top of page
Search
  • Writer's pictureMaulolo Fata Ueligitone Malifa

Toe Sauniga Rev. Sione Eli i Sini NSW Ausetalia 23 Ianuari 2022

Updated: Feb 19, 2022

IN LOVING MEMORY OF REV. SIONE ELI

“Ua maliliu Toa, ua ma’umau ai Au’ūpega o le Taua” I le soifuaga o lo’o outou soifua ma tatou ola ai, e matuā fa’agalogatā se tagata e tele sona sao, po’o sona a’afiaga i le olaga o tagata i aso faiso’o. O se Tama, Tinā, Toeaina po’o le Olomatua, se Faifa’atoaga, Kamuta po’o se Inisinia, Faiaoga po’o se Loia, Atamai po’o le lē Taualoa, e o’o lava i se Talavou. Fa’apenā fo’i iā ī latou ua ofoina atu lo latou soifua tautua, mo le folafolaina ma tala’iina o le Finagalo o Le Atua. O Lupe

Fa’alele, o Taulaga Soifua a Aiga, ua fa’anofoesea ma fa’afalelēmalu i Nu’u ma Afio’aga, ona o le avea ma sui va’aia o Le Atua. O le Aso Faraile ua mavae atu, na fa’amavae atu Aiga, le Fanau, Uo ma Aumeamamae, aetainane le Aufaigaluega Paia a Le Atua, Aulotu ma le Ekalesia, i lana Auauna Faifeau Malōlō Manumalo, le Susuga i le Faifeau iā Sione Eli. E maoa’e le Tala’aga o

le soifuaga o lenei Auauna sailimalo tauivi po’o se Lupe fa’alele fo’i a Samoa i Ausetalia nei. Se tasi o Faifeau Samoa na “asaina le vao filifili” na mua i malae i le fa’afaileleina o le galuega tala’i o le Talalelei a Le Atua, sa lē fa’apitoāugafa iā Samoa, ae mo tagata uma na tofia ai o ia e Le Atua i Ausetalia nei. Na soifua mai Sione Eli i Aso 11 Fepuari 1940, fa’amanavaina e Le Atua ana

galuega iā Ianuari, 2022 e vala’au lona Matai, ua 82 tausaga o lona Soifua. Sa a’oa’oina Sione Eli i le Kolisi o Avele Agricultural College, 1954-1958, soso’o ai ma le Kolisi Fa’afaifeau Ekalesia Metotisi, i le Anoāma’a Piula Theological College, 1959-1968. Fa’amanuiaina i le avanoa Fa’a Sikolasipi i Kings College, Brisbane QLD mai le tausaga 1969-1971. I le mae’a ai o a’oa’oga a

Sione Eli, ona toe taliu lea ma galue i Samoa, Ofisa o Tupulaga a le Metotisi i Matagfele-1972. Vala’auina i le galuega fa’afaifeau i le Ala’alafaga o Salua, Manono-1973, tausaga lea na filifilia ai e avea ma Fa’atonu A’oa’oga Kerisiano, Ekalesia Metotisi. Tausaga 1975, na tofia ai e avea ma Fa’atonu o le Ofisa Evagalia. Mai le 1978-1980, na galue ai i le Kolisi i Piula. Na tu’ua Samoa ina ua vala’auina mo le galuega Fa’afaifeau i Central Avon Parish, Western Australia (WA) i lalo o le

Fa’amalumaluga a le “Uniting Church Australia” mai le 1981, 1982-1985. Tausaga 1986-1989 toe vala’auina mo le avea ma Faifeau mo le Aulotu “Denmark Uniting Church” Western Australia.

O le tausaga e 1990-2015 na filifilia ai le Susuga iā Sione Eli ma le faletua iā Apouā, e avea ma Faifeau i le Aulotu Samoa (Ataatalafoia) Uniting Church, Ausetalia i le Ala’alafaga o Lidcombe, Niu Sa Uelese. Sa fa’aipoipo atu le Susuga Sione Eli i le faletua o Apoua-i-mafafa Pepe Eli, 22

Tesema 1973. O ona Matua o Potifara Ta’atitimanaia ma Talalupelele Auva’a. O ona tausoga o Galoiola Leuila Amerika, ma Nofoa Si’ulepa Eli. E to’a 3 o lā alo, ae to’a 5 fanau a fanau.

O le Aso Faraile ua mavae atu, na na fa’avae atu ai le faletua iā Apoua-i-mafafa Pepe, Sauniga Fa’ale Aiga ma Fa’amavae, sa faia lava i le malumalu na galulue ai “Samoa Uniting Church Australia” Ataatalafoia, i Lidcombe. E vala’au Le Atua i lana Auauna, le Susuga Sione Eli, ua fa’ase’etuāgalu mai le galuega a Le Atua, o se Faifeau Malolo Sailimalo Manumalo.

Na fa’atumulia ona sauniga i le taupati ane o Samoa ma le mamalu lautele, sa a’afia o latou olaga,

i le tautua ma le auaunaga a lenei “Toa o le Talalelei a Samoa” O ona itū Taulagi, o Ala’alafaga o Tufutafoe, Neiafu ma Falealupo, afifio i le mamalu maualuga i le Alataua, ma lo latou Tapa’au o le Tonumaipe’a, o le Ulua’i Tupu o Salafai.


OMIICRON SURGE ADDS 60,000 IN 9 HOURS

Manatu Talafou ua fa’afagogo tagiao lau fa’afofoga le atunu’u Pele Samoa i Tala Fa’asalalau i aso ta’itasi i uiga ma aga Ese’ese, o le Fa’ama’i COVID-19, aemaise le manua’e o le siama lona 3, o le OMICRON. Le vaiaso ua mavae atu, e fa’aopo’opo pea lava le fuainumera o i latou ua pisia i aso uma. Ripotia e Tom Rabe, Lucy Carroll ma Mary Ward o le Sydney Morning Herald, e

60,000 afe tagata na pisia i le “OMICRON” i lalo ifo o le 9 itulā i le aso e tasi, i le Setete o Niu Sa Uelese, a’o taumafa le Faiga Malo Maualuga, e tau fuafua fa’ale tulafono le tufaina atu o “Pepa Su’eina ai po’ua e maua i le OMICRON” rapid antigen tests. A’o vevesi le Ofisa Soifua Maloloina e tau mata’itū ni fofō, o le si’itia pea i luga o tagata mama’i, fa’aalia le aofa’iga 5,600 tagata

faigaluega tausi soifua, ua fa’anofo’esea ua a’afia i le COVID-19, ua fa’aalia fo’i le silia i le 70 minute le taimi fa’atali mo le taunu’u atu o le Ta’avale a le Falema’i, po’o le ‘Ambulance’ e aami ai oe mo le auina atu i le Falema’i. E foliga mai i le saunoaga a le Ta’ita’i o le Setete, Premier Dominic Perrottet i le vaiaso ua mavae atu, ua fa’amoemoe tele iā te oe ma lau fa’autautaga, i

le mae’a ai ona faia o lau ‘test’ ua e a’afia po’o le ‘positive’ ona fa’aaoga lea o le feso’ota’iga tauala atu i le “Service NSW App” i luga o le Inataneti, e logoina ma fa’amauina ai ua e mauaina le ‘siama’ Ua fa’amauina fo’i le fa’asalaina o oe i le $1000 tala pe ā lē resitalaina lou suafa ‘online’ po’o le “Upega Tafa’ilagi” a le “NSW Service” Lea ua toe fo’i mai lava iā te oe le tagata ua

pisia i le siama, e te fa’atino lou puipuia le pipisi atu o le Fa’ama’i COVID-19, aemaise le māsausau o le o’o atu a le “OMICROM” i le mamalu lautele, mai lou lava maota po’o le “Self-Administered at Home” Ripotia mai ua ausia nei le 67% pasene o ī latou ua gasegase i le

COVID-19, ua fa’amaonia le pisia i le “OMICRON” pei ona fa’ailoa e le Tama’ita’i Ofisa Sinia Soifua Maloloina Niu Sa Uelese, o Dr Kerry Chant.

Ua fa’amoemoe lava iā te oe ma lau silasila toto’a i le gasologa o le Fa’ama’i, mo le soifua maloloina lelei ma le saogalemū o si ou Aiga, aetainane si fanau.


MORE WOMEN TAKE THEIR PLACE ON COUNCIL

Ua ausia nei se tasi o Manulautī tāua sa nanau i ai le Faiga Malō Fa’a Setete a Niu Sa Uelese i le tele o tausaga ua tuana’i atu. O le fa’amoemoe ia tosina fa’ato’ateleina Tina ma Tama’ita’i, aetainane alo ma fanau teine talavou e fiafia, mā i ai le naunautā’iga e galulue i ‘Upufai o Pulega Fa’a Itumalō (Local Body Councillors) po’o Mafaufauga, Manatu ma Talanoaga Fa’apolokiki (Local Politics) ma āga’iga’i atu i “Upufai Fa’a Polokiki” a le Setete. Ua loa ona taumafai Pulega

Fa’a Itumalō i Niu Sa Uelese nei, mo le u’unā’ina o lenei Anavatau tā’ua, aemaise lava le fa’atā’uaina o le Itūpā o Tama’ita’i, mo le tula’i mai e tumua’itutusa ma le Itūpā o Ali’i i Upufai o Faiga Malo. A’o sauni atu i Faiga Palota Fa’a Itumalo iā Tesema ua mavae atu, 2021, nā

o le 31% pasene le aofa’iga o Tama’ita’i i Upufai Fa’a Itumalo, ua fa’ailoa mai le suiga tele i le si’itia maualuga o le ulufale atu o Sui Tama’ita’i, talu mai nai suiga i Fa’aulu’uluga ma Pulega, o lo’o fa’atautaia ia Upufai a le Setete Niu Sa Uelese. Saunoa le Peresetene o Pulega Fa’a Itumalo “NSW Local Government President” o DarrieaTurley, i le taimi nei ua 39% pasene le numera o Tina ma Tama’ita’i o lo’o galulue i Tofiga Fa’aupufai Fa’a Itumalo talu mai le 2017, e 8.5%

pasene na si’itia ai, pe ā fa’atusatusa i tausaga i luma atu. Manatu Talafou, e to’atele le Itupa o Tina ma tama’ita’i, aemaise alo ma fanau teine talavou Samoa i Sini nei, o lo’o maua’a ma fa’a’āuūpegaina e Le Atua i le atamai ma le poto silafia fa’aonaponei, aetainane agava’a, silafia ma metotia ese’ese, fa’apea ni Fa’ailoga Tauāloa, e ulufale ma ofi atu ai e avea ma ō tatou sui o Samoa ma le Pasefika, e molimoli atu ō tatou manatu ma mana’oga ese’ese, mo Soālaupulega

o Upufai Fa’a Itumalo, aemaise le Setete o Niu Sa uelese. O lo’o matuā mana’omia le ulufale atu o ni sui mai le Pasefika, auā e le’i taitai lava ona i ai se malamalama ato’atoa o le Au Faitulafono ma Upufai a Ausetalia, i a’i tatou le Mamalu ma le Lasilasi o Samoa, ma Tagata mai Atu Motu. Fa’aalia e le Sui Fa’a Itumalo a le Labor mai le Itūmalō o ‘Broken Hill City Council’ i le

talanoaga ma Megan Gorrey o le Sydney Morning Herald, Lomiga Aso 18 Ianuari, 2022, o le si’itia o sui Tama’ita’i, o se fa’ai’uga lelei ma talafeagai lea mai le Faiga Palota Fa’a Itumalo ua mavae atu, talu mai ona tolopō fa’alua ona puipuiga o le Fa’ama’i COVID-19. O le taimi nei mai le aofa’iga e 124 Sui Faipule Fa’a Itūmalō na pale mai i Faiga Filifiliga na Palotaina i le Setete o Niu Sa Uelese, e 69 sui Tama’ita’i, ua si’itia maualuga nai Faiga Palota ua mavae atu, i totonu o le

10-15 tausaga ua tuana’i. Saunoa Shelly Hancock, o se Sui muamua Faipule Fa’a Itumalo, mana’omia le tula’i o ni sui fou mai, aemaise Tagataānu’u mai le Pasefika.


OUR DAY FOR OUR HISTORY

O le “Aso Fa’amanatu Ausetalia-po’o le Australia Day” o se avanoa tu’uina e fa’atā’ua ai le tūlauele’ele o le Folauga Muamua mai Matū i Peretania, na taunu’u i laufanua o Ausetalia, o le Fa’avae mautū lea, ua sapi ai Augātupulaga o lenei Talutalufou. O le Aso o Ausetalia po’o le ‘Australia Day’ o le Aso Lulu o lo’o loma nei, e lē gata i le fa’ailogaina o le taunu’u o Tagata papa’e, ae o le ā va’aia fo’i Tagata Muamua Ausetalia, ‘Aboriginal’ i Solo Tete’e ma le tele o ni Faitioga, pe alagātatau ona fa’amanatu lea Aso. I Tusitusiga a le Tusitala Sinia a le Daily Telegraph, Kevin Donnelly i sona Manatu Mautū Tuto’atasi (Freelance Columnist) o le ‘Australia Day’ po’o le Aso Ausetalia, o se Aso e Fa’anōnōmanū ai ma lagona fa’anoanoa, ae tulimata’i se fa’avae maua’a ma le mautū o le Sosaiete, o lo’o tatou soifua ma ola a’e ai. Fa’amatalaina e Kevin, o se tasi o Tofāmamao e ao ona silasila toto’a i ai i le tele o Finauga i le Aso lea, le tatau ona suia i sē isi Aso, o le taunu’u mai o Tagata Papa’e Peretania ma nofoia Ausetalia, o se Osofā’iga o le

Filemū, ma sosolo atu ai i le amataga o le maliliu o tagata, ae sa tatou ma onomea ona fa’aaloalogia ma fa’atā’ua tū ma aganu’u, aetainane le loloto ma le moni o agaifanua masani, aemaise o lagona Fa’ale Fa’atuatua, ma Talitonuga Fa’akerisiano a Tagata Muamua o Ausetalia po’o “Indigenous” pei o “Aboriginals ma Torres Strait” Saunoa Donnelly, e foliga i le taimi nei, ua fa’atuatuana’i i tū ma aga ma lagona Fa’a Kerisiano Fa’a Peretania na aumai e tagata papa’e, ae ua lilifa atu i vaega uma o Talitonuga Fa’ale Lotu, ma aganu’u tumau a Tagataānu’u na ulua’i āinā, Ausetalia nei. Ua a’oa’oina fanau aoga ma tupulaga faia’e, ia amanaia ma fa’atā’ua “So’otaga Fa’apitoa” Special Connections” ma Nu’u taumavae ma nofoaga iloga, e lagona moni ai le feso’ota’iga ma Tagata Muamua o Ausetalia, e lē gata i lā lē tino,a’o le agaga.

Ta’utino e Kevin le fa’afitauli i le taimi nei, ua matuā fa’aiti’itia po ua leai fo’i i latou, Tagata Muamua po’o ‘Aboriginals ma Torres Strait” ua fa’ailoaina se lagona naunauta’i e taumulimuli iā latou tū ma aganu’u masani. Fa’amaonia i le Faiga Palota Tele Ausetalia, tausaga 2016, na fa’amāoti mai ai, ua nā o le 2% pasene tagata “Aboriginal ma Torres Strait” o lo’o i ai

se Naunauta’iga malosi ma le maumaututū, e fa’aauau ia tū ma aganu’u, aemaise ī o latou talitonuga Fa’aleLotu i le taimi nei. Fa’amaonia i Pepa o Fa’amaumauga mo le silafia o le mamalu lautele, i lalo o le Faiga Malo Maualuga-Federal Govt, ma Pulega fa’a Setete ma Teritori uma o Ausetalia, e $43,449 tala e tu’uina atu i le tagata “Aboriginal ma Torres Strait” i le tausaga e

tasi, ae $20,900 afe tala e agava’a i ai oe lea e lē o se tagata muamua Ausetalia, po’o “non-Indigenous Aaustralians” Manuia le “Aso Fa’amanatu Ausetalia”


JAY LAGA’AIA CALLS OUT BRIAN TAMAKI AFTER ARREST

Ripotia e le Nusipepa a le NZ Herald i lana Lomiga i le Aso ananafi, ni lagona fa’aseā mo se taimi muamua a le tamafanau fanau lauiloa ma ta’utā’ua Samoa i Ata Tifaga, Ata Televise, Polokalame a fanau i le TV i Niu Sila ma Ausetalia nei, aemaise lana taleni o le Tusitala, le ali’i o Jay Laga’aia. O le faitīoga a Laga’aia se tasi o Tama Autū o le ‘Star Wars’ lona lē talia o uiga ma fa’atinoga tete’e a le ali’i Maori Brian Tamaki, ua fiafia e fa’ailoa o ia o se “Aposetolo-Apostle” ae fa’aopo’opo pea le fa’asagatau,solia o aiaiga ma fa’ataute’e atu i tulafono o le Fa’ama’i COVID-19, mai lava i le amataga, ae fa’asilisiliina le matuā tete’e atu i le fa’atinoga o tiute ma faiva o Malu o le Malō, po’o le Vasega- Leoleo Saunoa Laga’aia i luga o Upega tafa’ilagi, ina ua aga’i

ane Leoleo e saisai ma lokaina ia Aposetolo Tamaki, se ua matuā ma’umau le ‘Okesene’ i lenei tagata, ina ua toe ave i le potu taofia mo le taimi lona 2, i lona solia o ona Moli’aga. Fa’aalia e Laga’aia i le atoa ai o le 10 aso o taofia pea e Leoleo, ‘ua nā o le ma’umau o le Ea ma le Okesene’ i lea itūaiga tagata, ua alagātatau ona tu’u atu i ai se lesona, a lē mafai ona taofia le solitulafono,

momoli i ai le fa’asalaga talafeagai. Laga’aia said, quoted: “Teach these guys a lesson. First and Foremost, if you can’t shut them down, then hit them where it really hurts, the hip pocket” Na afea fo’i e se manatu e lenei Alo Samoa le “Youth Camp” sisiva ma pepese a le Australian Hillsong, a’o pipisi le OMICRON. To’atele i latou na lagolagoina le lagona o lenei alo Samoa, luga o Upega Tafa’ilagi, na maitauina nisi na fautua iā Jay Laga’aia, e lē o oe o se Saienetisi po’o se Foma’i, ua nā o se Tama e Autū i ai Ata Tifaga, ma tāofoofi ou lagona mo oe lava. O Jay Laga’aia se tasi tagata Autū o le Ata Tifaga “Star Wars” fa’apea tagata iloga o Polokalame i Televise i Niu Sila ma Ausetalia, pei o le “Street Legal ma le Water Rats” O Brian Tamaki, ua lauiloa i Niu Sila ma lokaina fa’alausoso’o e Leoleo, i lona ta’itaia o Solo Tete’e i taimi o le Fa’ama’i, aemaise lona tete’e malosi, i le tulafono o le tu’ufa’atasia o le ali’i ma le ali’i, fa’pea le fa’aipoipo o Tama’ita’i, po’o le “Same sex Marriage” O Jay Laga’aia, o foliga ia o Polokalame A’oa’oga a le fanau iti i luga o televise, i Ausetalia nei. O Jay Laga’aia o le Lupe Fa’alele mai Palauli, Motu tele i Salafai.


TA’ALOGA TA’ALOGA-SPORTS SPORTS

Fa’aalia le lagona o’otia o le Alo ta’utā’ua Samoa ua lauiloa ai i le lalolagi i lenei vaitaimi, i le Lakapi Amerika-AFL po’o le “Gridiron” le atali’i na soifua ma ola a’e i Bankstown, Niu Sa Uelese, o Jordan Ma’ilata. Ripotia ai i Tusitusiga o Ta’aloga, Aso Lua 18 Ianuari, 2022 a Jasper Bruce o le Nusipepa Daily Telegraph, ina ua ma’ea le ta’aloga a lana Au, Philadelphia Eagles mo le sailia o le Au Siamupini, ina ua faiāina i le Au malosi, o le Siamupini fo’i o le “Super Bowl” Tampa Bay i le sikoa 31-15. O le ali’i ta’utā’ua Quarter Back o Tom Brady, na fa’atama’ia le Au a Ma’ilata i le mataina o lana ta’aalo. Ae na fa’amatalaina le lagona fa’anoanoa o lenei tamafanau Samoa, i lona lagonaina o le i’uleo o lana ‘Quarter Back’ o Jalen Hurts, lona tu’uā’ina o ia lava le mafua’aga o le faiāina o le Eagles, saunoa Ma’ilata ma lona loto tumu i le lagona o’otia, ma fa’apea atu isi ana uo ta’alo, o le tatou mālolo, o le sesē o le Au atoa, aua le tusitusilima i se to’atasi, e tofu i tatou ma lape ma fa’aletonu i le ta’aloga. Fa’atāua e Jordan Ma’ilata i tama ta’aalo a le Philadelphia Eagles, o ā ni ō tatou fa’aletonu, e mafai ona toe fa’alelei, auā o lo’o ī a’i tatou taleni ma agava’a e toe fa’asa’osa’o ai mo le isi ta’aloga. Jordan Ma’ilata Says, quoted: “We all need to be better” Toe to’atasi le tama ta’alo mai Ausetalia, o lo’o tumau lana Au mo le taumafai atu i le “Siamupini o le Super Bowl” le ali’i mai Perth Ausetalia i Sisifo o Mitch Wishnowsky, e ta’alo mo le San Francisco 49ers. Tatou talosia pea le atali’i Jordan Ma’ilata ma lana fa’agatama i le “AFL-Gridiron” Lakapi Amerika i lenei tausaga, 2022.


JARVIS VAAI FILIMALAE ON THE FAST TRACK TO PRO DREAM

E maoa’e le tele pea o Fa’amanui’aga a Le Atua, ua lē na o A’oa’oga ma Galuega, ae fa’apenā i

Ta’aloga. O agava’a ma taleni natia i totonu o nai ō tatou Aiga, Nu’u ma Afio’aga aemaise Tupulaga e soifua ma ola a’e i totonu o Ekalesia ma Aulotu, le galuega o feagai pea ma le Aufaigaluega Faifeau ma o latou faletua, i le tapu’eina ma le ola fa’afailele o alo ma fanau a Samoa.O le alo Samoa talavou 17 tausaga o Jarvis Vaai Filimalae, mai le ala’alafaga o Ma’agiagi i le Vaimauga, o se sui fo’i o se tasi o Au Soka Iloga isi o tatou atunu’u, “Lupe Ole Soaga” ua lausilafia e Samoa uma. O se tama ta’alo pito-i-la’iiti’iti lea a le Lupe Ole Soaga, i ana

ta’aloga mo le sailia o le Siamupuni o le ‘OFC’ po’o le “Oceania Football Confederation” e lavea ai ma Niu Sila. O le taleni ta’alo soka a Jarvis Filimalae, e le’i mou atu e aunoa ma le mata’itū ma le silasila toto’a, a le Kolisi Maualuga i Hawkes Bay Niu Sila, ‘Hastings Boys High School’ ma atofaina loa i lea alo talavou Samoa se Sikolasipi e Aoga fua ai, mo le Vasega 12, 2020/2021. Na lē gata i le Kolisi, ae ua filifilia e le Kalapu Soka Iloga i le Motu-i-Matū o Niu Sila, ‘Havelock North Wanderers AFC’ e ta’alo ai Filimalae i Ta’amilosaga Iloga a Kalapu Maualuga a Niu Sila. Talanoaga ma le Au Tusitala, fa’amatala e Jarvis Vaai Filimalae, o lona Tamā o se ali’i Laufalī Soka i Samoa, mae’a o lana galuega i se tasi o aso, na ia fa’ataua se polo Soka mo a’u, na amata ai ona fiafia i le ta’aloga Soka i le 7 o tausaga. Talanoa fiafia lenei atali’i i le si’itia ma le maualuga mai le ta’alo i A’oga, ma lona ofi atu i ta’aloga a Kalapu. O lana fa’amuamua ma le Autū i le taimi nei, ia ato’atoa le fa’atinoina o le ta’alo, ma taula’i i lana taleni fa’ameaalofa e le Atua. ‘My goal in football is to try and be a professional’ Ua ripotia e le Nusipepa a le “Hawkes Bay Today” ua sauni atu nei Jarvis Vaai Filimalae, e fa’aauau lona lumana’i ta’alo soka i Amerika i Saute, o atunu’u o le Ta’aloga soka, ua pei se Atua. Brazil, Argentina, Venezuela, Chile, Uruguay ma Peru. O le taleni a le Lupe Ole Soaga mai Ma’agiagi, i le Vaimauga, tauala mai i le Kolisi ma le Kalapu i Niu Sila, fa’amanuiaina e Le Atua, i Kalapu Tetele Iloga o le Lalolagi. Taleni o lo’o tanumia i totonu o ō tatou Aiga, Nu’u ma Afio’aga, Aulotu ma Ekalesia.



6 views0 comments

Recent Posts

See All

Comments


bottom of page