top of page
Search
  • Writer's pictureMaulolo Fata Ueligitone Malifa

Tala i vaifanua o Sini NSW Ausetalia 17 Oketopa 2021

CONFUSION SLOWS ROLLOUT OF 3 RD JAPS FOR THE VULNERABLE

E manatua le fuaitau masani a le atunu’u fa’apea “O le va’a o Toilolo ua le iloa pe alo i luma, pe alo i tua. U fa’apenā le fememea’i ma le lē mautonu, o le fa’atinoina o le ‘Tui Puipui lona 3’ o le Fa’ama’i COVID-19, mo le mamalu lautele o i latou, ua molimauina le a’afia fa’aauau pea i uiga su’ifefiloi o le Fa’ama’i, aemaise le tāofiōfia o le fa’atinoga o ‘Tui’ i le fa’aluafesasi, o tupe totogi atu i Fale Talavai (Pharmacies) i le fa’atoā fa’ailoaina i le vaiaso ua mavae, e alagātatau ona fa’atino le “Tui Puipuia lona 3” Fa’amatalaina e Mary Ward ma Lucy Carroll o le Sydney Morning Aso Faraile ua mavae atu, E amatalia taeao Aso Gafua 18 Oketopa 2021, ona faia le “Tui Puipui lona 3” o le 500,000 afe o Tagata Ausetalia, e aofia ai ma i latou e togafitia i le gasegase o le “KANESA” po’o le ‘CANCER”, fa’apea i latou o lo’o feagai ma Ta’otoga o Totoga sūia o le tino, va ane lau fa’afofoga tapua’i SAMOA, po’o ‘transplant recipients’ Ua fa’amoemoe o le “Ituaiga” o le ‘Pfizer po’o le Moderna’ le “Tui Puipui 3” ua agava’a mo i latou nei, auā ua talafeagai ona o itūaiga gasegase matuiā o lo’o fa’atāotolia ai, auā lava le puipuiga malu o le soifua maloloina. E ui i lea, e le’i fa’iloaina mai e le Faiga Malō Maualuga [po’o le Federal] se aofaiga o ni “Tui Puipui lona 3” ua mae’a ona fa’agasolo. Fa’aalia e le Fa’alapotopotoga o Fale Talavai,e fa’atelegese tēisi le fa’ataunu’uina o le “Tui lona 3” se’i fa’amautinoa mai. Fa’aalia e Chris Taylor, Ali’i Ofisa Sili, “Vaega o Gasegase Totoga Fesuia’i a Ausetalia” Transplant Australia,ua fa’aopo’opo gasegase KANESA ma Ma’i Fatu ia ua i ai le naunauta’iga e fa’amautū ō latou “tui Puipui 3” Fa’amautinoa mai e le Fale talavai i Cabramatta, o Quinn On ua 300 ‘Tui Puipui Moderna’ ua mae’a ona fa’aaogaina talu ona taunu’u mai iā Setema.


LABOUR ELDER URGES MP’S TO OPPOSE BILL

O le soifua o le tagata o le pule faito’atasi lea a Le Atua. Ua fa’aalia le matuā tula’i malosi a le “Fa’alapotopotoga Soifua Maloloina Katoliko Ausetalia” po’o le “Catholic Health Australia” o se Auaunaga silisili ona telē lona fa’atinoga i le “Tausiga ma le Va’aiga o Matua Matutua” po’o le “Australia’s Largest Catholic Health” e fautuaina ma u’unā’ina malosi Faipule uma o le Palemene a Niu Sa Uelese, e tete’e atu i le “Pili Tulafono Taufa’aofi” e fa’amuta ai le soifua o le tagata ua matuā gasegase tigaina, ma ua lēai se togafiti o totoe mo ia, ma ia fesoasoani se isi tagata ia fa’amuta loa lona soifua ola, po’o le “EUTHANASIA” Ua nā o Niu Sa Uelese le Setete i Ausetalia nei, e le’i Fa’a Tulafonoina lea Faiga ua loa ona fetosoa’ifa’apa’utoloāloi. O le tausaga e 2019 na pasia ai, e avea ma Tulafono i Niu Sila, ae fa’atoā mafai ona fa’aaogaina i le Aso 5 Novema 2021, le masina o lumana’i nei. O le nauanauta’iga malosi a le Fa’alapotopotoga Soifua Maloloina Katoliko Ausetalia, ia matuā tāofia le īoeina ma pasia Fa’ale Tulafono. Saunoa le Ali’i Faipule Matua a le Vaega Fa’aupufai a le Labor, o le Ta’ita’ifono Soifua Maloloina Katoliko Ausetalia, John Watkins, e tatau I Faipule uma ona silasila toto’a i le fa’aaogaina o tomai fa’a Foma’i ese’ese, mo le fa’aauauina o togafitiga mo so’o se gasegase, ua matuā ma’i tigaina, ae lē o le talanoaina o le togafiti sesē, o le taumafai e fa’amuta le soifua o le Tamā po’o le Tinā, o le Finagalo fai to’atasi lea o Le Atua. O le Soifua Maloloina Katoliko Ausetalia e silia i le afe ona Falema’i ma Falema’i Fa’apitoa e tausia ai Tagata Matutua i Niu Sa Uelese, ua fa’amautūina lona matuā tete’e lava i lenei Pili Taufa’aofi, e 28 Faipule mai Vaega Fa’aupufai Ese’ese o le Palemene latou te lagolagoina uma, le tete’e ma le taofia o lea fa’amoemoe. Fa’aalia e le Tama’ita’i Tausi Soifua aemaise i gasegase tigaina mo le 20 tausaga, Bronnie Taylor, nate lagolagoina le Pili, ona ua ia vaai tino i tagata gasegase tigaina, ua matuā lēai se togafiti fa’a foma’i o toto emo lea tagata Ma’i. Saunoa le Ali’i Premier Fou o Dominic Perrottet i le Aso Faraile ua mavae, ina ua fesiligia e Tusitala, e ao ona vāili’ili mae’ae’a itū uma ae le’i o’o i le palotaina pe talia, toe tatao atu le isi fesili ona o lona Talitonuga Fa’ale Kerisiano Katoliko, saunoa le Premier, e tele na’uā vaega tā’ua o lenei fa’amoemoe, e mana’omia le soālaupule toto’a ma le atamai mo tunu’uga talafeagai lelei, ua le nā o le tagata gasegase, a’o nai Aiga ma fanau.


ALMOST 1/4 MILLION NSW JOBS GONE TO LOCKDNSOW

Fa’amauina le latalata i le kuata miliona le aofa’i o galuega ua mou atu, talu mai le tapunia o Kamupani ma Pisinisi aetainane le lokaina o tuāoi, ona o a’afiaga o le Fa’ama’i COVID-19. I Niu Sa Uelese lava ia e 25,000 galuega ua fa’amutaina mo le masina o Setema 2021. A’o se tala fiafia, ua va’aia foliga lelei o le toe fo’i mai o le tamaoaiga o Niu Sa Uelese, ina ua toe mātalatala Kamupani ma Pisinisi, aemaise le fa’aiti’itia o tulafono o le COVID-19, ma le fa’aopo’opoina o itulā faigaluega talu mai le fa’aui’uga o le masina ua mavae atu o Setema.

Fa’amauina le a’afiaga tele o galuega i le itupā o Tinā ma Tama’ita’i, tusa ma le 61% pasene galuega na fa’amutaina talu mai le masina o Me,2021. E 35,000 le aofā’iga o Ali’i ma Tamā fa’apea tama talavou, na taofia galuega i le masina ua tuana’i atu. Talu mai le masina o

Me, 2021 e 244,000 afe galuega tāofia, ma le 217,000 afe i latou sa le’i maua ni itulā faigaluega i le masina ua mavae atu, i totonu lava o le Setete Niu Sa Uelese. Fa’aalia e se Ripoti o galuega i le masina ua tuana’i, ua si’itia le aofaiga o galuega fou i Sini nei, ae le’i tatala aloa’ia Kamupani ma Pisinisi i le vaiaso ua mavae, tele ō ia galuega ma le malosi o le toe fo’i mai o le Tamaoaiga, o le pitonu’u o Sini Sisifo. E 138,000 afe galuega na fa’amutaina i le atunu’u atoa, i le masina o Setema. A’o lokaina pea le Setete o Vitoria, e 123,000 afe i latou ua leai ni galuega mai le masina o Setema. O se va’aiga lelei i le Setete o Kuiniselani, e 30,800 afe galuega fou, ae 3,600 ia Ausetalia

Sisifo po’o Western Australia. Tele galuega fou ua mātalatala mai.


BEATING HEART OF LIVEABLE LIVERPOOL

Ua fa’alauiloaina se suiga telē ma ni foliga fou o le ā va’aia i le Pitonu’u o Liverpool, i se vaitaimi e lē o toe mamao atu, amata atu nei mo le isi 30 tausaga o lumana’i. O le ā i ai ni nofoaga ese’ese o

lea Pitonu’u o le ā si’itia ona foliga tuai e avea ma mata’aga fou. O se vaega fa’apitoa taugatā i totonu lava o le nofoaga fa’atau, e fai malologa i ai tagata uma, feōai ma tāfāfao ma evaeva ai, po’o se (multimillion-dollar leisure centre) o se vaega avanoa fa’apitoa ua fa’aāgaga mo fa’aaliga o koneseti, mo le 30,000 tagata vala’aulia (concert space for 30,000 people) O lenei Fuafuaga Fa’atāoto’oto Alualumamao ua tā’ua o le “The Woodward Place Masterplan” e sili atu i le $250 miliona tala lona tau fa’atulagaina, ua mae’a fofolaina mai e le Pulega a le Taulaga Fa’aītūmalō a “Liverpool City Council” e toe fa’afou ai ma si’itia foliga va’aia, o lea Aai televave le tuputupu

fa’aopo’opo pea o lona faitauaofa’i, auā le toe fa’amatagofieina ma fa’aleleia atili o ona si’osi’omaga, ma fa’aosofia ai lagona o tagata e fia avea ma ō latou nu’u ma alalafaga tumau. Ua silasila toto’a le Pulega a le Pitonu’u o Liverpool, ia matuā sūia atoa foliga tuai o le “Woodward Park” o lo’o i ai nei, ia si’itia maualuga e avea ma se “Aai Mata’aga o Ta’aloga” mo le Setete Niu Sa Uelese atoa, fa’apea se Nofoaga mo Fa’amoemoega Tetele fa’aonaponei,e tata’i mai ai

Pisinisi ma ni galuega fou mo Aiga ma Tupulaga faia’e, ma se tasi o ītu tā’ua, o le fa’aulufaleina ai o ni lagona fou o Tagata lautele o lo’o avea Liverpool ma ō latou Nu’u. Suiga o le olaga i Aso faiso’o i lau silasila ma le va’aiga o mata. O le ‘auau’ o le va’aimamao po’o le ‘Vision’ a le Tusiata mo le suiga atoa o ni foliga fou o Liverpool, ia tāaofa’i uma ni Māta’aga ese’ese mo le mana’o o le Tagata e ālala ma totogi Lafoga i le Pitonu’u o Liverpool, e tāofia ai le malaga ese mamao atu, e tausaili ni Nofoaga Fa’afiafia mo le Aiga aemaise Tupulaga Talavou ma fanau iti. Fuafuaina fo’i se Nofoaga malu puipuia lelei fa’aonaponei mo se ‘Vai āau po’o se Swimming Pool’ fausia ma fa’aāuūpegaina i mana’oga fa’aonaponei, pei o se ‘Vai ‘Aau 50 mita mo tapenaga Fa’a Olimkipeka, aemaise se Vaega mo Fa’amalositino “Fitness Gymnassium”mo le mamalu lautele, ma i

latou lavevea ma manu’aga, e mana’omia le toe fa’agāioi o maso ma musele o le tino. O le fuafuaga lea mo suiga o le “Whitlam Leisure Centre” o lo’o i ai nei, ua fai si matua. Galuega amata ua fa’agasolo nei mo le fausia o se Nofoaga ta’alo mo fanau iti (Playground) fa’apea faleaiga ma potu inu kofe (cafes/restaurants) aetainane se nofoaga nofonofo ma tafaoga ā Aiga, po’o ‘Picnic Facilities’ i (Brickmakers Creek ) Saunoa le Tama’ita’i Pulenu’u o le Pitonu’u Liverpool, Mayor Wendy Waller mo nei suiga ma le va’aimamao, mo le toe ‘tīmataina o le upega fagota’ a lana Pulega mo le mamalu lautele o lona Itumalō. Se tasi itu tā’ua mo a’u lava ia pe ā ou fa’alogoina pe ta’u fo’i le upu “Liverpool” auā o le Pitonu’u ta’utā’ua lea i Egalani Peretania, ma le lalolagi atoa na soifua a’e ai, ma le tupu’aga o le Fa’aili Pepese Lauiloa o le “BEATLES” i le tausaga 1960.


TAXPAYER-BACKED PACIFIC TELCO DEAL FIRMS UP

Ua fa’ailoaina aloa’ia i le Aso Faraile ua mavae atu e tauala i Tusitusiga a Nusipepa ‘Sydney Morning Herald ma le ‘The Age’ i lalo o le Tulafono o Fa’amatalaga Sa’oloto (freedom of information act) le a’afia o le Faiga Malo Maualuga (Federal Govt ) a le Ali’i Palemia o

Scott Morrison, i ni Talanoaga Vāvālalata ma Māale’ale Fa’a Pisinisi ma le Kamupani a le ‘TELSTRA’ i se auala e ofoina ai se fesoasoani mo le fa’atauina ese mai o ni ‘ASETA’ a se Kamupani Pasefika, ua iloga ma lausilafia i Feso’ota’iga Fa’a Uaealesi ma Telefoni. Ua ripotia mai ni talanoaga ā Ofisa Sinia a le Matagaluega o Mataupu Tau Va-i-Fafo ma Fefa’atauā’iga a Ausetalia (Department of Foreign Affairs and Trade) pe i ai se ītu tā’ua ma ni agava’a lelei o le ‘TELSTRA’ se tasi o Kamupani Iloga a Ausetalia, mo se manuia lautele fa’ale Tamaoaiga,

mo Ausetalia aemaise lava atunu’u uma o le Vasa Pasefika, pe ā tu’u atu le tau’au o le Faiga Malo Maualuga (Federal Govt ) mo le fa’atau ese mai o le Kamupani “Digicel Pacific” o lo’o pulea aoao e le ali’i pilionea Aiālani, o Denis O’Brien talu mai le tausaga 2020. E sili atu i le $1.5 piliona tala se vaega tupe o lafoga totogi (Taxpayer money ) e fa’amatu’u atu e le Faiga malo a Scott Morrison, pe afai ae tau lau o lea fa’amoemoe, ua faitau mo ni nai vaiaso ona tapuni lea o lea avanoa fa’a Pisinisi. O le Digicel ua fa’afagogotagiao i lau fa’afofoga Samoa, se tasi o Kamupani Telefoni Fe’avea’i e 2 o lo’o tautuaina si ō tatou atunu’u mo le taimi nei. O le Bluesky Samoa le isi, ae pulea

aoao e le Malo o Fiti le 75% pasene, ua nā o le 25% pasene mo Samoa, i lalo o se tasi o ‘Lālā Fa’aputu Tupe a Samoa’ ua fa’aigoaina o le “Unit Trust of Samoa” po’o le ‘UTOS’ Fa’amatalaina auili’ili i nei Talanoaga vāvālalata a le Faiga Malo a Scott Morrison ma le TELSTRA, se tasi o naunauta’iga mo le fa’atauina mai o ASETA uma a le DIGICEL PACIFIC, o lo’o fai Pisinisi ma le tele o atunu’u laiti tau atia’e o le Vasa Pasefika, ne’i paū atu i le Pulega Fa’a Komunisi a Saina, o lo’o fa’alālā mai lana atopa’utupe ma lana Tusi siaki, po’o le ā lava le tau e mana’o i ai le Pilionea Aialani o Denis O’Brien. Mo le silafia atili se tasi o Kamupani Tele mai Saina o le HUAWEI, ua taofia ni faiga fa’a Pisinisi ma Niu Sila, Peretania, Kanata, Amerika ma Ausetalia, auā e fai Pa’aga ma le Malo Komenisi a Saina. Fa’ailoa mai e Jonathan Pryke, Fa’atonu o le Tino “Lowy Institute’s Pacific Islands” e fa’atino ana Polokalame Fesoasoani mo atunu’u Pasefika, afai ae

fa’aauau lenei maliega, o le taimi muamua lea ua a’afia ai le Faiga Malo Maualuga Ausetalia-Federal Govt, i se tino-i-tupe mo ni avanoa Fa’a Pisinisi mo atunu’u o le Vasa Pasefika.


TA’ALOGA-SPORTS: OPETAIA TO GET DREAM TITLE SHOT

Ua taunu’u le moemitiga a le alo talavou Samoa i le Ta’aloga o Faipelega, le ali’i 24 tausaga o Jai Opetaia. Ua sauni atu mo lana fusu’aga aloa’ia muamua, mo le Siamupini o le Lalolagi i le Paga

“Cruiserweight” ma le ali’i o lo’o u’umia le Siamupini i le taimi nei o, Mairis Briedis i le Aso 14 Aperila 2022, Ausetalia nei a’o lo’o taumafai le Vaega Fa’alauiloa e toso mai i luma i le masina o Ianuari/Fepuari 2022. Talu mai le Fusu’aga a le ali’i Ausetalia o Jeff Horn ma le ali’i fusu lauiloa Filipaina o Manny Pacquiao i luma o le 51,000 tagata maimoa i Ausetalia nei, lea fa’atoā toe manino mai le Ioega a le ‘IBF po’o le International Boxing Federation’ Fa’alapotopotoga Fusu’aga a le Lalolagi, mo se avanoa mo lenei tamafanau Samoa, e ausia ai le tulaga Siamupini i le ‘Paga Cruiserweight a le Lalolagi’ O le asō e fetaui ai le Siamupini o Mairis Briedis ma le ali’i o Artu Mann, po’o ai e manumalo, o le ā feiloa’i ma le alo Samoa o Jai Opetaia, na fanau i

Sini Niu Sa Uelese, a’o se sitiseni Ausetalia, pei ona fa’amautinoa mai e le “IBF Fusu’aga a le Lalolagi” E 20 fusu’aga a lenei alo Samoa, leai se faiaina, 16 manumalo i le ‘KO knoct out po’o le tu’ioti’ Fa’aalia e le ali’i Fa’alauiloa Fusu’aga Niu Sila (Promoter ) Dean Lonergan, o lo’o gafa ma Fa’alauiloa Fa’alaua’itele a Jay Opetaia, ua sologalelei lelei vaega ese’ese auā lenei Faipelega tā’ua mo Opetaia ma lona aga’i i le lumana’i, aemaise lana taleni faipelē. O le 16 o tausaga o Opetaia na avea ai ma sui o Fusu’aga Ausetalia i Ta’aloga Olimkipeka 2012 i Lonetona, Peretania. Avea ma tama fusu Fa’aporōfesa i le tausaga 2015. Fa’aalia manino e Dean Lonergan, ua lava tapena le “Team Opetaia” fa’apea le Fox Sports ma Ausetalia atoa, mo le o’o mai o le Fusu’aga o le Tausaga i Down Under. O Jai Opetaia ma ona tupu’aga mai ala’alafaga o Lalomanu Aleipata, ma Apia i le Vaimauga. O le Tuaā o Jay Opetaia o Billy Opetaia na faipelē mo Samoa mai le

tausaga 1964-1973, 31 fusu’aga. Tapu Opetaia lona Tamā.


FORMER WALLABY LEALI’IFANO TO BE MOANA PASEFIKA

Ua fa’agasolo ma le toto’a le sailia o ni tama ta’aalo a le Au Supa Lakapi Fou a le Moana Pasefika, mo le tausaga fou 2022, i le Ta’amilosaga faigatā ma Au mai Niu Sila, Ausetalia ma le Aufili mai Fiti. Fa’ailoaina i Tala o Ta’aloga i Niu Sila, Ausetalia, Peretania le fa’agae’etia o le Pulega a le Moana Pasefika, le sainia o le sui muamua o le Wallabies ma le Brumbies, le alo Samoa o Christian Leali’ifano. Fa’aalia mai le mae’a fa’amautū o aiaiga fa’a Konekarate ma Feagaiga Ta’alo e le Moana Pasefika, ina ua lē manuia le toe a’apa atu a le Kalapu a le Brumbies, mo le taofia o Leali’ifano i le laumua i Canberra mo le 2022. Lana ta’aloga mulimuli mo Ausetalia i

le ta’aloga ma Egelani i le Ipu Lalolagi 2019 i Iapani, lea na malolo ai le Wallabies ¼ Final. O le toe si’itia maualuga o le ta’alo a lenei tamafanau Samoa i le taimi nei, ina ua toe fo’i mai lona malosi ato’atoa i le mae’a ai o ana togafitiga, i le gasegase o le ‘Leukaemia’ i le tausaga 2016. Fa’amatalaina e le ali’i Faiaoga na ulua’i tapu’eina Leali’ifano ma avea ai ma Kapeteni o le Brumbiesm i le 2019, o le ā tele se sao o Christian mo le Au muamua a le Pasefika, na te ta’itaia

tama ta’aalo talavou, aemaise o se ali’i ta’alo atamai ma tele ona agava’a. O Christian Leali’ifano o se tama ta’alo e mitamita faia’e o se tagata Samoa, o vaega ia e mana’omia e le Moana Pasefika, o ni fanau Pasefika e moni ma fa’amaoni lo latou lagona lotonu’u ma atunu’u, e ui lava e le’i fananau ma soifua a’e i Motu o le Paserfika.

Talosia le ofoina atu o le tautua ta’alo Christian Leali’ifano mo le Moana Pasefika. Ua 34 nei tausaga o le soifua o lenei tamafanu Samoa.

5 views0 comments

Recent Posts

See All

Comments


bottom of page