top of page
Search
  • Writer's pictureMaulolo Fata Ueligitone Malifa

Talafou i vaifanua o Sydney NSW 21 Mati 2021

Sms,social media blamed for word woes

O le masausau ma le televave o le fa’aaogaina o feso’ota’iga i

Upega Tafa’ilagi po’o le Social Media,aemaise le faia o tusitusiga

ma poloa’i i le telefoni(texting)ua o se fa’afitauli tele lea,ua fai ma

fa’apogai o le paū mauālalo o le faitautusi a fanau,aemaise ua titina

ai le iloa ona sipela o upu,ma sosolo atu ai ma le augatā ma paiē,e

tusi se fuaiupu po’o Tusigatala,e pei ona naunauta’i le Ali’i Palemia

o Scott Morrison,e matuā toe fa’aolaola lea vaega tele o a’oa’oga a

le fanau.O le sipelaina o upu,o se popolega tele lea o le Faiga Malo

Maualuga a Ausetalia,auā ua o’o lava i le tamaiti’iti 5 tausaga,ua

tau fa’anā i le tu’uina i ai o le Telefoni Feavea’i(Mobile)Fa’aalia ese

Saili’iliga Fa’atuatuaina le popolega o le 2/3 o Matua ma Tagata

Matutua,le matuā paū mauālalo o le iloa e fanau le sipelaina o upu

faigofie,ona o le fa’aselemutu o le tusiga o upu,pe ā tusi ma lafo

le’text message’,e foliga mai ua fa’atonutonu e le Initaneti,le ola

tuputupua’e o fanau iti.I se Saili’iliga sa fa’atinoina i luga o le

Initaneti(Online Survey)e 97% pasene,le matuā fa’atauaina le silafia

mautinoa o le Sipelaina o upu,ma le Faitautusi a le fanau,ae 67%

pasene le popolega i le vaivai ma le mauālalo,o le’Sipela Upu’Nisi o

mafua’aga fa’aalia mo lenei fa’afitauli o le,fa’amoemoe tele le

fanau i le su’eina i le Telefoni Feavea’i,42% pasene,ua leai se

faitautusi e pei ona tatou masani ai,26% pasene ua matuā paiē le

fanau,ona ua fa’atamala ma faia’ina le matafaioi a ta’ua Matua, ua

tu’ua’ina fo’i le pitola’au a le Aoga ma Faiaoga,ua vaivai le

tapu’eina ma fa’afailele fanau i taimi a’oa’oga.Fa’aalia e Dr Jennifer

Buckingham,atamai fa’apitoa i le’faitau ma le tusitusi’,ua tau i ai

sina suiga i le’SIPELA’ talu ona fa’aulufale le faia o’SU’EGA’i le

2008,mo Aoga uma i le atunu’u.


Illegal e-cigarette poisoning hundreds of kids

O se Ripoti Maumautūtū mai le Tino e Mata’itūina Tagata Onānā i

Vaila’au Niu Sa Uelese,NSW Poisons Information Centre,ua fofola

fa’amalamalamaina ai le fa’aopo’opoina pea o fanau ua onānā,i le

vaila’au o lo’o filogia ai le sikaleti ma’a,po’o le e-cigarette o lo’o

fa’atauina fa’asolitulafono,i Setete uma o Ausetalia.E 200 fanau na

sulufa’i atu i le Falema’i,mo ni togafitiga fa’afuase’i,to’atasi o i latou

nei a’afia ai le fatu,ma oso ai le ma’i maliu e pei ona tusia e Sue

Dunlevy,o le Daily Telegraph i le masina ua mavae atu.E 26,000 afe

le aofa’iga o sikaleti ma’a po’o e-cigarette,na mauaina ma taofia e

Ofisa Soifua Maloloina,NSW Health Inspectors mai le tele o nofoaga

fa’alilolilo,sa tufaina ai.Fa’aalia fo’i,e 300 telefoni na fa’amauina

mai le mamalu lautele,e fia iloa atili le mafua’aga tonu o le onānā,i

lenei sikaleti ma’a,ona o le vaila’au o lo’o filogia ai.E 376 ripoti o

tagata na matuā fa’ataotolia i totonu o le 5 tausaga,ae silia i le 200

na taofia i le Falema’i.Tausaga 2018 na maliu ai se pepe 18 masina

le matua i le Setete o Vitoria,ina ua ia foloina le vaila’au i le sogisogi

i le sikaleti ma’a,po’o le e-cigarette a lona tina.Ua avea lea ma ala o

fautuaga malosi a le Fa’atonu Aoao Faitauaofa’i Soifua Manuia o

Tagata Niu Sa Uelese,NSW Director Population Health,Carolyn

Murray,ia mata’ala i totonu o Aiga,ia teu fa’alelei peni

tusitusi(highlighter pens)masini laiti e togafiti ai le ma’i sela(asthma

puffers)vali laugutu(lipsticks)ia taumamao ma le mauaina e le

fanau iti.Mai iā Oketopa 2021 ua fa’ailoa mai,fa’ato’ā mafai ona

tu’uina atu se sikaleti ma’a,po’o le e-cigarette i le tu’uina mai o se

Pepa Fa’amaonia,Prescription.Fa’aalia le tele o fanau aoga,le

nānāina o sikaleti,e-cigarette i le pito i lalo o le ato aoga,po’o

totonu o Tusi Aoga(textbook)e aunoa ma se silafia e le Faiaoga ma

Matua.


Boy,12,attacked in School Yard by Youths

Na fa’afuase’i ona momoli atu i le Falema’i se tama Aoga i Sini

Sisifo,ina ua fasi ma fa’ao’olima i ai ni tama talavou matutua,se

to’atolu.O lenei fa’alavelave pei ona fa’ailoa mai e le Ofisa o

Leoleo,itulā e 2 i le aoauli o le Aso Gafua ua mavae atu,na ulufale ai

ni tama talavou matutua se to’atolu,i le lotoā o le Niland School i

Blackett,ma fa’ao’olima i se atali’i e 12 tausaga le matua.

Fa’amatalaina e le Leoleo Nānā,Detective Wayne Kelly o le Ofisa

Leoleo i Mt Druitt,o nei tama talavou e to’atolu e le a’o’oga,i le

Aoga,nā ona savavali atu lava,tatu’i foliga,o le ulu ma le tino,e afa

inisi le lavea o lona mata ma le ulu,pei ona ripotia e le

Falema’i.Fa’atopetope atu i le Falema’i i Mt Druitt,ina ua fa’atasi

atu i ai ma si ona Tina.Molimau a Leoleo ina ua taunu’u e fa’atino le

Su’esu’ega i Niland School,fa’amatalaina e le Pule Aoga o nei

taulele’a talavou e to’atolu,na faia le fa’ao’olima e omai oAiga

Pasefika.Ta’ua fo’i e le Aoga ma Ali’i Leoleo,ua fiu e taufa’asufi le

atali’i na fa’amanu’alia,pe nate silafia nei tama talavou,ae foliga

mai e fefe ma popole,e ono tutupu ai se isi fasiga o ia,aemaise le

o’o atu i lona Aiga.E le tele ni tala a le Pule Aoga,e tu’uina atu i

Ofisa o Leoleo.O le Aoga o Niland School,e fitoitonu i fanau e i ai

Mana’oga Fa’apitoa o le Tino(Intellectual Disabilities)ma fanau ua

tūtūmau pea i le lagona o’otia ma le lē mautonu(Emotional)Fa’aalia

fo’i e Leoleo ni misa ma fusuaga a fanau talavou,a le Kolisi Chiefley

College i Shalvey,na pu’eina i le Video a’o fa’ao’olima nei fanau

talavou i se tina,i fafo mai o le Nofoaga Fa’atau(Shopping

Centre)Po’o i ai se silafia o nai matua e ana nei fanau,molimoli i le

Aoga i taeao ma aami i le aoauli,5 aso o le vaiaso,ae matuā lilo nei

uiga le taupulea,ma fanau mai ai le avea ma kegi talavou,soso’o ma

le aga’i atu i le FALEPUIPUI.


NAB sued over fees

Ua molia nei e le Tino Maualuga e Mata’itūina Aiaiga o Tulafono,i le

Fa’atautaia o Faiga Fa’a Pisinisi,Corporate Regulator,le Faletupe a

Ausetalia,National Australia Bank,i lona faia pea ma le mautinoa,ni

Faiga Fa’a Pisinisi fa’aalatua,o tupe tului maualuga mo le mamalu

lautele ma a latou Teuga Tupe,i totonu o le 4 tausaga ua mavae

atu.Ripotia mai e le Komisi e Puipuia le Saogalemū o Tupe Teu

Fa’avaitaimi,po’o le Australian Securities and Investments

Commission,e fa’a 195,305 taimi na talepe ai e le Faletupe le

Tulafono,tusa lea ma le $365,454,000,le tino i tupe a Tagata Lautele

na a’afia ai.O lenei Solitulafono,na amata iā Fepuari 2015 seia aulia

Fepuari 2019.O le fa’anoanoaga tele o le Faiga Malo Maualuga,ua

loa ona silafia e le National Australia Bank,lenei fa’afitauli ma le

sese iā Oketopa 2016,ae leai se suiga,ona o le mana’otele ma le lē

alofa i ana Pa’aga ma a latou Teugatupe,ua fa’amuamua ana Tupe

Fa’asili ma Porōfiti,ma le fa’amalieina o le Au Faisea po’o ana

Shareholders,ia fa’atumu atili pea a latou Taga Tupe.Ua vave ona

sisi’o le Faletupe,ma tu’ua’ina ana Tagata Faigaluega,i le sese ona

fa’atino o latou tiute,aetainane le siaki ma seti lelei masini

fa’aonaponei,po’o Computer Systems.E le fou i le fa’alogo ma le

silafia o Tagata Faigaluega,o itū masani lava ia e alofaga i ai so’o se

Faletupe.Maitau lelei ane le tupe tului o lau Teugatupe,po’o

talafeagai ma aiaiga na amata ai.


INSTAGRAM KID BLOCK

Ua amata nei se faiga fou e le Kamupanī Feso’ota’i

fa’aonaponei,FACEBOOK ma se tasi o ona Lālā ua saoāsaoā lana aga

feso’ota’i,o le INSTAGRAM,i le fa’ailoa ma tatala se metotia fou,e

fa’apitoaugafa i le puipuia o fanau i lalo 16 tausaga,ona latou

tatalaina le faia mautū o sana itulau,e aunoa ma le silafia o

Matua,aemaise le taofia ma tapunia Tagata Matutua,ona feso’ota’i

atu i fanau iti,e leai se masaniga.Fa’aalia le tāua ma le vave ona

a’apa atu le FACEBOOK ma le INSTAGRAM,ia fa’amautū lea metotia

fou,ona ua fa’aopo’opo pea le tele o le popolega ma fa’aseā,i uiga

matagā ua alia’e mai,ona o feso’ota’iga fa’alilolilo,ma fanau a le

to’atele o Tagata Matutua,ma fa’asufi faiga fa’auō ma fanau iti,e

aunoa ma se silafia o nai Matua,po’o Tagata Matutua o Aiga.Ua

fa’aalia le galueaina o isi faiga fou a le FACEBOOK ma le

INSTAGRAM,ia mautinoa ai le saogalemū o fanau,i le fa’aaogaina o

igoa ma le matutua,ina ia faigatā ona mateia e i latou,ua atamamai

i le fa’aaogā fa’agaoi o fa’amatalaga totino a le isi tagata.O le 13

tausaga o lo’o fa’amoemoe e fa’amamalu,ma fa’amuta ai le matua

o le tagata e faia sana itulau FACEBOOK-INSTAGRAM.Fautuaga a

Talafou,tautuanā le fa’aaogaina e le fanau o le Mobile Phone,

Laptop,Tablet ma le Computer i le fale,ua le masino le tele o Ala

Feso’ota’i,sites ma apps e oso mai ai atama fa’amatalaga e vave

a’afia ai le mafaufau mu’amu’a o le fanau.


Plucky Team New Zealand defies cashed-up chase

Ua toe Manumalō A’ia’i le Va’a Failā Tutu’u a Niu Sila,Emirates

Team New Zealand,i le Tu’uga Va’a Failā lona 36,o le Ipu o le

America’s Cup,ina ua ia fa’ato’ilaloina le Va’a Failā o le Luna Rosa,a

Italia i le Aukilani i le Aso Lulu vaiaso ua mavae atu.I tusitusiga i

Nusipepa ma Mekasini,fa’asalalauga i Televise,Leitiō,Initaneti ma

Upega Tafa’ilagi,ua fa’amautūina ai le Malosi’aga Aoao ma le

Tulaga Numera Tasi,o le Va’a Failā,Emirates Team New Zealand i

lenei Fa’agatama i le gataifale,ua silafia lelei e le mamalu o le

atunu’u Samoa,aemaise Tu’uga Fautasi,Tulula,Paopao ma Va’aalo e

pei ona tatou masani ma soifua mai ai,isi o tatou Atunu’u Pele.Ua

fa’atusaina le Emirates Team New Zealand,i le New Zealand All

Blacks,i le maitau atu i Tusitusiga a Tusitala o le Lalolagi.Fa’aalia le

talenia,loto tetele ma le lotonu’u o lana Auva’a,aetainane le

fuafuaina(design)ma le fausiaina o lea ituaiga fausaga e matuā fou i

le Tala Fa’asolopito o lenei Ipu,America’s Cup,e ui e pito i maualalo

se vaega tupe na fa’atino ai lana tapenaga,fa’atusa i le Luna Rosa a

Italia,Ineos Team UK,Peretania,ma le American Magic a Amerika.Na

amata ona tauvā Niu Sila i le tausaga 1980,mai le 8 Tu’uga talu mai

le tausaga 1851,i le Isle of Wight,i Peretania,ua fa’a 7 ona ausia e le

Emirates Team NZ le Tu’uga Fa’ai’u(FINALS)ma manumalō ai fa’a

4.O Peter Blake 1995,Russel Coutts 2000,Peter Burling 2017 ma le

2021.I aiaiga ma Tulafono o le Ipu,America’s Cup,o le va’a e

manumalō, nate puleaina ma fa’atautaia tulafono,o le isi Tu’uga e

soso’o ai,2023/2024.E pule fo’i le Emirates Team NZ,po’o fea e fai ai

le Tu’uga.O le Va’a Failā”Australia 11”o se Va’a Failā muamua na

ave’eseina mai le Ipu,America’s Cup,i lima o Amerika i le tausaga e

1983,Perth Fremantle,Western Australia,na kapeteniina e le Ali’i

Ausetalia,o John Bertrand.O le Luna Rossa lea na faia’ina i le vaiaso

ua mavae,sa kapeteni ai le Ali’i Ausetalia o Jimmy Spithill,a’o le isi

fo’i Ausetalia o Glen Asbhy,nate Faitauina Uiga o le Tau ma le suiga

o galu fafati,a le Emirates Team NZ.


Why did we loose Keith

Ua taula’i nei le vaai ma fa’amoemoega o Matua ma le Aiga,o le alo

talenia Lakapi Liki Samoa,o Keith Titmus,le tamā o Paul,tinā iā Lafo

ma si ona uso o Jesse,ma le tuafafine o Zara,i le fia fa’alogo ma

mauaina se fa’amatalaga mautinoa,mai le Australian Sports Brain

Bank,po’o le Tino Fa’avā o Malo a Ausetalia,e sailia,fa’amaumau

ma maua ai se malamalama’aga,i ni mafua’aga o laveaga o le ulu

ma le fai’ai,o tagata ta’aalo fa’atautino(Regular Concussions)Ua fia

fa’alogo lava le tinā iā Lafo,i se tali vave mai o nei Su’esu’ega ma

Saili’iliga,ona o le maliu fa’afuase’i o si ona alo o Keith.Saunoa Lafo

i Talanoaga ma le Au Fa’aslalau i nai Vaiaso ua tuana’i atu,o le vave

maua o se tali i le manu’aga o si a’u tama,o se itū lelei e puipuia ai

le tele o isi alo talavou,e fiafia i le Ta’aloga Lakapi Liki.Mo le silafia

atili o lau fa’afofoga’aga,o Keith Titmus 20 tausaga le matua,na

fuafua le Faiaoga ma le Kalapu Lakapi Liki,Manly Seaeagles,e ta’alo

amata i le Au Maualuga(Premiers)i le Ta’amilosaga ua fa’agasolo

nei,2021.Na fa’afuase’i ona manu’a i koleniga tamo’e i le malae i

Narrabeen,fa’ai’uga o Novema 2020.Ta’ua i le Ripoti,na matapogia

fa’afuase’i,i le mae’a o le 90 minute o koleniga tamomo’e,tili atu i le

Falema’i ma maliu ai.Ua mae’a ona logoina le tinā iā Lafo ma le

Aiga,e 3 i le 6 masina e fa’atino ai Su’esu’ega fa’ato’ā maua se tali

mautū.E le o i ai se tu’ua’iga a Lafo ma Paul aga’i atu i se tasi,i le

maliu fa’afuase’i o si o la alo,a leai se tali mautinoa mai Su’esu’ega

Fa’a Foma’i,lona uiga o le Finagalo fai to’atasi o Le Atua.Fa’aaliga o

le fa’aaloalo a le Kalapu,Manly ua fa’apipi’iina mata’itusi o le suafa

o Keith ma lona fa’ai’u,i ofu ta’alo(jumpers)o Au Laiti uma mo lenei

Ta’amilosaga 2021,fa’atasi ma lana Numera-623-Fa’amatalaina e le

tinā o Lafo,e mamao ō lā manatu,lā te tanuina si a la tama o Keith,e

le tatau i ni matua ona latou tanuina ni fanau,aemaise le maliliu

laity.


Isaiah Tauiliili Tavita Papali’i is good mates with Storm hooker

Out e le fo’i e fa’afetaui,e ui lava o lau uo mamae.Le ta’utinoga lea

a le alo Samoa,Isaiah Papali’i e feiloa’i ma si ana uo,le hooker

Numera 9 a le Storm,Brandon Smith.O Isaiah,o se foliga fou i le

Parramatta Eels i le Ta’amilosaga 2021,ae ua tula’i mai o se aseta

fa’amoemoeina e fa’aaoga mai le nofoa fa’aleoleo(Bench Player)e

na te fa’atama’ia le au sesela i lona malosi fa’atautino.E le’i fa’atuai

Papali’i e tusi le lima i le tama a le Melbourne Storm,e tatau ona

taula’i ma makaina lelei i le lā ta’aloga i le afiafi o le Aso Tofi ua

mavae,lea na manumalō ai le Parramatta Eels,16-12 a le Storm.E 4

tausaga o tautua Isaiah Papali’i mo le NZ Warriors,mae’a ai o le

vevesi o le COVID-19,manatu loa lenei alo talenia Samoa,na soifua

a’e i Niu Sila,e saili se isi Si’osi’omaga fou,e ui na mana’o le Pulega a

le Warriors,e toe fa’aauau lana Feagaiga Ta’alo.O le Talanoaga i le

‘ZOOM’ma Brad Arthur,le Faiaoga o le Eels,na suia atoa ai le vaai

mamao a Isaiah,ona o le matagofie o le Konekarate Ta’alo na

ofoina atu e ta’alo ai mo 2 tausaga.E le’i toe fa’atali Papali’i,ua tali

mai Le Atua,i le lā fa’asoa ma lana Pulega,i le Kirisimasi 2020 mo se

isi amataga fou.I lana ta’aloga muamua ma le Brisbane Broncos,lua

vaiaso talu ai,na fa’asimā ai lona tulaga e filifilia ai mo le tausaga

atoa mo le Parramatta Eels,e fesoasoani i le isi Poutū,le alo

Samoa,Junior Paulo auā le taulāina o le laina i luma a le Eels mo le

2021. E 4 tausaga o ta’alo Isaiah Papali’i mo le NZ Warriors, 63 ana

ta’aloga, sa amata ta’alo o se sui o le Junior Kiwis,fa’atasi ma si ana

uo mamae Maori,o Brandon Smith. O Isaiah Papali’i e 22 ona

tausaga ma o lona tama o Tauiliili Tavita Papalii mai le afioaga o Utualii ma Faatoia, o se alo faasino ia Fauatea Okesene Papalii ma Faavaoa Maiava-Papalii, a'o lona tina o le Maori. Tatou Talosia le tula’i mai o lenei Fetū Pupula o Samoa,ma lona fa’amanuiaina o se tama ta’alo,i se Kalapu Lakapi Liki Iloga i Niu Sa Uelese, ma ua taunuu ai lana faalepo ma le miti, ia maua sana konekarate i se 'au lakapi liki i le malo tele o Ausetalia.

1 view0 comments

Recent Posts

See All
bottom of page