top of page
Search
  • Writer's pictureMaulolo Fata Ueligitone Malifa

Tala i vaifanua o Sydney NSW 28 March 2021

Islamic school’s big $11m payback

Ua galulue malosi nei le Setete o Niu Sa Uelese,ina ia toe fa’aola ma toe totogi mai Tupe a le Malo,ua fa’aaogā seseina.Ua avatu nei le fa’atonuga fa’avavevave i le Aoga Mosalemi pito silisili ona telē i Ausetalia,ia toe fa’afo’i mai le tino i tupe $11 miliona tala,o tupe a le Setete,ina ua alia’e mai le fa’aaogāina e lenei Aoga Mosalemi,i taimi o lo’o mautinoa le telē o ana Tupe Fa’asili,po’o Porōfiti.E pei ona ripotia e le Daily Telegraph i le vaiaso ua tuana’i atu,le tu’uina atu o le fa’amatalaga mautū a le Tama’ita’i Minisitā o Aoga,e tali atu ai i le Faigamalō Niu Sa Uelese,i lana fa’atonuga malosi i le Aoga Mosalemi,Malek Fahd Islamic School,Sini Sisisfo,ia toe fa’afo’i uma le tino-i-tupe $11miliona talā,i se taimi lata mai.Fa’aalia e le Minisitā o Aoga,le naunauta’iga ia toe fa’aola lenei seleni telē,na fa’aaogaina i le vaitau o le 2014 ma le 2015.O le fa’ai’uga o le toe fa’afo’i mai o le tupe,ona o se fautuaga malosi a le Komiti Faufautua a le,Fa’alapotopoga Aoga a le Malō,e le Fa’amoemoe i ni Tupe Māmā i le auala e galuea’ina ai le fa’atautaia o A’oa’oga.Ta’ua le sulufa’i atu o le Aoga i le Tino Tumāoti mo Saili’iliga ma(NSW Civil and Administrativei Tribunal)finauga ese’esega mo se fesoasoani,ae le’i fa’amanuiaina.Fa’aali e le Komiti Faufautua,ua fananau mai nei fa’afitauli,ona o le loloto o ma felata’i o le Pulega Tino Fa’a Isalama Maualuga a Ausetalia-Australia Federation of Islamic Councils,sa latou fa’atonutonu folau Komiti Fa’afoe a Aoga mai le tausaga 1989,aulia 2016.I le taimi nei ua galue se Faufautua Fa’a Pisinisi,e tu’ualalo ma saili mae’ae’a le fa’atinoga a lenei Aoga Mosalemi,ma maitauina le savalia ma aloa’ia Faiga Fa’ale Tulafono,mo le tausisia ma sologalelei le fa’atautaia o ana galuega,aemaise le fa’aaogaina fa’amatu’u mai le Malo mo A’oa’oga.




Hospital probe after sixth baby dies

Ua fa’agasolo nei se Su’esu’ega Mae’ae’a i le maliu ai o se pepe fa’ato’a fanau,i le taeao o le Aso Sa ua tuana’i atu i le Falema’i i le Pitonu’u o Blacktown.Ripotia ai o le 6 ai lea o pepe fou,e maliliu i le Maota Gasegase lenei i totonu o le 2 tausaga.O se fa’afitauli lata mai lea na tupu i se tama’ita’i talavou 20 tausaga,ua 38 vaiaso o lona ma’itaga,ina ua toa’itaunu’u i le Falema’i Blacktown,i le Aso Faraile vaiaso ua mavae.Fa’amatalaina a’o fa’atino galuega masani a Foma’i,na fa’afuase’i ona maitauina le paū maualalo le tātā o le fatu o pepe tama,ma maliu ai lava i le taeao po o le Aso Sa.O lo’o fa’aauau i le taimi nei Saili’iliga loloto,a Foma’i Tumāoti Fa’apitoa i le fa’apogai moni,ua tutupu fa’alausoso’o ai lenei fa’afitauli o pepe fou maliuliu,i le Maota Gasegase i Blacktown.Fa’aalia manino e le Fofoga So’oupu o le Soifua Maloloina i Pitonu’u Fa’aitūmaō Sini Sasa’e,Western Sydney Local Health District,ua matuā tatala atu i le Mamalu Lautele lenei Su’esu’ega Loloto,ona o le maliliu pea o pepe fou,a ua mautū ona fa’a’u’upega,ma fa’atotoga mae’ae’a uma masini ese’ese fa’aonapōnei,e fa’atino ai galuega fa’a Foma’i. Fa’aalia fo’i le agava’a lelei ato’atoa o Ali’i ma Tama’ita’i Foma’i o lo’o galulue ma tausia lea Maota Gasegase.O le tausaga ua mavae 2020,na savavali ese ma solotete’e Tama’ita’i Foma’i Pasi ma Fa’atosaga(Nurses ana Midwives)ona o le lē lelei ona fa’a’au’upega ma fa’atotoga vaega ese’ese o le Falema’i Blacktown.Fa’aalia e le Iuni a Tama’ita’i Tausi Ma’i ma Fa’atosaga(Nurses and Midwives) telē le fa’aletonu i le Vaega o Tina Failele ma Pepe Fou,ua matuā televave ona fa’aopo’opoina le to’atele o le Tina fananau,ae to’aiti’iti le Aufaigaluega.Fa’aalia le filifiliaina o Ofisa Fa’apitoa Soifuafua Maloloina Sinia e to’atolu(Senior Medical Officers)To’afā Ali’i Foma’i Fou(Junior Doctors)ae 15 Tama’ita’i Tausima’i Pasi ma Fa’atosaga,talu mai Oketopa 2020.E le o toe mamao ona mae’a lea o le Su’esu’ega Mae’ae’a,i le fa’atinoga o galuega a le Aufaigaluega,i le Maota Gasegase i Blacktown.

Public schools have $1.5b in unspent funds

Tala o Tupe i Aoga i Niu Sa Uelese

E pei ona fa’alauiloa aloa’ia e le Sydney Morning Herald i le Aso Tofi ua mavae atu,le tau fa’asoasoaina o Tupe e totogi ai le fa’atautaia o A’oa’oga i le Setete o Niu Sa Uelese,a’o lo’o saofa’i le $1.49 piliona tala o Tupe e le’i fa’aaogaina,na fa’aāgaga mo A’oa’oga,ua fa’atupula’ia i le $200 miliona tala talu mai le tausaga 2018.O le $756 miliona tala o lea vaega tupe,sa fa’amatu’u mai e le Malo e pei ona masani ai,a’o le isi $710 miliona tala,na mauaina i Sailiga Tupe na fa’atinoina e le Mamalu Lautele,ma nisi o le tele o Fa’alapotopotoga,e pei o le P&C ina ua fa’alauiloa e le Matagaluega o A’oa’oga Niu Sa Uelese.Ua manino mai lenei fa’ailoa,ina ua auautasi le Filifiliga a Ofisa Sinia,i le fausiaina o se Kolisi Aoga Maualuga fou,i le Pitonu’u o Leppington,Saute Sisifo o Sini.O le alia’e mai o le talanoaina o Tupe e le’i fa’aaogaina mo A’oa’oga,ona o le popolega i le Fa’ai’uga mautū i le tausaga 2019,e tu’uina atu le Pule Faitalia i Aoga ta’itasi,mo le fa’asoasoaina o Tupe fa’aalu,ae peita’i,e le’o va’ava’alua ma le lagolagoina malosi,mo Pule Aoga e fa’ataunu’u ai ma ia sologalelei le puleaina o Tupe Fa’aalu mo Aoga.E ao ona fai le fa’ai’uga faitalia a Pule Aoga,mo le filifilia o ni Faiaoga Lagolago,tapu’eina ma a’oa’oga fa’aopo’opo mo Ali’i ma Tama’ita’i Faiaoga,fa’apea le fa’atauina o masini e mana’omia mo galuega fa’aofisa,sa masani ona saunia e le Matagaluega o Aoga.Fa’aalia e le Failautusi a le Matagaluega o Aoga,Mark Scott ua telē le suiga lelei o le lufilufiina o tupe tu’uina atu i Aoga,aemaise le totoe o le $17 miliona tala,na fa’amatu’u atu mo Aoga a le Setete Niu Sa Uelese,e le’i fa’aaogaina.Saunoa le Sui Faipule o le Vaega Fa’aupufai a le Greens,i le Maota Maualuga(Federal)o nei tupe totoe,ua matuā alagātatau ona fa’asoasoa lelei mon ai Aoga o lo’o mana’omia moni le fesoasoani.


Airport link cost soars

Ua si’isi’i pea i luga le fa’aopo’opoina o le fausia,o fataula’iga ala e feso’ota’i atu ai i le Malae Va’alele i Sini Sisifo,po’o Western Sydney Airport.Ua silia ile $2 piliona talā le tau mo le Auala Televave(M12 Motorway)o lo’o fuafua mo le lumana’i lata mai,e pei ona fa’ailoa e le Matagaluega o Fa’avae Mautū mo Taulaga Fa’atau(Urban Infrastructure)O le suiga o le tupe fa’aalu o lenei Atina’e tele,e mafua i suiga o le Ata Tusitusi(Design)O le fesuisuia’i ma si’itia le foliga matagofie o le Auala Tele fuafua mo le aga’i atu i le Malae Va’alele Sini Sisisfo,ia feiloa’i ma fetaui lelei ma le Auala Televave(M12)soso’o atu i le Auala o Elizabeth Street,i le Fetaula’iga ala M7,ina ia feiloa’i ma isi auala feso’ota’i e ulufale atu ai i le Malae Va’alele.O suiga uma o lenei galuega tele,ma lona Tau Fa’aopo’opo e $286 miliona talā,fa’atupeina e le Faiga Malo Maualuga(Federal Govt)ma Faiga Malō Fa’a Setete.Saunoa Paul Fletcher,Minisitā e gafa ma nei galuega a le Setete,o nei Fetaula’iga ala fou,o le a si’itia ai le lava tapena o magāala ese’ese i Pitonu’u Fa’a Itūmalō,aemaise le Mamalu Lautele Femalaga’i,aetainane le saunia o auala e lē totogia,po’o toll free mo le filifiliga sa’oloto a le aveta’avale lava ia.O le Auala Televave M12 i lona fuafuaina tau tupe,fa’atulagaina i le Tino-i-tupe $2 piliona talā,$1.6 piliona tala ua fa’atupeina e le Faiga Malo Maualuga(FederalGovt)ae $450 miliona talā,ua totogi e le Setete Niu Sa Uelese,po’o lau tupe totogi fa’asaofaga(Tax Deduction) i taimi uma e totogi ai oe.


UNI book a woke joke

O se Tusi Ta’iala Iunivesite(University Guidebook)ua fa’atonuina ai Ali’i ma Tama’ita’i Faiaoga,i le suia o le upu”mother as a”birthing parent”po’o le ta’atia ese le upu”Tina”,ae suia i le upu”Matua na fanaua”O lenei mafaufauga ma le manatu fa’avalevalea o le Iunivesite,ua matuā faitioina malosi e le Ali’i Minisita o Aoga a le Faiga Malo Maualuga(Federal Govt)Alan Tudge,ua ia fa’amatalaina o le”Lapisi matuā Mafiafia”ua palasi maualalo ai le talitonuga o le mamalu o tagata lautele aga’i atu i Pulega Fa’a Iunivesite ma ana Komiti Fa’afoe, aemaise i latou na tusia nei Ta’iala.Saunoa le Ali’i Minisita,lona mitamitaga o ia o se Tama,ae le fanau,ua filifilia e Le Atua Tina e ala mai ai lana Meaalofa mo le Tagata.Ta’utino Alan Tudge,e matuā mafiafia ma maualuga lona tete’e malosi,i lenei Tusi Ta’iala Iunivesite Fa’avalevalea,na tusia e nisi e galulue mo le Australian National University Gender,mo le Gender Institute Guidebook,po’o le taumafai e tau fa’amatala le ese’esega o Ali’i ma Tama’ita’i.Ta’utino le Minisita,e le taitai ona tau latalata lona mafaufau nate taliaina ai lenei suiga matagā fa’avalevalea,e manatu fo’i o le 99% o le faitauaofa’i o Ausetalia,e suitulaga le upu “Tina”o se matua na fanaua.Ua matuā fa’amaupu’epu’e atili ai le inoino ma vaai maualalo o le Mamalu Lautele i uiga Fa’a Iunivesite,aemaise pe a tula’i mai le ituaiga poto lē lelei lea fa’aonaponei.Ua sosolo malosi nei mafaufauga,talu mai lava le pasiaina e Faiga Malo a Atunu’u e 29,e i ai ma Ausetalia,le tulafono i le taliaina o le Fa’aipoipoga a le ali’i male ali’i,po’o le tama’ita’ima le isi tama’ita’i,po’o le LGBTO.Fautuaina ma le agaga fa’aaloalo fo’i le mamalu o matua,ma le aumatutua,e silasila toto’a ane i nei faiga Iunivesite,i lagona fou ua taumafai e fa’aulufale mai,e tauala i A’oa’oga,ua tele lava ina taofiofi mamau e nai fanau,e aunoa ma le silafia.



World rugby to back 2 pacific island teams

Ua fa’amaonia le so’oso’otaua’u ma le lagolago malosi a le Tino Fa’atinā,Lakapi a le Lalolagi po’o le World Rugby,i le Fa’atupeina atoa,auā le fa’atautaia o Au Lakapi e 2 mo Atunu’u Pasefika,e ulufale atu i le Fa’alagāmaea a le Ta’amilosaga Supa Lakapi,mo le tausaga fou,2022 mo le taimi muamua,e pei ona ripotia mai e le Nusipepa,New Zealand Herald.A tusa ai la ma Aiaiga fa’ai’ui’u a le Iuni Lakapi a Niu Sila,ma lana Komiti Fa’afoe i lona taliaina aloa’ia,aemaise Tu’utu’uga masani o Fa’amoemoe Tetele fa’apea,ua nofo sauni le Komiti Maualuga Fa’avāomalō a le Lakapi Fa’atinā a le Lalolagi,World Rugby e fa’amatu’u mai le tino tupe,$1.2 piliona pauni Peretania i le tausaga,mo le 3 tausaga muamua,e fa’atupe ai ma le lagolago ato’atoa o Au Lakapi e 2 a le Pasefika,o le MOANA PASEFIKA ma le FIJIAN DRUA.Ua fa’aalia le lagolagoina o lenei fa’amoemoe,ua loa tausaga o taumafai,e Iuni Lakapi a Atunu’u ta’itasi o le Pasefika.O lenei fa’ai’uga ma le fa’amalieloto,i le mae’a o Sailiga o Tupe maua Fa’a Pisinisi,Faiga Fa’apa’aga ma le Iuni Lakapi a Niu Sila,ina ua talia aloa’ia le Tala Tupe fa’aaoga tatau,e pei ona fa’atapula’a i Aiaiga ma Tu’utu’uga masani.Fa’aalia e le Ta’ita’ifono o le Lakapi Iuni Lalolagi Bill Beaumont,le suiga tele o fa’ai’uga fai a le Komiti Fa’afoe,o lana vaaimamao ae le o le vaai maualalo,i le ati’ina’e o le Ta’aloga Lakapi Iuni i Motu Laiti o le Vasa Pasefika.Ta’utino le Ta’ita’ifono i lana vaai fa’aletagata soifua,o le tulaga tonu ua leva ona tatau o ausia,ia agava’a uma tama ta’aalo Pasefika,e fai ai lana filifiliga sa’oloto e avea ai ma tama ta’alo Lakapi Iuni fa’aporōfesa,i le fa’atumutumuga o Kalapu Lakapi Iuni i le Lalolagi.Molimoli fo’i lana Fa’afetai ma le Fa’amalō i Iuni Lakapi Malolosi e lua a Niu Sila ma Ausetalia,i le maua’a ma le naunauta’iga ia tau lau o lenei Fa’amoemoe mo ati’ina’e olaola o le Lakapi Iuni i Atunu’u,ma Tagata Pasefika uma.Talosia le ulufale o le MOANA PASEFIKA ma le FIJIAN DRUA,ia maua atili ai ni avanoa mo alo ma fanau Pasefika.

3 views0 comments

Recent Posts

See All
bottom of page