top of page
Search
  • Writer's picturePasefika Maiava

Sauniga Fuiāvailili Leaula Tautali & Kuinimele Sunema Fuiāvailili Sini NSW Ausetalia 6 Fepuari 2022

Updated: Feb 19, 2022

SAUNIGA FA’AMAVAE O LEAULA MA SUNEMA

“O ai ea i latou ia, po’o fea fo’i na latou o mai ai? O i latou ia o e o mai nai le puapuaga tele, ua ta fo’i o latou ofu, ma ua fa’asinasinaina o latou ofu i le toto o le Tama’i Mamoe” Nisi ia o Afioga Paia a Le Atua i le Tusi a Fa’aaliga, na fa’a’auau i ai le Sauniga Fa’ale Aiga o le Afioga iā Fuiāvailili po’o le Fetalaiga iā Leaula Tautali Sa’umaniafaese Akerise Fuiāvailili, ma lona Faletua iā

Kuinimele Sunema Faletagaloa Leaula Fuiāvailili, le vaiaso ua tuana’i atu. Sa fa’ataunu’uina lenei Sauniga fa’amomoiloto i le Malumalu o “Ieova Nese” o le Ekalesia Metotisi Sini Samoa i le Pitonu’u o Leppington, Sini Saute, Niu Sa Uelese. O le Aulotu Ekalesia Metotisi Muamua lea na mua i Malae i Sini nei. Sa limata’ita’ina lava lenei Sauniga tā’ua e le Susuga i le Tausi Matagaluega a le Aulotu, Susuga i le Fa’afeagaiga Rev. Ioelu Leatio’o Tanielu, Talosaga molia na

saunoa i ai le Susuga i le Fa’afeagaiga iā Rev.Auatama Iese o le Ekalesia Fa’apotopotoga Kerisiano Samoa-EFKS i Austral. Faitauina o le Afioga Paia a Le Atua, ma le Upu Fa’alāei’au, na saunoaina e Susuga i Tausi Matagaluega a le Sinoti Niu Sa Uelese. Soso’o ai ma Molimau a alo ma fanau a le afioga iā Fuiāvailili Leaula ma le faletua iā Kuinimele Sunema, auā le latou mafutaga fa’ale Aiga ma Matua.

Na laualuga i molimau a si fanau, aemaise ina ua tūtūla’i ō alo Tama’ita’i e to’alua, o le faletua o le Susuga i le Tausi Matagaluega i Aloau, Amerika Samoa, faletua o Salevalasi Salu, ma le faletua o le Fa’afeagaiga a le EFKS-Austral, o Sunema Loretta Sauileoge Auatama Iese. O le fa’amatalaina o uiga valevale alofa fa’agalogatā, loto tetele, tauivi ma sailimalo, ma le fa’asili’siliina o le tautuaina o le Atua ma lona Finagalo. O ni Matua e maua’a le Fa’atuatua i Le Atua, o lā “Uiga tautigā i le tautuaina o le galuega ma le finagalo o Le Atua” Sa molimau fo’i nisi o Fa’afeagaiga pei o le Susuga i le Sea mai le Sinoti a Melepone Vitoria, i le mafutaga ma Leaula ma Sunema. Saunoa le Susuga Tausi Matagaluega iā Rev. Ioelu Leatio’o Tanielu, o

Fuiāvailili Leaula ma Kuinimele Sunema “Ua toto auro ō lā’ua tino, le lā galulue i le Vanu auro o Tofiga, Le Ele’ele o Nese. O ai ea i lā’ua nei, Po’o fea ea na latou o mai ai? O ī lā’ua nei o le si’aga e olo i aso uma, e liliu ona itū ma olo ia ola le afi. E totosi, ona se’e lea, ona fofola lea i malae, mo le Osiga o le Taulaga i Le Atua. Po’o ai ea i lā’ua nei ? Ua manumalo i lā’ua i Puapuaga ma Faigatā.

O Viiga o Le Atua sa usuina lava e le Aufaipese a le Matagaluega Metotisi Samoa i Leppington, fa’atasi ai ma Alofa’aga e tauala i Pesepesega ma fa’atinoga Fa’a Evagalia a le Fanau talavou Maua fo’i le avanoa na lagiina ai Viiga o le Atua, na saunia e le Aulotu EFKS- Austral, fa’apea le Aulotu EFKS-Sini, Susuga i le Toeaina Fa’atonu, Malifa Taeipo ma le faletua iā Sitaua Malifa, aetainane le Mamalu o le Aufaigaluega faifeau ma Faletua, ma le Pulega a Sini Saute.

Maitauina fo’i le auai atu o le Afioga Tiakono Toeaina EFKS Matagaluega Niu Sa Uelese, Afioga Letoa To’afa ma le faletua iā Asopa Fuataga. O le afioga iā Fuiāvailili Pereresitene Fuiāvailili sa fai ma sui o Aiga o Fuiāvailili Tautali Leaula, e molimau i le soifuaga fa’ale Aiga o si ona

Uso. O se Uso sa fiafia i le fale o matai, a’o tuputupua’e. O lana ta’aloga o le kirikiti. O le faletua o Fa’aaoao Faletagaloa Teofilo, na saunoa ma fa’aleoina le Molimau, a Aiga uma o Kuinimele Sunema Faletagaloa Leaula Fuiāvailili. O Sunema o se Tinā e tautua lē lēoa.

E 11 tausaga o galulue Leaula ma Sunema fa’a Tiakono i le Ekalesia Fa’apotopotoga Kerisiano Samoa-EFKS Sandringham, a’o Faifeau le Susuga i le Toeaina iā Seuga Pula ma le Faletua o Tupe, Matagaluega Aukilani, Niu Sila. Sa avea ai ma Failautusi a le Aulotu mo lea taimi umi, ae le’i malaga mai i Ausetalia nei.

O le Sauniga o le Falelauāsiga o Fuiāvailili Tautali Leaula Fuiāvailili ma le faletua o Kuinimele Sunema Fuiāvailili, sa ta’ita’ina e le Susuga i le Sea o le Sinoti a Niu Sa Uelese, le susuga iā Rev. Fa’agu To’omalatai Lauvai 11. Fa’amauina fo’i le fa’atasi atu o le Paia ma le Mamalu o le Aufaigaluega Folafola a Le Atua i Tapua’iga ese’ese i Sini nei, aemaise fo’i Susuga i Toeaina Fa’atonu, ma le vasega o Toeaina EFKS, i Sauniga Fa’amavae, o nei Auauna nā to ō lā’ua ola

mo le galuega a Le Atua.

Fa’amatalaina e le Molimau a le faletua o Sunema Lorreta Sauileoge Auatama Iese, o le alo Tama’ita’i o Fuiāvailili Leaula ma Kuinimeli Sunema, e ui lava o ona Matua sa Fa’avaeina le Matagaluega Metotisi Sini Samoa i Leppington, ae o le mae’a ai ona Osi Feagaiga ma le Ekalesia Fa’apotopotoga Kerisiano Samoa-EFKS Austral, na amata ai loa ma le Matafale Lotu, a ona Matua, ma galulue ai Fa’a- EFKS se’ia o’o mai i le taimi na vala’auina ai e lō lā Matai Silisili.

E vala’au Le Atua ma fa’amanavaina lā galuega, ua 69 tausaga o le soifua o le Afioga Fuiāvailili Tautali Leaula Seumanufagai Fuiāvailili , ae 66 tausaga o le soifuaga o si ona Faletua o Kuinimele Sunema Faletagaloa Leaula Fuiāvailili.

O le Lagia lava lea o Vaitu’utu’u e afifio Ali’i e Lua, afifio ai Ma’upū, afifio ai Sa Peseta, Oe le pule ma lau Fa’atufugaga, Le Tufuga pule ma le Tufuga To’atama’i, Ala’alata’i mai oe Saleaula ma To’oto’o o Vaitu’utu’u

Ua Lagia fo’i Siuasava e afio ai lou Tapa’au o le Tonumaipe’a. Afio le ma’upū o le Tuia’ana, Ta’auso ma le Alo Tamalelagi. Susu le Alaala Matuātala ma le falefia o Tanuvasa. Maliu mai Folasā o le Fofoga o Papā. Le faiga ma le Alataua.

Ua Lagia fo’i Faletagaloa e afio ai lou Tapa’au o le Tagaloa. Afifio le To’afā o Ali’i. Le Taofia o Tulafale, Maliu mai lo lua To’alua o Moana ma Tuliatu. Maliu mai Taulauniu ma Sa Oloapu. Le Falefa o Sa Usi ma le Paia ia te oe Safune.

Ua Lagia Fo’i Titiuato’a, Lagia Fili ma Puletu’u na tō ai Manū. Le afifio o Auva’a ma Usoali’i. Afio lou Tapa’au Tonumaipe’a, le Ulua’i Tupu o Salafai. Afifio mai Alo o Sina. Susu mai le Ma’upū o Nafanua. Afio mai le Matua o Lamositele. Maliu mai le To’afā ma Siliālaei ma le Tapuaiga. Mae’a le Sauniga o le Falelauāsiga, soso’o ai ma lo Oliolisaga tumau, ona fa’ai’u lea i le taumafataga tele, fa’apea Fa’aaloaloga masani, mo le Paia i le Aufaigaluega a Le Atua, ma

Samoa Potopoto, na saunia lava e le mamalu o Aiga na Lua, aemaise le Paia i le Matagaluega Metotisi Sini Samoa i Leppington.


COPS NAP ISLANDER KILL CREW

Ua fa’amatalaina e Georgia Clark ma Josh Hanrahan o le Nusipepa Daily Telegraph, i lana Lomiga Aso 28 Ianuari 2022 le a’afiaga tele o “Tama Talavou po’o Kegi Pasefika” Islander Gangs, aemaise lava ali’i talavou mai Fiti, i le loloto ma le lavelave o gaiō’iga ma metotia, aetainane faiga ma Taupulepulega Fa’a-Solitulafono, ua va’ava’alua ma le tufaina o Fualaau ma Vailaau fa’asaina, sosolo ane ai ma le fa’ao’olima sauā, fa’amata’u tagata ma i’u ai i le fasioti tagata, va

ane lau fa’afofoga Samoa i lenei taeao. Ripotia e le Ofisa Tutotonu o Leoleo Niu Sa Uelese, a’o tau fofō ma fa’afilemū le Taua i le va o Aiga e lua i Sini, o “Hamzy ma Alameddine” ae manua’e ai le ta’ai fa’afala, atu ai ma “tama talavou, kegi Pasefika” mai Aiga lē tagolima ma utiuti le fa’asoa ma tupe maua, ( crews of poor young men of islander backrounds, particularly Fijians in the KVT gang” Fa’aalia manino e Leoleo, i le Saunoaga fa’alaua’itele a le Sui Komesina o Leoleo Niu Sa

Uelese, ua fa’aaogaina lelei e nei Aiga fetaua’i i Sini Sisifo, ‘Hamzy ma Alameddine’ ali’i ma tama talavou Pasefika, aemaise talavou Fiti o le Kegi “KVT” e fanau mai i le upu Fiti “kaiviti po’o le Fijian Warrior” latou te fa’ataunu’uina le fa’ao’olima ma le fasioti tagata, ua tā’ua “Guns for Hire, po’o le fa’a Samoaina “fanau talavou Pasefika, aemaise talavou Fiti, o ni fana e fa’amuta ai le ola o le tagata. Tā’ua e Leoleo, o le a’afiaga o tama talavou Pasefika, o se feso’ota’iga na fa’atonutonu mai i atunu’u Arapi, o lo’o fa’amautū ai le Vaega Iloga Fa’atupu Fa’alavelave o le “ISIS po’o le Islamic State of Iraq and Syria” le fa’asufi atu o Kegi Talavou Pasefika, pei o le KVT, po’o

talavou mai Fiti, e totogi tupe ae fa’atino le Solitulafono. Saunoa le Sui Komesina Leoleo Niu Sa Uelese, Stuart Smith, vaiaso ua mavae i le Au Fa’asalalau ma Tusitala, Talofa e i fanau talavou Pasefika, ua fa’aaogaina e nei Aiga fetaua’i Arapi i Sini Sisifo, ua pei ni “oloa fa’atau atu toe fa’atau mai” le avatu o fa’atonuga i le Kegi a le “KVT” po’o talavou Pasefika, latou te fa’atino le Solitulafono, ma totogi i se vaega tupe iti’iti, ae lalafi mai tua toē. Fa’amanino fo’i le

fa’anoanoaga o le Sui Komesina, i le mae’a ona faia o fa’atonuga a Aiga Taua’imisa o “Hamzy ma Alameddine” e tama talavou Pasefika, ona lafoina lea i le falepuipui mo se taimi umi. Fa’aalia e le Sui Komesina o Leoleo, lona fesiligia o le silafia e Matua Pasefika, i le o’o atu alo ma fanau talavou nei ī ia tulaga ogaoga. Pe Aiseā? Ua matuā fa’ailoa mai e le Ofisa Tutotonu o Leoleo Niu Sa Uelese, ua si’isi’i atu i le isi la’asaga, le fa’amamafa ma le mata’itū fa’aauau a Leoleo, i Kegi ma tama talavou Pasefika, aemaise le fa’amoemoe fa’ata’oto o le afe ane i Tuātusi ma Aiga o nei fanau talavou Pasefika, aemaise lava le Kegi a ali’i talavou Fiti, o le “KVT is a sub 21 gang mainly consisting of Fijians. KVT originated from the word kaiviti, which means Fijian Warrior. KVT is a well known gang i West Sydney. Fautuaga lava a ā tatou Talafou, se’i silasila ma taga’i ane i nai alo ma fanau talavou Samoa, pe lē o a’afia ma ūtia i ni feiloa’iga ma fa’atasiga fa’alilolilo,

a fanau Pasefika, e aunoa ma le iloa silafia e ī tā’ua Matua.


$450m EXPANSION OF WESTERN SYDNEY HOSPITAL

Ua fofola mai ma fa’amautūina le ata o le Vaega lona 2 o le fausiaina o le Falema’i i Sini Sisifo po’o Western Sydney, vaiaso talu ai pei ona fa’ailoa e Jake McCallum o le Daily Telegraph, Lomiga Aso 26 Ianuari, 2022. O se fa’aopo’opoga ua atoa i ai foliga fausaga fa’aonaponei. O le vaega ma potu mo gasegase ma ma’i tigaina, mo le fa’aete’etega ma le va’aia mautinoa ( state-of-the-art intensive care and close observation unit ) vaega ma masini fa’apitoa mo le togafitiga o alo

fanau iti (paediatric facilities ) o potu fa’apitoa mo le Aufaigaluega lagolago i ali’i ma tama’ita’i Foma’i ( clinical support ) fa’apea le nofoaga fa’apitoa mo a’oa’oga ma su’esu’ega fa’a Foma’i, a’o feagai ma le va’aia tausia lelei o le mamalu lautele, ua autova’a atu mo le nofo ai i le falama’i, a’o fa’agasolo togafitiga.fa’a Foma’i. E $450 miliona tala le toe fa’afouina o le Falema’i ‘Penrith Nepean Hospital’ pei ona fa’ailoa mai mo le silafia o le mamalu lautele, mo so’o se tasi e tu’uina atu ni manatu ma ni fautuaga, pei o Aiāiaga o Galuega Tetele po’o “Major Projects” a le Setete Niu Sa Uelese. E 11 fogafale ua fuafuaina mo le soso’oga o le galuega o lenei Falema’i, e le’i tele ona mae’a agtu. Fa’amaninoina e le Ata o le galuega, i lona Fa’avae Mautū, tauala mai i le Matagaluega o le Soifua Maloloina Niu Sa Uelese, le fa’aopo’opoina o se vaega tele mo masini tetele o Fā-ata ese’ese po’o ‘Medical Imaging Facilities’ nofoaga mo su’esu’ega o gasegase ma ma’i o le Kanesa ma totoga a’afia, po’o le Radiology, fa’apea potu fa’apitoa mo Gasegase Fa’amamā Toto, Dialysis. Ua i ai ma potu e fitoitonu mo gasegase ma ma’i o le Fatuga’o po’o Kidney desease. Fa’amatalaina e le Pepa mai le Soifua Maloloina, o le toe si’itiaina o lenei atina’e tā’ua mo le Falema’i i Penrith Nepean Hospital, i le Itumalō Fa’a Soifua Maloloina a Nepean Blue Mountains

Local Health District, ina ia si’itia maualuga le Auaunaga mo le va’aia ma le togafitia lelei, aietainane le tausia fa’amaoni o le mamalu lautele o tagata Mama’i, aemaise gasegase ogaoga o le tino, mo le toe fa’afo’i le soifua maloloina lelei. O le fausiaina o le Vaega Lona 2 o lenei galuega toe fa’aopo’opo mo le Penrith Nepean Hospital, o le molimau malosi lea mo le tali atu i le tuputupu pea o le faitauaofa’i o tagata, aemaise le fa’atumulia o moega o le Falema’i, pei ona va’aia i totonu o le 2 tausaga o le Fa’ama’i COVID-19. Se tasi itū tā’ua o le mana’omia o le Auaunaga mo le soifua maloloina lelei o tagataānu’u Ausetalia, aemaise le suiga tele o le fa’atinoga o le togafitia o ma’i

ma gasegasese’ese, e sulufa’i atu i Penrith Nepean Hospital mo ni togafitiga fa’avavevave. I le mae’a ai o le Vaega Muamua e 14 ona Fogafale-e $576 miliona tala lona tau aofa’i.


GIFTS GIVE BACK

E silia i le 1 le Piliona tala le aofa’iga o Pepa Fa’a-Meaalofa po’o “Gift Cards” na tu’uina atu mo oe, e te le’i fa’aaogaina, lona uiga o le ā toe fo’i atu le miliona ma miliona tala, i Kamupani ma Pisinisi Tumaoti, na fa’a-Mea-alofa mai mo i tatou, pei ona fa’amanatu ma fa’ailoa mai e le Kamupani e faia Saili’iliga ma Su’esu’ega (Research and Survey ) i lana Upega tafa’ilagi o le “FINDERS” I se Sailiga lata mai pe tusa ma le 1013 le aofa’i o tagata na fa’ailoa ane, ua tusa lea ma le $95 tala a le tagata Ausetalia e to’atasi, e maua i lana Pepa Fa’a Mea-alofa po’o le “Gift Vouchers” o lo’o ta’atia pea i totonu o lau pusatoso-draw, po’o totonu o lau atotupe, ua e manatu mama i ai. I le va’aiga i le aofa’iga o le atunu’u atoa, e $1.8 piliona tala. Fa’ailoa e se Saili’iliga mae’ae’a lata mai, o le 1 vae 3 o Ausetalia atoa, ua matuā ma’umau le tu’uina atu o nei Pepa Fa’a Mea-alofa, po’o “Gift Vouchers, po’o Gift Cards, mo le fa’atauina o ni oloa e te mana’omia, ae paga lea, e tē lē o fa’aaogaina. O lou lē fa’aaogaina o Pepa Fa’a Mea-alofa, po’o “Gift Vouchers po’o Gift Cards” ua atofaina mo oe, o le ā toe fo’i atu i Kamupani Tetele na atofaina mai, ma atili ai lava ona toe fa’aopo’opo miliona ma miliona a nei Pisinisi Tetele i AUSETALIA, pei ona molimau mai le “Finders Sarah Megginson”


NOWHERE TO HIDE FOR TROLLS

Ua mautū ma maua’a le filifilia o le Komesina Saogalemū Ausetalia i Upega Tafa’ilagi, ma Feso’ota’iga Fa’aonaponei-Australia’s eSafety Commissioner, mo le mata’ituina ma le ato’atoa o faiga uiga ese fa’a-Sotoma matagā i luga o Upega Tafa’ilagi ( Social Media ) O le filifilia ai o lea Tofiga tā’ua i lalo o le Fa’amalumaluga o le “Online Safety ACT” ina ua pasia aloā’ia e le Palemene faiga malo maualuga, i le tausaga 2021, ae na fa’atoā fa’aulufale ma fa’aaogaina mo le

taimi muamua, i le Aso Sa ua mavae, pei ona tusia e Ellen Ransley o le Daily Telegraph Ianuari 24, 2022. Ua mae’a ona logoina lē au le kea lea o Goggle, Internet ma le Facebook, i le ogaoga o Fa’asalaga tau tupe, i lō latou taliaina o fanau iti (under age) ma resitala i le fa’aaogaina le tele o ta’aloga ese’ese, i faiga fa’atosina a le Youtube, Facebook, Google ma isi Kamupani i Upega Tafa’ilagi, e aunoa ma se silafia ma se īoega a Matua. Fa’amanino mai e le Komesina Muamua

o le ‘Australia eSafety’ Tama’ita’i o Julie Inman, lona naunauta’iga i le mata’ituina o lenei Tulafono fou, ia matuā tape ma fa’aiti’itia le uiga fa’amalosi ( cyber abuse ) o nei Kamupani milionea tetele, ma taumafai e māunu atu fanau iti i ta’aloga fa’a (social media ) i le fa’aaogaina o telefoni feavea’i(mobile phone) masini laptop ma tablet, fa’apea komipiuta, ae mulimuli ane, ua oso mai ma ata va’aiga fa’a-Sotoma, e lē talafeagai ma fana iti ma talavou. Se tasi o itū ogaoga pei ona tautala i ai Julie Inman, o le taumafai e soloiesea uiga taufa’amata’u, taufa’afefe ma lafoga o upu masoā, ma le faia o le palauvale aga’i atu ī isi fanau ma talavou, i luga o Upega Tafa’ilagi

Saunoa le Minisita o Feso’ota’iga o Paul Fletcher, telē le malosi’aga Fa’ale tulafono ua tu’uina i le Komesina, tauala i lenei tulafono fou, e faia ni su’esu’ega mae’ae’a mo so’o se tasi ua masalomia, i le faia o ni fa’amatalaga fa’atupu fa’alavelave, ma tau fa’aleaga o nisi tagata i luga o Upega Tafa’ilagi i Ausetalia. To’atele i latou o lo’o lalafi mai tua, ae fa’aaoga igoa taufa’asesē, e osofa’ia ai nisi e ita ma lē fiafia i ai, aemaise lava i luga o le Api o Foliga po’o le Facebook.


WOMEN BINGEING

O uiga popole, mānatunatuga lē mautonu, lagona lē fiafia ma le to’atama’i, aemaise foliga fa’anoanoa ma fa’asiasia o Tinā, Teine ma Tama’ita’i, ua fesoasoani tele lea i si’itia ma oso maualuga, o le taumafa ava o le Itūpa vaivai, pei ona fa’ailoaina i se Saili’iliga lata

mai i Ausetalia nei. Fa’amaninoina i lea Su’esu’ega, pe tusa ma le 1 mai le to’a 5 o Tama’ita’i, o le Augā Tupulaga ogātotonu po’o le vā o le 25 ma le 60 tausaga, ua fa’amauina le mata’utia o le si’isi’i pea i luga o le taumafaina o le ava malosi, po’o le inu pia. Fofolaina mai fo’i e lenei Su’esu’ega, o Tinā ma Tama’ita’i mai le 40 i le 65 tausaga, ua silimusa ma sili atu lo latou taumafaina o le ava malosi i le taimi nei, pe ā fa’atusatusa i le 20 tausaga talu ai. Fa’aalia mai e fa’apea, ua matuā mamafa ma maualuga le afaina o Tinā ma Tama’ita’i, aemaise le soifua maloloina lelei, ō ī latou o lo’o tagofia le ava malosi Fa’amautūina fo’i i lenei Saili’iliga ma Su’esu’ega, e sili mamao atu le a’afia ma le leaga o le Ava malosi mo Tamā ma Ali’i, nai lo Tinā ma

Tama’ita’i. Ta’utino mai e lenei Saili’iliga, o Tinā ma Tama’ita’i Matutua e maualuga le tamaoaiga o tupe maua, ma tele lo latou sa’olotoga i mana’oga o le olaga, fa’apea ona taliaina lelei i tulaga

ma galuega maualuluga, e mafuli i le to’atele o Ali’i ma Tamā, aemaise i latou e tau’ave fa’atasi le galuega totogi lelei, ma le faia o ona tiute fa’ale Tinā, i totonu o le Aiga, ō ī latou tonu ia ua popole

tele i ai, auā ua va’ava’alua le tele o le gaosā o le soifuaga, ma le mamafa o le taumafa ava malosi i vaiaso uma, pei ona ripotia i le Lomiga a le Nusipepa, Daily Telegraph Aso 27 Iulai, 2022.




TA’ALOGA- SPORTS

Ua tele ni fesuia’iga, e le gata i le fegāsoloa’i o tama ta’aalo Lakapi Iuni, a’o suiga i le fa’atinoga o le Ta’amilosaga Supa Lakapi Iuni 2022. To’atele taleni talavou ua pale mai mo le amataina o Feagaiga Ta’alo Fou, o nisi ua suia Kalapu e ta’aalo ai mo lenei tausaga, to’atele fo’i i latou ua malaga ese atu, ma fa’aauau le agava’a ta’alo i fafo atu o Ausetalia ma Niu Sila, aetainane tama ta’aalo ua ausia tausaga e ao ai ona savali ese mai le Lakapi, ae amata se isi lumana’i fou, fa’apea i latou ua leva ona i ai le naunauta’iga e amata le Aiga ma fai se fanau. I le mae’a ai o le isi lua vaiaso o lumana’i, ona amataina lea o le Ta’amilosaga Supa Lakapi Iuni 2022, i le ta’aloga a le Auckland Blues ma le Au Filifilia a le Pasefika, Moana Pasefika e faia i le Malae o Eden Park i Aukilani. O le aofa’iga lenei o alo ma tamafanau Samoa ua filifilia mo Au Supa Lakapi 2022.

BRUMBIES: Alan Ala’alatoa, Scott Sio, Pete Samu, Rodney Iona, Noah Lolesio, Chris Feaua’i-Sautia, Lenny Ikitau, Irae Simone (7) MELBOURNE REBELS: Va’auli Pone Fa’amausili, Jordan Uelese, Tamati Ioane, Rob Leota, Stacey Ili, Ray Nu’u, Young Tonumaipe’a, Matthew To’omua, Jeral Skelton (9) NSW WARATAHS: Izaia Perese (1) QUEENSLAND REDS: Ritchie Asiata, Lopeti Faifua, Tuaina Taii Tuālima, Hunter Pa’isami, Jordan Petaia (5)

WESTERN FORCE: Daniel Ala (1) AUCKLAND BLUES: Nepo Laulala, Akira Ioane, Dalton Papali’i, Cameron Suafoa, Stephen Perofeta, Roger Tuivasa-Sheck, Tanielu Tele’a, Rieko Ioane, Tamati Tua, Mark Telea, Caleb Clarke, AJ Lam-12 GALLAGHER CHIEFS: Angus Ta’avao, Naitoa Ah Kuoi, Josh Ioane, Anton Lienert-Brown, Etene Nanai-Seturo, Chase Tiatia (6)

HURRICANES: Asafo Aumua, Alex Fidow, Xavier Numia, Pasilio Tosi, DU’Plessis Kirifi, Ardie Savea, Jackson Garden-Bachop, Peter Umaga- Jensen, Julian Savea, Pepesana Patafilo, Salesi Rayasi, Isaia Walker-CRUSADERS: Isaiah Punivai (1) HIGHLANDERS : Daniel Lienert-Brown, Saula Ma’u, Marino Mikaele- Tu’u, Patelesio Tomkinson, Solomon Umaga Jensen, Ngatungane

Punivai, Connor Garden-Bachop (7)


SUPER RUGBY UNION DRAW-2022

Ta’aloga muamua

1.Moana Pasefika vs Blues Fri 18 Feb, 2022- 5.05pm Mt Smart Std

2.Waratahs vs Fijian Drua Fri 18 Feb, 2022-7.45pm CommBank Std

3.Chiefs vs Highlanders Sat 19 Feb, 2022-2.35pm FMG Stad-H-ton

4.Crusaders vs Hurricanes Sat 19 Feb, 5.05pm Christchurch.

5.Reds vs Rebels Sat 19 Feb,2022 7.45pm Suncorp Stadium B/bane

6.Brumbies vs Force Sun 20, Feb 2022 3pm, GIO Stadium Canberra.

8 views0 comments

Recent Posts

See All
bottom of page