top of page
Search
  • Writer's pictureMaulolo Fata Ueligitone Malifa

Tala i vaifanua o Sini NSW Ausetalia 31 Oketopa 2021

KINDY KIDS ELIGIBLE FOR VACCINES IN WEEKS

Ua fa’alauiloaina aloāia e le ali’i Minisita Soifua Maloloina Faiga Malo Maualuga ( Federal Government ) Greg Hunt, le agava’a o fanau iti e o’o atu i le 5 tausaga, ona faia o latou ‘Tui Puipui’ o le COVID-19 i le fa’ai’uga o le masina fou, Novema, ina ua fa’aalia manino e le Tino e gafa ma le Fa’a Tulafonoina o Tui ma Vailāau, (Medical Regulator) aemaise Kamupani Gaosi Fuala’au a le Lalolagi po’o (Pharmaceutical Companies ) pe talafeagai le malosi o le ‘Tui

Vailāau’ ma tino o le fanau iti. Fa’amaonia fo’i le fa’aaogaina o le itūaiga ‘Tui Vailāau’ o le “Pfizer” pei ona tā’ua i le Tusitusiga a le Tusitala o Faiga Fa’aupufai Fa’apolokiki ( Federal Political Reporter ) a le Sydney Morning Herald, Tama’ita’i o Rachel Clun i le vaiaso ua

tuana’i. Fa’aalia fo’i le faia o ‘Tui Puipui’ fa’aopo’opo o le ‘Pfizer’ mo i latou i Falema’i o Tagata Matutua, ina ua fa’amautū mai i aiaiga fa’ale Tulafono Soifua Maloloina. Saunoa le Minisita o Greg Hunt, o le Aso 8 Novema ua oatofaina mo le fa’asafua atu o le ‘Tui Puipui’ fa’aopo’opo mo le Mamalu Lautele, i le mae’a ai o le Iōega Fa’ai’u mai le Fa’alapotopotoga Ausetalia Fautuaina Tui Puipui “ Australian Technical Advisory Group on Immunisation” i le vaiaso nei. Ua mae’a pasia le fa’ataunu’uina o ‘Tui Puipui’ fa’aopo’opo mo fanau talavou 18 tausaga ma luga atu, saunoa le ali’i Foma’i Porofesa John Skerritt, le fa’amautūina le fa’aaogaina o le ‘Tui Puipui’ o le ‘Pfizer’ mo fanau iti 5-11 tausaga, fa’aalia e le Porofesa le tele o le gaogaosā o vaega ma tapenaga ese’ese, i le fa’afeusua’iga o Vailāau ma Fualaau, ia mautū lelei ai ‘Tui Puipui Vailāau’ talafeagai lelei mo le taliaina e le tino malosi aemaise totoga mu’amu’a o fanau iti. Fa’amatalaina e le Foma’i Porōfesa, o le atoaga ō ou ‘Tui Vailaau’ e 2, o le fa’amoemoe lea mai le amataga o le vevela o le COVID-19, o le tu’uina atu o le ‘Tui Vailaau’ fa’aopo’opo, ia matuā malupuipuia oe, le fanau ma le Aiga.

Fa’amaninoina mai o le ‘Pfizer’ ua mae’a ona Ioeina ma Pasia fa’ale Tulafono, tauala i fa’amaumauga ma su’esu’ega a Foma’i fa’ale Soifua Maloloina, e fa’aaoga o se ‘Tui Vailaau’ fa’aopo’opo.


LONG WAIT FOR P-PLATE

Ua to’atele le mamalu lautele ua fa’aalia lagona fa’aseā talu mai lenei taimi umi, a’o taofia galuega ma fa’amuta le faimalaga pei ona masani ai, ona o tapu o le Fa’ama’i COVID-19. Fa’amatalaina e Tama’ita’i o Angira Bharadwah ma Kelsey Hogan, o Tusitala a le Sydney Morning Herald i le Aso Tofi ua mavae atu, pe tusa ma le 120,000 afe le aofa’iga atoa o aveta’avale o lo’o u’umiaina Laisene Nofo Va’avāa’ia po’o “P-plate”ua loa ona fa’atali mo ā latou Su’ega, mo le fia ausia o le “Laisene Atoa” po’o le Full License i le Setete Niu Uelese. Fa’aalia i se Pepa o Fa’amatalaga ( Press Release ) masani a le Matagaluega Service NSW, ua na o le 50 le Au Faiaoga fa’apitoa fa’aopo’opo po’o (Testers ) mo Su’ega a Aveta’avale, ua mafai ona fa’atulaga mo lenei taimi o le tausaga, aemaise le si’itia pea o ī latou ua tusia suafa mo le fia maua o ni Laisene aveta’avale atoa, po’o le Full License. E 103,000 afe aveta’avale e alala i Taulaga Fa’atau uma

o Sini ma Pitonu’u lalata i le Taulaga, ae 17,000 afe e nonofo i nu’u fa’a Itūmalo maomao atu ( Regional NSW ) Saunoa Damon Rees le Ali’i Ofisa Sili (CEO) Service NSW, e i ai le fa’amoemoe o le mae’a ai o le 6 masina muamua o le Tausaga Fou 2022, o fa’asolosolo le to’atele na fa’ava’atu’ia le fa’atinoina o Su’ega Aveta’avale, a’o feagai le Setete ma le tapu o galuega ma le feōa’i masani, ona o aga a le Fa’ama’i COVID-19. Fa’amanino mai e le Ofisa Sili, ua tu’uina atu nei le fa’amuamua mo le mamalu lautele, ua mana’omia le faia o Sailiga (COVID-19 Testing) ma ‘Tui Puipui’ o le Fa’ama’i, ae fa’apitoaugafa mo Tagata Faigaluega, ia mafai ona auai atu i Fale Faigaluega i aso uma.Manatu le Tama’ita’i So’oupu a le Ofisa saili galuega o le “LABOR” Yasmin Catley, ua alagatatau i le Service NSW ona faia se isi fuafuaga, mo se isi 50 Au Faiaoga Fa’apitoa auāua to’atele ua afaina galuega, ona o le mana’omia vave o Laisene Aveta’avale Atoa ( Full

License ) Fa’aopo’opoina le fa’aseā ma faitioga a le tele o Matua, i le galuega faifaipea o le taumolimoli o fanau talavou i A’oa’oga ma galuega, ua fa’ava’atu’ia ai galuega masani a nai Matua.


VETERAN MANAGER BACKS TELSTRA DEAL

O nai vaiaso ua mavae atu na tā’ua iā tatou Talafou le naunauta’iga o le Faiga Malo Maualuga Ausetalia (Federal Government ) mo se taimi muamua e atofaina se tino-i-tupe tele tusa ma le $1.33 piliona tala i se Kamupani Tumāoti mo se Fefa’ataua’iga Fa’a Pisinisi, ese mai tupe sao ā ī latou o le Aufaisea e fa’amoemoe i ai Kamupani ma Pisinisi Tetele, po’o ( Shareholders ) Tusitusiga a ‘Joe Samios’ o le ‘Sydney Morning Herald’ vaiaso ua tuana’i atu, fa’ailoa ai le I’uga manuia ua taunu’u i ai le fa’atauina motu e le Kamupani Telefoni Iloga Ausetalia, ‘TELSTRA’o le “Digicel South Pacific”ua lausilafia e le tatou atunu’u. Ua na o le $270 miliona tala le tupe fa’aalu a le

‘TELSTRA’ mo lenei Fefa’atauā’iga, e $1.33 piliona tala Ausetalia ua fa’atupeina e le Malo, ma le naunauta’iga maualuga ia tumau le puleaina o le “DIGICEL” i aao o se Kamupani mai le Vasa Pasefika, pei o Ausetalia ma Niu Sila. Fa’aalia e se Faipisinisi Matua Ausetalia, ua loa ona puleaina ni Kamupani Fa’apututupe Anton Tagliaferro, e ao ona Fa’afetaia le Faiga Malo a Scott Morisson, i lana vaaimamao mo le Tamaoaiga tau fa’aolaola o atunu’u o le Vasa Pasefika, ae tainane le puipuia o le Saogalemū o Motu o le Vasa Pasefika, mai le tele o Fa’atosina a le Malo Komenisi o Saina, i le so’ona tau’ai solo o ana miliona mo atunu’u tau’atia’e e pei o Samoa, ae mulimuli ane ua faulala’i le mau Aitalafu, ma le sosolo atu o Pulega Fa’amalosi mo le tau tototgiina o nei miliona, o le ā fafa i tumua’i o Augā Tupulaga faia’e o le Vasa Pasefika. Ua silia i le tausaga o fa’agasolo talanoaga ma feutagā’iga mo lenei Fefa’ataua’iga Fa’a Pisinisi, lea ua tino mai i le tu’uina atu o le $2 ma ona tupu miliona i aao o le ali’i FaiPisinisi Pilionea Aialani, o Denis O’Brien ae tumau le “DIGICEL” i le Vasa Pasefika. Fa’aali manino le maualuga o le tino-i-tupe na atofaina e le Malo Komenisi o Saina mo le South Pacific Mobiles-Digicel, mafua’aga lea na si’itia maualuga ai le tau fa’atauvā mo le”DIGICEL” Papua Niukini le Ofisa Tutotonu o le “DIGICEL” i le Pasefika, ma isi atunu’u e 5. Fiti, Vanuatu, Nauru, Tonga, ma Samoa.


PACIFIC SOLUTION ON FARM CRISIS

“O se taunu’uga lelei ma fa’amalieloto lea mo Ausetalia uma ma lona Tamaōaiga, aemaise le fesoasoani malosi mai ā ō tatou Aiga ma Tagata Pasefika” o le Saunoaga Fa’alaua’itele lea a le Tama’ita’i Minisita Va i Fafo (Minister Foreign Affairs ) Marise Payne i le Aso Faraile ua tuana’i atu, pei ona ripotia e Matthew Benns o le Daily Telegraph, i lona fiafiaga ina ua fa’amautuina Talanoaga mo le Au galulue i Fa’atoaga La’au ‘Aina i Ausetalia nei. Saunoa fa’alaua’itele le Sui Ta’ita’i ( Deputy Premier ) Niu Sa Uelese Paul Toole, i lona feagai ai ma feutaga’iga ma le Faiga Malo maualuga (Federal Govt ) mo le sainiga fa’ai’u, o le Feagaiga mo le malaga vave mai o Tagata galulue mai atunu’u o le Vasa Pasefika, auā ua fa’aalia le numera maualalo o le a’afia ma le pisia i le Fa’ama’i COVID-19. Tā’ua e Toole, le fa’amoemoe maualuga o le Aso Gafua, ō ā taeao lea e tu’ua ai laufanua o Samoa, Tonga ma Vanuatu e le vaega muamua o le aofa’i 55,000 afe Tagata galulue mai le Pasefika, mo Niu Sa Uelese nei, mo le fa’amoemoe maualuga o le galulue i Fa’atoaga La’au ‘Aina, o lo’o fuafua mamao e fanau mai ai se tino-i-tupe, $8 piliona tala mo le

Tamaoaiga o le Setete ma Ausetalia atoa, aetainane le solo atu o se vaega o lea seleni mo Aiga ma Tagata Pasefika. Fa’amatalaina e Ofisa Sinia o le Setete ma le Faiga Malo Maualuga le tatalaina o nei avanoa mo tatou Tagata Galulue mai le Pasefika, auā sa le’i faigofie Fa’atōfāla’iga ia matala nei avanoa Faigaluega, ona o le ogaoga o le Fa’ama’i COVID-19, a’o le fiafiaga o le Setete Niu Sa Uelese ma le Faiga Malo a Scott Morrison, le uti’uti o le faitauaofa’i o Tagata mai le Vasa Pasefika ua mama’i ma pisia i le Fa’ama’i COVID-19. Ua matuā mana’omia vave le tauina o Fuala’au ‘Aina i le taimi nei, auā e vave fo’i ona pala ma ma’uma’u. Fa’aalia le fa’ata’atia ese o Aiaiga

ma Tulafono masani o le Nofo’esea mo vaiaso, tatala fo’i Aiaiga o malaga mai isi atunu’u tuāoi, mai le Aso 1 Novema, taeao lea. E 21 malaga fa’atulaga a Va’alele mai atunu’u o le Vasa Pasefika, amata atu nei se’ia pā’ia le Kirisimasi. Taunu’u Sini,tu’usa’o loa i Fa’atoaga.


JAP MANDATE MAY TEACHER SHORTAGE TRIGGER

Ua alia’e mai i Pepa o Fa’amaumauga Fa’alilolilo a le Matagaluega A’oa’oga Niu Sa Uelese ( Confidential NSW Dept. Documents ) pei ona fofola mai e le Tusitala Fa’atonu o A’oga a le Sydney Morning Herald, le ali’i o Jordan Baker i le Aso Tofi o le vaiaso ua mavae atu, fa’aalia ai ni lapata’iga o le ā feagai ma A’oga a le Setete ma le fa’aiti’itia ma tu’le lē lava o Faiaoga, i totonu o le isi 5 tausaga, e ui o lo’o maitauina le fa’aopo’opoina pea le numera o fanau ua mae’a ona

resitala mo le ulufale atu i A’oa’oga mo le Tausaga Fou. Fa’aopo’opoina Tagata A’o’oga ae si’itia le fa’aiti’itia Faiaoga. O le popolega i le tula’i mai o lenei fa’afitauli, o le ā avea lea ma mafua’aga aliali, o le ā paū atili maualalo ai le silafia atamai o le A’oa’oina o le fanau, aemaise lava i Mataupu o lo’o taumafai le Matagaluega o A’oga, e u’unāina malosi le fanau A’oga e a’otauina

ai,pei o le Numera (Maths )ma le (Science) po’o le Fa’a Saienisi, mo le aga’i atu i Iunivesite ma A’oga Maualuga. Molimauina o Mataupu fo’i ia, e tele lava ina alofia e fanau Pasefika. Ua fa’aalia manino i nei Pepa Fa’alilolilo na tusia iā Mati 2020, le fa’aiti’itia o Faiaoga mo

A’oga a le Malo po’o ‘Public Schools’ se’ia aulia le 2024, ma tala atu o le tausaga 2026. Tā’ua le tu’uina atu o le Pepa i lenei Fa’afitauli iā Novema 2019 ma Iulai i le tausaga nei 2021, ina ua lagā e nisi o Faipule i lalo o le Tulafono fa’amatalaga fa’alaua’itele po’o ( Public Information Act ) Se tasi o popolega tele a’o aga’i atu i le masina fou ā taeao, le fa’amamaluina o le tulafono o Le COVID-19, numera tele o faiaoga e tete’e i le fa’atinoga o “Tui Puipui Vaila’au” ua atili ai ona

matuā savavali ese Ali’i ma Tama’ita’i Faiaoga, aemaise Faiaoga atamamai, ma i latou ua loa ona tautua fa’amaoni i a’oa’o ina o le “Poto Lautele” mo fanau i tausaga ua tuana’i. Fa’ailoa mai i le vaiaso ua mavae, le tatalo atu a le Matagaluega A’oa’oga NSW i Faiaoga uma o lo’o galulue i le Ofisa Tutotonu, ia fo’i ane e fa’atumu avanoa ia, ua mana’omia ni Faiaoga mo le taimi nei. Se tasi nei o Galuega ma se Auaunaga e talafeagai lelei mo fanau talavou Samoa.


TA’ALOGA pei STORMS LONE WOLF

O le alo Samoa ta’alo malosi toe fa’amoemoeina o Nelson Asofa-Solomona se tasi o tama ta’alo iloga a le NRL ma le Melbourne Storm, o lo’o fa’aauau pea lona teena o le faia o le “Tui Puipui

Vaila’au” pei ona fa’amatalaina i le Itulau o Ta’aloga, a le Daily Telegraph Aso Faraile ua tuana’i atu.I lalo o Aiaiga Fa’a Pa’aga o le Fa’ama’i COVID-19 a le Soifua Maloloina ma le Lakapi Liki-NRL, ia usita’ia e Tama Ta’aalo o Kalapu Lakapi Liki uma e 16, mo le ulufale atu i Paka ma Malae Ta’alo ( Parks/Stadiums) taimi o koleniga ma ta’aloga. Fa’aalia e le Pulega a le Melbourne Storm le tete’e pea o Nelson Asofa, e ui ua mae’a le Au atoa ona fa’atino lenei fuafuaga, manatu le Kalapu ia tu’u avanoa pea mo lona loto fuatiaifo lelei, i lana lava maliega, e aunoa ma le u’una’iina i se auala fa’amalosi. Fa’aalia manino e le Pulega, afai lava ae fa’afeufeu ma o’o atu i se tulaga faigatā le fa’auliulitō o le lagona aiātatau a lenei sui iloga ma le fa’amoemoeina a le Melbourne Storm, o le ā ono a’afia ai lana Feagaiga Ta’alo ma le Kalapu. E lēfa’atagaina Nelson Asofa ona ia toe fa’aaogaina vaega ese’ese o le AAMI Park, aemaise lona ulufale atu i tā’ua o koleniga a le Kalapu, se’i vagana ua mae’a fa’atino ona “Tui Puipui Vaila’au” e 2 pei o isi tama ta’aalo. Ua avea le tete’e o lenei alo Samoa, ua fesiligia ai le NRL i le mafua’aga ua talosaga ai

nisi Kalapu, ia fa’asafua le “tui Puipui Vaila’au” mot ama ta’aalo uma.Afai e le masuigamalie mai le teena e Nelson Asofa o le ‘Tui’ o le ā telē se tupe toesea o lana Konekarate, soso’o ai ma le fa’amuta o le Feagaiga Ta’alo mo le sainia e se Kalapu fou, pei o Kuiniselani o lo’o sa’oloto mai lea faiga. Ta’utino manino le Pulega a le Storm, o le ā telē le ōpū pe ā leai se vaifofō o lenei fa’afitauli, auā e maualuga le mana’omia o lenei alo Samoa Nelson Asofa-Solomona i le AAMI Park mo le 2022. O le aso 1 Novema e tatala ai tauofoga mo tama ta’aalo NRL, toe tausaga o totoe o Feagaiga Ta’alo mo ni Konekarate fou.


MAY HAS A WEEK TO CONJURE A MIRACLE

E ala ese’ese ma matafelefele le anoano o fa’afitauli e feagai pea ma tamafanau Samoa ma le Pasefika, i le Lakapi Liki-NRL fa’apea le Lakapi Iuni i tausaga ta’itasi, aemaise lava pe ā sologalelei manuia le fa’atinoga o se taleni ta’alo, sasa’a mai ai ma ni fa’amanuiaga o le

olaga, aemaise pe ā maualuga tupe maua. Ma’imau e pe ana le suia e le Tupe le olaga fa’aaloalo, agamalū ma le tauagafau na ola a’e ai i le Fa’asinomaga o Aiga Samoa. To’atele alo ma tamafanau Samoa o lo’o tausisia pea ia uiga ma tūlelei e o’o mai i le taeao nei. O le manumalo matagofie a le Penrith Panthers i le Siamupini a le NRL 2021, o se fiafiaga tele lea o Tagata Pasefika i Niu Sa Uelese atoa, aemaise Samoa o lo’o ala’ala i Pitonu’u uma o Sini, ae na filogia ma

ni fa’afitauli sa le tatau ona tutupu a’e, manatu Talafou ua sopoloa le fiafia ma le nene’e, ma ua sola’ese ma mou atu le lagona Fa’afetai i le Tapua’iga a nai Aiga, Uo ma ē masani aemaise le Alofa fa’aauau o Le Atua. O le alo Samoa e ta’alo fa’aleoleo i so’o se tulaga po’o le (Utility Bench Player)mo le Panthers 25 tausaga o Tyrone May, ua feagai nei ma ni Talanoaga Vavālalata faigatā, mo le toe lavea’ia o lona avanoa o se tama ta’alo tumau a le Penrith Panthers, mo le tausaga fou 2022. Ripotia e le Sydney Morning Herald ma le Daily Telegraph fa’apea Fale Televise i Ausetalia nei, talu mai le Ta’aloga Siamupini iā Setema, ni lafoga ma ni Tusitusiga lē manuia i luga o Upega Tafa’ilagi (Facebook/Social Media) ua ta’uleagaina ai le NRL Lakapi Liki i Ausetalia, fa’apea le fa’amāmāsagia ai le Kalapu atoa a le Penrith Panthers.Ua lē o se taimi muamua lenei na a’afia ai lenei alo o le atunu’u ini lafoga, tusitusiga ma ata pu’e na ia fa’amauina i lana Api o Foliga (Facebook ) E 7 aso ua tu’uina atu e le Komiti Fa’afoe a le Panthers mo Tyrone e tali ane i mataupu lagā e fa’asaga i le fa’aseā a le NRL, aetainane fo’i saili’iliga mae’ae’a a le Kalapu.Nisi o vaega o lo’o mafaufau i ai le Kalapu, Tautalagia ma A’oa’i, Fa’asala mo se Sala Tupe Lapo’a, Taofia lona ta’alo mo le 18 masina, po’o le fa’amuta o lana Feagaiga Ta’alo. O le Aso Lulu nei e fesāga’i ai.


TINO’S MEGA DEAL ,

O se Feagaiga Konekarate ta’alo fou e miliona, miliona ma miliona mo le ali’i ta’alo talavou Samoa o Tino Fa’asuamaleāui. Ua fofolaina nei e le Kalapu Liki NRL Gold Coast Titans se Feagaiga Ta’alo ua sili ona maualuga, talu ona fa’avae lenei Kalapu, tusa ma le $3.3 miliona

tala mo lenei alo ta’alo matāina Samoa. Ua vave tapena le Titans mo lenei seleni tele, e lē gata i molimauina pea o le talenia o lenei ali’i talavou, lona lua ia taofia ai i le a’apa mai o le a’ao malosi o Wayne Bennett, Faiaoga o le Kalapu Liki Fou Queensland Dolphins, fa’aalia manino fo’i le atofaina o le Tofiga Kapeteni pe ā taliaina e Tino. Auā ne’i galo o le Kalapu lea o lo’o saofa’i ai le Faiaoga o le Kangaroos, i lana Komiti Fa’afoe, le lauiloa i le Lakapi Liki i le lalolagi, le Numera 4

po’o Centre a Ausetalia, Mal Meninga. Fa’aalia le naunauta’iga o le Titans e fa’amautū le si’itiaina i le 4 tausaga le Feagaiga ta’alo ma Fa’asuamaleāui se’ia aulia le tausaga 2026. Manino mai i ripoti o le Kalapu Fou a le Dolphins, se Talanoaga ma le Au Tusitala ma le Au Fa’asalalau, tā’ua e Wayne Bennett le pipi’i o le suafa o lenei alo Samoa i ana Lisi mo se lā iputi i se taimi lata mai. Fa’aalia e le ali’i faiaoga silisili ona fa’amanuiaina i le tele o Kalapu na Faiaoga Ulu ai,

mafana le masaniga ma le mafutaga ma Tino Fa’asuamaleāui, a’o ia tau’aveina le ORIGIN a Kuiniselani lea na mālolo ai Niu Sa Uelese ORIGIN iā Novema 2020. Tatou mata’itū nisi miliona fa’aopo’opo a le Dolphins ma Wayne Bennett mo Fa’asuamaleāui.


DAVE RENNIE TO RECALL NOAH LOLESIO

Ua toe vala’au Rennie mo Noah. Ua 5 ta’aloga manumalo soso’o a le Wallabies mo se taimi muamua ini tausaga se tele ua tuana’i atu, 2 manumalo iā Aferika i Saute, fa’apea le 2 iā Argentina, ma le malo i le ta’aloga ma Iapani, 32-23 i Tokyo fa’ai’uga vaiaso talu ai. Ripotia e

le Daily Telegraph ma le Sydney Morning Herald i le Aso Faraile ma le Aso To’ona’i ua mavae atu, lē matuā fe’ese’esea’i ma le lē manino o Talanoaga ma Feso’ota’iga, a le Pulega o le Lakapi Ausetalia-Rugby Australia ma fa’aulu’uluga o le Au a le atunu’u, le Wallabies. Ua lē ō gatasi le ‘Futia ma le Umele’ pei o lea Muāgagana a Samoa.Ua fai si pogisā o le Pulega a le Wallabies, i le toesea ai o sui e to’atolu e ta’aalo i Kalapu i Iapani, Quade Cooper, Samu Kerevi, ma le ali’i o

Sean McMahon, ua fa’ava’atuia ma a’afia ai Filifiliga o tama ta’aalo mo le Ta’amilosaga Fa’ai’u i Egelani, Sikotilani ma Uelese. Mafua’aga lea o le toe tau tapatapa mai o le ali’i Faiaoga o Dave Rennie, ma taufonō mai i le alo talavou Samoa Noah Lolesio, oso i le va’alele ma malaga vave atu mo ta’aloga i Peretania. To’atele i latou iloga i le Ta’aloga Lakapi Iuni i Ausetalia, sa fa’aalia lo latou mau ese’ese ma le faiaoga Dave Rennie, i lē filifilia o lenei alo talenia Samoa mo lea Ta’amilosaga, manatu o se vaivaiga lea o le Faiaoga ma i latou e faia Filifiliga a le Wallabies, o se avanoa fa’a auro lea e tofo ai ma a’oa’ia Lolesio, mo le tapu’eina o lona mafaufau ma lana ta’alo i ta’aloga Fa’avāomalō, a’o vāaimamao mo le isi Ipu a le Lalolagi 2023, i Farani.

Tolu ta’aloga soso’o ma le All Blacks o fa’ataugā Noah Lolesio i le tulaga tā’ua Numera 10, leai se manumalo, ā ua o’o mai le taimi e fa’aaoga tatau ai i Peretania, ae fai i ai e alu e koleni malosi ma vaai lelei i vaega na fa’aletonu, i lana fa’atinoga i faiāina e 3 ma le Au pito i sili ona tele ana manumalo i le Fa’asolopito o le Lakapi a le Lalolagi. Tatou talosia le toe valaauina o Noah, e toe fa’amā’ai lana ta’alo i le Numera 10 a Ausetalia.

8 views0 comments

Recent Posts

See All

Comments


bottom of page