top of page
Search
  • Writer's pictureMaulolo Fata U. Malifa

Tala Fou i vaifanua o Sini NSW Ausetalia (10 Ianuari 2021)

Education costs rise for Mums and Dads

Ua sauni nei le to’atele o matua i Auasetalia, e totogi le 10% fa’aopo’opo o pili Aoga a fanau pe a toe fo’i i A’oa’oga i lenei tausaga 2021. Pei ona fa’aalia i le Ripoti mo le Toe fo’i i A’oa’oga 2020, sa fa’atautaia e le kamupani o le YouGov, na manino mai e $592 mo le tamaiti’iti aoga e to’atasi, na fa’aaluina e matua,i mea-aoga a le fanau,o le si’itaga e $54 tala lona fa’aopo’opoga mai le tausaga ua mavae 2020. Fa’amoemoeina fo’i le totogi e matua pe tusa ma le $284 tala mo mataupu fa’akomipiuta a le tamaiti’iti, 17% pasene ua maualuga ai nai lo le 2019 o le si’itaga ua sili atona mamafa i lo se isi lava mataupu fa’ale a’oa’oga o le 2021. O le aotelega pe a fa’aopo’opo fa’atasi uma nei si’itaga o mea-aoga a le fanau mo le 2021, lona aofa’iga e $970 tala a le tamaiti’iti e aoga ai i lenei tausaga 2021. O isi tau fa’aopo’opo mo le toe fo’i o fanau i A’oa’oga,ua a’afia ai Toniga e $180 tala, se’evae $111 tala, ma api ma Tusi Aoga e $92 tala. O le aotelega, e 83% pasene o Matua, ua a’afia i lagona popole,aua e 51% pasene le tau o le toe fo’i o fanau i A’oa’oga, 38% pasene e fa’aalu i faleoloa ese’ese, ae 27% pasene e fa’aagaga mo le fanau lava ia,ae le’i toe amatalia A’oa’oga. Tele le fesoua’ina o nai matua, i le tau fa’asoasoa o tupe maua,aemaise le tele o suiga talu mai le Fa’ama’i. Pe 7 mai le 10 matua, e i ai fanau 5-17 tausaga le matutua, ua ta’utino sa fuafua mamao lava i le tapenaina o le toe fo’i o fanau i A’oa’oga 2021, ae o le aotelega o tupe fa’aalu i totonu o le Aiga, ua ma’ai le si’itia maualuga. Ua silasila toto’a fo’i matua i faleoloa e maua ai Toniga na fa’aaoga muamua (second hand shop) a’o tumau le lelei.


New rise of phone phopia

Ua matuā oso maualuga le lagona fefe ma le lē mautonu,pe a le u’uina le telefoni feavea’i(mobile phone)i le lima. E 1 mai le 10 tagata Ausetalia ua i ai mafaufauga ma lagona tutumau popole fa’avalevalea, pe a le taulimaina lana telefoni feavea’i i sekone uma o le soifuaga, e pei ona fa’amaoti mai i se saili’iliga fou fa’atoa fa’ailoa mai (New Research) ua fa’alaua’i tele e le Monash University i lana su’esu’ega fa’atoa mae’a na fesiligia ai le 2000 o tagata, e 99.2% pasene le aofa’iga, ua i ai lagona fememea’i,ma pei ua fai se fa’anoanoa pe a leai pe tete’a ma lana telefoni feavea’i i sina taimi pu’upu’u o le olaga. O le 13.2% pasene o i latou nei ua i ai lagona ma uiga ua pei ua le ato’atoa le mafaufau ona ua fa’alagolago tele,ua pei o sona to’alua lana telefoni feavea’i. Fa’amatalaina i lea sailigae mata’utia le tulaga ua o’o i ai le faiga pa’aga a le tagata soifua ma lana telefoni feavea’i po’o le mobile phone ua foliga mai ua Atua i ai ua tutupu ai fo’i vevesi i totonu o Aiga, ua taua’imisa i le su’eina o le telefoni feavea’i a le Tama ma le Tina. Se tasi o itu na fa’aalia i lenei sailiga, e sili atu i le 3 itulā le umi e fa’aaoga ai le telefoni feavea’i i le aso e tasi, ua atili ai ona mata’utia ma ogaoga le lagona, ua matuā musu lava e tete’a ma lana pa’aga mobile phone. Fa’amatalaina e le ali’i na fa’auluulu i ai lenei saili’iliga a le Iunivesite o Fareed Kaviani, e tele nisi a’afiaga ua alia’e mai, ona o le naunauta’iga fa’avalevalea o le tagata i lana telefoni feavea’i, e pei ua le feso’ota’i ai ma le olaga masani,e tauala i talanoaga masani ma tagata soifua. O le a fai ma fa’afitauli i se taimi lata mai i le lumana’i pe a sosolo mai uiga o le fa’amuamua o le fa’asoa e ala i lau telefoni feavea’i,nai lo le feiloa’i ma lou aiga ma soalaupule fa’afesaga’i. Fa’aalia e le Pulega o Feso’ota’iga ma Fa’amatalaga Tufaina Ausetalia (Australian Communications and Media Authority) ua si’isi’i maualuga le aofa’iga o le fanau iti e fa’aaogaina fa’alausoso’o le telefoni feavea’i, 46% pasene fanau iti mai le 6-13 tausaga le matutua,ua i ai telefoni feavea’i i le 2020. E 33% pasene o ia fanau iti,ua latou u’umia sa’oloto ma avea le telefoni feavea’i o sana pa’aga totino. Se’i taga’i ane po’o saogalemu lenei fa’afitauli masausau o le mata’ituina le fa’aaogaina o le telefoni feavea’i e fanau iti.


Children in stonefish maulings

O lapata’iga mo tafaoga i Matafaga i le vaitau lenei o le tau mafanafana,aetainane fo’i le aga’i atu o matua, aiga e ave le fanau ini taelega i le gataifale. Fa’amatalaina e se tina i le Setete o Kuiniselani, i le vaiaso ua tuana’i atu,le tuia leaga o le vae o si ana tama i le (stonefish) o se ituaiga i’a e foliga mai o se ma’a mafolafola e le migoi a e tu ai ua matala mai le suavai e ‘ona ai lou vae, e tele lava ina maua i vaega papa’u o le sami po’o le aloalo.

O le Aso Kerisimasi na tupu ai lenei fa’alavelave, fa’aalia e Kylie Stapleton le tina o le 9 tausaga, na tuia lona vae i le stonefish i Golden Beach le sulufa’i fa’atopetope atu i le falema'i mo se togafitiga, na ia fa’atoa iloaina ai,e to’aono isi fo’i fanau na manunu’a i le stonefish po’o le i’a mafolafola le migoi ae ona lana tui. Ta’utino Kylie,fa’afetai i le vave o gaioiga a i latou e vaa’ia le saogalemu i matafaga (Lifeguards) na sologalelei ai togafitiga o lana iva tausaga aua na ia maitauina le o’ono,ma le tigā o si ana tama, i le taimi na tuia ai lona vae ona o le ‘ona tele o le sua na lofia ai lona vae. Ta’ua e Leoleo Matafaga (Lifeguards) le taua o le mata’alia ma le mata’ala o matua ma tagata matutua,pe a tafafao i Matafaga aemaise Taelega i le sami, i le vaitau lenei o le taumafanafana. Aua le tu’ulafoaia nai fanau iti e tee’ele na o latou,e o’o lava i le 10 tausaga le matua,e pei o Lapata’iga a Pulega o Matafaga.




4-year grind for uni rebound

E le fesiligia le telē ma le fa’aopo’opoina o fa’aletonu,o galuega fa’a Iunivesite i le tausaga 2021 nai lo le 2020. Fa’amatalaina i Tusitusiga a le ali’i o Richard Ferguson o le nusipepa o le” Australian” i le Aso Lua 5 o Ianuari,pe 4 tausaga le umi e toe fa’afo’i mai ai le Malosi’aga Fa’a Iunivesite, nisi o Iunivesite Maualuga, Lelei ma fa’amoemoeina a Ausetalia, talu mai le Covid-19 ma le Fa’ama’i.Fa’amanino fo’i i ni lapata’iga, a i latou atamamai i le mata’ituina o Tamaoaiga Fa’a Iunivesite, le aluifo pea i lalo,o fa’atinoga ma aiaiga alualumamao, a le To’avalu Iunivesite Maualuluga a Ausetalia, i le mae’a ai o le Fa’ama’i Covid-19. Fa’amautuina le lototele o le Iunivesite Matua a Ausetalia, le Iunivesite Sini, e mafai lava ona latou taofimau lona tulaga lona 100, o Iunivesite i le Lalolagi, e ui i le fa’aaliga a le Pule Lagolago Aoao (Vice-Chancellor) a Iunivesite a Lotu Katoliko,o Greg Craven,ua ia valoia ai le tifatō o Iunivesite a Ausetalia, o le a le toe saofa’i i le Laulau a Tama Mamafa o le Lalolagi.Fa’amatala e le ali’i Porofesa o Nofoaga Tutotonu mo A’oa’oga Maualuluga (Centre of Study Higher Education) o Frank Larkins i le talanoaga ma le Australian, i le Aso Gafua ua mavae atu, mo Iunivesite a Ausetalia i le toe fa’afo’i mai i ona tulaga masani, aemaise le $7bn piliona tala, mai Pili totogi, o tagata ao’oga ua le mauaina, ua fa’aiti’itia ona o le COVID-19, manatu a ia o le tausaga 2022, e matuā iloga ma aliali mai ai, le paū maualalo o Tupe maua ma a’afiaga ini tugā ese’ese i le fa’atautaia o Iunivesite i Ausetalia nei. E 6 Iunivesite Ausetalia e i totonu o le 100 pito i luga,o Iunivesite uma o le Lalolagi, e pei ona lomia i le Times Higher Education Supplement. O i latou nei:University of Melbourne, Australian National University,University of Sydney, University of Queensland,University of NSW ma le Monash University.


Covid-19 mutations put state high alert

Toe fa’atauaina le matuā fa’aeteete ma le mataālia o tagata uma,e alala ma pāpāaao i le Setete o Niu Sa Uelese i le taimi nei. O lona mafua’aga,ua fa’amaonia le a’afia o se Aiga e to’afā, na malaga mai i Aferika i Saute, ma se siama e tausoga ma le COVID-19, fa’apea se tagata malaga mai Peretania, lea ua fa’amalosia ai le taofia o so’o se tasi,e malaga mai le Taulaga Atoa o Brisbane, ma ona nu’u taulalata ane,fa’aaliga ta’ua lea a le Matagaluega Soifua Maloloina Niu Sa Uelese. E tolu aso ua tapunia aloaia ai ni malaga ma feoa’iga, i le Taulaga o Brisbane, a’o fa’agasolo Fonotaga Fa’afuase’i a le Kapeneta, mo le fa’aiti’ita i le 50% pasene tagata malaga mai i atunu’u mamao,se’ia aulia le Aso 15th Fepuari, mana’omia fo’i le tauaaoina o fa’amaoniga na fa’atino ni tui (test) e iloa ai e le o tauaveina le siama po’o le Fa’ama’i COVID-19, ae le’i tulauele’ele i Sini Niu Sa Uelese. Fa’amalosia le sailia o i latou e galulue i luga o va’alele, o aveta’avale, le au teufale,fa’apea aufaigaluega Ofisa Soifua Maloloina,pea lea o le auala e tete’e atu ai le pipisi feavea’i o siama ese’ese, aemaise le toe si’itia ma oso maualuga o le Fa’ama’i i Peretania. Fa’aalia, le faia o tui (test) o le 16 o pasese na malaga mai Aferika Saute,ma nonofo taofia nei i se Nofoaga Soifua Maloloina Fa’apitoa, mo i latou ua fa’amaonia le maua (positive cases) i le COVID-19. Saunoa le Premier Lagolago, John Barilaro, e le tapunia le tuaoi ma Kuiniselani, ae fautuaina so’o se tasi, sa nofo pe latalata i le Taulaga o Brisbane, i le Aso 2 o Ianuari, ia e faia le amiotonu, o le fa’amuta ni feso’ota’iga ma lou Aiga,e tauala i lou alala na o oe i le potu o lou lava maota, se’ia aulia le itula e 6 i le afiafi o le Aso Gafua.

Waratahs one-year lifeline for Izaia

Ua toe tu’uavanoa nei le Kalapu Supa Lakapi Iuni Waratahs i le alo Samoa o Izaia Perese, e fa’aauau ma fa’aiila lana taleni Lakapi, ma lona naunauta’iga ia fa’asa’osa’o ni fa’afatiatama’i na a’afia ai i nai tausaga ua mavae. Fa’amatalaina e le Faiaoga Ulu a le Waratahs, le ali’i Niu Sila Rob Penny, o Izaia o se tama lelei toe talenia,e alagatatau le fai o le amiotonu,e toe tu’uina se avanoa lona lua,e le gata e talavou,a’o lona naunauta’iga e fai le fa’atinoga tonu ma le sa’o, mo ia, lona aiga ae tainane le Kalapu male Iuni Lakapi. Fa’atoa 23 tausaga o lenei atali’i Samoa, 17 ana ta’aloga mo Kuiniselani, sa filifilia e le Faiaoga muamua o le Wallabies, Michael Cheika, mo le malaga ta’amilo a Ausetalia i Europa, i le fa’ai’uga o le 2016. Sainia lana Feagaiga Ta’alo ma le Brisbane Broncos, na o le 2 ana Ta’aloga i le 2019. Maua lona avanoa mo le 1 le tausaga, e ta’alo mo le kalapu a Bayonne, Ta’amilosaga “Top 14”a Farani. Fa’aalia i Tusitusiga o Ta’aloga lona naunauta’i e toe fo’i mai i Ausetalia, le atunu’u na fanau ai. Fa’amatalaina e le Faiaoga Rob Penny, e talavou,na te misia ona tagata, lona aiga ma le nofoaga e masani na soifua a’e ai. Saunoa Rob, e matuā mafiafia ma tele na’uā taleni a lenei alo Samoa, e le’i taitai ona tatala mai. Ta’utino lenei tamafanau Samoa, e gatasitasi lana ta’alo ma le mafaufau o le Faiaoga, i le taunu’uga o lo’o aga’i atu i ai le fa’aaogaina o taleni, o tama ta’aalo ua filifilia mo le Waratahs i le 2021. Fa’aalia le toe auai fa’atasi o sui o le Waratahs, o lo’o filifilia mo le Wallabies, i ana koleniga aua tapenaga mo le Supa Lakapi Ausetalia, amataina ia Fepuari 19, 2021. Tatou talosia le atali’i o Izaia Perese, ma lana fa’atinoga i lenei tausaga, pe toe filifilia ai i le Wallabies 2021.

8 views0 comments

Recent Posts

See All
bottom of page