top of page
Search
  • Writer's pictureMaulolo Fata Ueligitone Malifa

Tala i vaifanua o Sini NSW Ausetalia 08 Aokuso 2021

Rent is too costly for workers

O le tupe totogi mo fale mautotogi ua tauau lava ina le ausia, ma ua avea ma to’atugā i vaiaso ta’itasi,aemaise lava mo nai tagata faigaluega, o lo’o tatou fa’amoemoe pea i ai i vaiaso uma,latou e galulue i galuega mo’omia(essential workers) Fa’aalia manino pe tusa ma le 1 vae 3 o ō latou totogi, ua gotouga lea i le tau o le potu e nofo ai mo le vaiaso e tasi.O lea fa’afitauli ua a’afia ai le 84 mai le 104, o le aofa’iga o itumalō pito i sili ona to’atele le numera o tagata i Ausetalia atoa.O le fa’aaliga maumautūtu lea a le Tino e fitoitonu ma ia Sailiga ua tā’ua o le “Everybody’s Home” ua fofola atu le latou ‘MAU’ i Fa’aulu’uluga o Setete, saili se auala e taugofie ai le soifuaga ma le olaga i “Aga Feso’ota’i” aemaise lava ia fa’apaū maualalo ma ia taugofie fale ma potu mautotogi mo Tagata Lautele.Fa’aalia e lea Fa’alapotopotoga lona finau mo le fa’aiti’itia o le tau o fale ma potu mautotogi (Rental Properties) le matuā taugatā lē mafaufau i vaega ma nofoaga fa’aitūmalō, e a’afia ai ma vaega uma o Sini, Gold Coast ma le ACT. Ta’utino le Tama’ita’i So’oupu o Kate Colvin, le fa’amaligi mata ma le lagona fa’anoanoa le so’ona fai ma le lē alofa, le taugatā o fale mautotogi aemaise mo i latou, o lo’o fa’amoemoe i ai galuega o le Fa’ama’i COVID-19 i le taimi nei.Fa’amatalaina e Kate le matuā le amanaia o i latou nei o lo’o galulue punoua’i, mo le tau togafitia o le Fa’ama’i, ae taui atu i le taugatā o nofoaga o lo’o mautotogi ai.E taunu’u ane le totogi o le vaiaso i le BANK, toetoe lava 50% pasene mo lau RENT. Ua fa’amaonia le to’atele sa nonofo taulalata i le Taulaga,ua se’e atu nei i nofoaga ma nu’u i tua mo ni fale mautotogi feololo. Fa’amanino mai e le “S & P Global Ratings” pe tusa ma le 10% pasene le si’isi’i malie a’e i tausaga ta’itasi, le tau e te alala ai i Fale Mautotogi aetainane se Fale Fa’atau, i totonu o le isi 2 tausaga o lumana’i. A tu’u fa’atasi le tupe maua a ni tagata faigaluega se to’atolu o se Aiga, ua matuā lava ma totoe ai le totogiina o se Fale fa’atau motu, po’o se Mokesi i le BANK, auā o si ou lava Maota totino,o le seleni alu aoga, aemaise le lumana’i o le Aiga ma le fanau.


Age no barrier to virus

E le fa’ailogaina e le Fa’ama’i COVID-19 le tagata matua, talavou po’o le la’iiti’iti, o lona uiga e lē fa’atuāoiina tausaga o lou soifua ma so matou ola, ma le a’afia o i tatou i le Fa’ama’i, e ala i lou tauaveina o le ‘siama’ e aunoa ma lou silafia.Afiafi Aso Lua ua mavae atu na maliu ai se tamā talavou, na o le 27 tausaga le matua i a’afiaga o le COVID-19 aemaise le toe mapuna malosi a’e o le pipisi, o le siama e feavea’i e le savili lea ua tā’ua o le (Delta Variant) I ripoti mai a Foma’i pe toe 1 le aso ona mae’a lea o le 14 aso nofo toesea ai o le tamā talavou o Aude Alaskar, ae maliu fa’afuase’i, na matuā fa’ate’ia ali’i ma tama’ita’i Ofisa o le Soifua Maloloina, i le vave osofa’ia o le gasegase tigaina, ma maliu ai lava. Fa’amatalaina i le mae’a o le su’eina(COVID-19 testing) o le ulugali’i, ma mautinoa ai le a’afia ma lona to’alua, ona e galue lagolago le tinā mo tagata e lē

ato’atoa le malosi (disability support worker) lea na pisia ai si ona to’alua.Tā’ua e Foma’i, na fa’afuase’i ona motusia le tātā o le fatu (cardiac arrest) Fa’aalia i fa’amaumauga talu le amataga o le Fa’ama’i COVID-19, taimi muamua lenei ua maliu ai se tagata talavou i Niu Sa Uelese(27 tausaga le matua) Fa’ailoa fo’i e le’i faia se Tui Puipui o lenei tamā talavou.


A’O TATOU I AI PEA I LE FA’AMA’I COVID-19 Million Pfizer a week

Ua ripotia mai e le Tino o lo’o fitoitonu ma le fa’atauta’ia ma le tufatufaina o Tui Puipui o le Fa’ama’i i Ausetalia atoa, po’o le ‘Australia COVID-19 Taskforce’ ua si’itia maualuga nei i le sili atu i le (1) le miliona le aofa’i o Tui Puipui,ituaiga o le PFIZER e tufaina atu i vaiaso ta’itasi.O lea fa’amoemoe ia lava tapena uma nofoaga ua atofaina mo le faia o Tui Puipui, e pei o Ofisa e va’ai ai lau Foma’i (Medical Clinics) ma Fale Talavai (Pharmacies ma Chemists) e tusa ai le fa’alauiloa a le Setete Niu Sa Uelese,aetainane le fofolaina mai e le Faiga Malō Maualuga ( Federal Government) Ua fa’amanino mai fo’i le Fuafuaga Taoto mo le naunauta’iga ia mafai ona faia Tui Puipui, o le 70% pasene o le faitau aofa’i o tagata, i le aga’i atu i le vaitau o le Kerisimasi. Fa’atāuaina fo’i le vave ona fa’asopolia le fa’atinoina o Tui Puipui mo ulugali’i ma tagata talavou, e 30 tausaga ma luga atu.


BRISBANE’S CLUSTER HITS CHILDREN HARDEST

Ua fa’aalia mai i Tusitusiga ma Ripoti fa’atuatuaina mai Kuiniselani, i le vaiaso ua tuana’i atu, le matuā a’afia tele o nai fanau iti i le toe manua’e o le pipisi o le COVID-19 e pei ona tatou va’aia i vaipanoa o Niu Sa Uelese, talu le tapunia o galuega, a’oa’oga ma feoā’iga lima vaiaso talu ai. O le 70% pasene o le numera fou o i latou ua a’afia i le Taulaga o Brisbane, o fanau po’o tamaiti laiti. I fa’amatalaga a Foma’i Fa’apitoa i ma’i o fanau iti, e faigofie ona pisia auā e matele lava ina putuputu fa’atasi i taimi uma, totonu o aiga,o le faleaoga fa’apea taimi e ta’aalo ai le fanau inofoaga o ta’aloga,aemaise le taimi o le malologa i Aoga.Aso Lua ua mavae o le 31 o i latou ua

a’afia i le Fa’ama’i COVID-19, e i lalo ifo o le 19 tausaga le matutua. E 16 ma’i fou na mauaina mai le Aoga, nisi na pisia mai faiaoga, fa’apea totonu o Aiga. O le 63 o cases fou, e 43 e i lalo ifo o le 19 tausaga le, lona uiga e vaelua tutusa i le 2 i le 9 tausaga, ma le 10 i le 19 tausaga le matutua. Se’i tautuanā nai fanau iti i lenei vaitau o le toe si’itia maualuga o le pesi o le Fa’ama’i. E faigofie ona togafiti i tatou matutua, ae ono lē mautonu ma fēmemea’i i tā’ua matua, pe ā ogaoga le tigaina o le fanau iti.


Mild to fast and furious in just days

Mai le feololo ma le lē amana’ia, i le ogaoga ma le fa’atāotolia i totonu o nai aso. O āuga e pei o le tafe o le isu (va ane lau fa’afofoga) Samoa,fiva oso fa’afuase’i, taletale ma le fa’aī tigā, ua fa’amaonia i le fa’amatalaina e Foma’i Fa’apitoa o Fa’ama’i Pipisi pei o le COVID- 19, o itū aliali ia ua fa’ailoa manino ai le a’afiaga o le to’atele, ua filogia totoga i le ‘siama’ o lo’o vevesi ai nei (COVID-19) Ua mae’a ona saili (negative test ) ua leva ona sasofa’i le ‘siama’ i le tino, ae ua vave fo’i ona fa’alogoina lagona tigaina.Saunoa le Foma’i Porofesa Fa’apitoa o Fa’ama’i Pipisi, Tony Cunningham, o le Fa’ama’i COVID-19 e i ai le isi ona malosi’aga e silia atu,e pei ona outou silafia ma tatou iloaina nei, i le toe manua’e a se isi ona vaega(delta radiant outbreak) o le ā televave ona osofa’ia ai isi totoga o le tino, e aunoa ma sou silafia,lea ua fa’aopo’opoina ai pea le numera o tagata ua a’afia (positive test) i aso ta’itasi talu mai le 5 vaiaso ua tuana’i atu.

Ta’utino Porofesa Cunningham, e ulufale atu loa le ‘siama’o le COVID i ou māmā po’o (lungs) ona fefiloi lea ma le ea e fēulaina alātoto, ona maua ai lea o potoi toto ua to’a (blood Clotting) ma a’afia vave ai ma fa’aletonu le galuea’ina o le okesene o le toto (blood oxygen) Fa’aalia

manino, mo i latou e lē o matuā mamafa le mauaina i le ‘siama’ po’o le ‘mild’e ono fa’afuase’i le televave ona uti’uti ma paū maualalo le okesene o le toto po’o le (blood oxygen) Saunoa le Porofesa, e mafai e le ‘siama’po’o le COVID-19 ona osofa’ia fetaulā’iga o lou fatu, o ou fatuga’o po’o ‘kidneys’ fa’apea lou fai’ai se’i va ane lau fa’afofoga i lenei taeao o le Sapati.


Labour wants $300 for all who get jabs

O le ā mauaina e Ausetalia uma le tino i tupe e $300 tala, pe ā aulia atu le Aso muamua o Tesema 2021, ua mae’a ona fa’atino ou Tui Puipui o le Fa’ama’i COVID-19, e pei ona fa’alauiloaina e le Vaega Fa’aupufai a le Labor, e tauala i tupe fa’aaoga fa’avavevave (urgent Federal spending) e fa’amatu’uina mai e le Faiga Malō Maualuga po’o le Federal Govt.A fa’amalieina lana Faiga Malō i le gasologa o Aiaiga o Tui Puipui o le Fa’ama’i, ma fa’aiti’itia ai le taofia o galuega

ma tapunia Pisinisi, aemaise le fa’amaloloina o A’oa’oga, pei ona saunoa i ai le Ta’ita’i o le Vaega Fa’a Polokiki a le Leipa, le ali’i o Anthony Albanese, i le vaiaso ua tuana’i atu, o ni tupe totogi tau’aao fa ‘a meaālofa, e fesoasoani i tagata uma ona o le taofia mai taimi faigaluega, ua ma’uma’u ai le miliona ma miliona o tupe maua o le Tamaoaiga o Ausetalia i aso ta’itasi.O lenei fuafuaga taoto pe ā pale mai le Faiga Malō a le Labor i le Faiga Palota o lo’o loma nei, e $6

piliona se tino i tupe o le ā fa’aaluina ai, ma le fa’amoemoe e 20 piliona tagata matutua Ausetalia, e sainia le Feagaiga o le COVID-19 ma le talitonuga maumautūtū o Albanese, ia fa’asopolia ai tagata uma i Tui Puipui o le AstraZeneca, Pfizer ma le Moderna e pei ona folafolaina.Saunoa Albanese, o Tui Puipui ua alagātatau ma matuā onomea ona fa’ataunu’uina e tagata Ausetalia uma, aemaise le tupe Fa’a Meaalofa ua atofaina, o le ā fesoasoani tele i le mamalu lautele

aetainane Kamupani ma Pisinisi.O le $300 tala o le ā tu’uina sa’o mo i latou ua mae’a Tui Puipui e 2, fa’apea i latou ua taliaina ma sainia le fa’atinoga o Tui Puipui i aulia atu le Aso 1 o Tesema 2021.Fa’aalia manino mai e le ali’i Palemia, Scott Morrison le fa’amoemoega o le ausia o le 70% paqsene o Ausetalia uma,amata mai le 16 tausaga ma luga atu,ua mautū le Maliega (In-Principle Agreement) ma Ta’ita’i o Faiga Malō Fa’a Setete mo Tui Puipui ae le’i mae’a lenei tausaga 2021.


Siblings hold the key to trade secret

O tausoga ma fanau talavou o lo’o u’umia le leo lilo, o le tāua ma le fa’amalieloto o se fanau ua fa’amanuiaina ini agava’a,taleni ma le atamai poto talafeagai, mo a’oa’oga e aga’itonu i le maua o galuega mana’omia mo le taimi nei, e ese mai a’oa’oga fa’a Iunivesite.E to’atele fanau talavou e gata lava le naunauta’i i le a’oa’oga fa’a Iunivesite i sina taimi pu’upu’u,nisi e le aulia se tausaga ae toe sui ma fa’ama’amulu ma fa’apeapea atu ai lava,ae ua alu le tupe a matua po’o le student loan,a’o fanau talavou ia, o lo’o tumu ma teu ai le agava’a,taleni ma le poto mana’omia, e tali atu ai i le tele o avanoa faigaluega e talafeagai ma ia atamai.O le talanoaga felāta’i ma le fa’asamasamanoa a ni matua ma se fanau talavou e to’alima i se pitonu’u o Sini, na manino ai i le latou fa’asoa, ua lē na o le Iunivesite e ausia ma taunu’u ai ā latou ‘Moemitiga’ mo le lumana’i.O Richard o lo’o a’otauina e fia avea ma Palama (Plumber) o Jacob o se tama o lo’o aoga i mataupu fai Pisinisi (Business Management) a’o Liam o le aoga fa’apitoa mo le faia o Ea malūlū (Airconditioning) ma le Inisinia o Komipiuta ma Masini fa’aonaponei (Technician & IT) O a’oa’oga mo galuega mo le tupuolaola o le Tamaoaiga o so’o se atunu’u (Trades and Apprenticeship) Fa’amatalaina ua taumulimuli ai ma tuafafine masaga ta’i 16 tausaga,i tulagavae o tuagane matutua e to’atolu.Tama’ita’i talavou o Steph Vasega 11, o lo’o fa’agasolo ana

Mataupu mo le tausia o manu ese’ese po’o meaola (Animal Studies) ma lana moemitiga, e fia avea ma Foma’i Manu po’o le Vet.O lona uso masaga o Sherina, ua amata nei lana a’oa’oga i le saunia po’o le kukaina o Mea-ai, e lilifa lona lagona i le fia avea ma fa’alautele lona tomai o ia o se Tama’ita’i Kuka po’o le CHEF.Ta’utino Sherina le aga’i pea lona loto ma le mafaufau,i lona ola a’e i totonu o le Aiga,e vaai pea i lona Tuaā(grandma) fa’apea si ona Tinā i le kukaina o ta’umafa

a lo latou Aiga.Fa’aalia i Numera fa’amaumau o Tagata Ao’oga,e i ai agava’a ma taleni fa’apitoa,e aga’itonu i galuega mana’omia mo le taimi nei, e 15% ua si’itia fanau talavou ulufale atu,mai le 2020.


AMBOS see 37 suicidal kids a week

O se tasi o fa’afitauli ua avea ma fa’anoanoaga tugā talu le alia’e mai o le Fa’ama’i COVID-19, aemaise le toe mapuna a’e o le pipisi fou lea po’o le (delta variant) Ua logoina e i latou ua agava’a fa’apitoa mo le fa’atalanoaina o fanau iti, tupulaga talavou fa’apea le to’atele ua mafaufauina le ‘PULE I LE OLA’ le Auaunaga o Ta’avale a le Falema’i, po’o AMPULANCE, mo le fa’asaoina o fanau iti ma tupulaga talavou,ua sosolo a’e le fia pulea lona soifua.Talu mai le tapunia o faiga masani o le olaga ona o le Fa’ama’i, e 37 fanau iti ma tupulaga talavou ua o’o lava i le 5 tausaga, ua vala’au fa’atopetope le Ta’avale a le Falema’i po’o le AMBULANCE mo le auina i le Maota Gasegase.

Taimi atoa lenei o le pipisi o le COVID-19, e foliga mai o fanau talavou mai le 15-18 tausaga le matutua, ua matuā mamafa atu i ai lenei fa’afitauli.E 1,635 fanau Aoga ua lagonaina le fia PULE I LE OLA ua feso’ota’i atu i le Laina Telefoni ‘KIDS HELPLINE’ i totonu o le 6 masina muamua o le tausaga,2021 mo se fesoasoani a le Falema’i po’o le AMBULANCE.O le aofa’igafou lea ua matuā maofa ma fa’ate’ia le Setete ma le Matagaluega Soifua Maloloina.E fa’a 69 ona vala’au le mana’omia o i latou Fa’apitoa mo Talanoaga (Counsellors) ma fanau fia pule i le ola, i le vaiaso e tasi, ua silia atu i le taimi lava lenei i le tausaga ua mavae,2020.Fa’aalia e le Tama’ita’i Ofisa Sili o le ‘KIDS HELPLINE’ Tracy Adams, ua si’itia maualuga i le 200% pasene fanau iti i Aoga Tulagalua, va o le 5 ma le 9 tausaga ua vili ane mo se fesoasoani.Tā’ua fo’i mai le 42 telefoni mai fanau ta’i 5 tausaga, to’atasi na maua atu ua toetoe lava ina uma lona soifua (suicidal) to’a 8 ua nā o le fetagisi,mata fa’asiasia,popole ma lē mautonu (talk about loss and grief) fia maua se isi e talanoa i ai, to’a 2 ua faia i ai ‘uiga matagā’(suffered sexual abuse) a’o le to’atele ua femēmēa’i

ona ua a’afia tele le mafaufau i le sasao o le sauaga i totonu o le Aiga.Ua tu’ufa’atasi uma fa’aseā o nei fa’afitauli ogaoga ma le mata’utia,ua alia’e mai i nai fanau iti ma tupulaga talavou, i le

Fa’ama’i COVID-19.


PM Jacinda Ardern delivers a formal apology for the Dawn raids

O le Aso Gafua o le vaiaso ua tuana’i atu, na fa’ataunu’uina aloa’ia ai i le Maota Autū o le Pitonu’u o Aukilani po’o le Auckland Town Hall i Aukilani Niu Sila, le Sauniga Fa’apitoa o le “FA”ATO”ESEGA a le Malō Niu Sila e tu’usa’o atu i le mamalu o Tagata Atumotu ae fa’apea Aiga Pasefika, sa matuā a’afia tele i Faiga Fa’ailogalanu “RACISM”A tatou tōmanatu i le vaitau o le 1970 ma le 80,lea na saili ma su’e solo ma ma tulituliaupū nai o Tagata Samoa, Toga na isi atunu’u Pasefika , ona o le sili aso ma ova pemita fa’atapula’a o aso e nonofo ai i Niu Sila.Sa malomaloā le Faiga Malō a ali’i Palemia o Robert Muldoon, ua OVERSTAYERS uma tatou.Silia i le 100 tagata Pasefika ma sui o le Malō, Aufai Pisinisi ma Kamupani Tumāoti,fa’apea Uo ma e Masani aemaise tagata Niu Sila sa latou lagolagoina lenei IFOGA ma le FA’AMAUALALOGA a Niu Sila. To’atele le mamalu ole tatou atunu’u aemaise alo ma fanau ma tamafanau a Samoa, o latou Tuaā ma Matua sa a’afia tele i lenei Faiga Fa’ailogalanu ma le vaai maualalo i Tagata mai Atu Motu o le Pasefika i lea vaitau.Sa fa’atinoina lava lea fa’amoemoe i aga ma tū masani a Samoa e fa’atatau i le “IFOGA” O le Tama’ita’i Palemia Niu Sila,Jacinda Ardern sa fa’atinoina.

O le ali’i Faipule Samoa i le Palemene a Niu Sila,Afioga Aupito William Sio, o le Minisita o Tagata Pasefika a Niu Sila,sa saunoa e fai ma sui o Tagata Pasefika, e tali fuaitau atu i le Palemia ma le Malo Niu Sila.


Roger Tuivasa-Scheck as a winger for Auckland

O le toe taliu atu o le alo ta’utāua Samoa i le NRL Lakapi Liki,le ali’i talenia o Roger Tuivasa-Sheck e fa’aauau lana taleni ta’alo i le Lakapi Iuni a Niu Sila,ua matuā talia aloa’ia e le Pulega ma le Au atoa a Aukilani mo le Ta’amilosaga NPC,pei ona fa’ailo manino e le Faiaoga Lagolago o Craig McGrath. Fa’aalia fo’i le fa’agae’etia ma le fiafiaga o le ali’i Faiaoga Ulu o le All Blacks, Ian Foster ina ua fesiligia e le Au Tusitala, saunoa Ian o Roger o se tama ta’alo e maoa’e le talenia ma agava’a e tele o lo’o ia u’umia, ua atili ai ona fa’amaupu’epu’e le felanulanua’i o le mau taleni talavou e fai ai le filifiliga o le Au a Niu Sila,aemaise Au o le Ta’amilosaga Supa Lakapi.O se tama ta’alo fa’amoemoeina e le gata i luga a’o fafo mai o le Malae lakapi, e maualuga ana tapenaga i taimi (very professional rugby player) O le tulaga fa’atini po’o le uigi ua fa’amoemoe le faiaoga o Aukilani, sui muamua o le All Blacks,Alama Ieremia e amata ai le toe ulufale atu o Roger i le Lakapi 15, ma fa’asolosolo ane ai i le 12 ma la 13, e fetaui ma talafeagai lelei ma ona agava’a n ate fa’asa’oina le laina i tua po’o le Backline.Ua fa’amoemoe o lana ta’aloga muamua mo lana

Kalapu Fou, Aukilani NPC i lana ta’aloga ma Tasman NPC,faia i Nelson i le Aso 14 Aukuso, Aso To’onai nei.Talosia le toe fo’i atu o lenei alo o le atunu’u,sa ta’utā’ua ai Samoa i lona kapeteniina o le NZ Warriors,aemaise lona taimi i le Kalapu iloga a le Sydney Roosters. O le fa’amoemoe autū o Roger Tuivasa-Scheck, o le fia ulufale atu i le Olopeleki a Niu Sila mo le Ipu Lakapi Iuni Lalolagi,Rugby World Cup i le tausaga 2023 e faia i Farani.


All Blacks ma le Wallabies ananafi i Eden Park Aukilani

E to’a 15 le aofa’iga atoa o alo o si o tatou atunu’u Samoa na lautogia i le ‘Ta’aloga (1) o le Ipu o le Bledisloe Cup’ i le va o Niu Sila ma Ausetalia i le afiafi ananafi, i le Malae taufa’afefe i Eden Park i Aukilani. Ua maua ai le Au atoa “NIU SILA SAMOA AUSETALIA” O le molimau maumautūtū lea ma fa’ailoga va’aia o le fa’amanuiaga a Le Atua iā Samoa ma ona Tagata,e tauala i ō outou alo ma fanau, aemaise taleni foa’ifua o Meaālofa a Le Atua, mo Aiga,Nu’u ma Afio’aga aetainane Ekalesia Lotu ese’ese a Samoa.E ui ina tatou aitaumalele atu i Ausetalia ma Niu Sila,a’o lo’o fa’atino pea o tatou tiute mo le tausia o Aiga,Nu’u ma Ala’alafaga,le atunu’u aemaise Ekalesia i Samoa,e tauala i tupe lafo,o fa’amomolio i vaiaso ta’itasi auā nai o tatou Tuaā ma Matua o lo’o fa’amuli mai Samoa.A silasila i taleni a Samoa i Ta’aloga,o alo ma fanau ia na tu’ua e o latou matua ma Tuaā laufanua o Samoa i le vaitau fa’ai’ui’u o le 1960, amataga o le 1970,80,90 ma le amtaga o lenei seneturi 21, mo ni sailigā manuia ini galuega totogi lelei,fa’aaogaina o fanau,aetainane se soifuaga fou i Niu Sila ma Ausetalia, lea ua pale mai i le taimi nei,e lē gata ua

fa’ai’uina a’oa’oga,galulue i galuega totogi lelei,aemaise le mau avanoa i ta’aloga,ua fa’aaogaina i ai taleni ma agava’a ses’ese ua fesoasoani tele ai i nai Tuaā ma matua.Fa’afetaia ai Le Alofa ma le Agalelei fa’aauau o Le Atua iā Samoa ma ona Tagataānu’u,po’o fea lava o le Lalolagi o lo’o ala’ala ma pāpāaao ai.O alo nei o Samoa na tauina le taua o Ta’aloga Lakapi i le afiafi ananafi mo Niu Sila ma Ausetalia

Ausetalia:Allan Ala’alatoa,Brandon Paega-Amosa,Noah

Lolesio,Hunter Pa’isami,Len Ikitau,Jordan Petaia,Jordan Uelese ma

Matt To’omua.


Niu Sila-All Blacks:NepoLaulala,Akira Ioane,Dalton Papali’i,Ardie

Savea,Rieko Ioane,Anton Lienert-Brown ma Angus Ta’avao.Ua maua

le 15 atoa a Samoa.

6 views0 comments

Recent Posts

See All

Comments


bottom of page