top of page
Search
  • Writer's pictureMaulolo Fata Ueligitone Malifa

Tala i vaifanua o Sini NSW Ausetalia 19 Setema 2021

Staying the “racist” course Public schools continue to promote “divisive” theory banned by Senate.

Ua fa’amatalaina i ripoti a James Morrow o le Daily Telegraph, i le Aso Lulu ua mavae atu, le fa’aaogaina pea e le Matagaluega o A’oa’oga Niu Sa Uelese ni fa’amatalaga, tusitusiga ma mafaufauga ese’ese e u’unā’ina malosi ai le a’oa’oina loloto, o tagata ma ana aganu’u, tu ma aga masani fa’apea lanu ese’ese, po’o “RACIST CRITICAL THEORY” i tagata ua autova’a mai ma nonofo i Ausetalia.

Fa’aalia ini ripoti fa’atuatuaina le tau’ave pea e Aoga a le Malō i Niu Sa Uelese, nei faiga sesē e ui ua mae’a ona pāsia aloā’ia lona tāofiga, ina ua te’ena malosi e le Maota Maualuga a le Senate a Ausetalia, le a’oa’oina o fanau ī ia itūaiga a’oa’oga, ile masina o Iuni i le tausaga ua mavae,2020. Fa’amatalaina fo’i ma le manino, o le naunau pea o Pule Aoga ma Faiaoga e fa’aauau nei mafaufauga fa’ale a’oa’oga, e fa’atupula’ia ai le māvaevae, fēaina’i ma matala ai lagona taua’imisa fa’ailogalanu o tagata, aemaise fanau aoga. O le Aso Lua ua mavae atu na fa’aalia i luga o le ‘Upega Tafa’ilagi’ a le Matagaluega ni Tusitusiga ma mafaufauga Fa’ailogalanu fa’aāgaga mo faiaoga “anti-racism resources” Fa’aalia manino e le Daily Telegraph ni lagona popole ma le lē fiafia o Minisitā o le Setete ma le Faiga Malō Maualuga, i le toe alia’e o nei Tusitusiga. Mulimuli ane i le maitauina o se Fa’alapotopotoga i Amerika o lo tū i tua o lenei fa’amatalaga, ia u’unā’ina faiaoga Ausetalia e malosi lo latou finau ma tete’e atu i le Tulafono a le Setete ma le Faiga Malō Maualuga-Federal Govt, i lona fa’alavelave i le tapēina o nei a’oa’oga taufa’asesē, ua avaga tele i ai fanau i lenei talutalufou. Numera tele o Aoga i Amerika, ua matuā

tapuni lava ona faitoto’a i nei fa’amatalaga feavea’i taufa’asesē, e pei ona vevesi ma vaeluaina ai Amerika i le taimi nei. Latou fo’i nei ua latou manana’o e sūia le upu ‘tamā ma le tinā’ ae ta’u o matua na fanauā, “leave out father or mother” fa’aaoga le upu “birth parent”.


Churches pray unvaccinated can still attend

O le saunoaga a le Ali’i Faifeau a le Ekalesia Agelekana a St George North, Sususga iā Phil Colgan i lana alaleo fa’asalalau (The Pastor’s Heart podcast) i le vaiaso ua mavae, pei ona ripotia e Michael Koziol o le Sydney Morning Herald, e matuā leai leai lava se lagona ma sona mafaufau, nate te’ena pe taofia se tagata Lotu po’o se Kerisiano, e le’i faia se ‘Tui Puipui’ i lona ulufale atu o se sui tapua’i i totonu o le malumalu Paia o Le Atua. Ta’utino le Ali’i Faifeau, lona fa’anoanoaga

i le tumua’i tutusa o le tulafono mo le tatalaina o le ‘fale inu ava, fale tifaga’ ma Maota Tapua’i i Le Atua, po’o Falesa. Fesiligia malosi fo’i e le Sususga i le Faifeau iā Phil Colgan, pe i ai se aiā a le Malō e fa’alālā so’o ai le afaina o Tapuaiga Fa’a Kerisiano ma Lotu Ese’ese, o se vaega i lona manatu e matuā lē taliaina. Fa’aalia manino fo’i e le Ali’i Faifeau, o le itū silisili ona tā’ua e le mamalu lautele aemaise le Faiga Malō a le Setete, o le loto fuatiaifo lelei o Fa’aulu’uluga o Tapua’iga Fa’akerisiano, na talia ma amana’ia ai Aiaiga ma Tulafono fa’ailo o le Fa’ama’i COVID-19, ae manatu i le taimi nei, ua la’aloa le ali’i Minisitā Soifua Maloloina ma le Tama’ita’i Premier, auā e matuā leai lava se aiātatau a le Faiga Malō a le Setete, latou te taofia ai le o’o o

Tagata Kerisiano e feiloa’i ma mafuta Fa’a Kerisiano. O le fa’amaāā pea lā o Brad Hazzard, Minisita Soifua Maloloina a Niu Sa Uelese, i lana fa’ai’uga o le lē fa’atagaina o i latou e le’i faia ni “Tui Puipui” se’i vagana ua taua’aoina ni Pepa o Fa’amaoniga pe ā mātalatala Maota Tapua’i, a’o lo’o finau ma le maumaututū pea Fa’aulu’uluga o Lotu ma Ekalesia Ta’itasi, e leai se Tagata Lotu Kerisiano e taofia ma tusi esea mo lona ulufale atu e tapua’i i totonu o le Malumalu i lona Atua.

Fa’aalia fo’i le tutula’i malolosi o le Afioga Aki Epikopō Katoliko o Sini, Anthony Fisher, ma le Afioga Aki Epikopō Agelekana o Sini, Kanishka Raffel ma Ta’ita’i ma Fa’aulu’uluga o Ekalesia Ese’ese i Niu Sa Uelese, aga’itonu i le Minisita o Brad Hazzard, ia fa’amatu’u mai le faama’āā

pea o lana fa’ai’uga. Fa’aseā fo’i ua lēai se fa’aaloalo ma le amanaia Fa’aalia e Brad Hazzard, o lo’o feso’ota’i pea ma Ta’ita’i o Ekalesia.


Pandemic offers an end to commute

E foliga mai o lou alausu masani e tapena lou aga’i atu i lou Fale Faigaluega, sauni lau ta’avale, savali e fa’atali le pasi, pe momoli fo’i oe i le nofoaafi po’o le train, o se vaega fa’atuatuana’i lea o le ā o’o i ai lou soifuaga mo le lumana’i ma īēluā, aemaise lava i galuega Fa’ale Malo, Fa’a Ofisa ma le to’atele o le Aufai Pisinisi Tumaoti ma Ta’ito’atasi, Kamupani Tetele ma isi Ofisa Iloga o le atunu’u, se’i vaganā le mamalu lautele o tagata e alagātatau ona o’o atu pea i nofoaga e galulue ma faigaluega ai, e pei o Fale Gaosimea, Faleoloa ma Kamupanī, aemaise Auaunaga mo le tautuaina o le mamalu lautele, ma isi Pisinisi e tatau ona fa’atino mai i Fale Faigaluega, le

gāluea’ina o ana galuega fai, aemaise le gaosiga o oloa i le poto i le fa’aaogaina o taleni ma agava’a, i masini ese’ese fa’aonaponei. Ua fa’aalia manino e le “Komisi e Mata’ituina Galuega Fa’atino Olaola Alualuiluma” o le ā le muta le fa’amuamua pea o le faigaluega mai i

le fale, pe ā masuigamalie atu le fa’ateteleina o le Fa’ama’i, fiafia le numera tele o tagata le avea o le fale ma lona ofisa, telē le taimi ua fa’asaoina aetainane le faimalaga atu i le fale faigaluega i taeao uma. Saili’iliga lata mai a’o gasolo le COVID -19, fa’ailoa mai e le Komisi, o lou galue mai i le fale mo le Aso e 1 o le vaiaso nai lou malaga atu i le ofisa, ua fa’asaoina lou taimi malaga e tutusa ma aso faigaluega e 7, ma le $394 tala o lou pasese i le nofoaafi,pasi ma le fa’tupeina o lau ta’avale, suāu’u ma le penisini. A’o le’i a’afia tatou i le F a’ama’i COVID-19, na o le 8% pasene le aofa’iga o ī latou na fai Aiaiga ma Pulega e galulue mai Maota ma Laoa, fa’aalia e le Komisi,

ua si’itia maualuga nei i le 40% pasene le mamalu lautele ua galulue mai i Aiga, ua matuā fa’aalia le fiafia tele i le gasologa ua i ai nei. O le kuata po’o le 1 vae 3 le aofa’iga ua manana’o e galulue mai ī ō latou Aiga, mo le 3 aso o le vaiaso, ae 20% pasene ua fulisia e galulue tumau i le fale. Fa’aalia le fa’atāuaina e le itupā o Tina ma Tama’ita’i le faigaluega mai le fale, o le ā faigofie ai le fesoasoani i fanau i so’o se taimi e mana’omia ai. Silia i le itulā e malaga ai i le galuega i Sini.


DRIVE FOR DOSES

Fa’atino lou “Tui Puipui-Vaccine” a’o e alala lava i totonu o lau ta’avale, e aunoa ma lou tula’i ese. O se faiga fou muamua lea i Sini Niu Sa Uelese, e te malaga atu lava i lou Sa, o ane le aufaigaluega oomi lou “Tui-Vaccine “Sydney’s First Drive-Through COVID-19 Vaccination Clinic” pei lava o le Drive-Through a le Macdonald ma le KFC, ua taumafai e fa’afaigofie uma la’asaga mo le fa’atinoga o lou “Tui po’o lau Vaccination” O le Aso Faraile fa’atoā mavae atu, na amata ai lea fa’amoemoe fou moo e ma le Aiga. O le nofoaga e paka ai ta’avale a le Kalapu Lakapi Liki, Canterbury-Bankstown Bulldogs, Belmore o lo’o fa’ataunu’uina le faiga fou lea. Fa’aalia e le Foma’i na gafa ma le soalaupuleina o lenei Auaunaga, le ali’i o Jamal Rifi i se feiloa’iga ma le Daily Telegraph, ua mae’a tapena uma itūtino tā’ua o lenei taumafaiga, lalo o le Fa’amalumaluga a le Matgagaluega Soifua Maloloina, fa’apea le Setete, fa’amaonia fo’i le nofoaga ua atofaina e fa’ataunu’u ai. Tā’ua e le Foma’i le aofa’iga e 1000 “Tui-Vaccine” e atofaina i le Aso e 1, a’o e alaala pea i totonu o lou Sa. Fuafuaina mai lou taimi taunu’u, mae’a lou Tui, 15 minute e malolo

ai, pe i ai ni ‘auga tigā masani, e iti’iti ifo i le 30 minute lou taimi fa’aalu aoga, ona e toe afio ese mai lea. Fa’amanino mai e Doctor Rifi, le fa’aaogaina o “Tui-Vaccine” e 2 o le AstraZenega ma le Pfizer mo le mamalu lautele,o le ā afifio ane i le Canterbury-Bankstown Buldogs i Belmore i le amataga o lenei vaiaso Sa. Lou avanoa le atunu’u Pele Samoa, ia aulia atu le fa’ai’uga o le tausaga i le Alofa ma le Agalelei fa’aauau o Le Atua, auā ne’i toe fa’alavelaveina ni

fuafuaga fa’ataoto alualumamao a oe ma le Aiga, ona o le mau Aiaiga fa’ale tulafono a le Setete o lo’o fa’amalumalu mai pea i ō tatou luga, a’o feagai ma le Fa’ama’i COVID-19. Manatua ane fo’i nai alo ma fanau talavou, po ua fa’atulaga o latou “Tui po’o Vaccination.


A (NEW) ZEALAND

O ni tusitusiga mai Niu Sila a le Nusipepa Iloga o le NZ Herald i le vaiaso ua tuana’i atu, ua fa’alauiloa aloa’ia ai e le Vaega Fa’aupufai Fa’a Polokiki a Tagata Maori Niu Sila ( New Zealanad Maori Party ) so latou mana’oga tusitusia le suia o le igoa ‘New Zealand’ i le fa’aaoga

aloa’ia ma fa’amautū i le igoa “Aotearoa” New Zealand name to officially name Aotearoa.Mana’o fo’i le Vaega Fa’aupufai, NZ Maori Party ia valaauina ma fa’amamaluina le fa’aaogaina o igoa Maori, o nofoaga o nu’u, pitonu’u ma itumalō e patino tonu i Tagata Maori, fa’amoemoe le Vaega Fa’aupufai, ia fa’ataunu’u ma fa’amautinoa nei suiga tā’ua uma i totonu o le isi 5 tausaga. A’o le’i faia le Faiga Palota Tele talu ai a le Malō Niu Sila, na fa’alaua’itele ai so latou manatu, afai ae tula’i ma pulea le Malo, latou te suia le Niu Sila iā Aotearoa i totonu o le 6 tausaga, fa’apea isi suiga uma o igoa fa’a Peretania, i upu Maori ae le’i aulia le tausaga 2026. Fa’aalia fo’i le 5o% pasene o mataupu i A’oa’oga e a’otauina i le “Te Reo” po’o le gagana Maori, i le aga’i atu i le 2030. A’o limata’ita’ina e le Faiga Malo a le Labour ma le Tama’ita’i Palemia Jacinda Ardern, Niu Sila i

le taimi nei, ripotia mai le sosolo o lana Pulega i ana Fuafuaga Taoto ina ua tula’i mai lana Faiga Malo. Mo le silafia nā o le to’a 2 sui o le Vaega Fa’aupufai NZ Maori Party i le Palemene a Niu Sila na pale mai i le Faiga Palota tausaga ua mavae, ae silia i le 10 sui Faipule toto ma pito Maori i Vaega Fa’aupufai a le Labour ma le National. E to’a 8 sui Faipule Pasefika e aofia ai tamafanau e to’a 4 Samoa.


AUSSIES BIG DREAM TURN TO ‘BIG MONEY

O moemitiga ua taunu’u ma taulau o fa’amoemoega o matua na tu’ua ai Samoa. “Ua leva ona ou fa’atali, ou te fia fa’atauina se fale o nai o’u Matua, lea ua o’o mai le taimi ua mafai ai ona ou fa’atino” O le tala fa’amama’i lea a le alo ta’utā’ua Samao i le NFL po’o le Lakapi Amerika, fa’atoā 24 tausaga, Jordan Ma’ilata i se talanoaga ma le Tusitala o Ta’aloga a le Daily Telegraph, Russell Gould i le Aso Lua ua mavae atu. Fa’amatalaina e Russell i ana tusitusiga le silafia lelei ma

le ao malamalama iā Jordan Ma’ilata, le fa’amanuiaga ua tu’uina mai e Le Atua, o le fa’atau o se fale nofomau mo ona Matua ma le Aiga. E faitauina Tala o Ta’aloga i le Aso Sa ua mavae, o le Aso

To’ona’i lea i Amerika, e le’i sainia le Feagaiga Konekarate Ta’alo a Ma’ilata ma le Kalapu NFL Philadelphia Eagles, ripotia mai o le Aso To’ona’i lava lea na fa’amautū ma sainia ai le Feagaiga Ta’alo e tusa ma le $87 miliona tala Amerika mo le 4 tausaga, a’o sauni atu i lana ta’aloga muamua aloa’ia i le tulaga “offensive lineman” po’o lona puipui o le ‘quarterback’ po’o afa. Ripotia le mata’ina o lana ta’alo ma le manumalo o le Philadelphia Eagles 32 i le 6 a le Atlanta Falcons i le Aso Gafua o le vaiaso ua mavae. O le aofa’iga atoa o le Feagaiga Ta’alo a lenei alo talavaou Samoa na soifua a’e i Bankstown, Sini $A108 miliona tala Ausetalia ua aofia uma ai ma isi fa’amanuiaga, e pei o le fa’aaogaina o ona foliga i televise, nusipepa, leitiō, mekasini ma ana tautalaga i so’o se taimi e fa’alauiloa ai le Kalapu, aemaise le Lakapi Amerika, po’o NFL. Momoli le fa’amalo i nai Matua, Arioga iā Tupa’i Ta’amilo ma le faletua o Pereseti Ma’ilata, i le tausiga ma le fa’afaileleina o le atali’i o Jordan, lea ua tali mai Le Atua i le galuega na lua lūlū, lea ua o’o mai le taimi o le Seleselega. Fa’aalia e Jordan, o lona naunauta’iga mo se fiafiaga o nai ona Matua, le Tinā o Pereseti e galue mo le 6 aso, 12 itula ma lana toeaina e 2 ana galuega, ina ia fafaga le fanau i aso uma. Fai mai Jordan, e mafai e so’o se talavou Polenesia ona ausia nei fa’amanuiaga uma.


SONNY OUTLOOK HELPS COOPER SEE THE LIGHT

E mafai ona fa’amatalaina le mafana o le faigā uō mafanafana a le Numera 10 a le Wallabies, Quade Cooper ma le alo ta’utā’ua Samoa le sui muamua o le All Blacks ma le NZ Kiwis, Sonny Bill Willams i se fa’aupuga faigofie, o se talanoaga ma fa’asoa i luga o le laulau ai, i se inugā ti o le taeao o le fasi falaoā fa’apa’u fa’apata, ma le fasi i’a samani (plate of breakfast toasted salmon ) Ua lalaga mai i luga nei mafutaga lilo fa’aleuō ina ua manumalo le Wallabies i le toe fo’i mai

a le Quade Cooper, ma lana ta’alo mata’ina i le fa’ato’ilaloina o le Siamupini Lakapi o le Lalolagi,Aferika i Saute i Gold Coast Aso Sa ua tuana’i. Fa’amatalaina e Sonny Bill le vala’au atu o si ana uo ina ua le toe filifiliaina e Brad Thorn mo Kuiniselani 2017, e 2 lelei masina o mafuta ma Quade i Aukilani, fiafia lana fanau e ta’aalo ma talanoa ma ‘Uncle Quadey’ Ta’utino SBW o le tele o le taimi o talanoaga loloto i le tā’ua o mafutaga fa’ale Aiga, aemaise Le Atua ma le Lotu.

Taimi o le ta’umafataga, ona fa’apea lea o Sonny, amuia tatou ua maua mea-ai mo luga o le laulau, ae Talofa e, le anoanoa’i i Aferika ma isi vaega o le lalolagi, o lo’o matelāina i le fia maua o se mea-ai Fa’amatala e Sonny i le talanoaga ma le ‘News Corp’ o le mafutaga ma le uso iā e iti’iti lava le afea o le Lakapi ma ta’aloga, tele o le lā fa’asoa o Le Atua, Matua, Aiga, Tausoga Ma Fanau, aemaise le taumafai e ola i se olaga faigofie (simple life) E i ai le talitonuga maumautūtū o le au atamamai i ta’aloga, aemaise Foma’i popoto o le mafaufau (Sports Psychologists ) o le 2 masina lea na mafuta ai SBW masi uo o Quade, o le leo lilo lea ma le fa’apogai na suia atoa ai le toe fefulisā’iga, fa’alāau mamafa o le olaga mimita ma le fia fa’aaliālia o Quade Cooper, ae fa’aulufale lagona fa’atama matua, ma toe liuliu ai lana vaai iā te ia ma lana taleni, aemaise ona uiga fa’aalia i le va fetausia’i ma isi tama ta’aalo, fa’apea le mafuta atu i tagata lautele e lagolagoina le Lakapi (Rugby fans) Fa’afetaia SBW ma le tapu’eina ma le tu’ualalo isi ana uo, lea ua manuia ai le Wallabies, aemaise lana fesoasoani i le talavou o Noah Lolesio.

2 views0 comments

Recent Posts

See All
bottom of page