top of page
Search
  • Writer's pictureMaulolo Fata U. Malifa

Tala i vaifanua o Sydney 11 Aperila 2021

Camera revenue picks up speed

Tupe tia’i ona o le aveta’avale saoasaoa ma le mitavale

Ua fa’amatalaina o tupe ua tia’i,e tatau ona aga’i tonu i le ati’ina’e

o Aiga,ma fa’asoasoa lelei mo a’oa’oga a le fanau,a ua matuā

fa’ateleina ai tupe maua a le Ofisa o Leoleo,ona o le aveta’avale

saoāsaoā,mitavale ma lē fa’autauta.Ripotia ai e le Vaega o

Alatelevavave a le Ofisa o Leoleo i Niu Sa Uelese,ua sili maualuga

atu le Tupe maua mai Meapu’eata mo Ta’avale Saoāsaoā i le

masina o Fepuari 2021,nai lo le vaitau atoa o le Tala Fa’atatau

Fa’aletupe(Financial Year)ua mavae atu,ina ua ave’ese laupapa

fa’ailoilo a le Malō,na maitau gofie ai oga’ala sa fa’atūtū ai,mo le

silafia e le mamalu femalagaa’i,ia fa’aiti’itia ai le mamafa o lou aao i

le vae penisini.Fa’aalia e le Matagaluega o Tupe Maua a le Setete

Niu Sa Uelese(NSW Dept.of Revenue)e $6.1 miliona tala na aoina e

le Malō,i le 28 aso Fepuari,ua sili atu i le $5.7 miliona tala,o le

aofa’iga atoa o Tupe maua i Meapu’eata Ta’avale Saoāsaoō,i le

2019/2020.Mafua’aga ina ua ave’ese laupapa fa’ailoilo,sa fa’ailoa ai

nofoaga o lo’o i ai Meapu’eata Ta’avale Saoāsaoā,mai le masina o

Novema 2020 mo le isi 12 masina.Saunoa le Fofoga So’oupu o

Mataupu o Auala a le Vaega Fa’aupufai a le Labor,John Graham,lo

latou lagolagoina o nei Meapu’eata,ma Tupe maua mo galuega

fa’atino a le Setete,ae alagātatau ona toe fa’afo’i le fa’atūtū o

fa’ailoilo mo le silafia e le mamalu fegasoloa’i,aemaise

Aveta’avale.Fa’aalia manino o se vaega tele o nei tupe maua,e

tatau ona fa’aagaga mo ni A’oa’oga mo Aveta’avale mo le fa’aiti’itia

o le so’ona aveta’avale saoāsaoā,mitavale,lē mafaufau,ma le lē

fa’autauta,aemaise ua fa’aopo’opoina pea tagata maliliu,i luga o

Auala.Ta’ua e Peter Khoury o le NRMA,e tāua le i ai o laupapa

fa’ailoilo,mo lapata’iga pe ā taulalata i magāala o lo’o fa’atūtū ai

Meapu’eata Saoāsaoā,e fesoasoani tele i le suiga o le mafaufau

fa’apumo’omo’o,o Aveta’avale le kea,fia fa’aaliālia mitavale,ae

afaina ai le mamalu faimalaga i luga o Alatele Vavave i aso ta’itasi.A


ē tausisi i le saoasaoā fa’atulagaina(Speed Limit)e lē ma’umau lau

Tupe,ā ē tausisi i le Saoasaoā Fa’atulafonoina o le Auala,e lē

ma’umau le Soifua o le isi tagata.E 43 tagata maliliu i luga o Alatele

i tausaga ta’itasi,ona o le Aveta’avale saoāsaoā mitavale lē

fa’autauta.Saunoa fo’i le Sui Failautusi o le Matagaluega o

Si’isi’omaga,Saogalemu ma Tulafono Taufa’aofi,o fa’asalaga tupe e

maua i Meapu’eata Ta’avale Sāoasaoā,o se faiga lelei ma talafeagai

lea,e a’oa’i ai le Aveta’avale amio le kea,mimitavale,fia fa’aali’alia

ma lē fa’autauta.Fautuaga a Talafou,silasila toto’a ane i le sāoāsaoā

o lo’o fa’afoe ai lou sa,i taimi e te faimalaga ai,ne’i ma’umau lenā

tupe ona totogi i Leoleo.


Virus link to brain issues-

Feso’ota’i le”KoronaVairusi”ma a’afiaga o le Fai’ai

Ua ripotia mai e le Nusipepa o le”TIMES”i Peretania i le vaiaso ua

mavae,feso’ota’iga vāvālalata o le”KoronaVairusi”po’o le Fa’ama’i

o le COVID-19,ma ni a’afiaga latalata i le FAI”AI o le tagata

soifua,se’i vā ane lau fa’afofoga tapua’i Samoa i lenei taeao ole

Sapati.Fa’aalia i Fuainumera fa’amaumau,pe tusa o le 1 i le 3 tagata

na pisia i le Fa’ama’i,COVID-19 ua mautū fa’amaonia i Sailiga

Fa’afoma’i,le fetaula’iga o totoga o le tagata,aemaise le FAI”AI,ua

maitauina ni a’afiaga i totonu o le 6 masina talu ona pisia i le

COVID-19,e pei ona Fa’ailoa ini Sailiga ma Su’esu’ega e Foma’i

Saienisi Fa’apitoa (Neuorogist/Psychiatrist lata mai(New

Research)O se Sailiga pito sili lea ona telē i lenei talutalufou,ua

mauaina ai le mau fa’afitauli,ma le gaogaosā e pei o le

Popolevale,Lagona fa’anoanoa lē mautonu,pei se tagata ua

tu’ulafoa’ina,fa’apea le galonimo o vaega ole Olaga,aetainane le

Ma’i Fatu oso fa’afuase’i.O nei fa’afitauli ua ta’atele ma sosolo ane

iā i latou sa maua i le Fa’ama’i(COVID 19) ma isi gasegase masani o

le tagata soifua.Fa’aalia e Foma’i Fa’apitoa o nei Gasegase,e ui o

lenei Su’esu’ega ua nā o se Sailiga Amata,ae ua tele fa’amaoniga

ma fa’amaumauga ua fa’aalitino mai ai,ua alia’e ai ni mafaufauga,o

le Fa’ama’i COVID-19 ua fa’apogai ai le tutupu,nisi o fa’afitāuli ua

afaina ai le FAI”AI-BRAIN ISSUES.


Consent lessons plan for schools

Fuafua le a’oa’oina o le lagona”IOEGA”i Aoga a le Malo,Aoga

Katoliko ma Aoga Tuma’oti uma i le Setete o Niu Sa Uelese.

Fa’amatalaina e Jessica McSweeney o le Daily Telegraph,27 Mati

2021,le matuā mana’omia o le galulue va’ava’alua o Matua ma

fanau Aoga,aua o i latou ia e taula ma ogatotonugālemū i ai le

Fa’atofāla’iga,mo se fa’ai’uga mautū a le 3000 Aoga i Niu Sa

Uelese,e pei ona fa’ailoaina i se Maliega Sainia Tu’ufa’atasi,e nei

Tino Malolosi e 3,o lo’o fa’atautaia ma fa’afoeina Aoga a le

Setete.O le Ta’utinoga manino,e lē iti’iti se galuega fai,ina ia taofia

ma fa’amuta vave le sosolo maualuga,o le mafiafia o a’afiaga, o

fanau Aoga talavou,i le faia o”Uiga Fa’apaupau Matagā”aemaise le

fa’amaupu’epu’e pea,o”uiga fa’a Sotoma”aga’i pea i fanau teine

talavou,ma i’u atu ai ina fa’ava’atu’ia o latou olaga talavou

mu’amu’a,a’o nisi fanau ua palasi tonu i lima o le Tulafono,e pei

ona iloa i Fa’amaumauga,le fa’aopo’opoina pea o alo talavou

Pasefika,e taofia i Nofoaga mo Fanau Talavou Solitulāfono,po’o le

Juvenile Justice.Fa’aalia le lagolago malosi o Aoga uma i Niu Sa

Uelese,ia matuā āmanaia leo ma manatu fa’aali o le fanau,o lo’o

vala’au pea,aetainane le si’itia ma fa’amanatu pea,o le uiga

fa’aaloalo ma le feavata’i,o le vātapuia o le Tuafafine ma le

Tuagane,e pei ona ola ma soifua mai ai i totonu o le Aiga

Samoa.Saunoa le Tama’ita’i Leoleo Nana Sinia,Detective

Suprintendent Stacey Maloney,Aiaiga fou Fa’ale Tulafono,e a’afia ai

fanau teine ma tama talavou,i le faia pea o uiga fa’apaupau

matagā(sexual abuse) ua na o le 3% pasene o Moliaga e ripotia i le

Ofisa o Leoleo,e fa’amaonia le Solitulafono.Ta’utino le Minisita o

Aoga,a Niu Sa Uelese o Sarah Mitchell,i lana Tautalaga

Fa’alaua’itele i le vaiaso ua mavae,le tu’uina atu ato’atoa ma le

mautinoa o le Malosi’aga o le Setete,ia amanaia le tagi mai ala o

fanau teine talavou,ma alo Tama’ita’i,ma tete’e malosi atu,i uiga

pa’aā fa’aalia i totonu o A’oa’oga i le tele o tausaga,ae le o mautū


se Aiaiga Fa’atulaga e fo’ia ai lenei fa’afitauli,aemaise le mau

Solotete’e a Tina ma Tama’ita’i,i le fa’apumo’omo’o pea o Aiaiga

Fa’aletulafono,ia taofia le toe tupu o nei uiga i totonu o A’oa’oga i

Augā Tupulaga o le Lumana’i.


New cars will cost more due to COVID

Ua matuā pagatia i latou na fa’atau ta’avale fou,i le suiga fa’afuase’i

o le tau,a’o fa’atalitali le taunu’u mai o ā latou oka.Ua fa’aupuina le

mafua’aga o le si’itia o nei tau fou,ona o le uti’uti ma lē lava

ta’avale fou i totonu o Ausetalia,fa’apea le tele o le gaosā mai

a’afiaga o le Fa’ama’i,COVID-19.O se fa’ata’ita’iga le ta’avale o le

Suzuki Jimneys,ua logoina le fa’aopo’opo o le $1500 tala,mai le tau

na okaina ai,o le pikiapu alumia o le Izuzu D-Max,ua oomi anei ai le

$1000 tala fa’aopo’opo.Fa’aalia e le Fa’atonu o Fefa’ataua’iga ma

Fa’alauiloa(Director of Sales and Marketing)a le Kamupani Ta’avale

Izuzu,i Iapani,le ali’i o Koichiro Yoshida le naunauta’iga o le

Suzuki,ia aloa’ia lelei e le Kamupani,le ulua’i tau na fa’aaogaina i le

taimi muamua,na sainia ai le Feagaiga Fa’atau ma ana Pa’aga,o lo’o

fa’atali Ta’avale fou.Ae ua fa’ailoa mai i Setete o Kuiniselani ma

Vitoria,ua maitauina le si’itia o tau fa’aopo’opo ina ua taua’aoina ā

latou Ta’avale fou.Fa’amatalaina e le Komisi o Fefa’ataua’iga

Fa’atauvaga-Australia Competition and Consumer Commission,e

mafai e so’o se Kamupani ona si’itia o ana oloa,i le vā o le okaina

ma le taua’aoina,pe a’o tusia ma fa’aalia i lau Feagaiga Fa’atau,po’o

le Sales Contract.O se kamupani Fa’atau Ta’avale na te suia le tau

mai le Ulua’i Aiaiga Fa’akonekarate,ua mana’o e faia i auala

fa’aalātua palapalā taufa’asese,ua fano ma tuliesea ai Tagata.


Woman,48,dies after AstraZeneca vaccine

Ua felanulanua’i pea fa’amatalaga ma ripoti o le mamalu lautele,ua

mama’i tigaina,o nisi ua maliliu,i a’afiaga o le Tui Puipui o le

Fa’ama’i-COVID-19,aemaise le Fuālāau Vailaau Tui o le

“AstraZeneca”e pei ona tusia e Anna Caldwell o le Daily

Telegraph,Aso Faraile 16 Aperila,2021.E 48 tausaga le matua o se

Tina Niu Sa Uelese,na maliu i le Nofoaga o Gasegase Ma’i

Tigaina(Intensive Care Unit)ina ua mae’a le faia o lona Tui Puipui o

le Fa’ama’i-COVID-19,i le Vailaau Fuālāau “AstraZeneca”Mafua’aga

o le maliu,o potoi toto ua to’a(blood clots)solo i lona tino,e tusa ai

ma ripoti.E o’o mai i le taeao nei,o lo’o vevesi mā lē mautonu Ofisa

Sinia o le Falema’i,John Hunter Hospital i Newcastle,e tau fuafua,

fa’avasega ma iloilo potoi toto,na fa’amuta ai le soifua o lenei Tina

mai Lake Macquarie,pe feso’ota’i ma le Tui Puipui o le COVID-19,le

‘AstraZeneca’Fa’amaonia mai le faia o lona tui i le Aso 9 o Aperila,

ae maliu i le mae’a ai o le 5 o aso.Saunoa le Palemia,Scott Morrison

i le Aso 8 Aperila,le fautuaga i le suiga o le Vailaau Tui o le’Pfizer’mo

Tagata Ausetalia,e le’i atoa le ta’i 50 tausaga.Fa’aali manino e le

Soifua Maloloina Niu Sa Uelese,le fa’amaoniga o le maliu o le

Tina,ae le’i tautalagia se fa’aaliga maumautūtū,o le Vailaau Tui

‘AstraZeneca’na mafua ai.Fa’aalia nisi o gasegase o le tino e maua

ai si nei Tina,pei o le Ma’i Suka(Diabetes)O lo’o taofiofi ma fuafua

mamao le fa’asafua atu o lenei Vailaau Fualaau Tui,mo i latou e i

lalo ifo o le 70 tausaga le matutua.Silasila toto’a pea o tatou Aiga,i

ni a’afiaga e ono alia’e mai,i le fa’atinoina o nei Tui Puipui mon ai o

tatou Matua Matutua,fa’apea le fanau iti.


Siblings to PART ?

O le lumana’i ta’aalo fa’atasi o alo Samoa,le uso o Luciano ma Joey

Leilua,o lo’o talanoaina nei e le Kalapu Lakapi Liki,a le West

Tigers.Fa’agasolo fuafuaga e fa’amautū ai le lumana’i ta’alo o

Luciano,e ala i le atofaina o le isi Feagaiga Ta’alo fou,a’o Joey e le o

manino mai se avanoa,e fa’aauau ai lona avea pea ma tama ta’alo a

le West Tigers.O le uso la’iiti’iti o Luciano,24 tausaga,ua naunau le

Kalapu e toe fa’aopo’opo nisi tausaga,pe ā mae’a lana Konekarate i

le fa’ai’uga o le tausaga fou,2022.E maualuga le fa’atuatuaga ma le

fa’amoemoe o le West,i lenei alo o le atunu’u,e le gata i lana

taleni,ae o lo’o talavou pea lona olaga ta’alo.Fa’aalia le matuā

fa’amalieina o le Kalapu,talu le ulufale mai o Luciano,3 tausaga talu

ai,a’o ta’alo i le St George Illawarra.Ta’utino e le Kalapu le fia

taofimau mo Joey mo se isi tausaga,2022,aepeita’i o lona tau

maualuga,se’i vaganā ua fa’apaū lana Tupe maua,e ta’aalo fa’atasi

ai ma le uso la’iiti’iti,o Luciano mo le isi tausaga.E le aumaua taleni

ta’alo o ni uso Samoa,e taumulimuli ai Kalapu,ona o faiva ma

agava’a i Ta’aloga,o Meaalofa foa’ifuaina e Le Atua i Tamafanau,

Aiga,Nu’u ma Alalafaga,le Atunu’u Pele Samoa,aetainane ana

Ekalesia.


Back in a hunt-

Toe fo’i mai Karmichael Hunt e lavea’i le BRONCOS.O taeao ua

atofaina e auai atu ai lenei alo Samoa,i lana koleniga muamua fa’a

Lakapi Liki,mo le Kalapu a le Brisbane Broncos,talu ona savali ese

mai le Liki,ae fa’apupula lana taleni Lakapi Iuni mo Kuiniselani ma

le Wallabies,i nai tausaga ua mavae.Fa’amatalaina i Tusitusijga i

Nusipepa i le vaiaso ua mavae,ua toe tāliu le alo Samoa Karmichael

Hunt i NRL.Ta’ua le olaga ta’alo o Hunt,pei se feagia’i a se asiosio

ma se matagi,e taumatemate po’o fea tonu e aga mai ai,a’o lea ua

toe tapā e le Faiaoga Ulu o le Broncos,Kevin Walters ma toe tatala

atu le faitoto’a,iā Hunt ua 34 tausaga,e toe fa’ai’ila ai ona agava’a,i

le toe ofuina o le Maroon Jersey,ma fesoasoani i le tapu’eina o

tama ta’aalo fou o le Kalapu.Fa’aalia le fa’afiafiaina o le ali’i Faiaoga

i le avanoa e fesoasoani ai Karmichael,i le isi fo’i tamafanau talavou

Samoa,Anthony Milford,e fa’amalosiau ma fa’atonutonu folau lana

fa’atinoga,ua lē o sologalelei i lenei vaitau o le Ta’amilosaga a le

NRL.O le Broncos na amata ai le taleni ta’alo a Karmichael

Hunt,tausaga 2004,i le fa’atoā 17 o ona tausaga.Na soifua mai lenei

alo Samoa i Aukilani,Niu Sila,17 Novema 1986.Tulaga e ta’alo ai

Fullback,Wing,Five-Eight ma le Halfback.Lakapi Liki-Brisbane

Broncos,2004-2009,ma le 2021.Kuiniselani(Origin)2006-

2009,Ausetalia-Kangaroos 2006-2008.Lakapi Iuni-Biarritz

Olumpique,Farani 2009-2010,Kuiniselani Reds,2015-2018,NSW

Waratahs 2019-2020,Brisbane City 2015.Ausetalia Wallabies-

2017.Sa ta’alo fo’i lenei tamafanau Samoa i le AFL,Australian

Football League.Fa’amaumauga o tagata ta’aalo iloga i Ausetalia,o

lenei alo o le atunu’u,o se tama ta’alo lona lua lea,ina ua mavae Ray

Millington, i le Tala’aga Fa’asolopito o Lakapi e 3,na o’o i le

Tumutumu Maualuga Fa’aporofesa,o le Lakapi Liki(NRL)Lakapi Iuni

a Ausetalia ma le Australian Rules Football.Tuua e Karmichael Hunt

ma lona Aiga Aukilani,Niu Sila,fa’atoā 11 ona tausaga.O ona tuaā o

le Samoa le tamā,a’o le Atu Kuki si ona tinā.


Roosters chase another all blacks great

Ua pisapisaō ma lagonaina i le ualesi moso’oi mai Bondi i le vaiaso

ua tuana’i atu,i tala a’ave i feutaga’iga ma fa’asoa a le Kalapu

Lakapi Liki, Sydney Roosters ma le Afa lauiloa,Numera 9 a le

Olopeleki a Niu Sila,le ali’i pito Maori o TJ Perenara.Mana’omia

vave e le Roosters se Fetū Pupula e suitulaga iā Jake Friend,pei ona

ripotia i Tusitusiga a Christy Doran,o le Daily Telegraph,Aso Faraile

16 Aperila,2021.Fa’amatalaina e le Ripoti mae’ae’a a le Fale

Televise Niu Sila’1 News’i le vaiaso ua mavae,le matuā vaai toto’a a

Perenara ma lana Pulega(Agent)pe lē o le vaitau talafeagai lenei,e

liliu ai loa le Numera 9 mata’ala a le Olopeleki,e toe fa’aolaola ona

faiva Lakapi Liki,aemaise e lē o i ai sana Konekarate Ta’alo mautū,i

le mae’a ai o le Ta’amilosaga Supa Lakapi Aotearoa 2021,o lo’o

avea ai TJ ma sui fa’amoemoeina,toe Kapeteni a le Hurricanes.

Fa’aalia e lenei Olopeleki ta’alo finafinau,e ui lava i le lilifa pea o le

lagona e ta’alo tumau i Niu Sila,ae ua to’atele le mau taleni talavou

ua manu a’e ā latou fo’i fa’atinoga i taimi nei.Ta’utino lana Pulega

le ali’i o Warren Alcock,e lē masino le tele o Kalapu Lakapi i le

Lalolagi,o lo’o talosaga tauvā mo Perenara.Fa’aauau pea talanoaga

ma le Sydney Roosters,fa’apea le Iuni Lakapi a Niu Sila.Ta’utino TJ,e

le faigatā ona maua se nofoaga fa’amalieloto i lenei vaega o le Vasa

Tasemane,pe ā mae’a lana filifiliga ma lona Aiga,e kolosi i le Lakapi

Liki.O TJ Perenara fa’atoā 29 ona tausaga,2 manumalo i le Ipu

Lakapi Iuni Lalolagi(Rugby World Cup)mo le Olopeleki,69 Ta’aloga

mo Niu Sila(Test Matches)6 masina na ta’alo ai mo le Japanese Top

League a Iapani.E 4 isi Kalapu Lakapi Liki,NRL o lo’o fa’agasolo pea

soalaupulega,ae foliga mai o le Sydney Roosters,o lo’o taulāmua i le

taimi nei,mā o lo’o lava ana $$$miliona o Tupe fa’aāgaga i lalo o

Aiaiga a le NRL,po’o le Salary Gap.


Su’ega Aoga Faifeau Ekalesia Fa’apotopotoga Kerisiano Samoa

Pulega Sini Saute,pei ona masani ai i tausaga ta’itasi.I le taunu’u ai

o le Talalelei i laufanua lanulau’ava o Samoa,191 tausaga talu ai,ua

lē nā o le suluia o le atunu’u ma ona tagata,i le Malamalama Pupula

o Le Atua,ma Fa’a Kerisianoina ai tatou,ae na afīfī malu mai ai ma

A’oa’oga mo alo ma fanau a Samoa.I le tuputupua’e lā i Nu’u ma

Ala’alafaga,sa fa’alogoina ma sāua pea le si’uleo,i aso uma e

fa’apea”Ave le fanau i le Aoga a le Faifeau”E fa’agalogatā le aunani

ane ma le taupati o nai matua,ma nai Tuaā.Lē lā ua tā mai le logo o

le”Aoga a le Faifeau”O le amataga lea o le Fa’afaileleina o alo ma

fanau a Samoa,e tauala i”A’oa’oga a le Faifeau”o le matāfaioi tonu

lea a le Susuga i le Fa’afeagaiga Tau-i-le-Lagi,ma lona Faletua a Nu’u

ma Ala’alafaga,o le tapu’eina o tamafanau faia’e a le Afio’aga.O le

Aso ananafi na fa’ataunu’uina ai”Su’ega A’oga Faifeau”EFKS,Pulega

Sini Matū,11 ana Aulotu,fa’afoeina lava e Susuga i Faifeau ma

Faletua,i le Ta’ita’iga a le Susuga Toeaina ma lona Faletua.Sa

Talimalō ai le Tovine o Sini EFKS,Susu ai le Susuga Malifa Taeipo ma

Sitaua Malifa,ma le Paia maualuga i le Mamalu i le Aulotu.Mataupu

A’oa’oina ai le fanau ua silafia e Samoa uma.O le Faitauina o le Pi

Tautau,Mataupu Silisili,Faitau Tusi Paia,Gagana Samoa ma le

Aganu’u,Numera,Tauloto, Tusilima,ma le Tala Fa’asolopito EFKS.

Vaevaeina i Vasega e pei ona masani ai,Faitau Pi,ma le Vasega

1,2,3,4,5,6,7 ma le Vasega 8 mo alo ma fanau matutua.Na

fa’atumulia le Tapuaiga a nai Matua ma Aiga uma o le Pulega,i lea

fa’amoemoe tāua i Tausaga ta’itasi,i lalo o le Kalena o Galuega Fa’a

Kerisiano Fa’asolo,a le Ekalesia Fa’apotopotoga Kerisiano

Samoa.Mae’a le Su’ega,soso’o ai ma le lauina o togi na mafai ona

ausia e alo ma fanau,mai mataupu ta’itasi.E i ai le Talitonuga

maumautūtū,e lē o le sili,tu lua ma le lona tolu,ae o le galuega

va’ava’alua a Susuga i Faifeau ma Faletua,ma le vasega o matua ma

nai o latou Tuaā,ia fa’aauau pea le lagona Sailimalō,e tauala i

le”A’oga a le Faifeau”auā le fa’afaileleina ma le tapu’eina o alo ma

fanau lalovāoa a Samoa i A’oa’oga Fa’a Kerisiano i Ausetalia.Na


taualuga lea aso taupōina,i le Taumafataga na saunia lava e Aulotu

ta’itasi o le Pulega Sini i Saute.E molimoli pea le Agaga Fa’afetai ma

ma le Fa’amalō i le Aufaigaluega Totofi a Le Atua,Susuga i

Fa’afeagaiga ma o latou Faletua,auā e ui lava ina alālā ma pāpāaao

le Mamalu ma le Paia o Samoa,i lenei atunu’u,ae o lo’o fa’amumu

pea le Lamepa a Le Atua mo fanau a Samoa.

2 views0 comments

Recent Posts

See All

コメント


bottom of page