top of page
Search
  • Writer's pictureMaulolo Fata Ueligitone Malifa

Tala i vaifanua o Sini NSW Ausetalia 15 Aokuso 2021

FREEDOM ON WISH LIST

Ua fa’amatalaina le taofiga o feōa’iga ma feasi’asiga, ae tainane le taofia o galuega, tapunia o a’oa’oga,ua pei lava o le nofo i le toese po’o le falepuipui, ae ua mana’omia le fa’amuta vaveina, ma aga’i i le fa’ama’oti mai se aso e fa’amuta ai, ma tatala atu le sa’olotoga o tagata uma.Tā’ua e James Morrow o le SKY NEWS Ausetalia, a i ai se lagona o le ali’i Palemia o Scott Morrison, e toe fo’i foliga masani o le Aso Kirisimasi pei ona masani ai, e ao ona matuā fa’amāoti mai le LA’ASAGA LONA 2 o le Fa’ama’i COVID-19 i lumāmea, ini fuafuaga fa’ataoto mo tagata Ausetalia, o se MEAALOFA lelei lea mo tagata uma i le o’o mai o le Kerisimasi. Ua fa’aalia le sosolo a’e pea o le lē mautonu o tagata i le taumatemate pea o fa’ai’uga ese’ese a Pulega o Setete, aemaise lava i ona Ta’ita’i fa’apea i latou o lo’o fautuaina Setete i fa’amatalaga felanulanua’i fa’ale Soifua Maloloina. Ripotia mai, O le aotelega o le faitaua’ofa’i o Ausetalia,ua matuā manifinifi le soifuaga fiafia sa masani ai, ua suiga mālie atu nei i logona pogisa, ma ua maualalo fo’i le talitonuga mo ni leleiga, e ono fotua’i mai i se taimi o totoe,a’o aga’i atu i nai masina mulimuli fa’ai’ui’uga o le tatou folauga mo lenei tausaga,2021. Ta’utino ini Tusitusiga a James

Morrow, ua fa’ailoaina mai i foliga o fuainumera,namafai ona aoao mai, e tauala i lagona ma manatu o tagata lautele, e ono le toe filifilia o se Palemia Scott Morrison, pe ā fa’atino se FAIGA PALOTA I se taimi lata mai. Ua ati le va’ai a tagata lautele i le telegese o le gasologa o le tofutofusia o Ausetalia atoa i le sāilia (testing) po’o ai o lo’o a’afia i le Fa’ama’i COVID-19.Ua leotetele ma malomaloā tagata, i le tuai ona fa’asolo le Tui Puipui (Vaccination) atoa ma le fa’anenefu po’o le ā tonu le ese’esega o nei Tui Puipui (AC ) AstraZenega ma le (Pfizer ) aetainane le isi Tui fou-MORDERNA. Pau lea Samoa e, ia lava papale pea ma fa’asolo lau ‘test’ma fa’atulaga se taimi o lou Tui Puipui po’o le VACCINATION.


TICK THE RELIGION FOR HERITAGE’S SAKE

O lenei talutalufou ma le soifuaga, ua foliga mai e taumafai lava Pulega ma le fa’atautaia o galuega ese’ese, e tata’i ma mimilo ane le lagona ma uiga fa’a polokiki, ia suia ai se uiga lelei ma fa’ai’uga tonu ma le taunu’uga masani o fa’amoemoega.I le fa’agasologa o le “TUSIGAIGOA”2021 Ausetalia na fa’ai’uina i le po o le Aso Lua o le vaiaso ua mavae atu nei. O le tāua ma le aoga o le fa’atino pea o TUSIGAIGOA i so’o se atunu’u i totonu o le ta’i 5 tausaga,ia mauaina e le Matagaluega Fa’amaumauga Fuainumera Ausetalia (Australian Bureau of Statistics) le faitauaofa’i o Tagata, mai le pepe fou,e o’o atu i tagata matutua, ma logoina le Faiga Malō, i le fuafuaina o le fausia o le Fa’avae Mautū o le atunu’u po’o le (INFRASTRUCTURE) O le fausiaina o Auala Televave, Auala Laupapa, Falema’i, Malae Va’alele aemaise ni Faleaoga fou mo fanau.Se tasi o itū tāua o lo’o mana’omia le fia iloa mautinoa e le OFISA FUAINUMERA, o tagata uma ma ā latou Tapua’iga Lotu, i lona mafua’aga, ia atofaina tatau alagātupe talafeagai mo A’oa’oga Fa’apitoa e pulea i lalo o le Fa’amalumaluga a Tapua’iga Lotu ma Ekalesia ese’ese.Se tasi o

FESILI tāua e ao ona fa’atumu i lau Pepa o le “ TUSIGAIGOA” Ia fa’ailoa atu le ‘TAPUA’IGA LOTU na e ola mai ai. Lua vaiaso talu ai na matuā iloga se fa’alauilo’aga ma ni faiga fa’atosina, i luga o Upega Tafa’ilagi (Social Media) a se vaega o tagata e taumafai e fa’asufi ma fa’atauānau le to’atele o le Mamalu Lautele i Ausetalia, ia tusi i lau PEPA TUSIGAIGOA, O oe e te lē alu i se LOTU (NO RELIGION) ae auā e te fa’a’iloaina lau Tapua’iga po’o le Lotu na e soifua mai ai. O ī latou fo’i nei o lo’o taulamua ma u’una’ina le fa’ata’atiaese mai le fa’aaogaina o le Upu “LO MATOU TAMA E”-‘OUR FATHER’ i le amataga o le Fonotaga a le Palemene,fa’apea le taumafai malosi e tapuni avanoa faigaluega e ofi atu i ai tagata e mautū Talitonuga

FA’ATUATUA ma Lagona FA’AKERISIANO.Taga’i ane i uiga sese ia.




END TO THE FREE RIDES

O le ‘FUATA MA LONA LOU’ po’o le talutalufou ma le suiga fou. Ua fa’ailoa mai e le ali’i Minisitā Soifua Maloloina,fa’apea Tausiga o Tagata Matutua Ausetalia, Hon.Greg Hunt i le vaiaso ua tuana’i atu se suiga fou, mo i latou uma o lo’o u’umiaina Pepa fa’amaonia po’o ni Tusifolau Tagataānu’u, o ni atunu’u se lua ( Dual Nationality ) pei o Ausetalia/Niu Sila, fa’apea fo’i i latou e i ai Pepa Nofomau ma So’otaga ma isi atunu’u po’o le (Permanent Resident ) O le ā i ai se suiga fou i le fa’amutaina o femalagaā’iga sa’oloto e pei ona masani ai. O le Aso 11 Aukuso na amata aloa’ia ai lenei suiga fou, lona uiga o ī latou e Sitiseni Ausetalia sa masani ona alala ma nonofo i isi atunu’u o le ā le toe maua le sa’olotoga lea, se’i vagana ua fa’amautūina ma mautinoa le So’otaga ma le isi atunu’u, ona fa’atoā taliaina lou tu’uva’a ese atu, mai Ausetalia nei, pei ona saunoa i ai le Minisitā. Fa’aalia mai e le ‘Matagaluega ma Ofisa Puipuiga o Tuāoi ma le Saogalemū o Ausetalia’po’o le ‘Australian Border Force’ i se fa’amatalaga fa’alaua’itele (Press Release ) faitauina. O lenei suiga fou ua fa’atulagaina ia puipuia ai feoā’iga fa’alausoso’o i le va o

Ausetalia ma isi atunu’u, mo le fa’atumauina o le puipuiga malu, aetainane le sa’o ma le tonu o galuega fa’atino a le Ofisa o Pemita Malaga (Immigration) ma le Ofisa o le Tiute (Customs ) Ta’utino le ali’i Minisita ose tasi o fa’afitauli a’afia tele ai le Malō ile taimi nei, o le to’atele o Tagata Ausetalia e u’umiaina Tusifolau Ausetalia ma isi atunu’u, ua fa’aalia le ita ma to’ama’i, ua le mafai ona toe fo’i vave mai i Ausetalia nei, o lo’o saisaitia i atunu’u i fafo ona on aua taofia i

aiaiga o le Fa’ama’i, pei o le tapunia o tuāoi ma faigamalaga o va’alele ma isi atunu’u. Silasla ane i nei suiga tāua nei toe afaina ai i o femalaga’iga.


5 TEENS ON MURDER AFTER BASHING CHARGES

O se va’aiga matagā ma mata’utia foliga o se atali’i talavou nā o le 16 tausaga, na fasi ma fa’ao’olima i ai ni fanau talavou se to’alima i le Pitonu’u o Dooside, Sini Sasa’e i le po o le Aso Lulu ua mavae atu. E to’afa tama ma le teine talavou, i le va o le 13 ma le 15 tausaga le

matutua o nei fanau,na faia nei amioga ma uiga lē taupulea ma le fa’apaupau, ma i’u ina maliu ai si nei atali’i talavou 16 tausaga, i le Falema’i i le mae’a ai o le 3 aso o tau togafiti e Foma’i. Fa’aalia e le Ofisa o Leoleo le ogaoga o manu’aga, auā e fa’a 52 ona tātu’i ona foliga, fa’apea le tākikiina o lona tino,e le tama 14 tausaga, mai lava i lona ulu, o le gutu ma mata, fa’apea le tino atoa.Fa’amatalaina e le ripoti a Leoleo, e uiga ese lea itūaiga fa’ao’olima na fa’atinoina e nei

fanau talavou. A’o faia nei fasiga, ma fa’atonu le 16 tausaga e ta’u upu nei “F….21,27 on top, a’o lo’o pu’eina le ata (video) ma fa’aali i luga o le Upega Tafa’ilagi ( SOCIAL MEDIA) O le 21 o le igoa lea o le KEGI “21 District or the Inner West Brotherhood”e fa’amoemoe tele i KEGI po’o potopotoga Laiti ia, e fafaga atu ai ‘KEGI’ MATUTUA, a’o le 27 e aga’i ona so’otaga ma le “KEGI” Street Gang ‘OneFour’ na amataina o ni fanau Samoa ma le Pasefika Pepese (RAP music ) mai le Pitonu’u o Mount Druitt. O lo’o fa’aauau sailiga ma su’esu’ega a Leoleo ina ua mae’a ona lokaina le to’atolu o nei fanau talavou, e a’afia ai ma le talavou teine, 19 tausaga le matua o Kayla Dawson, o ia lea na maunuina atu le atali’i 16 tausaga i lona fale, ma fasi ai se’ia o’o ina fa’atopetope i le Falema’i Westmead Hospital, ma i’u lava ina maliu ai. Ua na o se tu’ualalo e molimoli atu fa’afautuaga ma le agaga fa’aaloalo a TALAFOU, ia tautuanā fanau i le toesea mai

le fale e aunoa ma le silafia e i tā’ua MATUA, aemaise lava i le afiafi ma aga’i atu i le po.


JUMP IN UNI APPLICATION

O A’oa’oga o le Tusifolau lea o le fanau mo le lumana’i, O A’oa’oga fo’i o le tasi lea o Manulauti tāua na tu’ua ai Samoa, ae fai mai le tatou folauga i Niu Sila ma Ausetalia talu mai le le vaitau o le 1960 se’ia aulia mai lenei taeao. A’o sauni se ala’alafaga fa’amavae a se Aiga o le ā tu’ua nai o tatou laufanua i Samoa, e masani lava ona lagonaina le i’uleo ma le fesili fa’apea, O fea o le ā malaga i ai Tui ma Seve, e mafua i se ā le malaga atu i NiuSila o Pai ma Lafai ? Tali si toea’ina ma le olomatua, e o e ave tamaiti e fa’aao’oga, ma saili se lumana’i manuia o lā’ua ma si a lā fanau. O lo’o fa’aopo’opoina pea le numera tele o alo ma fanau Samoa fa’amanuiaina mai A’oa’oga ma aga’i atu i galuega lelei, nisi ua sologalelei i taleni ma agava’a i ta’aloga, ae maitauina lava le numera tele o nai fanau talavou,o lo’o tau saili ma mata’itū po’o fea tonu o lo’o saofa’i ai lona lumana’i. O se tala fiafia, e ui o lo’o fa’ava’atuia pea le fa’aauauina o A’oa’oga maualuluga, Iunivesite fa’apea a’oa’oga Fa’a Matātā Ese’ese, ua fa’aalia manino le fa’aopo’opoina pea o fanau talavou ua talosaga mo le resitalaina i Iunivesite ma isi A’oga Maualuga fa’apea le TAFE.

Fa’aalia e le Ofisa Tutotonu e talia Talosaga mo Iunivesite, e 24,000 fanau talavou ua tusi talosaga atu mo le fa’amauina o igoa mo le 2022, e 6% pasene ua si’itia ai i le taimi lava lenei i le tausaga talu ai,2020. E foliga mai e fa’aauau pea le si’isi’i i luga o le fuainumera i le aga’i atu i le amataga o le tausaga fou, 2022. O le fa’amau fa’ailoga lea o le naunauta’iga i fanau talavou, e ao lava ona

fa’aauau i A’oa’oga maualuga mo ni fa’ailoga lelei talafeagai mo le lumana’i. Se tasi itū lelei o le vave ona resitala le fanau, a’o lava le taimi mo nisi fesuia’iga o Mataupu e su’esu’eina e le fanau, aemaise fo’i le lava o avanoa e talanoa fa’asoa ai ma le Tinā ma le Tamā, ae le’i vevesi le fa’ai’uga o lenei tausaga, aemaise le Fa’ama’i o lo’o fa’amalumalu mai i ō tatou luga. O A’oa’oga lava o le fa’apogai lea o se lumana’i manuia ma le sologalelei o Aiga, Nu’u ma Ala’alafaga, le atunu’u Pele Samoa, aetainane le tautuaina o Ekalesia ma le LOTU.


PAPALI’I KEEN TO STUCK IN THE MIDDLE

O Isaiah Tauiliili Tavita Papali’i le alo Samoa 22 tausga,o le tama ta’alo pito silisili ona fa’amoemoeina ma le lelei a le Parramatta Eels mo le 2021, e ui lava e le’i mae’a le Ta’amilosaga Lakapi Liki NRL. Fa’aalia e le Pulega aemaise le Faiaoga, ua talafeagai lelei le atofaina o le Feagaiga Ta’alo mo lenei tama ta’alo mataālia, malosi ma le finafinau i luga o le Malae, talu mai lona ulufale mai PARRAMATTA. Ua avea la le fiafia o le Faiaoga, ua filifilia ai Papali’i e ta’alo i le tulaga pou i le ta’aloga ma Manly Sea Eagles ae lē o le loka e pei ona masani ai, mana’omia

PAPALI’I na te fa’atupuina le ta’alo fa’atautino (Physicality) i le laina i luma, ma fa’aulufale le lagona tauivi, o se tasi lea o ona malosi’aga talu ona tu’ua le NZ Warriors mo le Eels.Ta’utino Papali’i le talanoaga ma Nick Campton o le Daily Telegraph Sports, malie ato’atoa i lana

ta’alo i le taimi nei, ae ua ia taliaina le suiga ua tofia mai e le Faiaoga, pau lea ia manuia ai le Au atoa. Fa’aalia i ripoti o lenei alo Samoa, o se tama ta’alo laina i luma (Forward player) ua maualuga le mana’omia e Kalapu e tu’uina atu i ai se Konekarate Ta’alo mo le lumana’i, auā fa’atoā 22 tausaga. O Papali’i e 2,812 mita ua momo’e ai talu le amataga o le Ta’amilosaga NRL 2021,le isi tama ta’alo soso’o ane ai o Mitch Barnett e 500 mita. Foliga mai e tūmatilatila lava Isaiah Papali’i mai isi tama ta’aalo. Talosia le si’isi’i pea o le fa’atinoga a lenei alo Samoa i le NRL. O Junior Paulo le tasi alo Samoa i le PARRAMATTA EELS.


FA’ATULAGAINA O AU NRL I LE TAEAO NEI LONA 8 PITO I LUGA

1 Melbourne Storm,

2 Penrith Panthers,

3 Sydney Rabbitohs

4 Sydney Roosters,

5 Parramatta Eels,

6 Manly Sea Eagles,

7 Gold Coast Titans

8 Canberra Raiders

3 views0 comments

Recent Posts

See All
bottom of page