top of page
Search
  • Writer's pictureMaulolo Fata Ueligitone Malifa

Tala i vaifanua o Sini NSW Ausetalia 26 Setema 2021

MODERNA ‘BEST AGAINST DELTA

A’o feagai pea le mamalu lautele o si o tatou atunu’u ma le fesuia’iga o fa’atonuga ese’ese o aiaiga o le Fa’ama’i COVID-19, aemaise le matuā felanulanua’i o saili’iliga a le ‘au saienetisi saienisi fa’a-foma’i’ i se ‘vailaau fofō’ mo le Fa’ama’i, a’o lea fo’i ua fa’ailoa mai le taunu’u ai i le asō, i lauele’ele o Niu Sa Uelese, Ausetalia le uta muamua o le isi fo’i “Tui Vaila’au Puipui” ua tā’ua o le “MODERNA” E 1 le miliona le aofa’iga ua taunu’u, fa’aalia ini su’esu’ega fa’a Foma’i lata mai, e sili atu lona a’afiaga vave maua ai o se to’omaga, i le tete’e atu i le pipisi o le “taleta po’o le delta” nai lo le ‘Pfizer’ ma le ‘AstraZenega’Ua fa’amatalaina o le “MODERNA” e foliga mai e 92-

95% pasene lona aoga vave mo le ‘Delta’, pe ā fa’atusatusa i le Pfizer e 77-88% pasene, a’o le AstraZenega e 67% pasene. Fa’aalia mai o nei Tui Vaiala’au uma, ua fa’amaonia e 90% pasene, lona aoga vave talafeagai mo le puipui togafitia o i latou mama’i, ae 100% pasene le puipuia o le maliu o le tagata gasegase, pei ona ripotia e Sue Dunlevy o le Daily Telegraph i le Aso Faraile ua mavae atu. Fa’amalamalama manino e le ali’i Foma’i Sinia Fa’apitoa o Vailaau ma Fuālaau a le

Moderna, “Chief Medical Officer Dr.Paul Burton, le matuā si’itia maualuga o fa’ai’uga fa’ailo mai e le ‘MODERNA’i lona aga’itonu i le fa’amoemoe autū na gaosia ai lenei “Tui Vailaau” po’o le ‘Vaccine’ Tolu itū tā’ua ua fa’ailoa mai, o lona malosi’aga, e 28 aso le vā o le tui muamua ma lona lua, fa’atusa i le 21 aso a le Pfizer,ma le isi itū tā’ua tele, o su’esu’ega loloto na galuea’ina ai le fa’amautūina o le malosi’aga o le “MODERNA” E 350,000 afe na taunu’u i le po o le Aso

Faraile, ma le 700,000 afe e taunu’u i le aoauli nei.Fa’amoemoe e 3 miliona Tui MODERNA i le masina Oketopa, Novema ma Tesema. Ua i ai le fuafuaga e fa’asafua atu i Fale Talavai uma i Ausetalia le 3640 Tui ua mae’a ona “Ioeina ma Pasia” mo le fa’aaogaina, mo so’o se tagata amata atu i le 12 tausaga. Ta’utino Dr Burton ia aua ne’ifa’apopoleina le mamalu lautele o Ausetalia, i le “MODERNA” ma lona saogalemū, ua mae’a tapena i faiga fa’aonaponei (technology)


ABC HIT BY‘CHILD ABUSE’CLAIMS-KIDS IN RACISM ROW

Ua matuā māfiafia le tele o ni faitioga ua fa’atūtu aga’i atu i le Kamupani Televise o le ‘ABC po’o le Australian Broadcasting Corporation’. Ua fa’amatalaina le fa’asalalauina o lana Polokalame

mo le fa’aiti’itia o le “Fa’ailogalanu-Racism”, i le fa’aaogaina o Vasega ma fanau iti, ae ua manatu le aofia ma le mamalu to’atele, ua silisili atu ona “Failogalanu” Ua tumua’itutusa lava le uiga moni o le Polokalame a le ABC, ma le “Sauāina o Fanau Iti” O le po o le Aso Gafua ua mavae atu, na fa’aalia ai le Vaega Muamua po’o le “First Episode” ua fa’a Peretania ina “The School That Tried To End Racism” po’o A’oa’oga mo le taumafai e fa’amutaina le fa’ailogalanu.O le manatu o ī latou na tusia ma pu’eina le Polokalame, o le autū moni ia matuā fofola ma tatala talanoaga e finauina ai ma tapē uiga ma faiga “Failogalanu-Racism” i totonu o potu aoga ma A’oa’oga. Sa fa’aaogaina fa’amalosi fanau iti i le vā o le 9 ma le 11 tausaga, i le fesiligia i le lanu o lona pa’u ma fa’amanuiaga e maua e le tamaiti’iti, po’o le tamaoaiga o ona matua “Race and Privilege” O se tasi o va’aiga na fesiligia ai fanau e tupuga mai tagata papa’e Peretania ma Ausetalia, o le ā le uiga moni iā te oe e pa’epa’e lou pa’u, se tasi o teine iti’iti na fa’aalia lona le mautonu i lona tali atu, nisi o tusitusiga i Tusi Faitau ua tusiaina ai, o le tagata e pa’epa’e le pa’u o lona tino, e ao ona fa’aaloalogia. Fa’aalia manino le femēmēa’i ma lagona popole i nei fesili e lē masani ona fa’alogo i ai fanau iti. Se tasi o fesili, e lanumeamata pe lanumoana ou mata. O le tama’ita’i O Fiona White o le Iunivesite a Sini, na ia galuea’ina lenei Polokalame i lona silafia o Tu ma Aganu’u Ese’ese. Fa’ailoaina lenaunauta’iga o le Televise ABC i le vaeluaina o ona manatu ma lagona fa’apolokiki, i le fa’aaogaina pea o lana Auaunaga e osofa’ia ai le uiga fa’ailogalanu aliali o tagata papa’e Ausetalia, molimau lea a Dr Bella d’Abrera o le ‘Institute of Public Affairs’ po’o le Tino Tau A’oa’oga o Mataupu fa’ale Mamalu Lautele. Tatou mata’ala pea i nei a’oa’oga faia fa’ananā i totonu o Aoga, aemaise Polokalame i Televise.


ALZHEIMER’S TEST

Ua fa’ailoa aloa’ia se tasi o avanoa tā’ua mo nai matua ma tagata matutua, ua tuputupu pea le fa’apopoleina ona ua galogalo ma ua lē manatua nisi o vaega o le soifuaga, po ua fa’aiti’itia le malosi’aga o le mafaufau sa masani ai. Ua atofaina nei le ‘sailiga o lou toto’ blood test, e mata’itū ai ‘auga ma suiga tau amata o le gasegase po’o le ma’i o le mafaufau, ua matuā galonimo le gasologa o lou olag, tā’ua o le (ALZHEIMER desease) Fa’aalia le fa’aavanoaina o se tino i tupe

tusa ma le $10 miliona tala, e fa’aagaga mo Sau’esu’ega e saili ai ni auala ma ni metotia fou, mo le fa’aauauina le fa’ata’ita’ia oni Togifitia, e fōia ai le gasegase o le Mafaufau po’o le “DEMENTIA”

Fa’amatalaina le fēlata’ai o ‘auga o nei gasegase, ALZHEIMER, DEMENTIA fa’apea ma le MENTAL HEALTH lea e fanau mai ai le SUICIDE po’o le mafaufauina o le PULE I LE OLA. O lo’o galulue nei le Au Su’esu’e Ausetalia, i le faia o ni fa’ata’ita’iga mai lou toto na su’eina( blood test ) e mata’itū ai ni fa’ailoilo tauamata o le gasegase o le DEMENTIA, po’o le mafaufau ua galo. Ua atofaina ni nofoaga fa’apitoa mo tagata ua galogalo ma lē manatua nisi o vaega ole olaga, i le atunu’u atoa mo le fa’atinoina o ni sailiga, ae le’i tu’uina atu ni fa’amaumauga maua i lau Foma’i po’o le GP. O lo’o galulue nei le Au Su’esu’e Fa’apitoa i le Setete o Vitoria, po’o ai tonu e ono atofaina i ai avanoa ini fa’amanui’aga e tauala mai i lenei Su’esu’ega Fou, e fa’aiti’itia ai le faia o Tui Vailaau malolosi, aetainane le aga’i atu i le fa’aaogaina o Masini e su’e ai le fai’ai (Brain Scans ) ona o le taugatā mo nai Matua ma Tagata Matutua.


BRAKES PUT ON L-PLATERS

Ua fa’aalia le lagona musuā, ma tauau ina mou atu le onosa’i a le mamalu to’atele o ‘Aveta’avale Fa’ata’ita’i’ po’o ‘LEARNER DRIVERS’ i le taofia pea o Su’ega Aveta’avale o laisene “L-Platers”aetainane e lē o mautinoa se taimi fa’atulaga e su’eina ai o latou laisene ‘P’ po’o le

Provisional License. O lo’o taofia lē tumau nei le tusia o lou suafa mo Su’ega o le ‘L-Platers’ a’o le popolega o le ā matuā umi se taimi fa’atali a’o fa’agasolo le numera tele, pe ā toe taliu mai i Aiaiga o le Fa’ama’i. Fa’ailoa e le sui So’oupu a le Service NSW o lo’o galulue nei e fa’amautū tapenaga o fuafuaga mo le toe fa’aauauina o su’ega aveta’avale, pe ā tatala le amataga o galuega ma le fa’amoemoe e amata, i vaega o Pitonu’u Fa’a Itūmalō ma Nu’u i fafo atu o Sini. Ua fa’aalia e nisi fanau talavou ta’i sefulufitu tausaga, o lo’o fa’aaoga le ‘L-Plater’ua loa ona fa’atali le taimi e su’eina ai Laisene mo le ‘P’ po’o le Laisene Aveta’avale Fa’atalitali, e fesoasoani ai i le feavea’iga o nai Matua, ma matua o matua e vaai Foma’i, ma isi fuafuaga fa’ale Aiga. Ta’utino le ali’i talavou 17 tausaga o Jerome Sassine, mana’omia lona Laisene “P” se’i alu ai e feiloa’i ma nai ana uo, ua

leva e le mafuta ona o Tulafono a le Tama’ita’i Premier o Gladys Berejiklian.


WATCH OUT,YOU MIGHT CAUGHT ON CAMERA

O le lapata’iga tā’ua mo oe i lenei vaitau o le tausaga. Ia e mata’ala, Ia e fa’aeteet, auā e te lē o silafia ma iloaina po’o pu’e lou ata e se meapu’eata nanā po’o se ‘hidden camera’ O meapu’eata fa’alilolilo ua tele ina fa’apipi’i nanā i le tele o nofoaga faitele po’o public places Ua tele ona fa’apipi’i i tua o se laupapa ata tautau i totonu o ofisa (behind office Painting ) luga o le fa’ālo o le fale ( ceilings ) totonu o le pusatoso o le kesi ( desk draws ) totonu o le matāuila moli o le faletaele ( bathroom light fittings ) fa’apea le ūaeaina i le keli o lau ta’avale ( boots of cars ) Fa’amatala e Alan Earl pulea le Kamupani o le “Bug Detector” fa’afetaia le Fa’ama’i COVID -19 aemaise i latou e faigaluega mai o latou Aiga, ua siiti’a maualuga ai le olaola o lana Pisinisi, o lana galuega o le su’e po’o fea o nanā ai le meapu’eata fa’alilolilo, a’o fo’i na ia fa’apipi’iina. Tā’ua e lenei Ali’i Su’esu’e Nanā i le talanoaga ma le “EYE SPY” ua le masino le fa’atoai atu o talosaga ma mana’oga ese’ese, na te faia ni su’esu’ega i fale o Aigai, aemaise fale ma nofoaga o Ofisa Sinia o Kamupani ma Matagaluega ese’ese a le Malo, ua masalomia le fa’apipi’iina ai ni meapu’eata fa’alilolilo,ma masini fa’aleotele leo e aunoa ma le iloaina. Tā’ua e Alan le tele o itūaiga meapu’eata fa’ananā e ese’ese, nisi pei ni fa’amau o se ofu, nisi ua foliga o se fuala’au tui, ua faigofie ona fa’atau i luga o le eBay Nisi meapu’eata fa’alilolilo ua foliga o se USB. E lē talitonu Alan Earl, se tasi o meapu’eata ua momono i totonu o le molī o le faletaele, fa’apea se ūaea o le iphone, ua gaosia ai se meapu’eata nanā (hidden camera ) ma tāai ma ūaea molī i le keli o le ta’avale. Ua ese le tulaga ua o’o i ai le lē toe’e o tagata gāoi i lenei vaitaimi. Fautua mai le “Bug Detector” Ia e mataālia ma mataala,auā e o’o lava i lou maota ma lou laoa, e ono fa’apipi’iina ai se meapu’eata fa’alilolilo, ma nanā i vaega o le fale ē te lē o māgafagafa i ai. Lapata’ia fo’i oe i

nofoaga faitele ne’i maua oe e le meapu’eata fa’ananā, a’o e faia se gāiōiga lē talafeagai ma molia ai oe e le tulafono.

There are hidden cameras everywhere. Watch out,you might be caught on camera.


OVERSEAS TRAVEL THE ULTIMATE XMAS GIFT

Ua fa’amautinoa mai e Faiga Malo a Setete fa’apea le Faiga Malo Maualuga po’o le Federal Government, le tatalaina o tuaoi o le atunu’u, i le aga’i atu i le vaitau o le Kirisimasi, mo faigamalaga fa’avāomalo, mo le to’atele o tagata Ausetalia ua lē mafai ona fa’atalitali le fia malaga ese mo atunu’u mamao mo se suiga talu mai le taofia ma lokaina e le Fa’ama’i COVID-19. Fa’aalia e le ali’i Minisita o Tagata Tafafao Maimoa a le Faiga Malo maualuga,Federal Tourism

Minister,Dan Tehan i lana tautalaga i le fa’atasiga ale Au Fa’asalalau i le Aso Lulu ua mavae, ou te lagonaina ma malamalama lelei i le taofia o le mamalu lautele Ausetalia, ua ave’esea le avanoa e malaga ai mo isi atunu’u mo galuega, pisinisi, a’oa’oga fa’apea faiga malologa. Mafua’aga tatau lea e ao ai ona faia uma ō tatou Tui Puipui, ma tausisia le fuafuaga ua fa’ataotoina e le faiga Malo

Maualuga, ina ia mātalatala ai ō tatou tuaoi ia e malaga ese atua ai mo le Kirisimasi. E lagatatau i Ausetalia uma ona ausia le 80% pasene o Tui e 2 e afua mai le 16 tausaga ma luga atu le matutua.

Tā’ua e le minisita le fa’amoemoe tele i aiaiga a isi atunu’u e uiga i le Fa’ama’i, e sologalelei ai lau faigamalaga. Fa’ailoa e le Kamupani va’alele a le Qantas ana fuafuaga lata mai mo ana faigamalaga fa’avaōmalo i Lonetona, Fiti ma Los Angeles i Amerika, amataina i ogatotonu o Tesema. O isi uma malaga mo atunu’u mamao ua fa’amoemoe e tatalaina i le masina o Aperila 2022. Ae manatu ā tatou Talafou ma le agaga fa’aaloalo i lenei taeao o le SAPATI, o le atoaga o nei fuafuaga alualumamao a le Setete aetainane le Faiga Malo Maualuga, o le afifio ma tala’aao ane e fa’atino o tatou ‘Tui Vaila’au po’o Vaccinations’ ō inā e ala mai ai le mātalatala uma o

tuāoi e pei ona taulagi mai e Ta’ita’i o le Malo.


LEOTA RE-SIGN FOR THE REBELS AND WALLABIES

Ono masina talu, ai na logoina ai e le Pulega po’o le Manager a le alo Samoa, le sui fou o le Wallabies, lea na ta’alo ananafi i le ta’aloga ma le Argentina, le ali’i talavou o Rob Leota, mo sana filifilga pe nate taliaina le 2 tausaga fa’aopo’opo o le Feagaiga Ta’alo mo le Kalapu Melbourne Rebels, ma avea ma sui o le Wallabies a Ausetalia, se’ia aulia le tausaga 2023. Sa le’i faigofie le filifiliga a Leota ona ua atofa ane muamua le Konekarate Ta’alo miliona a se tasi o Kalapu milionea o ‘PAU i Farani’ Ae peita’i na fa’afaigofie le fa’ai’uga a Leota ina ua vala’au ane le Faiaoga a le Wallabies, Dave Rennie ma taumafai e fa’asufi le Pulega a Rob Leota,le ali’i Manager o Dave Wesels ina ia ta’alo pea Leota i Ausetalia, mo le aga’i atu i le Ta’amilosaga Ipu a le Lalolagi-Rugby World Cup 2023. Fa’aalia le fa’agae’etia ma le loto fa’amalieina o le Faiaoga o le Wallabies, le tula’i mai o le si’itia vave o le ta’alo a lenei alo Samoa, aemaise le fa’amautuina o tama ta’aalo talavou mo le tu’ufa’atasia o se Au lelei a Ausetalia mo le Farani i le 2023. Fa’ailoa e le Ofisa Sili (CEO) a le Melbourne Rebels o Baden Stephenson i le talanoaga ma le Tusitala o Ta’aloga a le Sydney Morning Herald, Sam Phillips, e lē fa’atusalia le tupe maua i le nofo ai

o Leota i le Wallabies, ma le Feagaiga Konekarate Ta’alo miliona ma miliona na fa’alālā mai e “PAU i Farani” Ta’utino Baden o fa’asoa na faia ma le fa’amaoni ma upu tu’usasa’o ma lenei tamafanau Samoa, na faigofie ma gaua’i ai Rob Leota i nofo ma ta’alo fa’aauau mo le

Melbourne Rebels ma le Wallabies. Saunoa le Faiaoga a le Wallabies Dave Rennie, ua fai si umi o ia maitauina le ta’alo ma fa’atinoga a Leota i taimi o koleniga, e matuā telē lo’u fa’amoemoega ma le amana’ia o lenei tama ta’alo talavou, e maualuga sona lumana’i ta’alo mo Ausetalia. Fa’amatalaina e Leota, o le tosina o lona fiafia i le Lakapi, auā ō ona tausoga i le latou Aulotu, e ta’aalo Lakapi uma i latou.O Robert Leota na fanau ma soifua a’e i Preston Melepone Vitoria, Aso 3 Mati, 1997 ua 24 ona tausaga. E ta’alo i le Numera 6 po’o 7 i le laina i luma-forwards. Talosia le tula’i mai o Robert Leota.


MENINGA AIMING TO WOO TO’O FOR ROOS

Ua mae’a fa’atia nei le fuafuaga alualimamao a le ali’i FaiaogaTa’utā’ua o le Aufili Lakapi Liki a Ausetalia, le KANGAROOS o Mal Meninga, ia saofa’i lelei i lalo mo se talanoaga vāvālalata

fa’aleuō ma se tasi o Fetū Pupula o le Ta’amilosaga Lakapi Liki NRL,2021, le alo ta’alo lelei talenia toe laufofoga fiafia ma le loto maualalo, le atali’i talavou Samoa po’o le uigi a le Penrith Panthers o Brian To’o. Ta’utino Mal Meninga, o Brian To’o ma le uigi a le Melbourne Storm, Josh Addo-Carr o le sili ma le tulua lea i su’ega fa’ai’u a uigi uma a le NRL o lenei tausaga 2021. Fa’aalia fo’i e Meninga, e lē mafai ona sopoloa lana filifiliga e aunoa ma le pipi’i o le suafa o Brian To’o o se sui o le KANGAROO AUSETALIA. Ta’utino manino e Meninga, o le la’asaga muamua ma le tā’ua o le talanoa fa’afesaga’i ma Brian To’o, ma tu’uina atu le fesili pe nate fia ofuina le jersey Lanuauro meamata, po’o fia avea ma sui o le Toa Samoa. Ua malamalama lelei Mal Meninga i fēlata’i o le mafutaga fa’aleuō a Brian To’o ma le isi alo Samoa o Jerome Luai, ua tu’uina atu lana taleni ta’alo mo Samoa. Saunoa Meninga, e lē natia le maualuga o le avanoa ma le amanaia’ina e le NRL, aemaise ia o le Faiaoga le tautua ta’alo a lenei alo Samoa o Brian To’o, i totonu o le 2 tausaga.Ta’utino fo’i Meninga, e lē fa’alavelaveina e ia ma lana Pulega pe ā filifilia e

Brian To’o le ofuina o le jersey a le Toa Samoa. Fa’amatalaina e Meninga, le atoa ma le sologalelei o le o le fa’atinoga a To’o i ta’aloga uma a le Penrith Panthers i le 2020 ma le 2021. E lē o se uigi

e fa’atalitali ma tūtū i lana itū o le malae, e tele lava ina a’afia i le ta’aloga i totonu o le 80 minute. O Brian To’o, Jerome Luai, Moses Leota, ma Stephen Crichton o le Penrith Panthers, e avanoa uma e ta’aalo mo le Toa Samoa, pe ā manana’o ai. Tatou talosia nei tamafanau Samoa po’o ai lava le atunu’u e tu’uina atu i ai latou taleni Lakapi Liki. Kangaroos po’o le Toa Samoa.


IKITAU STAYING PUT

Ua alalaga fiafia le numera tele o i latou (Australian Rugby fans ) e lagolagoina, taumulimuli ma naunauta’i e maimoa i le ta’alo a le tamafanau Samoa o Lenny Ikitau. Fa’ailoa mai e le Iuni Lakapi Ausetalia le toe sainia o le isi Feagaiga Ta’alo fa’aopo’opo mo le isi 2 tausaga me le Numera 13 a le Wallabies i le taimi nei. Fa’aalia se fuafauaga sa mafaufauina e Ikitau mo le se’e atu e ta’alo mo se isi Kalapu Lakapi mo le Ta’amilosaga Supa Lakapi 2022. Ua fa’ailoa ane

le naunauta’iga o le Kalapu Supa Lakapi a le Melbourne Rebels, ma lana ‘tupe telē’ ( bigger financial offer ) e ave’ese atu ai Lenny Ikitau ma le laumua i Canberra, ae ua fai le filifiliga maumautūtū a le alo Samoa, e tu’uina atu lana taleni, ma ofoina atu lana ta’alo mo si Kalapu na agalelei, ma fesoasoani tele i le tapu’eina o ona agava’a ta’alo, i le tau amataga o lana Lakapi. Ua toe nofo e fa’aauau mo le ACT Brumbies mo le isi 2 ma le afa tausaga. Fa’amatalaina e Lenny, lea ua sasa’a mai fa’amanui’aga, i lona fa’aaogaina lelei o avanoa i Polokalame Ta’alo, ma a’oa’oga nā ia maua i le Brumbies, lea ua i’u ai i le Numera 13 a le Wallabies, soso’o ai ana ta’aloga e 3 ua mavae atu ma le Springbox Aferika ma le PUMAS Argentina, a’o fa’agasolo le Ta’amilosaga Rugby Champioship 2021. Fa’amanino mai e le ali’i faiaoga a le Wallabies, Dave Rennie, o lo’o fa’amoemoe e telē se sao o Lenny Ikitau i tapenaga a le Australian Wallabies mo le Ipu L,alolagi

faia i Farani i le tausaga 2023. Na fanau Lenny Ikitau i Ausetalia nei, Aso 1 Oketopa 1998, ae sa ola a’e i Niu Sila ini matua Samoa.

2 views0 comments

Recent Posts

See All
bottom of page