E! UA MALILIU TOA, UA MA'IMAU AI AU'UPEGA O LE TAUA!
TU'UMALO LE AFIOGA I LE FALETUA IA -
"UPELI TALAOPATINA ENARI- LAMOSITELE TAVITA SIO"
O SAMOA MA LANA AGANU’U….E MAMAPO I MAMALU E AFUA MAI I FUA O TO’ALA FA’A’AUTAMA SAUA I ANUFE MA SUA A’ALU O FATUMANAVA MAUA TA E….E A LE TU…..E A LE TU LAVA A IFOIFO SE TAGATA….TA LE USO…..TANU I LE PALAPALA
LE ELE’ELE LENA O LONA GAFA, MA LONA FA’ASINOMAGA LE FA’ATUFUGAGA E LALAGA AI PAIA, MA SA O LONA TAMALI’I’AGA O LE MAMALU TAU’AVE LENA O LONA ANOFALE MA ANOFALE O LONA SI’OSI’OMAGA A MALAMALAMA LE TAGATA SAMOA I ONA MAMALU, MA ONA TAMALI’I’AGA O ONA PAIA FA’ALUPE, MA ONA TAULAGI ONA AVEA LEA MA TAGATA FIAFIA, FA’AALOALOGIA, SA’OLOTO MA
TAUSA’AFIA.
O le ta tonu o le itulā e 4 i le aoāuli o le Aso Lua, vaiaso ua tuana’i atu, 7 Tesema 2021, na valaau ai Le Atua i lana Auauna, le Faletua, le Tina, le Tama’ita’i po’o le Tuafafine o “Iupeli Talaopatina Lamositele Nuafesili Tavita Sio” po’o Tina lona Suafa, ua silafia ai e le to’atele o Samoa i Ausetalia nei. Ua fa’amae’a e Le Atua ana galuega i le ola ma le soifuaga nei.
Na soifua mai Iupeli Talaopatina i le Aso 22 o le masina o Aukuso, tausaga e 1960, i le Ala’alafaga o Utuali’i i le Tuamasaga, a’o galulue Faifeau ai ona Matua, Susuga i le Toeaina o Sarasopa ma le faletua o Aitaua Enari, o le Matagaluega a Malua. O Talaopatina o le lona 9, o le fanau e to’a 10, a’o ia fo’i e la’iiti’iti o teine. Fa’amatalaina e si ona tuagane, le Susuga i le faifeau o Soti Enari, o si ona tuafafine o se tagata sailimalo, o fuafuaga uma nate fa’ama’ite, e naunau lava Talaopatina ia taunu’u, o se tasi e tausimea, e tau’ave ona manatu ma lona fa’amoemoe maualuga, ia fa’atumu ai avanoa, ina ia atoa le fa’atinoga mo se leleiga o tagata uma. “She retains a standard, wanting the best above all in all things” according to Reverend Soti Enari.
Fa’aalia e se tasi o Tiakono EFKS, o le Faletua iā Talaopatina, o se Tama’ita’i Samoa e tumu i le fa’aaloalo, agamalū ma uiga tausa’afia, so’o se taimi e feiloa’i ma talanoa ai. I le mae’a ai o
A’oa’oga Tulagalua, ona soso’o ai lea o se teine A’oga i Leifiifi Intermediate School i Malifa. Na fa’aauau ana A’oa’oga ina ua malaga i Niu Sila, ma avea ma teine A’oga i le Wellington East Girl’s College, i le Laumua i Ueligitone. Soso’o ai lea ma le avea ma se Tama’ita’i faigaluega i le Nusipepa o le “Evening Post” O le tausaga e 1986 na tu’ua ai Ueligitone Niu Sila mo Ausetalia, mo le lagolagoina o si ona tuagane ua amata lana A’oa’oga fa’a Iunivesite i Sini nei. Na feiloa’i ma fa’aipo’ipo atu i le Susuga a Tavita Sio, po’o le afioga iā Nuafesili Lamositele, o se Tamali’i Fai Pisinisi Samoa, a’o se sui muamua fo’i o le Manu samoa, i le tausaga e 1989. E to’a 4 nai o lā
alo, o Scott, Patrick, ma le masaga teine o Analise ma Talaopatina. Le ali’i o Scott Sio o se sui tumau o le Wallabies a Ausetalia, ua latalata nei i le 10 tausaga. A’o i ai ī Niu Sila, sa avea ma se sui Autalavou, fa’apea le Faiaoga Aso Sa i Ueligitone, a’o se tama’ita’i o le “Festival Singers a Niu Sila” Sa avea ma tagata lotu i le Samoan Uniting i Lidcombe. E fa’amanava e Le Atua galuega a Iupeli Talaopasina, ua liliu atu i le Tapuaiga Katoliko i Saint Joachim, John Street, Lidcombe.
Sa tele le sao o lenei Faletua i nisi o Fa’alapotopotoga Samoa i Sini nei, pei o le “Matron-Fa’atina” o le Marist Samoa Sydney, fa’apea le galue o le Failautusi a le Mafutaga a le afio’aga o Vaiala, Ulalei-Sydney. E le iti’iti le tautua a lenei faletua iā Samoa ma ona tagata, tauala i le lā Pisinisi o laei ma meataulima Samoa, fa’apea le lafoina o tupe fa’amomoli isi ō tatou atunu’u i Samoa, aemaise le tele o isi Auaunaga ese’ese mo tagata Pasefika.
O Suniga Fa’ale Aiga po’o le Family Service, mo le faletua o Iupeli Talaopatina Lamositele Luafesili Tavita Sio, o le a fa’ataunu’uina i le Saint Joachim, i John Street, Lidcombe i le Aso Faraile nei, itulā e 5pm i le afiafi.
Sauniga Fa’amavae po’o le Funeral Service, itulā e 8am i le taeao o le Aso To’ona’i.
*Ua lagia ai nei Sagameauta, e afio ai Aiga Satuala ma la outou Tama
o Muagututia. Afio mai Taimalieutu, Fofoga o Satuala. Susu Tanuvasa na Itulua ai A’ana, o le Laau na Fausia. Maliu mai le Falea’ana.
*Lagia Falefatu e afio ai Tofaeono le Matua, Afifio Patu ma Asi. Maliu mai oulua na Ta’i, Tamapua ma Manogiāmanu. Ma le Nofo-ituaiga iā Fuata.
*Lagia fo’i Malae o le Toto’a ma malae o le A’ava, Lagia Lepā ma Feu’u, e afio ai Fa’aolotoi ma le Ma’upu Taulagi. Sa’otā ma Alaalamalae. Afifio Tago ma Tupuola. Maliu mai oulua Punefu, o
Auelua ma Fatialofa. Le Faleatua ma Salefao.
*Lagia fo’i Sinave ma Ulumato’otua. Afio ai Seumanutafa o le o Alo Sina. Afio mai Salevalasi ma le Matua. Susu le Aiga Sa Malietoa. Maliu mai le Faletolu ma le Vainalepa.
*Ua lagia Niuvai ma Mata'ale e afifio ai Luatuanu’u ma le Ma’upu o Matiu.
Afio le Aloali’i o Luafalemana. Maliu mai oe le Uso, ma oe Si’ufanua ma le Faletolu.
*Lagia fo’i Si’umo’o ma Vaioa, e afifio ai Tama Fa’asisina.
Taofia le Malietoa Taulapapa ma e na Au-i-Ao. Afio le Aloali’i.
Afifio Usoali’i taua.
Maliu mai Saleutogipo’e, o le Lima Matua o Faleupolu e fa.
Le Paia e o Aiga na lua, Ua goto ifo i le moana le tifa e tumu i Penina tautele, Ua oto nei le moemoe o le Fuesina, Ua mafuli fo’i Lago’ele o Aiga. Le Tinā sa tu i Matagiolo, auā le Aiga, Nu’u ma le Ala’alafaga, le Atunu’u o Samoa, aetainane ana Ekalesia.
O lana utaga fetalai, ma lana Tofā fetu’utu’una’i, afua ai ona taoto i lagatonu.
So’o se to’atugā, ma lafo ai i le auau o le vasa tele ni fa’aletonu Talofa e, Iupeli Talaopatina, sa e fōalamea pe a lutaluta le gataifale i totonu o le Aiga.
Sa e sisi le lā afa ma le pa sina, ae ā le pa taulafo, e lē tau fa’afuluina O lau tu’uālalo ola fa’a Tinā, na mitamita ai Lamositele Nuafesili, i totonu o le Aiga, Nu’u ma le Ekalesia.
Ua manatua i le loto le tagi fesaea’i a le Tama’ita’i Salemuli’aga Taputūtagitele ma fasa i ona Aiga, ona o le Alofa fa’a Tinā Le Lupe sa olo i Falefatu, Niuvai ma Mataale, Lepa, ma Ulumato’otua, ma Malae o le Toto’a ma le A’ava,
UA TO PULE I AI LE ATUA. - IA MANUIA LAU MALAGA
"IUPELI TALAOPATINA LAMOSITELE NUAFESILI TAVITA SIO."
Alofa’aga mai le Fa’atonu, Ali’i Fa’asalalau ma le Alaleo Fofoga Mo’omia o Samoa
MIGRANTS-ANSWER TO SOLVE WORKFORCE NEEDS
O taqata mai isi atunu’u po’o (Migrants) ua malaga mai ma le fa’amoemoe maualuga, o le fia avea o Ausetalia ma o latou Aiga ma nofoaga tumau po’o (Permanent Residents ) o le tali moni lea ma se
fōfō, i le fa’afitauli ua loa ona tula’i mai i le fa’aiti’itia pea, o tagata galulue i le tele o vaega ese’ese, o lo’o mana’omia vave ona fa’atumu i galuega i Ausetalia nei, pei ona fa’alauiloa aloa’ia e le ali’i Minisita o Galuega, Stuart Robert i lana saunoaga i le Tauaofiaga a le Au Fai Pisinisi Ausetalia (Business Council of Australia) i le Aso Lua ua mavae atu, pei ona tusia e Ashleigh Gleeson, o le Daily Telegraph. Ta’utino le Minisita i ana Fuafuaga Fa’ataoto, a le Faiga Malo a Scott Morrison, ina ia tatala ma fa’alautele le aofā’iga o tagata galulue, i tomai ma agava’a ese’ese taualoa, e tauala i le fa’aauauina ‘A’oa’oga Pupu’u’ i Iunivesite, fa’apea a’oa’oga a le ‘TAFE’ mo le si’itia o le atamai lelei mana’omia, o tagata malaga mai (Migrants ) mo ni Tusipasi Taualoa,
i galuega tonu o lo’o fia maua ai ni tagata faigaluega mo se taimi umi, o le tali atu lea i le fa’afitauli ua loa ona feagai ma Ausetalia, ae na toe si’itia maualuga i le taimi nei, ona o le Fa’ama’i COVID-19.
Fa’aalia e le Minisita le manino o le ese’esega tele, o le ‘tali atu i le fia maua o ni tagata galulue, ma le mana’omia moni o ni tagata faigaluega’ (the divide between ‘supply and demand’) Pitonu’u
ese’ese uma o Ausetalia. Fa’afiafiaina fo’i le Faiga Malo a Scott Morrison, i lona maitauina le vave ona talia gofie e tagata mai isi atunu’u, a’oa’oga Fa’a Iunivesite ma le ‘TAFE’ ona o le maualuga o ō latou agava’a fa’apitoa, e aga’itonu i avanoa galue o lo’o fia fa’atumuina, aetainane le televave ona fa’amanuiaina ai ō tatou tagata i ni Tusipasi Taualoa, auā o lona ese’esega tūmātilatila lava
lea mo le Lumana’i. Tā’ua e le Minisita, o le fa’atumutumuga ia maua se galuega, ae lē nā o le fa’atalitali i galuega, pei ona malaga mai ai ō tatou tagata mai Samoa ma le Pasefika, ae tu’utu’umamao le fa’autautaga, ma lafo le ‘upega i le ogasami loloto’ mo se galuega e
tumua’itutusa ma ou agava’a, ma le taleni o lo’o tanutanu pea.
A STRIKE TO THE HEART-city chaos as hundreds of workers walk off the job
Na molimauina le femēmēa’i ma le lē mautonu o le sefulu o afe ma afe o le faitauaofa’i, o le mamalu lautele femalāga’i o Pitonu’u uma o le Taulaga o Sini i le vaiaso ua tuana’i atu, ina ua savavali ese le Au Avepasi, Ave Nofoaāfi (Busses/Train Drivers) Faiaoga ma Pule Aoga, i le fa’atinoga o le latou Solo Tete’e atu i le Malo, aemaise Pulega o Kamupani Pasi ma Nofoaafi, i le alagātatau ma le talafeagai o le si’itia maualuga o ō latou totogi. Ua tele a’afiaga o fuafuaga masani a matua ma fanau, aemaise le o’o atu o fanau i faleaoga, fa’apea matua mo falefaigaluega, vevesi nai matua e tau fa’avasega le momoliina o fanau aoga, aetainane le toe a’amiina i le taimi tu’ua o le aoga. O fa’afitauli ia ua fananau mai ona o le ‘Solo Tete’e’ a nai Tagata Faigaluega pei ona tā’ua i luga. Fa’amatalaina e le Tusitala a le Daily Telegraph, James Morrow i le Aso Lua ua mavae, ua leva ona fuafua lenei Tete’e, ae sa fa’atelegese ona o le manatu o le ‘Iuni a Tagata Faigaluega’ i le tautuaina o le mamalu lautele a’o feagai ai ma le Fa’ama’i COVID-19. Manatu le Iuni, e lē o paleni le tausia ma le va’aia lelei o Ave Pasi ma Nofoaafi, aetainane Faiaoga ma Pule Aoga, aemaise le si’itia maualuga fa’afuase’i o le ‘tau o le soifuaga’ ae lē o manatu ane le Malo ma Pulega o nei Kamupani, ia amanaia ma tulaga lelei totogi talafeagai, aemaise ua loa ona fa’atalitali ni si’itaga o totogi. Ua 11 nei tausaga talu ona fa’amatu’u atu e le Malo le fa’atautāia, o Kamupani Pasi ma Nofoaafi i Pulega Tūmāoti po’o le “PRIVATISATION” ae lē o iloga ma aliali mai se naunauta’iga moni, e fai se ‘si’itaga talafeagai o totogi’ mot agata faigaluega, aemaise
lava i latou ua tausagā ona galulue fa’amaoni, i nei galuega tā’ua o le fela’uā’iga o le mamalu lautele i aso uma o le vaiaso, mo a’oa’oga ma Au faigaluega auā le Tamaoaiga o Aiga. Fa’aalia i fa’amaumauga ua 50 le aofa’i o Solo Tete’e talu mai Setema 2021, 11 ua sili atu ai i le taimi lava lenei i le, 2020. Saunoa Mark Morey, failautusi a le Iuni Tagata faigaluega, o le ā tele nisi Solo Tete’e fuafuaina i le lumana’i.
HERE’S THE PROOF NSW CAN WARD OFF ‘OMICRON’
Ua lē o i ai se fa’amaumauga o se tagata ma’i o le COVID-19 i le taimi nei, ua a’afia pe gasegase i le ‘siama pipisi lona 3’ o le ‘Omicron’ pei ona fa’alauiloa aloāia mai e le Foma’i Fa’apitoa o siama pipisi a le Setete Niu Sa Uelese. I le maitauina o fuainumera fa’amaumau o le Fa’ama’i COVID-19 i le lalolagi, ua fa’amanino ai, le aunoa ma se a’afiaga ogaoga o Tagata Lautele i le tama fou o “Omicron” fa’aalia fo’i ua nā o se ‘siama pipisi vaivai’ (mild desease) E le’i fa’ailoaina fo’i
se tasi ua maliu ai, talu ona maua i su’esu’ega fa’a Foma’i, ma le soifua maloloina. Fa’amatalaina e Peter Collignon, Foma’i Fa’apitoa o Siama Pipisi ( Infectious Desease Expert ) mai ana su’esu’ega, o lo’o tumau pea lenei siama i se tulaga maualalo, a’o se itū lelei lea mo i tatou uma. Fa’aalia fo’i e Professor Collignon, o le manua’e o le ‘siama Omicron’ i Aferika i Saute, fa’ailoaina ai ē leai se malosi’aga o le ‘siama’ ua maliliu ai i latou ua fa’atāotolia i Maota gasegase,
aepeita’i e ao lava ona tatou fa’aete’ete ma mata’itū pea ona aluga, auā e le’i leva atu lona alia’e mai. Ripotia e Angira Bharadwaj o le Daily Telegraph, le saunoaga a le Ofisa Sinia Soifua maloloina Niu Sa Uelese, o Dr Kerry Chant i lona lagolagoina o le molimau a Professor Peter Collignon, e 152 gasegase na auina atu i Falema’i, 24 itulā ua mavae atu, 24 i latou i potu o ma’i tigaina, e leai se tasi ua ripotia mai, ua pisia i le siama fou o le ‘OMICRON’ Fa’aaliga mai le ali’i
‘Faufautua Fa’apitoa Tau Siama Pipisi’ a le Iunaite Setete o Amerika, Dr Anthony Fauci, o lo’o fa’aopo’opo pea tagata Amerika o lo’o a’afia i le COVID-19, a’o ni ripoti lata mai, e lē o mamafa se afaina o le mamalu lautele i le tama fou lea o “OMICRON”. Fa’aalia manino e le ali’i Foma’i Fa’apitoa mo Taotoga o Gasegase, o siama pipisi o Paul Griffin i talanoaga ma le Daily Telegraph, fa’ailo mai i saili’iliga, o foliga amata o le maua o oe i le siama “OMICRON” ua e lēlavā gofie
ma le tino ua gagase, o le ā iloa lou tigaina, pe ā lē lagonaina sou fia ta’umafa, ma mou atu lou sosogiina o mea ta’itasi ( loss of taste and smell ) Mata’itū ane pea aluga o lenei o le “OMICRON’
CHINA NEARLY HAD US ALL IN THE DARK
O lo’o fa’aauau pea gaiōiga ma faiga fa’a’alatua fa’ananā, tau fa’amata’u a le Faiga Malo Komunisi a Saina, aga’i atu i le tele o Atunu’u o Faiga Malo Fa’a Temokarasi pei o Ausetalia. Meāmanū se vaega o Kuiniselani Ausetalia, e pogisa ma pēpē uma ona molī i le Aso To’ona’i, 27 Novema 2021. Fa’amatalaina e James Morrow, o le Tusitala Fa’atonu o Tusitusiga Fa’aupufai ma Polokiki a le Daily
Telegraph, i le Aso Lulu ua mavae atu, na toetoe lava ōni nai minute ae tāpē uma nisi o nofoaga, e fa’atonutonu ai le fa’asoasoaina o le malosi fa’aeletise, e mumu ma ola ai fale o le tusa ma le 3 miliona o Aiga i le Setete o Kuiniselani, ona o se ‘gāiō’iga osofa’i fa’akomipiuta’ po’o le ‘sneak cyber attack’ fa’aonaponei, e fa’aiti’itia ai se tapenaga fa’amalosi’aga, a le Fitafita o le Saogalemū po’o le ‘Military’a le Malō Ausetalia. O le masina o Novema i lona Aso 27, na maitauina ai e le
Kamupani Malosi Fa’a Eletise o le ‘CS Energy’ i Kuiniselani, ni faiga fa’amata’u taufa’asesē i totonu o ana ‘uaea felavasa’i o feso’ota’iga’ po’o ‘computer systems’ ni gāiō’iga fa’alilolilo, e ono tapunia atoa ai le feusuā’iga ma le galueā’ina o uaea ese’ese, e fa’amūmu ai molī o Fetaulā’iga Alatele, aemaise fale ma maota o Aiga ta’itasi. Ana o’o lenei taupulepulega fa’aosofa’iga fa’alilolilo a tagata atamamai fa’apitoa a le Malō Komunisi a Saina, latou te tatalaina ai masini
komipiuta a isi atunu’u, po’o le ‘cyber hacking’ e ono tōesea ai se aofa’iga, e 3,500 mekauati o le malosi’aga Fa’aeletise, ua lava lea e tāpē ma fa’apogisā ai fale ma maota o Aiga e silia ma le 3 miliona. Talanoaina i le tele o Ripoti Fa’avāomalō, le taumafai o Faiga Malō Fa’a Komunisi a Saina ma Rusia, iā lā’ua Fuafuaga Fa’atāoto’oto Alualumamao, le tāpēina o malosi’aga Fa’akomipiuta a Faletupe, Kamupani Gaosi mea’ai, aemaise le fa’avae mautū (infrastructure) o
le atunu’u atoa. Saunoa le Ta’ita’ifono Komiti Tu’ufa’atasi o Puipuiga ma Metotia Fa’akomipiuta, o James Paterson, ua alagātatau ona pasia vave se tulafono e talanoaina fa’alausoso’o ai se vaifofō, e tete’e atu ai iā Saina ma Rusia, i ō la uiga ma’ema’eā Fa’akomunisi.
DOM’S BID TO TAKE ON CHILDCARE
Ua fa’ailoa le naunauta’iga moni o le Premier NSW, Dominic Perrottet, ia fa’amatu’u atoa mai le fa’atautaia ma le puleaina o le va’aia, ma le a’oa’oina o fanau iti-mai le pepe i le 5 tausaga, i lalo o
lana Faiga Malo Fa’a Setete, pei ona folasia i lana Kapeneta. I lana saunoaga i le Fono Tauaofia, a le Kalapu Aoao o le Au Tusitala Fa’asalalau ma Nusipepa, pei ona ripotia e le Daily Telegraph, Aso 8 o Tesema, na ia ta’utino ai, o le matāfaioi tausoa mo A’oa’oga Amata mo fanau iti, a le Faiga Malo Maualuga ma le Setete ( Federal Govt/NSW State) ua fa’atagāfai ma fa’atalapelo lona fa’atinoga, saunoa Perrottet, leitīoa ona faigatā le mauaina e nai matua o se malamalama’aga, aemaise lava le fa’aluafēsasi ma lē mautonu nai matua, ma fa’aiti’itia ai le silafia talitonu i le totogiina, aemaise ī latou e va’aia ma tausia fanau iti, a’o feagai ma galuega i vaiaso ta’itasi.
Ua saunoa malosi nei le ali’i Ta’itai o le Setete, Dominic Perrottet, ua mautū lona mafaufau o le ā fai ma matāfaioi tumau a lana Faiga Malo, le tauaveina o tiute uma mo le sologalelei o le
“va’aia o fanau iti, aetainane lona a’oa’oina a’o tuputupua’e” po’o le “Child-care and Early Childhood”, e ui e matuā maualuga lona fa’atupeina. Fa’aalia manino e le Premier, e manatu ua alagātatau i le Faiga Malo Maualuga-Federal Govt, ona silasila i se Aiaiga fa’a Inisiua mo Fanau iti, ma ō latou Matua aemaise Aiga ta’itasi uma, e maualalo ma vaivai le tupe maua, e tauala ai se tupe fesoasoani, e toe fa’atumu ai le tupe fa’asili a le Setete Niu Sa Uelese, o le ā fa’amatu’u atu mo le “va’aia lelei ma le a’oa’oina o fanau iti, a’o tuputupua’e. O le ā tapenaina ma le ato’atoa le fa’agasologa o galuega fa’a ofisa, mo le fa’amalieina lelei o Matua, i le va’aia o alo ma fanau iti, a’o toesea i ō latou taimi faigaluega. Ia tapu’eina fanau iti mai a’oa’oga amata, se’ia ausia A’oga Maualuga ma A’oga Fa’apitoa e toe fuatāina ai taleni ma agava’a o fanau, e tatau ona galueāina ma fa’ailoa. Ta’utino le ali’i Premier o Dominic Perrottet, “Ia fa’amalaga’i ma fa’atino loa i le taimi nei.
TAI’S OPPONENT GETS THE MESSAGE - UFC-Ultimate Fighting Championship
Ua sauni atu nei le tamafanau 28 tausaga Samoa o Anthony Tai Tuivasa, i se tasi o ana fusu’aga silisili ona tā’ua, mo le si’isi’i pea i luga o lona tulaga i le Ta’aloga o Fusu’aga Taufea’a ma Taufekiki, a le Lalolagi, po’o le “UFC-Ultimate Fighting Championship” O le mae’a ai o lana manumalo mata’ina, i le ali’i sa ta’alo Lakapi Amerika muamua o Greg Hardy, ina ua taofia le fusu’aga i totonu o le 67- sekone, ua toe si’itia maualuga ai le tulaga o le Paga Mamafa o le ‘UFC’ i Ausetalia nei. O le fusu’aga a Tuivasa i le Aso Sa nei i Las Vegas, Nevada i Amerika o ā taeao lea, le paga (UFC 269 ) o le ā fetaui ai ma le ali’i o ‘Augusto dos Santos Sakai’ mai Brazil, Numera
11 i le Paga Mamafa a le ‘UFC’ Ripotia mai e le Daily Telegraph i le Aso Tofi ua mavae, le feso’ota’i atu o lenei alo Samoa, i lana poloa’i i le ‘text’ ma logoina Sakai, mo le fa’amautuina o le lā fetauiga, ona o suiga o le mauaina o le ‘VISA’ malaga o Tuivasa, e tu’ua ai Dubai mo Amerika. Fa’amatala e lenei tamafanau Samoa i le Au Fa’asalalau, o lona fia fa’amautinoa i lana Paga, e lē fēmoumoua’i ana fa’ai’uga ua mae’a ona īoeina ma pasia aloā’ia e le “UFC” A’o feagai le lalolagi
ma le COVID-19, taimi ia o lo’o koleni malosi lenei alo Samoa i Dubai mo le tausaga atoa, mo ana tapenaga mo le feiloa’iga ma Augusto Sakai. O Anthony Tai Tuivasa na soifua a’e i le Pitonu’u o Mt Druitt, i Sini Saute Sisifo iā Mati 16, 1993. Matua, Tamā Samoa Tony Tuivasa, ma le Tinā o Kerry Johnson-Indigenous. E 16 ana fusu’aga-Kick Boxing 14 manumalo, 10 i le knock-out po’o le tu’i oti, ae 2 faiaina. E 15 ana fusu’aga (Mixed Martial Arts) po’o le fusu ma le kiki, 12 manumalo,
11 knock out po’o le taofia le fusu’aga. O le saunoaga a Tuivasa i le Au Tusitala, e lēai ni suiga tele mo sauni atu mo Augusto Sakai, o a’u lava lea na ola a’e i se olaga maualalo ma le filemū i Mt Druitt. E 11 le fanau a ona Matua. Tatou tapua’ia faiva o lenei alo Samoa. Mark Hunt le tasi alo o Samoa na o’o lava i le tumutumu o le ‘UFC’.
JUNIOR TAFA-BOXING
A’o tatou i ai pea i le Ta’aloga o Fusu’aga, o se tasi o matāfaioi a le ali’i o Tai Tuivasa, o le fesoasoani lea e fa’alauiloa ( Promoter ) se tasi fo’i alo Samoa, ua si’isi’i vave lona taumafai i fusu’aga faipelega, le ali’i talavou o Junior Tafa. Ua silia i le 3 vaiaso o taumafai Tuivasa, e
fa’aulufale atu le suafa o Junior Tafa, mo se avanoa e maua ai sana Paga Faipelē, i le Fusuaga Iloga o lo’o loma nei a le Kapeteni Muamua a le ‘NSW Blues Origin’ o Paul Gallen, i le masina nei. O lo’o i ai le naunauta’iga o Junior Tafa, e fia ofi atu i le “UFC” po’o le ‘Ultimate Fighting Champioship’ auā o ia o se Tama Samoa Fusu TaufeKiki Fa’aporofesa po’o le Kick Boxer. O Tafa na soifua a’e i Avondale, Aukilani Niu Sila, Aso 21 Setema, 1996 ini Matua Samoa, ua 25 ona tausaga. O Junior Tafa o le uso o se tasi fo’i Tama Fusu TaufeKiki ‘UFC’ o Justin Tafa. Maoa’e le fa’amaumpu’epu’e pea o taleni ese’ese ua foa’iina e Le Atua mo nai alo ma fanau Samoa, ae
ua talafeagai tonu ma le ala’ala ma nonofo i nei atunu’u, pei o Ausetalia ma Niu Sila, ua faigofie ai ona mātalatala mai le mau avanoa, e tapu’e ma fa’ai’ila ai nei agava’a ma taleni ta’alo o lo’o i
totonu o ō tatou Aiga, Nu’u ma Ekalesia.
TALA MAI LE LAKAPI LIKI-NRL
O le alo Samoa o John Asiata, o le tama ta’alo muamua lea i le Ta’amilosaga Lakapi Liki-NRL, ua fa’aleaogāina ma fa’amutaina lana Feagaiga Ta’alo (Player Contract ) ma lana Kalapu ona o le tumau pea o lona talitonuga, o le tete’e atu i “Tui Vailaau Puipui” o le Fa’ama’i COVID-19, pei ona ripotia e le ‘Nusipepa Daily Telegraph’ i le vaiaso ua mavae. I lalo o Tu’utu’uga ta’alo a le NRL, e ī le tama ta’alo lava le “Faitalia ma ana Aiā Tatau” fa’apea le ‘pale feagai’ ai ma Kalapu Lakapi Liki e 17 a le NRL, ini fa’aupuga fa’ale-tulafono ua fai ma Aiaiga ese’ese, ua tusitusia iā latou ‘Feagaiga ma Konekarate Ta’alo’, e limata’ita’ina ai ‘tama ta’aalo ma Kalapu’ O le tula’i mai o
le Fa’ama’i COVID-19, aetainanae le matala mai o tuāoi o le Setete Kuiniselani mo le fa’aaogaina o ona Malae Ta’alo ma Paka (Stadiums ma Parks ) mo Koleniga ma Ta’aloga, a le Ta’amilosaga Lakapi Liki NRL i lenei tausaga atoa 2021, aemaise le 2022, ua fa’amalosia ai tagata ta’aalo uma ma Pulega o Au Ta’aalo, i totonu o le Setete o Kuiniselani, ia mautū le fa’atinoina o “Tui Vailaau Puipui e 2”, ona fa’atoā fa’atagaina le ulufale atu i Malae Ta’alo ma Paka o le Setete, mo le tausaga Fou. I lalo o Aiaiga masani o Feagaiga Ta’alo, ua mae’a ona fa’atulafonoina, ua tete’a ai nei le alo Samoa, John Asiata ma le Kalapi Lakapi Liki-NRL o le “Canterbury Bulldogs” ae le’i
amataina le Ta’amilosaga 2022, i se fa’ai’uga ua ‘malilieina fa’atasi’ e itū e 2 po’o le ‘mutual consent’ Ua le mafai ona koleni, ta’alo ma malaga fa’atasi ma le Au atoa i isi Setete o Ausetalia, e aunoa ma le fa’ataunu’uina o “Tui Vailaau Puipui e 2”
NELSON ASOFA-SOLOMONA
Fa’aalia le lototele o le Kalapu Lakapi Liki-NRL a le Melbourne Storm, ma le fa’amoemoe i se taimi lata mai i le masina fou, i le mae’a ai o le Kirisimasi, mo le fa’atinoina o “Tui Puipui” o se tasi o poutū i lana laina-i-luma, Nelson Asofa-Solomona pe ā i ai se suiga lona lagona fa’a Aiātatau, fa’apea ma nisi mafua’aga tā’ua iā te ia, e tete’e ai i le “Tui Vailaau Puipui” O Solomona o se tasi lea o Tama Ta’alo Iloga a-le NRL, na te lē taliaina le ‘Tui Vailaau Puipui’ po’o le “Highest Profile
NRL Player” to reject the COVID-19 Jap” O lo’o tutūfa’atasi pea Nelson Asofa-Solomona, ma le ali’i Ofisa Sinia ‘CEO’ Justin Rodski, a le Melbourne Storm mo le sailia o se fa’ai’uga lelei mo le fa’aauauina o le ‘Feagaiga Konekarate Ta’alo’ a lenei alo ta’alo malosi Samoa, o se sui fo’i o le Au Lakapi Liki Filifilia a Niu Sila,po’o le NZ KIWIS. Tete’e atu Solomona i le faia o sona “Tui Vailaau Puipui” o lana Aiātatau.
Comentarios