top of page
Search
  • Writer's pictureMaulolo Fata Ueligitone Malifa

Toe Sauniga Asiata Faumuina Faleao Saolotoga Tavui Leota Sydney Ausetalia (Talafou 13 Fepuari 2022)

Updated: Feb 19, 2022

SAUNIGA FA’ALEAIGA O ASIATA FAUMUINA FALEAO SA’OLOTOGA TAVU’I LEOTA

“Ua toe fo’i mai ai iā te ia o le Lupe i le afiafi, fa’auta fo’i, o i lona gutu le lau olive mata” O le Faitauga lea o le Afioga Paia a Le Atua, i le Tusi a Kenese, na limata’ita’ina ai le Manavaga Paia o le Lotu Fa’ale Aiga, O le Susuga po’o le Fetalaiga iā Asiata, le Afioga iā Faumuinā Faleao Sa’olotoga Tavu’i Leota “O le Lupe sa fa’alele e Le Atua, Sa fa’afofoa i Faletoi, ā ua toe lele i Le Atua, Le Lupe a Le Atua, ua na iloa tonu lona Tauafiafi” O le Saunoaga lea a le Susuga Tausi

Matagaluega, Susuga Reverend Falō Vaomua, na ia saunia le Lauga ma le Upu a Le Atua ma le Fa’amaisega, i le Sauniga Lotu Fa’amavae Fa’ale Aiga, o lenei Tamali’i Samoa.

“Sa suamalie lona soifua tautua i Le Atua, o se Tamā e mata’u i Le Atua, o se Kerisiano fo’i e tumu i le fa’atuatua i Le Atua” e pei ona sausaunoa i ai le tele o Molimau i lona Sauniga i lea afiafi. Sa fa’atumulia le Malumalu Tapua’i o le Ekalesia Metotisi Liverpool, a le Afioga i le Sea o le Fa’a-Sinoti i Niu Sa Uelese, Susuga Reverend Fa’agu To’omalatai Lauvai 11, i le aoauli o le Aso Faraile ma le taeao o le Aso To’ona’i ua tuana’i atu, i Sauniga mo le fa’amavae atu o Aiga, Uo ma Aumeamamae, fa’apea le Mafutaga Fa’a Sinoti, Ekalesia Ese’ese sa auai, aetainane le faletua iā Christine ma le nofo-a-alo, i le Fetalaiga iā Asiata, Afioga iā Faumuinā Faleaao Sa’olotoga Tavu’i-Leota. Fa’amatalaina e le fanau Pele a Asiata, o se Tamā e tumu i le Alofa, e maoa’e lona Fa’atuatua i lona Atua, e ‘oa i Fa’amanui’aga ese’ese a Le Atua, e lē popole fo’i auā e aumai e Le Atua.

Molimau nai ona tuafafine o Fiailoa Tavu’i-Leota Mata’utia, ‘na faia e Asiata ni mea silisili, a’oa’oga sili, mea matagofie ma lelei e Viia ai Le Atua. Saunoa fo’i le tuafafine o Senia Fiapapalagi Tavu’i-Leota, o lona tuagane “O le Tagata o Le Atua” Asiata’s Eldest daughter, Whitney Iliganoa Greta Tavu’i-Leota spoke about her father’s Accomplishments and Achievements, He’s very loyal to his family, and our Protector ae na te Fa’asilisiliina Le Atua.

“He leaves a great legacy for his children and his Good lady”

Ta’utino Whitney, tele ni a’oa’oga ma fa’ata’ita’iga lelei ma tā’ua ua tu’uina mai e lona Tamā mo ī latou. Sauniga Fa’ale Aiga po’o le Family Service, sa ta’ita’ina e le Susuga Tausi Matagaluega, Reverend La’auli To’oto’o Le’iātaua, Faitauina o le Tusi Paia, saunoa i ai le Susuga Tausi Matagaluega Rev. Fereti Va’alepu, o le Lauga ma le Upu Fa’amafanafana, saunia e le Susuga Tausi Matagaluega Rev. Falo Vaomua.

O lona Sauniga o le Falelauasiga ma lona Oliolisaga tumau, sa saunia lava lea e le Afioga i le Sea o le Fa’a Sinoti Niu Sa Uelese, le Susuga Fa’agu To’omalatai Lauvai ll.


Na soifua Asiata i le Aso 30 Tesema 1960, i le Ala’alafaga o Satupa’itea, Motu i Salafai, Samoa. Fa’amanavaina e Le Atua ana Galuega i le Aso 27 Ianuari 2022, Sini Ausetalia.

O ona Matua, o le Tamā, Tavu’i Faumuina Leota Aiuta Fu’aolealofa, o le Tinā, Asenati Pofitu Gafo Lau Gogo Tuiā. Matua o lona Tamā: Leota Su’a Fanene Tuātagaloa Tikerī 11, ma Siniva Tupua Pilimai Fu’aolealofa Maugatai. Matua o lona Tinā: Lau Gogo Tuiā ma Leiloa Gasū ma Silupe Gasū.

Na fa’aipoipo atu iā Christine Muszynski. E to’a 11 o lā alo, ae to’a 1 le atali’i Fa’ale Tulafono.

E to’a 5 fanau a fanau. O Uso ma Tuafafine o le Fetalaiga Asiata, Afioga Faumuina Faleao

Sa’olotoga Tavu’i-Leota o : Folole Tavu’i Leota, Fu’aolealofa Taueu Tavu’i-Leota, Panapa Tavu’i-

Leota, Anesone Anthony Tavu’i-Leota, Fiailoa Tavu’i-Leota Mata’utia, Tavu’i Faleao Panapa Tavu’i-Leota ma Senia Fiapapalagi Tavu’i-Leota.

E maoa’e le felanulanua’i o Molimau a nisi o Tamafanau Samoa e uiga i le soifuaga o Asiata, a’o soifua ai i Sini nei. O lona uiga Alofa Fesoasoani i so’o se tagata, e sulu ane iā te ia. Saunoa Faleono Fa’aVaoga se tasi o Uo mamae a Asiata, o le Uso lenei, o le Tagata o Le Atua, o le fa’amuamua o lona soifuaga, o lona Fa’atuatua i lona Atua. Molimau fo’i le Afioga Tiumalu Matua o le Fono a Samoa, i le Sao tele o Asiata i le tau amataga o Fuafuaga a Samoa i le Aai o Sini nei. Saunoa Molimau fo’i le Fa’atonu o le Fofoga Mo’omia, Susuga Fa’afeagaiga o Reverend Pasefika Maiava, i le vaitau o galulue ma le Susuga Asiata i Alaleo Leitiō, i le tauasaina o le galuega Fa’aFa’asalalau, i lona tauivi ma le sailimalo ī ia agava’a ma taleni, sa le’i faigofie ona tapu’e ma ati’ina’e i le vaitau popōfou, o le Folauga mai a le Mamalu o Samoa i Sini nei.

Fa’aalia e le Susuga a Maiava, e lē tau fa’ailoaina ma tau fa’amatalaina le Sao tele o lenei Tamali’i Sailimalō, auā Samoa ma sona manuia.

O le vala’au a Le Atua po’o le Usugafono a le Fetalaiga po’o le Susuga Asiata, le Afioga iā Faumuinā Faleao Sa’olotoga Tavu’i-Leota, o le Lagia lava lea o le Malaefono i Faletoi e :

Susu ai Asiata na Falefa i ai Tumua o le Va’aimalae, Susu mai Tupa’i o le Va’aitī. Susu mai le Aiga Sa Moeleoi. Afio mai Alo o Lilomaiava.

Susu mai Fauatea ma le Aiga Sa Valomua. Afio mai lou Tapaa’u o le Tonumaipe’a. Maliu mai le Alataua, le Tapa’aulefano, le Nofoapule ma le Matuafia.

Aetainane fo’i le Lagia o Faleulu, i le Afio mai o le Ali’i Nofoao o Ulupoao, Afio Silofau, Afio Faumuinā o le Tupufia, Maliu mai lau Fetalaiga Mauisi’i ma Sauluītoga, ma le mamalu maualuga iā te oe Salemuli’aga

Lagia fo’i Savelu, na i ai Mavaega. Le Tapuā’iga malu a le Susu mai a lau afioga le Tagaloa, o le Tapa’au. Afifio mai Paia o Sa Amituana’i ma le Gafa. Maliu mai ma Ala’alata’i Taulauniu ma Safune.

Fa’ai’u ma Taualuga Sauniga o Asiata i ni Taumafataga tele, ma le matagofie, fa’asopolia uma le Aufaigaluega Folafola o le Talalelei, aetainane Samoa na Potopoto, aetainane Fa’aaloaloga masani Fa’ale Atunu’u mo le Aufaigaluega paia a Le Atua, na saunia lava e Aiga na Lua.

E manatua pea lenei Tamali’i Samoa, i lona lē fa’ailoga tagata sa tau mo Samoa i Ausetalia nei, i tausaga e tele.


More protections needed for Pacific Island seasonal workers.

Ua lē o lava le silafia ato’atoa lelei o nai tagata mai Atu Motu o le Pasefika, o lo’o auina mai i avanoa o Galuega Fa’avaitaimi po’o “Seasonal Migrant Workers” i Ausetalia, i Aiaiga ma le malosi’aga o ana Aiātatau fa’ale tagata faigaluega, ua fananau mai ai le tele o fa’afitauli ma nisi o to’atūgā, a’o galulue i Fa’atoaga ese’ese, i Setete uma o Ausetalia. Ua fa’aopo’opo pea fa’alavelave tutupu mai i tagata galulue mai le Pasefika, Toga, Vanuatu aemaise Samoa, ā ua

le matuā manino mai se fofō o ia fa’afitauli, ae po’o ai fo’i e maua ai se tali sa’o ma mautū, mo tagata faigaluega mai Samoa. O nisi nei o Tusitusiga ma Ripoti o Talanoaga i luga o le alaleo ma ata Televise a le ABC a Ausetalia i vaiaso ua mavae. Ua fa’amatalaina fo’i i ni Tusitusiga a Nusipepa Iloga Ausetalia i Sini nei, le Sydney morning Herald ma le Daily Telegraph.

Ua matuā mana’omia ma fa’atā’ua le lagolagoina malosi o ni Polokalame, e fa’aulufale ai ni fautuaga, apo’apoa’iga ma ni talanoaga tu’usasa’o, fa’atasi ai ma ni fa’asoa fa’akerisiano fa’ale

fa’atuatua, mo tagata mai Atu Motu Pasefika, o lo’o fa’aulufale mai e le Faiga Malo a Ausetalia, e galulue fa’avaitaimi i galuega ese’ese fa’afa’atoaga, i Ausetalia nei, o se molimau maumaututū lea a le ali’i o Graham Turner, o se tagata muamua Ausetalia (Indigenous ) o lo’o feagai ma le saunia o Talanoaga Fa’a Kerisiano mo tagata galulue mai le Pasefika.

Fa’amatalaina manino e Graham Turner, e ao ona silasila toto’a le Faiga Malo Ausetalia, aemaise atunu’u Pasefika o lo’o la’u mai ona tagataānu’u e fa’afaigaluega i fa’atoaga, ua lē na o le taumafai e fa’amalie le fa’atinoga o galuega mo nei Faifa’atoaga Tetele, sasa’a mai le tupe mo latou, fiafia Faletupe ma lelei le atili le Tamaoaiga o Ausetalia, ae ao ona fa’amuamua le ola ma le soifua maloloina o tagata faigaluega mai le Pasefika. Se tasi o naunauta’iga ma se vaega tā’ua na fa’amamafa i ai le saunoaga a lenei ali’i Faifeau, le alagatatau i tagata faigaluega mai le Pasefika ona i ai le lagona latalata, i mafutaga fa’ale Aiga ma Aulotu, a’o galulue ai i so’o se vaipanoa o Ausetalia, auā o ana “Tu ia ma Agaīfanua, aemaise ana Aganu’u masani” Saunoa le ali’i Faifeau, e foliga mai i Fa’atonuga mo Tagata Faigaluega mai le Pasefika, e matuā ‘TAPU’ ma fa’asā ona latalata i ni ō latou Aiga i Ausetalia nei.

O le fesili ua tula’i mai a Talafou, “PE AISEā” I Tusitusiga a Angus Thompson o le Herald 11 Fepuari 2022, e 90 ni Fa’atoaga na su’eina e Leoleo o le Va Tuāoi Ausetalia (Australia Border Force) mo le sailia o ni Tagata Faigaluega Fa’avaitaimi, ua fa’atopetope ma tūua fa’afuase’i ō latou nofoaga e galulue ai, ona o le tigaina i galuega ua pei ni pologa, i galuega nei Fa’avaitaimi a le Malo. Fa’amanino mai e Leoleo ma Pulega o Tuaoi Ausetalia po’o le Border Force, ua alia’e le afaina tele o Tagata Faigaluega Fa’avaitaimi, ona o le lē mautu lelei o Aiaiga Fa’ataoto a le Malo, ua fanau mai ai faiga fa’apologa a Kamupani

ma le Aufai Pisinisi, o lo’o fa’afaigaluegaina o tatou tagata mai le Pasefika.




TA’AMILOSAGA SUPA LAKAPI IUNI-2022

Ua fa’ailoa aloā’ia mai e le “Tino-Super Rugby Pacific” i le fa’ai’uga o le vaiaso ua mavae atu, le toe tolopoina le amataga o le Ta’amilosaga Supa Lakapi 2022, sa fuafuaina mo le Aso Faraile nei,

18 Fepuari, 2022. Sa fa’amoemoe e tala malae le Au Fou a le Pasefika “Moana Pasefika” ma le Au a le Auckland Blues i le Malae Ta’alo “Mt Smart Stadium” Penrose i Aukilani, ua lē fa’ataunu’uina ona o le pisia ma a’afiaga o tama ta’aalo e to’a 7, a le Moana Pasefika i le COVID-19 ma le Omicron. E le’i fa’ailoaina mai se aso taupoina mo lea ta’aqloga. O lo’o fa’amoemoe e mae’a lenei Ta’amilosaga i le Aso 29 o Me 2022, a’o le Ta’aloga o le Siamupini po’o le Final iā Iuni 18, 2022. Mo le silafia atili o le mamalu lautele o Samoa, o lo’o maimoa ma tapuā’ia tamafanau Samoa ma le Pasefika i le Supa Lakapi, ua lē toe auai i lenei Ta’amilosaga, Aferika i Saute, Argentina ma Iapani. Le fa’atāotoga fou lea ua ulufale mai ai le Moana Pasefika, e filifilia i tama ta’aalo a le Manu Samoa, Ikale Tahi, ma isi atunu’u Pasefika, e fa’amautū i Aukilani, ma le Au mai Fiti o le Fiji Drua, ua saunia e le Iuni lakapi Ausetalia lona nofoaga tumau i Niu Sa Uelese nei. E 5 Au a

Ausetalia, 5 Au a Niu Sila ma le 2 mai le Pasefika. Talosia le ulufale mai o nei a le Pasefika, ia si’isi’i maualuga ai le Fa’atautaia o Iuni Lakapi a Samoa ma Toga, aemaise lava i le va’aia lelei o tama ta’aalo fa’apea le pale feagai ai ma le Tino Lakapi Fa’atinā a le Lalolagi, po’o le “WORLD RUGBY” E 13 alo Samoa ua filifilia i le Moana Pasefika mo le Ta’amilosaga Supa Lakapi 2022:

Hookers-Ray Niuia ma Luteru Tolai, Lock-Don Lolo, Loose Forwards-Jack Lam, Alamanda Motuga, Henry Time-Stowers, Halfback-Ereatara Enari, First-Fives- Christian Leali’ifano, Midfields- Henry Taefu, Danny Toala, Outside Backs- Tomasi Alosio, Neria Foma’i, ma Lolagi Visinia.


JUNIOR PAULO IS HANDED A SENIOR JOB

Ua si’itia maualuga le tulaga o le alo Samoa, le pou ta’alo mataālia malosi a le Parramatta Eeels, Junior Paulo. Ua avea ma Kapeteni Tutūfa’atasi (Co-Captain) ma le ali’i fulupeki o Clint Gutherson, o le Kapeteni o le 2021. I le talanoaga a Paulo ma David Riccio o le Daily Telegraph, vaiaso ua mavae, fa’amatalaina e lenei alo agamalū Samoa, na amata ona avea ma tama ta’alo Parramatta i Au Laiti, e o’o mai i le taimi nei, leai sona lagona e savali ese mai le Kalapu na

o’o mai ai Fa’amanui’aga mo ia. Manatu Junior Paulo o lona iloa ma naunauta’iga i le toe fa’afo’i mai o aso lelei, ma vaitaimi na ta’utā’ua ai le Parramatta Eels, ina ua Siamupioni i le 1986, o lo’o olaola pea i ona lagona i minute uma e fa’amāulu ai le ofu-jersey Parramatta. O le filifilia o ia e avea ma Kapeteni Tutū Fa’atasi, e le’i āfea e lona mafaufau, pau lava lona fa’amoemoega, ia ta’alo lelei mo le Kalapu.

Saunoa le Faiaoga o Brad Arthur, sa le’i faigata le tofiaina o Paulo, na matuā maopo’opo le le īoega ma le lagolagosua a le Au atoa, o Paulo o se tama ta’alo alofagia ma fa’aaloalogia e le Kalapu atoa. Fa’aalia e lenei tamafanau Samoa, o le Parramatta Eels o lona Aiga lea, e lē

taumateina lona ritaea a’o ta’alo pea mo le Kalapu. Ua toe sainia le isi 3 tausaga fa’aopo’opo o lana Feagaiga Ta’alo ma le Eels. O Junior Paulo o lo’o avea ma tama ta’alo filifilia a le NSW Origin Blues, o lo’o Faiaogaina e le ali’i Lakapi Liki ta’utā’ua o Brad Fittler. Fa’atoā 28

tausaga o le soifua o Junior Paulo.



10 views0 comments

Recent Posts

See All

Comments


bottom of page