai Pisinisi Ese’ese o le Lalolagi, e aunoa ma le silafia e le Malo Samoa, le fa’apogai e maua ai ā latou tupe ma le

Tamaoaiga, ma Resitalaina ā latou Kamupani ma Pisinisi i totonu o Samoa. Fa’amatalaina e le “4 Corners” o le vaitau o le 1980 aga’i atu i le 1990, na o’o atu ai le ali’i Tausi Tusi (Accountant ) Ausetalia e suafa iā Graham Briggs, ma soalaupule ma le Faiga Malo a Samoa, i le fa’aaogaina o le Suafa o Samoa i Sisifo (Western Samoa) mo le Resitalaina o ni Kamupani mai Atunu’u i Fafo (Off Shore Company) e aunoa ma se fa’atuina o ni Ofisa va’aia i lo tatou atunu’u. Mulimuli

ane ua tofia aloāia e le Malo Samoa Graham Briggs, e avea ma ona Konesula Aloa’ia (Honorary Consular ) i Singapore ma le Atu Asia, fa’apea le fa’atuina o lona Ofisa i Apia, Fa’aigoina “Samoa Asiaciti” Fa’amatalaina e le Tama’ita’i Ofisa Sinia (CEO) sa galue i lea vaitaimi, To’oto’oleāava Dr Fanaafi Aiono-Le Tagaloa, i le “4 Corners” e 10,000 afe Kamupani Ese’ese o le Lalolagi na fa’aaogaina le Suafa o Samoa i Sisifo, e avea ma Resitala ai ā latou Pisinisi, o nei Kamupani uma, ē lē o toe aloā’ia ma āmana’iaina e Fa’aputuga Tupe Tetele o le lalolagi, pei o le “World Bank, Faletupe o le Lalolagi, European Union, Iuni a Europa, Asia Development Bank, Faletupe o Ati’ina’e o Asia” ma isi Fa’aputuga Tupe Iloga o le Lalolagi. Se tasi o vaega mautinoa na tā’ua e le “4 Corners po’o Tulimanu 4” i le mafuaāga o nei Teuga Tupe Fa’ananā, ia fa’ase’e atu i ai le Tamaoaiga ma Tupe maua a Ta’ita’i o Malo, e aunoa ma se fa’ailoaina o igoa ma le aofa’iga o

Teugatupe. Saunoa To’oto’oleāava mai lea vaitau, sa le’i mautū le tapenaga a Samoa i Tulafono e malupuipuia ai nei faiga Fa’a Pisinisi Fa’aalatua ma Fa’ananā. Fa’aalia fo’i e le Ofisa o Lafoga Ausetalia (ATO) o lo’o ua su’esu’e toto’a ma mata’itū lenei a’afiaga o Samoa, i le Fa’aaogaina o ana Taotoga Tulafono Fa’a Pisinisi a Tagata mai Fafo, e teu fa’ananā ai le Tamaoaiga e tauala mai i le ‘afu liligi’ o Tagata Lautele o se Atunu’u. E $62 miliona tala Ausetalia le Tamaoaiga o le ali’i Su’etusi Ausetalia o Graham Briggs, mai le “Asiaciti” pei ona fa’atuina i Apia Samoa. O Singapore o lo’o i ai le Ofisa Autū o le “Asiaciti” i le taimi nei, ona e faigofie ona fa’atinoga o galuega Fa’a Pisinisi, aemaise ana Aiaiga fa’ale tulafono e nanā ma fa’aufiufi ai igoa ma tala’aga o i latou e ana Teugatupe. A’o le fesili e tula’i mai, “E fia ni miliona a le Atunu’u o Samoa, na mauaina mai i le fa’aaogaina o lona igoa “Samoa” e nei Kamupani, ina ia nanā ma fa’alilolilo ai ā latou Tupe maua mai Lafoga Totogi ī o latou atunu’u.

Fa’amatalaina e le Ofisa o Lafoga Ausetalia, i le talanoaga ma le “4 Corners” e lē tatau ona a’afia Samoa o se atunu’u la’iiti’iti i nei Teugatupe Fa’ananā Fa’aālatua, ae tu’uina atu mo ona Tagataānu’u.


DISADVANTAGED STUDENTS DO BETTER AT UNI:STUDY

O se Su’esu’ega lata mai i A’oa’oga Fa’a Iunivesite, pei ona Ripotia e le Tusitala o A’oa’oga a le Sydney Morning Herald, Jordan Baker Aso Lua na se’i mavae atu, Fa’aalia ai le sili atu le maualuga o fa’ai’uga fa’ale a’oa’oga a nai alo ma fanau, mai Aiga e maualalo ma vaivai le

Tamaoaiga, pe ā fa’atusatusa i tama ma teine, ma’i latou e malosi ma lelei le seleni maua ā ō latou Matua. Tā’ua fo’i le ma’ai ma le to’a o le mafaufau aetainane le agava’a ausia o alo ma fanau ia, i le ulufale atu mo le tausaga muamua i le Iunivesite, e ui e uti’uti le Tamaoaiga ī ō latou Aiga. Fa’aalia e le Tino Fa’a Iunivesite o le “University Admissions Centre” i le maitauina o Su’ega, le tulaga tutusa o fa’ai’uga o Su’ega a fanau teine, fa’apea fanau mai Aiga o ‘Tagata Muamua’ o Ausetalia po’o ‘Indigenous’ i le Su’ega o le “Australian Tertiary Admission” ma A’oga Maualuluga ma Kolisi a Niu Sa Uelese, fa’apea le Tausaga Muamua i le Iunivesite. Ae peita’i pei ona fa’amatalaina e le Ripoti, e fa’ava’atu’ia lava le taumafai a nai fanau mai Aiga vaivai ma lē a’ua’u le Tamaoaiga, ona ‘ausia le Vasega 12 ma ulufale atu i le Iunivesite, fa’atusa i fanau mai Aiga e maualuga le Tamaoaiga. E matuā tā’ua le lava tapena o fanau, ia lē gata i le Tamaoaiga tau tupe, ā ia fa’asilisili le lagolagosua ma le talitonuga o Matua, o le fa’apogai o se Lumana’i manuia mo so’o se tama ma le teine, o A’oa’oga. Manino i lenei Su’esu’ega le lagona fa’aosofia lelei o fanau i totonu o Iunivesite, auā ua se’e ese mai Kolisi ma Aoga Maualuluga sa tāofiofi, le tatala atu o mafaufauga ma agava’a o fanau, auā o le avea ma se tagata A’oga fa’a Iunivesite, o lou lava lagona tau’ivi, taumafai ma le sailimalō, e fa’aosofia ai le naunauta’iga e fa’atino saili’iliga i meaāoga, aemaise le lagonaina e le tama ma le teine talavou, le galuega alofa moni a nai Matua e alausu atu i galuega, i le tausaga atoa. Fa’aalia e le “Australian Tertiary Admission Rank le fa’aopo’opo pea o fa’amanu’iaga e solo atu mo fanau a Tagata Muamua Ausetalia

(Aboriginals ) ae matuā fa’amoemoe tele i le fa’aaogaina tatau mo Tusi Aoga ma Mataupu tau le a’oa’oga. Saunoa le Perestene Tino Pule A’oga i Niu Sa Uelese, Graig Petersen, o Matua e lava le Seleni ma le Tamaoaiga, ua silimusa ona tele lo latou fa’atamala i le va’aia ma lagolagosua i a’oa’oga a le fanau, nai lo le tamā ma le tinā e tau fa’asoa le tupe maua, ae silisili ona fa’aosofia pea i lagona sailimalō, mo se leleiga o a’oa’oga a le fanau, ia āua ne’i falōlō ma tau saili se

lumana’i.


SHOCKING SYDNEY ROAD TOLLS BURDEN

Fa’ateia le Ta’ita’i o le Vaega fa’aupufai a le Labor Niu Sa Uelese, o Chris Minns, Faipule mai Kogarah, i le mamafatū o le totogi o auala (road tolls) mo le mamalu lautele o Sini atoa, tusa ma le miliona i le aso e tasi (1 million tolls a day) a’o i latou ua silisili ona pagātia, i tupe totogi o aveta’avale ma nai Aiga e ala’ala ma nonofo i Sini Sisifo. Ua ta’utino lenei ali’i Faipule o Christopher, o lana Anavatau lea mo le isi Faiga Palota, e fesoasoani ai i le mamalu femalāga’i ma

aveta’avale, ia matuā mauaina se fa’amamā avega maualalo mo le tupe totogi o auala po’o (road tolls) Ua aga’i fo’i lana fa’ase i le ali’i Ta’ita’i Fou (Premier) Niu Sa Uelese, o Dominic Perrotet i lana Tupe Fa’aāgaga o le (WestInvest Fund) e $5 piliona e taua’ao mai i lē isi lima, ae toe a’apa mai ave’ese atu i le isi lima, tauala i le taugatā o le tupe totogi o le auala (road tolls) I le Tauaofiaga Fa’a Palemene a le Setete Niu Sa Uelese i le Aso Tofi vaiaso ua mavae, i lana Komisi Su’esu’e i le totogi o auala (road tolls) fa’amautūina ai le vaega maoa’e e 300,000 afe le aofa’i, o i latou e ala’ala ma nonofo i le Itūmalō Sini Sisifo, aemaise i latou e galulue mamao ese mai o latou

Aiga, le totogiina o se vaega tupe e $9,300.00 tala i le tausaga, mo le totogi o auala (road tolls) i totonu o le 12 masina. Fa’aalia manino e le Ta’ita’i o le Labor, Chris Minns tusa ma le $2.3 piliona tala le tino-i-tupe e totogi e le aveta’avale i tausaga ta’itasi. O lenei tupe tele ua palasi tonu lea i tumua’i o nai Aiga e nonofo i Pitonu’u o Sini Sasa’e, po’o Western Sydney. Fa’amatalaina e le Ali’i Ofisa Sinia (CEO ) o le “Fa’alapotopotoga Fonotaga Tumāoti Fa’a Itumalō a Sini Sasa’e,” Charles Casuscelli, o nai Tagata ua matuā telē le a’afiaga i lenei fa’afitauli, o le Au Totogi Maualalo (low paid-workers) ae taugatā le malaga atu i nofoaga o galuega, aetainane femalaā’iga masani a

Aiga. Tā’ua e le So’oupu, Minisita o Auala a le Vaega Fa’aupufai a le Labour, John Graham, o le mataupu sili lea ona tugā i Aiga e nonofo i Sini Sisifo, o le tau o le auala (road tolls) Ta’utino fo’i le Ta’ita’i Fou le Premier, Dominic Perrotet, o le fatu o lana Faiga Malo, o Sini Sisifo.


FACEBOOK HARMS CHILDREN AND STOKES DIVISION:WHISTLEBLOWER

Ua fa’alauiloa aloa’ia e le Tama’ita’i sa faigaluega i le Kamupani o ‘Fa’amatalaga Sa’oloto, Api o Foliga po’o le Facebook’,Tama’ita’i o Frances Haugen, le maualuga o le a’afiaga ogaoga o fanau iti, fa’apea le ono fa’apogai o le tu’uese’ese, māvaevae ma le tetē’aga o mafutaga, aemaise le lamatia o fanau tama ma teine talavou, ona ua fa’amuamua pea e le Facebook ana piliona ma piliona o ana tupe maua, nai lō le saogalemū o fanau iti, i lona vaai ma tepa ese mai le fa’aaogaina e lona uso ā Kamupani, o le ‘Instagram’ i le fa’a’aliali o ata ese’ese o fanau teine talavou, ua a’afia i le gasegase o le fai’ai, po’o le ‘mental health’ ma ono tosina atu i ai fanau iti e matamata, e aunoa ma le silafia e nai Matua. O le vaiaso ua mavae na fofola ai le Ta’utinoga O’oo’o a le Tama’ita’i o Frances Haugen, i luma o le Maota o Sui a Amerika (US Congress) fa’apea le Komiti o Pisinisi ma

le Tamaoaiga a le Senate (US Senate Commerce Committee) ina ua mae’a le 2 tausaga sa galue ai, o le Pulega o Oloa Fa’atau (Product Manager) a le Facebook. Auili’ili e lenei Tama’ita’i toa ma le lototele le pepelo faifaipea a le Pule Aoao o le “Facebook ma le Instagram” le ali’i o Mark Zuckerberg, le tāofia o ia itūaiga fa’asalalauga e a’afia tele ai fanau iti, ae ua fa’amuamua e Zuckerberg le tafe mai o le tupe mo ana Kamupani o ‘Facebook ma Instagram’ Tā’ua e Frances

Haugen, ua nā o Zuckerberg lava e faia suiga, auā o ia o le Pule Aoao e Pulea le Kamupani i so’o vaega. Fa’amalieina le ‘Maota o Sui’ Congress, ma le ‘Maota Maualuga o le Senate’ a Amerika iā Frances Haugen ma lana Ta’utinoga fofola mai, auā e le’i mamao tele atu le fēsāga’iga a le ali’i o Mark Zuckerberg, ma le Au Fai Tulafono a Maota e 2 a Amerika. Fa’amauina fa’aseā a le Kamupani Facebook aga’i atu i lenei Tama’ita’i, e lē tele sona silafia auā nā o si 2 tausaga

na galue ai i le ‘Facebook ma le Instagram’ Mata’itū ane le avanoa lea ini suiga se tele o lē kea o Mark Zuckerberg ma lana FACEBOOK.


FROM ONE BIG FAMILY TO PREMIER FOR ALL STATES FAMILIES

Na soifua mai i se Aiga to’atele, ua avea nei ma Ta’ita’i Premier o Aiga uma o le Setete Niu Sa Uelese. O le fa’amavaega fa’afuase’i a le Tama’ita’i o Glady’s Berejiklian, vaiaso ua mavae atu, ua pale mai ai le ali’i Faipule Lotu Katoliko 39 tausaga, Dominic Perrottet nate limata’ita’ina le Setete Niu Sa Uelese seia aulia le isi Faiga Palota. O Dominic Perrottet o le Ta’ita’i o le Vaega Fa’aupufai a le “Liberal Party” Niu Sa Uelese. Na fa’atautoina i le Aso Lua 5 Oketopa,2021, o

le Sui Faipule mai le Itumalo Palota o Epping, Sini Matū, Niu Sa Uelese. Saunoa Perrottet le fia avea o ia ma se Premier po’o se Ta’ita’i o Aiga, lona lagona lea ina ua mae’a lona filifiliga e le Vaega Fa’aupufai a le Liberal Party. E tele matāfaioi ese’ese i lalo o la’u Ta’ita’iga, ae o la’u fa’amuamua o le atiinaa’e o Aiga manuia, ma ia fa’aaogaina o avanoa, o moemitiga ma le galue punoua’i. E lē matuā faigatā ona mate’ia auā na soifua a’e Domonic Perrottet i se Aiga e to’a 11 le fanau, ae to’a 6 ona alo ua i ai nei, to’a 5 afafine ma le atali’i e to’a 1. Se tasi o ana saunoga i le tausaga 2019, na fa’apea ai o se fa’alogona fa’agae’etia le ola a’e i se Aiga to’atele. Na mua’i

filifilia o se Teutupe ma le Sui Ta’ita’i iā Ianuari 2017, ina ua mae’a ona avea ma Minisita o Tupe ma Auaunaga Ese’ese i le 2014, soso’o ai ma le Minisita oTupe, Auaunaga Ese’ese ma Fanua 2015. Toe filifilia Sui Ta’ita’i o le Liberal Party iā Mati 2019. Ta’utino Perrottet se tasi o ana fa’amuamua, ia toesea le sili atu i le $10 miliona tala na fuafua mo le Taulaga Fa’apisinisi i Sini CBD, ae fa’aāgaga mo le Pitonu’u o Sini Sisifo, ma fa’amautū ai le fa’amuamua a le Faiga Malō

i Western Sydney, aemaise le vaai mamao mo le Faiga Palota 2023.

Na soifua mai i le Aiga Katoliko Lotu Pope, sa avea ma Kapeteni o le Aoga i le Vasega 12, i lona tausaga fa’ai’u i le Kolisi o ‘Redfield College’ Ta’utino le Premier o Dominic Perrottet, o le fa’amanui’aga ua taunu’u i ai lana Polokiki, ona o lona Talitonuga Fa’ale Fa’atuatua ma le Lotu, aemaise a’oa’oga na fa’afaileleina ma fa’a’auūpegaina ia.


TA’ALOGA: SONNY BILL WILLIAMS-you can’t stop the sun from shinning.

“E le mafai ona e taofia le oso a’e pea o le la” “You can’t stop the sun from shining” O le fa’aulutalaina lea o le “Tusi Ta’aloga” o le tala’aga, o le soifuaga ma le ola ta’alo o le alo ta’utā’ua i ta’aloga Samoa, Sonny Bill Willams po’o SBW, tusia e le ali’i Tusitala Maori, o Alan Duff. Fa’amatalaina i le Tusi se tasi o uiga po’o se amioga ofo’ofogia i le olaga tuputupua’e o lenei alo o le atunu’u, o le fa’atumauina o lona naunauta’iga e fa’amalositino, ma fa’atino ana koleniga mai lava i lona tamaiti’iti. Ua silafia uma e le to’atele e fiafia i Ta’aloga, le tele o taleni ma agava’a o SBW, na ati’ina a’e ma tapu’e i lona tupua’e o le fa’avae mautū lea o lona olaga ta’alo, na fatufatu

a’i lona ulufale atu i le maualuga o Ta’aloga lakapi fa’a Porofesa, ma avanoa fesoasoani na tauala mai i Faiaoga Fa’apitoa mo le si’isi’I pea o lona malosi ta’alo mo le Lakapi Liki-NRL, fa’apea ina ua filifilia i le All Blacks, aetainane ana taleni ma agava’a i fusu’aga ma faipelega.

Fa’amatalaina e SBW lona olaga talavou i A’oa’oga ma Kalapu ta’alo sa talavou fo’i le mafaufau, tele a’afiaga o le olaga sa fa’ava’atu’ia ai lana fa’atinoga, ua tagata matua ua telē fo’i suiga o le isi la’asaga o le soifuaga, auā ua fa’aipo’ipo ma fai le to’alua ae tainane le tausiga o le fanau ma le Aiga. Fa’aalia manino e lenei alo Samoa, o le vaega ma le la’asaga silisili ona maoa’e i lona soifuaga atoa, se’ia aulia le taimi nei, o le “Malamalama Susulu o Le Atua i lona olaga, mafua ai

le si’itia maualuga o lona Fa’atuatuaga i lona Matai i le lagi. Ta’utino SBW le taimi na matuā mana’omia ai sona Tusifolau Samoa, ina ua savali ese mai Ie ‘Canterbury Bulldogs’ ma le Lakapi Liki NRL, ae saili atu i Europa mo se avanoa e fa’aauau ai ana taleni ta’alo. Na te lē fa’agaloina le Kapeteni a le All Blacks, alo Samoa, o Tana Umaga.


WORLD RUGBY XV-SUPER CHAMPIOSHIP 2021 RUGBY

I le mae’a ai o le Ta’amilosaga Siamupini Supa Lakapi 2021, a atunu’u e 4, Ausetalia, Aferika i Saute, Atenetina ma Niu Sila i le vaiaso ua mavae, 4 vaiaso soso’o o maimoa Kuiniselani ma Ausetalia aemaise le Lalolagi atoa i lenei Ta’amilosaga, mo se taimi muamua, ua fetaui ai nei Au Lakapi Iloga o le Lalolagi, aemaise le ogatotonu o le feagai ai o le Lalolagi ma le Fa’ama’i COVID-19. Fa’amalieina le Tino Lakapi Iuni Fa’a Tinā o le Lalolagi po’o le World Rugby, i taleni

lakapi fa’aalia a le Wallabies, Springbox, PUMAS ma le All Blacks, aemaise le fa’aauau pea o le fa’alauiloaina o le Lakapi Iuni i totonu o Ausetalia nei, auā e pito i luma le Lakapi Liki NRL, soso’o atu Lakapi Ausetalia-AFL, Ta’aloga Kirikiti, Ta’aloga Soka ma le Netball, fa’atoā taotaotua atu ai le Lakapi Iuni. O le toe fo’i mai o le fa’atinoga lelei a le Wallabies i alo o le Ta’ita’iga a le Faiaoga Niu Sila, Dave Rennie, o se molimau maumatūtū lea o le suiga fou ua va’aia nei i le Wallabies.

Matagofie manumalo soso’o e 2 iā Aferika i Saute ma le 2 i le PUMAS mai Atenetina. I le mae’a o le Ta’amilosaga, ua filifila ai e le Lakapi a le Lalolagi-World Rugby se Au Lakapi Tu’ufa’atasi mai nei atunu’u e 4 To’a 6 Wallabies, to’a 5 All Blacks, to’a 4 Springbox, leai se sui-PUMA To’a 2 alo Samoa ua filifilia mo lenei Au a le Laolagi, Ardie Savea (8) ma Akira Ioane (6)

Ua malaga atu nei le Wallabies ma le All Blacks mo ana malaga ta’amilo i le Itū-i-Matū Peretania mo le isi 5 vaiaso.

Alo nei o Samoa ua filifilia mo le Wallabies: Allan Ala’alatoa, Pone Fa’amausili, Robert Leota, Pete Samu, Will Skelton, Lenny Ikitau, Hunter Pa’isami, Izaia Perese ma Jordan Petaia.

Alo nei o Samoa ua filifilia mo le All Blacks: Asafo Aumua, Nepo Laulala, Angus Ta’avao, Akira Ioane, Dalton Papali’i, Ardie Savea, Rieko Ioane ma Anton Lienert-Brown. Ua toe taliu Patrick Tuipulotu i Niu Sila, mo sona fa’amoemoe fa’ale Aiga.

Wallabies e ta’aalo ma Iapani-Aso To’ona’i 23 Oketopa i Tokyo, 3.45 i le aoauli, ona malaga lea i Peretania mo ana ta’aloga e 3 ma le Au a Sikotilani, Aso Gafua, 8 Novema, 1.15am, Egelani Aso Sa, 14 Novema 4.30am, ma Uelese Aso Sa, 21 Novema 4.30 am All Blacks e ta’aalo ma le USA Eagles i FedEx Field, Washington DC, Aso To’ona’i, 23 Oketopa 2021, 6.30 am. Malaga lea i Peretania mo Ta’aloga ma Uelese (Wales) Aso Sa, 31 Oketopa -3.15am (Cardiff ) Italia Aso To’ona’i, 6 Novema 10 pm (Rome ) Aialani (Ireland) Aso Sa 14 Novema, 2.15am (Dublin ) fa’ai’u iā Farani Aso Sa 21 Novema, 7.00am i le Malae ( Stade de France )

9 views0 comments

Recent Posts

See All
bottom of page