top of page
Search
  • Writer's pictureMaulolo Fata U. Malifa

Talafou Sydney NSW Ausetalia (21 Fepuari 2021)

Certifiable problem

Ua tula’i mai se fa’afitauli i le fa’aaogaina o le Upega Tafa’ilagi,po’o

le Initaneti,e resitala ai lou suafa mo lou agava’a,mo se Pepa

Fa’amaonia(Vaccine Certificate Online)ua mae’a ona faia sou

Tui,ma fai se Sailiga pe na a’afia oe i le Fa’ama’i(COVID-19)O le taua

o lea Pepa,e ono mana’omia mo lou malaga ese atu ma

Ausetalia,aetainane lou ulufale atu i le Falema’i,Faleaiga ma Fale

Ta’umafa Kofe ma Ti,po’o Fale Kalapu.Fa’amaonia mai e 10 miliona

le aofa’iga o Tagata Ausetalia,ua le mafai ona fa’atulaga

talafeagai,e tauala i le Initaneti.Fa’aalia manino,e 19.7 miliona

tagata Ausetalia,ua mafai ona talanoa e ala i le(myGov)imeli,e na o

le 19.9 miliona i latou,o lo’o mafai ona feso’ota’i tonu,ma a latou

fa’amaumauga moni,o lo’o fa’amaonia i le MEDICARE i le Initaneti,e

faigofie ai ona fa’atusatusa ma au fa’amatalaga totino,ma le

tala’aga fa’asolopito,pe sa a’afia oe i le Fa’ama”i COVID-19.Fa’aalia

fo’i o fanau laiti ma talavou,fa’apea tagata matutua,e foliga mai e

le o lava le tapenaina,aua o le numera tele o matua,ua sologalelei

fa’amatalaga uma mana’omia,e toina sa’o mai Aoga Fa’ata’ita’i,ma

Aoga Amata,fa’apea Nofoaga e vaa’ia fanau iti.Saunoa le Minisita o

Auaunaga Ese’ese A Le Malo(Government Services)o Stuart

Robert,le matuā taua o le ato’atoa le fa’atumuina o au

Fa’amatalaga Totino,i le fa’aaogaina o le Inataneti ile taimi

nei,tapena ai mo le o’o mai o le Vaifōfō(Vaccine)o le Fa’ama’i

COVID-19.Ta’ua fo’i le mauaina o sau Kopi Fa’amaonia(Vaccine

Certificate)i luga o le Upega Tafa’ilagi a le Services Australia.


Hidden costs of junk food

O le taulogologo fa’amanatu pea ia i ta’ua matua,i ta’umafa ma

mea-ai a le fanau,i totonu o lana LUNCH BOX i aso ta’itasi.E le

faigofie le matāfaioi a matua,i le saunia o le mea-ai po’o le lunch a

le fanau,i le 5 aso o le vaiaso,ae manatu o le tiute tauave masani o i

tatou matua,auā le malosi fa’aauau o le fanau i la le tino,o le

sologalelei fo’i lea o le matala,ma le ma’ai o lona mafaufau,a’o

feagai ai ma le a’oa’oga,i totonu o le 6 i le 7 itula i le aso.Nai vaiaso

ua mave atu,na amata ai se fa’amoemoe fou,a le Nutrition

Australia,o le Tino e Vaa’ia ma Fuafuaina Ta’umafa Lelei ma

Talafeagai mo Tagata Ausetalia.O le”Healthy Lunch Box Week”po’o

le Vaiaso Ta’umafa Soifua Maloloina Lelei Mo Fanau

A’oga.Mafua’aga o lenei fa’ama’ite,ia u’una’ina matua ia alagatatau

le tu’uina o le mea-ai e maua ai le soifua maloloina lelei,maua ai le

malosi fa’afouina tutu’a,o le afafine ma le atali’i,e pu’eina ai le

a’oa’oga a le Faiaoga,i le aso atoa.Fa’amatalaina i Su’esu’ega ma

Saili’iliga a le Deakin University,e moni o lo’o saunia le Lunch Box a

le fanau i aso ta’itasi,ae o le numera tele,o mea-ai le talafeagai mo

le soifua maloloina lelei,po’o “JUNK FOOD”aemaise lava i nai Aiga e

maualalo le Tamaoaiga,ma le Tupe Maua.Se tasi o itū taua na

molimauina i lea Su’esu’ega,e silisili atu ona taugatā o ia

ta’umafa,fa’aalia e le Tama’ita’i Atamai i Ta’umafa Soifua

Maloloina Lelei(Dietitian),mo fanau,o Leanne Elliston.Fa’aalia o le

tele o matua,ua faigofie ona se’etia i fa’alauiloaga,ma fa’asalalauga

fa’atosina Fa’a Pisinisi a Kamupani,e fa’atauina atu Lunch

Box,ituaiga mea-ai e ofi lelei i totonu o le latou LUNCH BOX,ae

mama’i ai le fanau,toe taugatā.Fautuaina matua,ia taumafai e

fa’atau si’iatoa atu ta’umafa,talafeagai ma le soifua maloloina lelei

mo le fanau,ona fa’asoa auaua’i lea mo le vaiaso atoa.


Number of teen killers on the rise

I Tusitusiga Fa’atuatuaina a Natalie O’brien ma Charles Miranda,o

le Daily Telegraph,Aso 14 Fepuari 2021,i le si’itia maualuga o fanau

Talavou Ausetalia,fa’ao’olima ma fasi tagata fa’amoemoeina,ua

molia i le Fa’amasinoga i Soligatulafono Ogaoga ma le Matu’iā.Ua

fa’aalia ai le lagona Popole ma le lē Mautonu,o le Pulega o le

Fa’amasinoga,Faiga Malo a le Setete,ma le Faiga Malo

Maualuga(Federal Govt)i moliaga fa’alausoso’o o nei Fanau

Talavou,ua tau’au lava ina faigatā se Fōfō e togafiti ai,ma tete’e atu

i le masausau o amioga,fa’ao’olima matu’iā a Fanau Talavou,ua

ma’umau ai le soifua ma le ola o le to’atele.Fa’aalia e i latou

Atamamai i Soligatulafono a Fanau Talavou,ua fa’ama’ite i le Ma’i o

le Fai’ai po’o le Mental Health,i le saisaitia ona o le Fa’ama’i COVID-

19,se tasi lea o mafua’aga le ma’alofia,ua sasao fa’aafi ai le lagona

fa’ao’olima o Fanau Talavou i lenei talutalufou.E 50 fanau talavou

lalo o le 17 tausaga na molia i le fasioti tagata,ma isi moliaga

fa’ao’olima i le 2020,e aofia ma fanau tama e to’atolu,e ta’i 13

tausaga,e pei ona fa’ailoaina e le Matagaluega o Fuainumera o

Fa’amaumauga Ausetalia(Australian Bureau of Statistics)O isi

fa’amaumauga lata mai,a le Ofisa o Leoleo,o Fanau

Talavou,solitulafono fa’alua,fa’atolu.E 518 fanau iti e 10 tausaga na

molia i le 2019/2020.To’aono mai le 49 na molia i le fa’ao’olima ma

le fasioti tagata,o fanau teine e ta’i 15/16 tausaga.Mai le aofa’iga e

46,949 fanau,ta’i 10 ma le 17 tausaga na molia i le fa’ao’olima,ua

fa’aiti’itia i le 49,180 i le tausaga i luma atu o le tausaga ua

tuana’i,2020.E sili atu i le 1 vae 3 fanau talavou Solitulafono,i Niu Sa

Uelese,e ese le moliaga matu’iā,ma se isi fo’i moliaga,ae o le 1 vae

5,o se moliaga ogaoga,o le taumafai e fa’ao’olima ma fa’amanu’a se

tagata i se Lagona fa’amoemoeina,e pei ona fa’amatalaina e le

Porofesa Fa’apitoa i Tulafono Ogaoga,o le Monash

University,Criminologist Professor Alex Piquero.


Fire sparks car recall

Ua avea saili’iliga a Inisinia Ta’avale(Motor Mechanic)i le ono mū

atoa o se ta’avale,ua mana’omia ai le toe tu’uina atu o le aofa’iga e

93,000 ta’avale,ona o le popolega e ono pa le afi,ma vave ona mu

talalī,tusa lava pe le o ola le afi o le ta’avale.O le mauaina o ni

totoga fa’apipi’i sēsē i afi o le 93,572 ta’avale,o le fausaga Hyundai

Tucsons,na fa’atauina atu i le mamalu lautele o Ausetalia,mai iā

Novema 2014,se’ia aulia Novema 2020,ua manatu ai le Kamupani

Ta’avale Hyundai,ia toe fa’afo’i uma atu nei ta’avale,e ono tutupu

ai ni fa’alavelave fa’afuase’i le ma’alofia,ma maliliu ai nisi.Fa’aalia

manino fa’a fautuaga e le Kamupani,mo i latou o u’umia sa’oloto

nei fausaga,ia fa’atūina i se nofoaga ta’alaelae(park in an open

space)ia mamao ese ma suau’u,penisini ma le kesi(inflammable)aua

fo’i le fa’atūina pe paka,i totonu o lau Fale Ta’avale.Ua fa’aalia

mautinoa e le Kamupani Ta’avale Hyundai Australia,o le ā feso’ota’i

atu i a’i latou uma,o lo’o u’umia sa’oloto lenei fausaga o le

“Hyundai Tucsons”2014-2020,ua a’afia i lenei sēsē mo le

fa’apipi’iina o le totoga mana’omia,mo lau ta’avale.O le fautuaga

maumautūtū lea ua tu’uina e le”Tino Mo Oloa Saogalemū Mo

Ausetalia”Product Safety Australia.


Scramble to fix kid-fail

Ua fa’aalia le tele o tapenaga ma taumafaiga ese’ese,a Pulega o

A’oga Amata ma A’oga Fa’ata’ita’i,fa’apea A’oga Tulagalua,i le

puipuia malu o fanau iti,mai faiga taufa’alata a i latou,o lo’o faia

uiga matagā fa’asotoma i nai fanau iti ma tupulaga talavou,aemaise

lava i luga o Upega Tafa’ilagi,Initaneti,Facebook ma le Youtube.O

nei sauniuniga i le amataga o a’oa’oga a fanau iti,5 i le 10

tausaga,mo le aga’i atu i le A’oga Tulagalua po’o le Primary

School.Mo feso’ota’iga fa’a Initaneti ua i le va o le Fale ma le

A’oga,ua suia e le Aoga tuātusi imeli a le fanau,ini fuainumera

ese’ese e fa’afefiloi ai tuātusi imeli sa’o,ia faigatā ai ona

mauaina(hack)e i latou o lo’o taumafai e talanoa i fanau iti,ma

taumafai e fa’asufi,fa’alata ma ofoina tupe ma mea-alofa

fa’alilolilo,e tauala ini talanoaga fa’anānā,e aunoa ma le silafia a

matua,po’o tagata matutua.Fa’amatalaina e le Au Atamamai i le

Puipuia Saogalemū Talanoaga Fa’a Initaneti po’o “Cyper Security

Experts”o le popolega,ona ua faigofie ona osofa’ia ma tatalaina

imeli a le fanau iti,auā na o le igoa muamua ma lona fa’ai’u,ua

fa’atamala fo’i ma augatā matua,e fesusuia’i le tuātusi imeli a le

fanau iti,mo feso’ota’iga ma le A’oga.Fa’amamafaina e le

Matagaluega o A’oga,pei ona ripotia e le Daily Telegraph,Fepuari

12,2021,le taua o le mata’itū lelei o “igoa fa’aaoga po’o user e

names”e a’afia ma Tuatusi,aua e vave ma faigofie ona mate’ia,e i

latou o lo’o faia lea uiga matagā,i luga o le Initaneti,ua tele ina

a’afia ai olaga tuputupua’e o fanau iti,fa’apea tupulaga

talavou.Tautuanā i tatou matua,mo le silafia lelei i taimi e fa’aaoga

ai e le fanau le Computer,Labtop,Ipad aemaise le Telefoni

Feavea’i,le mobile phone.


Girls tyred of training

O se tasi o muāgagana ua se tai taliga ma fa’afofogaina pea,i lo

tatou soifuaga i aso uma.”E suisui faiga ae tūtūmau pea fa’avae”O

le Manulautī lea ma se mafaufauga fou,ua fa’aulufale e le Kalapu

Lakapi Iuni a Southern District,i Sylvania Waters,Niu Sa Uelese,i le

amataga o lenei tausaga,2021.Ua le na o le a’oina ma koleniga o le

Lakapi,ua tu’u i ai ma le fa’amamafa,o le a’oa’oina o isi lesona ma

silafia talafeagai, mo le lumana’i manuia o tama ma teine talavou,e

fia ta’aalo Lakapi Iuni,auā e talenia i Ta’aloga.Ua o va’ava’alua le

a’oina o le pu’e,pasiina o le polo fa’apea le kukaina o mea-ai,ma le

fa’asino i Talavou,aemaise teine ta’aalo,le suiina o le pa’u pā o le

ta’avale.Ua fa’aigoaina lenei Polokalame Fou”Rugby for Life”Lakapi

Iuni ma le Olaga.O taimi o koleniga i vaiaso ta’itasi,ua fa’aopo’opo i

ai ma le tapu’eina o agava’a ia,e taua tele mo le olaga tuputupua’e

o fanau talavou,ua fa’amanuiaina e Le Atua,i le atamai i so’o se

Ta’aloga.Fa’amatalaina e le Peresetene o le Kalapu,Simon

Bennett,ua fa’apitoaugafa lenei mafaufauga fou,mo fanau lautogia

i Au o le 4 ma le 5(4 th /5 th Grade)auā e manatu le Kalapu,o talavou

nei,a lelei ona tapu’e,atiina’e ma fa’ataua o latou agava’a i le tau

amataga,e ono avea ma”Fetu Pupula”mo le Lakapi Iuni i le

lumana’i.Ta’utino Simon,o le fa’aulufaleina o nisi metotia fou,e fai

ma aualalaupapa e tatala ai agava’a lilo,o le talavou o lo’o tanumia

e le o silafia e ta’ua matua.Fa’ailoa ma le fiafia e le Kalapu a le

Southern District,o le fa’aulufaleina o nei agava’a mo fanau

talavou,e fa’a’au’upegaina ai olaga mo so latou lumana’i

manuia,Aiga,Nu’u ma Ekalesia.Fa’aalia e matua,e silia i le 100 tama

ma teine talavou,o lo’o auai i lenei Polokalame a le Kalapu,e 3 aso o

le vaiaso e fa’atino ai,(1)koleniga/fitness(2)a’oina o agava’a

Lakapi/Rugby skills(3)lesona po’o agava’a o le Olaga.Molimau le

tina o Elizabeth Latta,lona fa’afetai i lenei mafaufauga fou,e tauala i

le Lakapi Iuni,ua iloa ai e Keely,tete’e atu i fanau taufa’amata’u i

totonu o A’oga,iloa kuka,fa’apea le suiina o le pa’u pā o le ta’avale.


Meet Parra’s new teenage Junior Paulo

O Muagututi’a le mata’utia,tusia e le Tama’ita’i Tusitala a le Daily

Telegraph,Jocelyn Airth,lana Lomiga Fepuari 13,2021.Fa’aigoaina o

le”Junior Paulo Talavou”pe fa’amatalaina fo’i,o uiga fa’aalia,o

agava’a ta’alo LAKAPI LIKI,i taimi uma e u’u ai le polo ma tamo’e,e

fa’apea tonu le tauamataga o le olaga Lakapi Liki,a le pou malosi a

le Parramatta Eels,le alo Samoa o Junior Paulo.O le ali’i o Larry

Muagututi’a,o se tasi o taleni talavou fou Samoa,ua fa’aopo’opo i le

lisi a le Parramatta Eels,2021.Fa’aalia i Tusitusiga i Nusipepa,Leitio

ma Televise,pe ta’ito’atolu e pu’eina fa’ato’a taofia le tamo’e a le

ali’i talavou o Larry.O se tama ta’alo iloga a le SG Ball,ua sauni e

fa’aalia lana taleni mo le Eels,2021 i lana ta’aloga muamua

ananafi.Ta’utino Muagututi’a,mai lona tuputupua’e i Au Laiti,o

Junior Paulo,sa fai ma fa’ata’imuaga i lana malaga fa’a Lakapi

Liki,auā ou te ta’alo i le laina i luma,ou te taulaina le sikalamu(Prop)

pei o Paulo.Ua loa ona taumulimuli ma mata’itū,e le Faiaoga ma le

Pulega a le Parramatta Eels lenei alo Samoa,fa’ato’ā 17 tausaga,a’o

avea ma sui o le Au a Tama Aoga Ausetalia,Lakapi Liki 2018,soso’o

ai male Under-16 Niu Sa Uelese,lea ua sainia le Feagaiga Ta’alo ma

le Parramatta Eels,pei ona fa’aailoa e le Faiaoga Ulu o Dean

Feeney.Fa’aalia manino e Dean,le Pule fo’i lea mo A’oa’oga a le

Kalapu,o le tama ta’alo e loloto lona mafaufau i lana fa’atinoga i

luga o le malae ta’alo,e atamai fo’i ma poto i totonu o le Potu

A’oga,aemaise le taimi e a’oa’oina ai le mafaufau,mo se Fa’ailoga

Taualoa(Degree)a’o fa’apupula le Taleni Lakapi Liki.Tala fa’amama’i

lenei alo talavou Samoa,Larry Muagututi’a,le tāua o le ta’aalo

fa’atasi ma tama matutua pei o Junior Paulo,e pu’epu’e mai le

silafia ma le poto masani lelei,ma vave ai ona lelei le ta’alo.Talosia

le tula’i mai o lenei Samoa”Larry Muagututi’a le Mata’utia”


Soliola never more vital to the Raiders

I le olaga ta’alo Lakapi Liki o le alo Samoa,o Iosia Soliola,ina ua

tu’ua ona matua,ma lona Aiga i New Windsor,Avondale i Aukilani,i

le fa’atoā 16 ona tausaga,i lalo o le Feagaiga Ta’alo A’oga ma le

Sydney Roosters.Ua talanoaina nei le matuā mana’omia,e le ali’i

Faiaoga,Ricky Stuart ma le Pulega,o lona agava’a ma le poto

masani,fa’atama taalo matua i le Ta’aloga,e fa’atini ai le

fa’atinoga,ma le naunauta’iga o le Canberra Raiders,mo le

Siamupini,o le Ta’amilosaga Lakapi Liki, 2021,i le aulia ai o le 30 o

tausaga,o lenei alo ta’utaua o le atunu’u.O Soliola o se tasi o le

to’aono a le Raiders,ua ta’i 30 tausaga le soifua.Na amata ta’alo

lenei Tamafanau Samoa,i le tulaga uigi mo le Sydney Roosters,2015

a’o Faiaogaina e Ricky Stuart,le Faiaoga Ulu o le Canberra Raiders,i

le taimi nei.Talanoaga a Soliola ma le ali’i Tusitala Nick Campton,o

le Daily Telegraph,vaiaso ua tuana’i,le toe tomanatu a’o tama

talavou,i lana fa’asoa ma talanoa ma Jimmy Dymock,Freddy(Fittler)

ma Ricky Stuart,ta’ua le vave o le gasologa o lana taleni,ona o le

fa’aauau pea o le filifilia e ta’alo i vaiaso ta’itasi.Fa’amanino e nei

Ausetalia iloga i le Lakapi Liki,o Iosia Soliola,sa le fa’aleiloga i lona

taimi a’o ta’alo i le uigi,a’o lenei ua avea ma Poutūtoa ma

Fa’amoemoega Tutasi,e tapuvaetasi i ai le Kalapu a le Canberra

Raiders.E 5 tausaga sa ta’alo ai i le Kalapu,Saint Helens,UK Super

League,Peretania.Fa’asoa mai Soliola i Talafou,e tele lava ina le

manatuaina lona taimi talavou,fa’atoā amataga,i le aulia o le

2021,auā o ia o se vaega iti’iti o tama ta’aalo Liki,e mafai ona amata

sana Ta’aloga,i le tulaga Uigi po’o le Pou.Soliola can start at wing or

prop if needed.O se ali’i ta’alo e tumu i le fa’aaloalo ma le

tauagafau.O Iosia Soliola o se Lupe Fa’alele a Afio’aga o Lepa i

Upolu,ma Fatausi Safotulafai,i le Motu Tele i Savai’i.

3 views0 comments

Recent Posts

See All

Comments


bottom of page