Tala i vaifanua Sydney NSW Ausetalia 17 Ianuari 2021

340 drink drivers and demerit points

E 340 aveta’avale onānā na molia ma fa’asalaina e Leoleo,sa tusiina i ai le aofa’iga o sala tupe e 6978,fa’atasi ma le toesea fa’aluaina o togi aofa’i(double-demerit)i le vaitau o le Kerisimasi ua mavae atu.E to’afā i latou na maliliu i fa’alavelave i auala o Niu Sa Uelese,i le taimi o Aso malolo 2020.O se tasi o i latou nei,o le talavou 20 tausaga,na pu’eina e mea pu’eata saosaoa a Leoleo,i le televave e 180 kilomita i le itulā,i le ogaala e 100 kilomita i le itulā,i le nu’u o Mudgee i le 7 o le afiafi,a’o lumana’i ai le Tausaga Fou.O lea talavou o lo’o fa’aaogaina le ituaiga Laisene o le(P-plater)E $2,520 tala na palasi i le tumua’i o lea talavou,fa’atasi ma le se’iina o lona Laisene.E 45 kilomita na ova ai le saoasaoa.Fa’aalia i Pepa mai le Ofisa o Leoleo,e 145,928 sailiga masani o tagata fa’asuāvā(breath tests)ae 340 moliaga o le aveta’avale onā,537 ta.avale lavevea matu’iā,ae to’afā na maliliu.Talosaga le Ta’ita’i Pulega a Leoleo,o Auala Televavave(Traffic and Highway)o le Komesina Lagolago o Leoleo,Karen Webb,e lapata’i mo aveta’avale uma,ia i ai le fa’aete’ete i luga o auala i le amataga o le lenei Tausaga Fou 2021.Fa’amanatu e Karen,e le vave aluese le o’ona o le ava malosi mai lou tino(va ane lau fa’afofoga)i le taeao e soso’o ai,ma e tago ai i le foeuli,a’o lo’o filogia pea lou toto e le ava malosi,ma taofia e Leoleo,se’i ai ma le Laisene Aveta’avale,i le masina muamua o le 2021.Fa’aalia e le Vaega e gafa ma ta’avale lavevea malepelepe,e le o talia lava e tagata le feau molimoli,o le aveta’avale onā,ta’utino le Ofisa,ma’imau pe ana le o afaina ai le mamalu lautele,ua to’atele nai fanau laiti ua maliliu,ona ona o aveta’avale onānā ma le olaga so’onafai i luga o Alatetele i le Setete o Niu Sa Uelese.Tautuana lou laisene i mamulu atu,ona afaina lea o lau galuega,aua le tausiga o le fanau ma le Aiga,i le Folauga tau amata o le 2021.

Teachers call it quit over ZOOM

Ua fa’aalia mai le to’atele o Faiaoga ua fa’amavae ona o le lē fiafia i le faiga fou o a’oa’oga talu mai le Fa’ama’i(COVID -19)Molimauina ua le ato’atoa le fa’atinonga o a’oa’oga ma fanau ao’oga,i le fa’aaogaina o le ZOOM po’o le pu’eina Fa’a Ata Tifaga,ua suia mai le auai atu o fanau i potu aoga,e pei ona masani ai.Ta’utino nisi o Faiaoga,ua fa’ava’atu’ia ma telegese ai le a’otauina o fanau,aetainane fo’i,ua mou atu ai ma le mafutaga vāvālalata a Faiaoga,ma tama ma teine aoga,o le a’uga lea o le a’otauina o fanau,fesili atu ma tali mai,aemaise le fa’amalamalamaina o mataupu ese’ese,e le manino ai fanau aoga.I se fa’atalanoaga ma le 700 Faiaoga i le tele o Iunivesite o le lalolagi,o le 200 o i latou nei,o Faiaoga atamamai ma lava le poto masani a Ausetalia,ua fulitua mai i le potu aoga,talu mai le COVID-19.Fa’amatalaina e Dr Melissa Cain o Iunivesite Katoliko Ausetalia,e ui o le 2/3 o Faiaoga na fa’atino ai lenei sailiga,e silia i le 25 tausaga lo latou poto masani,ma ua leva ona galulue Fa’afaiaoga,ae ua savavali ese ma tu’ua le avea ma Faiaoga,ona ua paū maualalo avanoa o feso’ota’iga,ma faiā vāvālalata ma fanau ao’oga,ona osuiga fou,o le fa’atino o a’oa’oga i luga o le Initaneti po’o le ZOOM.Ta’ua e le tele o Faiaoga,o le a’otauina o fanau ua le na o le fa’amatala ma a’oa’o atu o Mataupu ta’itasi,ae fa’amuamua e le Faiaoga ona osiosi masaniga ma iloa lelei ana tagata a’ooga,aua e avea lea ma auala e talia gofie ai Mataupu,o lo’o naunau le Faiaoga e tatala atu lona sosia,ina ia sologalelei ma maua e fanau aoga le atamai mana’omia,e o’o ai i le tumutumu o ana a’oa’oga,aemaise le ausia o Aoga Maualuluga ma Iunivesite.Manino mai fo’i i lenei Sailiga(Survey)e i lalo ifo o le 1 i le 10 Faiaoga,na a’afia ini A’oa’oga e faia i luga o Upega Tafa’ilagi po’o le Initaneti i se taimi muamua,a’e le’i o’o mai le COVID-19,ina ua tapunipuni Aoga.E 675 Faiaoga i le lalolagi na taua’aoina ni Ripoti,e fa’amatala ai uiga ese’ese fa’ale Faiaoga,na alia’e mai i le taimi o le Fa’ama’i,179 o i latou nei o Faiaoga Ausetalia.O le Porofesa Lagolago o James Cook University,Louise Phillips sa taulamua i lenei Sailiga.

Resolve to stick to a resolution

Mai Saili’iliga a le Tama’ita’i Tusitala o Alanah Frost o le Daily Telegraph,i lana Lomiga o le Aso 2 Ianuari 2021,na manino mai ai, toe iti’iti lava afa po’o le 50% pasene, le Faitauaofa’i o Ausetalia,ua fa’ailoa se suiga pe tasi o amioga sa masani ai,i lena tausaga ua mavae atu 2020,i le ulufale atu i lenei Tausaga Fou 2021.Ae peita’i, ua na ose vaega iti’iti,e savavali ai ma tausisia ia lagona fa’aalia.O le fa’atumutumuga o nei lagona fou,pe a moni,o le fa’aiti’itia le tino mamafa po’o le puputa,fa’aiti’itia ma lafoa’i i le taumafa ava malosi,ma taofia loa le ulaula tapa’a,ma tape motu le tutuina o le sikareti.Ta’ua e Mark Stephens,e agava’a Fa’apitoa i le atofaina o fōfō,e tauala i mafaufauga ese’ese e sui ai amioga masani a le tagata soifua,pe na o le 10% pasene o i latou nei,e mafai ona fa’ataunu’u a latou Ta’utinoga.Fa’aalia e Stehens,o le numera tele lava,e toe fo’i lava I ona uiga tuai,i nai aso po’o vaiaso muamua o lenei fo’i Tausaga.Fa’amanino atili e Stephens,o le leolilo lava o le matuā tapēina,o lenei masani o le taumafa ava malosi,ma le ulaula tapa’a,po’o le sikareti,o le ato’atoa ona suia i se amioga ma se Faiga Fou,mo le 2021.E le afaina po’o le ulaula sikareti,ta’umafa o mea-ai suamalie,poka po’o le pelē tupe,fa’aiti’itia loa po’o le taofia o lou taumafa ava malosi,ae o le leolilo,e tape ma fa’atama’ia ai nei uiga tuai ma lē lelei,mo le sologalelei ma malū ai le Folauga o le 2021,o le suitulaga ai o se isi mafaufauga fou,e tatala fa’aulufale mai ai ni Fa’amanuiaga,ma nisi La’asaga Fou mo oe,le tina,le fanau,le aiga,le nu’u aetainane le Ekalesia.Fa’amatalaina e Stephens,nisi o suiga ma ni fa’atumutumuga fou,ua aga’i i ai le to’atele,ua fa’atumulia i lagona naunauta’i mo ni suiga fou,e pei o le tno soifua maloloina lelei,fa’ata’ua le fa’amalositino faifaipea,fa’aleleia ma si’isi’i i luga le tulaga tau tupe maua a le aiga,ia matuā fa’aiti’itia le taimi talanoa i le telefoni,aemaise le telefoni feavea’i,fa’apea le tele o le taimi matamata i le TV,Netflix,Facebook ma Ata Tifaga.O se suiga fou mo lenei talutalufou.

Unions take Qantas to court over JobKeeper

Ua Fa’aalia malamalama mai e le Tino Mo Tagata Faigaluega,a le Kamupani Va’alele a le Qantas,le lē atoa o totogi o ana Tagata Faigaluega,pe tusa lea ma le $10,000 tala a le tagata galue e to’atasi,i le fa’aaogaina o tupe totogi a le Malo(JobKeeper)e totogi ai taimi galue fa’asili(Overtime)o ana tagata Faigaluega.Ua tūtū fa’atasi nei Fa’alapotopotoga Iuni Galuega Ese’ese Ausetalia(Services),Iuni Tagata Faigaluega Fela’ua’iga(Transport)Iuni Tagata Faigaluega i Luga o Va’alele(Flight Attendants)e saili ai se avanoa e Apili ai i le Fa’amasinoga Maualuga(High Court)e talanoaina ai se Fa’ai’uga Mautū,ia manino ai le fa’aaogaina tonu o lenei fesoasoani tupe a le Faiga Malo Maualuga(JobKeeper)i le taimi na sasa’a mai ai,a’o feagai Ausetalia ma le Fa’ama’i(COVID-19)Na manumalo Iuni a Tagata Faigaluega,ina ua lu’iina le auala na fa’aaogaina e le Qantas,i tupe totogi o le JOBKEEPER i le Fa’amasinoga Maualuga(High Court) ia Setama 2020,ae na toe liliu lea I’uga a le Fa’amasinoga,ia Tesema 2020.Fa’aalia fo’i sa i ai ni vaega sa le’i ato’atoa ona fa’amaninoina,i le totogiina o le $1000 tala a le tagata,mo le 2 vaiaso i lalo o aiaiga o le Fesoasoani tau tupe ale Faiga Malo Maualuga.O le to’atele o Tagata Faigaluega a le Qantas,e ta’ilua vaiaso ma totogi,a i ai ni taimi galue fa’asili(overtime)e fa’atoā maua i le vaiaso e soso’o ai,ae a le galue pe fa’amalōlō,ona mimiti loa lea e le JobKeeper le tupe,mo lena 2 vaiaso(fortnight)Maua mautinoa e Iuni a Tagata Faigaluega,e $12,000 tala e fa’aiti’itia ai totogi o tagata Faigaluega a le Qantas,i lalo o le JOBKEEPER,pe a fa’atusa i totogi maua pe a glulue fa’asili(overtime)Fa’aalia mai le teuina i le taga a le Qantas,o tupe sa tatau ona totogi atu i ana Tagata Faigaluega,mo taimi galue fa’asili(overtime)ma tupe totogi o fa’asalaga(penalties)Fai mai le Kamupani a le Qantas,o lo’o uia uma vaega mana’omia i ala fa’ale tulafono,i fecso’ota’iga ma talanoaga faifaipea ma Iuni a Tagata Faigaluega,e pei ona masani ai.Silasila ane lenā e te galue i le Qantas,po’o sologa lelei lou totogi i le ta’ilua vaiaso.

Postal over late mail

E silia i le afe ma afe o Ausetalia,o Pa’aga masani a le Australia Post,o lo’o fa’amoemoe,ma tu’uina atu o latou talitonuga,i le mauaina o a latou afīfī ma tusi,iā latou Pusa Meli,i vaiaso ta’itasi.Ua valaau leotele atu nei,i le Tino e mata’ituina Auaunaga a le Malo,mo le Mamalu Lautele,mo se fesoasoani,aemaise i le vaitau o le vevela o le Fa’ama’i,i le tuai ona maua,po ua leiloa fo’i afīfī ma tusi lafo mai aiga,uo ma fanau,a ua le taunu’u.Ua le masino le mafiafia o fa’aseā ua autova’a atu i le Ofisa e Sailia Fofo Saogalemū(Commonwealth Ombudsman),i le va o Auaunaga ma Matagaluega a le Malo ma Tagata Lautele.E 1059 Faitioga tu’usa’o,e fa’atutonu i le Australia Post,i le paū maualalo o lana auaunaga i le masina o Iulai ma Setsma,69.7% pasene,sili atu i le vaitaimi tonu lenei,nai lo le tausaga ua mavae 2020.Fa’aalia mai,pe tusa ma le kuata o le fa’aletonu o le fa’atinoga,o le lē taunu’u o tusi ma afīfī i le Tuatusi sa’o,fa’apea le fa’ata’atia solo o afīfī ma fa’amomoli,i nofoaga e le saogalemū ai,pe a taunu’u i maota ma laoa o aiga.Saunoa mai le Tama’ita’i Fofoga So’oupu a le Australia Post,e 53% pasene le si’itia maualuga o le fa’aaogaina o lana Auaunaga,aemaise lava i afīfī ma fa’amomoli,o le Kuata e tau atu ia Setema 2020.E alu alu lava le Initaneti,imeli,text ma le Facebook,e le taitai lava i le lafo o le tusi ma le afīfī i le Falemeli,aua e le fesiligia sau Password,ma mamulu atu ai ma au fa’amaumauga totino(Personal Details)aemaise le fiapule o le Google ma le Internet,i olaga o tagata i lenei talutalufou.Talosia pea le fa’aleleia atili o lenei Auaunaga taua,le lafoina o tusi,afīfī ma fa’amomoli,aua ua maitauina le sasao fa’aafi o faiga fiapule,a auaunaga fa’aonaponei e pei o le Google,Twitter,Youtube,ma le Facebook,e o’o lava i lau tuatusi imeli,ua tele aiaiga ma suiga fou ua mana’omia mai,ma latou fa’aaogaina a tatou fa’amaumauga totino(personal details)e aunoa ma se fesiligia o lau aiātatau,e puipuia ai fa’amatalaga e patino lava ia te oe ma a’u.

TALA I TA'AALOGA

NRL sign of concern

Ua tu’uina atu se lapata’iga malosi mai le Ofisa o Leoleo a le Setete Niu Sa Uelese,i tama ta’aalo a le NRL,ia taumafai e taofi ma fa’aiti’itia le naunau e fai a latou fa’ailoga fegi,ma fa’ailoilo i le fa’aaogaina o tamatama’ilima pe a mae’a ona sikoa.O nei faiga fegi,ua maitau ma fa’aaoga lelei e Vaega Kegi Talavou i Sini,po’o”Youth Street Gangs”e fa’alauiloa ai uiga matagā le mafaufau,taufa’amata’u,taufa‘afefe,ma sosolo atu i le fasioti tagata(va ane lau fa’afofoga Samoa)ae fanau mai i fa’ailoga i taimi e fa’atalanoa ai e le Au Tusitala tama ta’aalo Lakapi Liki,NRL.Molimauina fetauiga,fusuaga,misa ma le felamata’i o Tagata Talavou,mai atunu’u ese’ese o lo’o nonofo i le Ogatotonu o Sini(Inner Sydney)ua silimusa i le fa’aaogaina o fa’ailoilo fegi a ali’i ta’aalo iloga e pei o,Josh Addo-Carr,Jack Wighton ma le alo talenia Samoa o Brian To’o.Fa’aalia e le uigi a le Melbourne Storm o Josh, na te le o faia ia taga ma fegi fa’ailoilo pe a uma ona sikoa,ma se fa’amoemoe,e fa’aliliu ma fa’aaoga e Kegi Talavou,iā latou pese e tu’u i le Facebook i ni uiga fa’amisa,o ana taga e fa’ailoa ma fa’amanatu ai lona loto Tagata-a-Nu’u Moni(Indigenous)ma lona Tupuaga ma lona Fa’asinomaga(IDENTITY)Fa’aalia manino e Josh,e le tatau i Tagata Talavou ona a’afia ma avea,ma Vaega Kegi Talavou(Street Gangs)Ta’ua le Vaega Gang o le”Hooligan Hefs”ma le “OneFour”na latou pu’eina ni ata o Wighton,Josh ma To’o ma tu’u i luga o le latou Facebook,ma taumafai e fa’afeso’ota’i,ia upu masoā,ma gagana palauvale,o a latou fatuga ma taga fa’ailoilo a nei tama ta’aalo lauiloa o le NRL,e aunoa ma se silafia e nei ali’i ta’aalo,fa’apea ana Pulega.Fa’amatalaina e le Ta’ita’i Leoleo Sinia,e vaa’ia le Vaega e fitoitonu ma Solitulafono Ogaoga ma le Matu’iā,Superintedent Jayne Doherty,o lo’o galulue va’ava’alua ma le Tino a le NRL e vaa’ia amioga a tama ta’aalo(Integrity Unit)mo le mata’ituina,pe i ai ni uiga fa’a Solitulafono,a’afiaga i Kegi ma fualaau fa’asaina a Tama Ta’aalo NRL.

Big tino’s titanic contract clause could have rival clubs circling

E le masani ona fa’ailoa ni upu tusitusia o ni Konekarate Ta’alo,a i latou e ta’aalo Fa’aporofesa i so’o se Ta’aloga.Ua fofola malamalama le Feagaiga Ta’alo a le alo Samoa o Tino Fa’asuamale’aui,ma fa’ailoa ai se fasi fuaiupu(clause)lona naunauta’iga e liliu le Kalapu a le Gold Coast Titans,ia avea ma se tasi o Kalapu Iloga ma Silisili ona Malosi(Powerhouse)o le NRL.O le tautalaga lea a le tamafannau Samoa,Tino Fa’asuamale’aui i le Talanoaga ma Trevis Meyn o le Daily Telegraph,i le vaiaso ua mavae.O le vaiaso nei na amata ai koleniga amata a lenei alo Samoa,ina ua fo’i mai lana malologa toe fa’aopo’opo,i le vaitaimi o le Kerisimasi,i le mae’a ai o lana fa’atinoga matagofie mo le Melbourne Storms 2020.E 22 ta’aloga a lenei tama ta’alo fa’amoemoeina toe tino maualuga i le laina i luma,a le Storms lea na manumalo ai i le Siamupini o Siamupini(Premiership 2020)soso’o ai ma le pale mai o se tama ta’alo iloga,mo le Au Fou a Queensland,i Ta’aloga e 3 o le State Of Origin 2020,lea na manumalo ai le Maroons,2 i le 1.Se tasi o mataina o le Origin 2020,o le ta’aalo fesaga’i o Tino ma se tasi fo’i alo Samoa o Payne Haas,se tasi o fetu pupula a le NRL i le taimi nei.I le 20 o tausaga o Fa’asuamale’aui,ua talanoaina e le au mafaufau atamamai o le Lakapi Liki,o se tama ta’alo laina i luma(forward player)iloga lona tula’i mai mo le isi 10 tausaga,e moni ua sainia fo’i e le Titans David Fifita,ae ua taula’i uma le maitau,o le vaai ma Tusitusiga a le Au Tusitala Nusipepa, Leitio,Televise ma Upega Tafa’ilagi(Social Media)i lenei alo Samoa ta’alo mataina,atamai ma le lē solomuli,o Tino Fa’asuamale’aui.Ina ua fesiligia lana Kalapu Fou,tali Tino o lo’u aiga e nonofo i Gold Coast,e taua le ola a’e o lona afafine o Alina(1 le tausaga)ma ona matua,ma matua o matua(grandparents)O le Titans o se Kalapu e alagatatau ona avea ma se Kalapu Iloga ma le Malosi a le NRL,o se avanoa ma se mafua’aga taua lea,o le fia avea ma se tama ta’alo,e taunu’u ai lea Moemitiga mo le Gold Coast Titans.

Winger in sights of Bunnies

Taula’i le vaai mamao a se tasi o uigi finafinau a le NRL mo le Rabbitohs i le 2021.Ua feagai nei le Kalapu a le West Tigers,ma se fa’afitauli fou,i le taumafai e taofimau le”Daily M Uigi” o le Tausaga,le alo Samoa o David Nofoaluma,e le o toe mamao ona sainia lea e le South Sydney Rabbitohs,lenei Uigi saoasaoa toe mata’alia,mo le Ta’amilosaga o le 2022.Maoa’e le tumatilatila o le ta’alo a lenei tamafanau Samoa mo le Tigers i le tausaga ua mavae,2020,e 17 ana sikoa,i ta’aloga e 20 a le NRL,ma ia mauaina ai le Fa’ailoga,”Kelly-Barnes Award”o le tama ta’alo lelei ma mama ma le fa’amaoni,a le West Tigers.O le Ta’amilosaga NRL 2020,na fa’amautuina ai e ala i fuainumera fa’amaumau(Statistics-Fox Sports Lab Numbers)le ta’alo fiafia ma sologalelei o taimi uma,e filifilia ai lenei alo Samoa,na manumalo i le”Dally M Winger”e fa’a 112 ona ia talepeina pu’e a le isi Au(tackle busts),fa’a 19 ona sao atu mai le puipuiga a lana paga(line breaks),ae fa’a 7 ona ia fesoasoani i sikoa a isi tama ta’aalo(try-assists)O lona talepeina fa’a 112 o pu’e a isi tama ta’aalo,e tulaga 4 i le fa’asologa a le NRL i le 2020,ae paga tutusa ma le uigi televave a le NSW Origin,Josh Addo-Carr,e ta’i 7 a la galuega fesoasoani,i le tulaga uigi e sikoa ai le isi tama ta’alo.Ta’utino le naunauta’iga o le Ta’ita’ifono(Club Chairman)a le West Tigers,le ali’i o Lee Hagipantelis,i le la Taumafataga ma David Nofoaluma,le tapena o lana Kalapu e fa’atino vaega talafeagai uma,ina ia mautinoa le nofo tumau ai o lenei alo Samoa,ma ta’alo mo le West Tigers i tausaga o totoe o lona olaga Lakapi Liki,i le NRL.Fa’amatala fiafia ma le manino e le Ta’ita’ifono,ua mae’a ona fa’ailoa ia Nofoaluma,le mana’o o le Kalapu,ia avea le West Tigers,o le Kalapu Numera 1 mo ia,o le lagona moni fo’i lea o Nofoaluma,ae sauni le West Tigers mo se umi talafeagai mo le isi Feagaiga Ta’alo Fou.Ta’utino le Kalapu,West Tigers,lo latou lagona moni ma le fa’amaoni,le fia sainia o David Nofoaluma fa’atoa 27 ona tausaga,mo le isi 3 tausaga,se’ia aulia le fa’ai’uga o le 2024.Ta’utino David lona fiafia e avea ma West Tigers.